Allir dagar eru góðir dagar

Af staðgöngumæðrun og siðferði landans...

2012-02-06T20:53:00.002Z

Það er best að reyna að hita upp „pikk puttana“ fyrir komandi ritgerðarvinnu og tjá sig hér um siðfræðileg álitaefni. Það sem ég ætla að fjalla örlítið um núna, er málið sem á að fara í umræðu (eða er búið að samþykkja drög að ble ble ble) á hinu háa Alþingi og von einhverra að það náist í gegn. En svona til að vera aðeins skýrari, þá ætla ég að fjalla um staðgöngumæðrun.

Jebb, þannig er það nú að lífið er hverfult og ekki allir sem fá allt sem þeir þrá.

En hvað eigum við að ganga langt í því að sumir fá það sem þeir þrá...því það er með þetta eins og allt annað, þetta kostar pening og ekki eiga allir peninga.

Í fyrsta lagi, þá held ég að það þurfi að taka umræðu um staðgöngumæðrun í samfélaginu áður en misgáfulega Alþingið okkar fjallar um svona viðkvæm mál, og þar sem að siðferði hefur ekki alltaf verið haft að leiðarljósi við afgreiðslu mála að undanförnu, þá tel ég algerlega þarft að hafa smá áhyggjur af gangi mála.

Í öðru lagi, hvað felur staðgöngumæðrun í sér? Hverjir eiga hlut að máli? Hverja snertir þetta bæði beint og óbeint? Hver er réttur allra sem að málum koma? Hvaða ábyrgð bera þeir sem koma að málinu, siðferðislega og lagalega?

Það er mikið talað um mannréttindi (réttindi til að eiga barn) já og réttindi kvenna til að ráða yfir eigin líkama. Þau réttindi eru t.d notuð til að réttlæta fóstureyðingar; ekki er hægt að neyða konu til að ganga með barn sem hún vill ekki. En hvað er staðgöngumæðrun? Það er klárlega ekki verið að neyða konu til að ganga með barn sem hún vill ekki eiga...eða hvað? Hvað kallast það, þegar konu er borgað fyrir að ganga með barn? Hún er kannski ekki neydd til þess...eða hvað? Jú kannski rekur fjárhagsleg neyð hana út í það, svipað og vændi. Já...úps, þarna kannski fór ég aðeins og langt, að líkja staðgöngumæðrun við vændi...en er ekki í báðum tilvikum verið að selja aðgang/afnot að líkama kvenna?

Svo ég vaði úr einu í annað, þá vilja konur réttlæti og konur vilja standa jafnfætis karlmönnum, í þessu máli gera þær það klárlega ekki að þeirri augljósu ástæðu að karlmenn geta ekki gengið með börn.

En svona til gamans og kannski beint að karlkyns-lesendum þessa pistils (ef einhver les þetta á annað borð) þá getum við sett upp eitt lítið dæmi: Indverskur karlmaður, faðir tveggja barna (konan stakk hann af með hvítum auðjöfri), er atvinnulaus og peningalaus. Einn daginn er komið til hans og honum boðnir tveir valkostir.
Fyrri valkostur: honum eru boðnar 5 milljónir fyrir að vera tengdur við nýrnarbilaðan fyrirbura, sem á von á nýju nýra eftir 9 mánuði og þá einnig taka nýjir foreldrar við þessu barni. En eina von þessa barns til að lifa er það að einhver taki þetta að sér. Segjum sem svo að ef Indverjinn okkar tekur það að sér, þá þarf hann að liggja fyrir í nánast allan tímann, en getur þó farið aðeins um en alltaf er litla barnið teng við hann með slöngum. Barnið er allan tímann í hitakassa og til að indverjinn myndi sem minnst tengsl þá sér hann ekki í gegnum kassann, en sér þó útlínur barnsins og bæði sér og skynjar hreyfingar þess og hann getur talað til þess, þótt það heyri ekki í honum.

Seinni valkostur: honum eru boðnar 5 milljónir fyrir að selja blíðu sína 20 forríkum konum. (fer ekki út í nánari útlistanir á því).

Hvor kosturinn er nú vænlegri? Hvor kosturinn gæti hugsanlega leitt til þess að tilfinningatengs myndu verða til staðar? Eru báðir kostirnir jafn siðlegir?

Svo er eitt, allt annað kannski, en það er rétturinn til að eignast barn, er hann skýlaus réttur okkar? Eiga þau öll þau börn sem eru munaðarlaus og allslaus úti í hinum stóra heimi ekki frekar rétt á því að eignast foreldri?

Af hverju er ekki leitað leiða til að flýta fyrir og jafnvel gera ódýrara fyrir fólk að ættleiða börn?
Á hverjum degi deyja börn úr hungri og sjúkdómum.
Börn sem hafa fæðst til þess eins að deyja, vegna þess að forríku þjóðirnar eru of uppteknar við að leika guð. Við erum of upptekin við að stjórna hver fær að kveikja nýtt líf og ákveða hverjir fá að njóta þess.
Já og svo er þessi sér íslenska krafa um að allir verði að eignast börn, og helst ekki seinna en strax! Hvaðan kemur hún? Svo þegar fólk lætur undan þrýstingi og eignast barn, þá VERÐUR það að eignast annað...já og annað...og svo kannski bara skilur það, því það kikknaði undan kröfum samfélagsins sem enginn veit hver setti en allir verða að fara eftir.

Nú tek ég skýrt fram að börn eru alveg dásamleg, en þau eru ekki eitthvað sem við eigum heimtingu á, eða eigum að heimta að aðrir eignist, og ekki heimta að aðrir eignist fyrir okkur.
Hættum að dæma aðra, hættum að vera með nefið ofaní annarra manna málum (sumir geta ekki eignast börn, aðrir hafa engan áhuga á því), já og svona til að enda þennan langa og út um víðan völl pistil, þá skulum við taka „staðgöngumæðrunarmálið“ út af borðinu, á Alþingi í það minnsta. Við skulm í það minnsta velta fyrir okkur þeim ótal hlutum sem þetta getur leitt af sér, þetta getur valdið jafn mikilli sorg og gleði ef ekki gengur allt að óskum.

Ræðum málin að vel íhugðu máli, af skynsemi og með rökum, við skulum ekki missa okkur í slegggjudóma og heimtufrekju.

Eigum við ekki frekar að reyna að HÆKKA siðferðisstuðul okkar frekar en lækka?

Till next...adios

Að bera í bakkafullan...

2012-01-17T21:41:00.001Z

Uuuu...réttlátt samfélag?

Nú er hver höndin á móti annari í allskonar umræðum, bæði manna á millum en þó sér í lagi á veraldarvefsíðum ýmisskonar. Eftir stutta skönnun á facebook, þá virðist sem svo að fólk sé talsvert að fá leið á „iðnaðarsalt-umræðunni“ svokölluðu. Jú auðvitað er hundleiðinlegt að tala um sama málefnið í allt að þrjá daga í röð! Tölum frekar um eitthvað annað; Gillz eða Geir H.H.

En ég ætla, því miður (og þá geta einhverjir bara hætt að lesa hér), að bera í bakkafullan lækinn og ræða aðeins meira um iðnaðarsaltið, eða öllu heldur spá í það; hvað í óskupunum hefur geta valdið því að það var selt hér og notað í matvæli í yfir tíu ár. Ég veit ekki hvort að almenningur gerir sér yfirleitt grein fyrir, eða hugsar út í það, að þessar eftirlitsstofnanir sem við höfum á landinu, eru í vinnu hjá okkur við að gæta hagsmuna okkar. Þetta eru stofnanir reknar af almannafé, fyrir skatta frá fyrirtækjum og einstaklingum, eins og aðrar opinberar stofnanir.

Hjá stofnunum eins og Matvælaeftirlitinu og Heilbrigðiseftirlitinu vinnur fagfólk og ef við grípum aðeins niður í grein sem Sigurður Kristinson skrifaði um fagstéttir þá segir þar meðal annars: „Fagstéttir standa ekki undir nafni nema þær hafi kerfisbundna tilhneigingu til að setja almannahag ofar sérhagsmunum.“ Hefur orðið misbrestur á þessu hjá mörgum fagstéttum landsins? Hvenær urðu sérhagsmunir æðri almannahagsmunum? Afhverju fær Ölgerðin undanþágu til að selja iðnaðarsalt og afhverju fær Skeljungur undanþágu til að selja áfram áburð með of háu kadíum-innihaldi?

Málið er ekki, að mér finnst, hvort að þetta sé svo skaðlegt eða ekki, eða hvort að við þurfum að innbyrða mörg baðkör að viðkomandi vöru til að hljóta skaða af, heldur því að reglur eru settar og eftirlitsaðilar ráðnir sem fara svo ekkert eftir reglunum. Og afhverju ekki? Er einhver að fá einhverjar greiðslur fyrir eitthvað? Getum við ekki alveg eins sleppt þessum reglum fyrst við erum ekkert að fara eftir þeim?

Einhverra hluta vegna þá finnst mér þessi mál hafa einhvern smá ilm af einhverju frekar spilltu, kannski ekkert ólöglegt, meira svona siðlaust...maður þekkir mann, eða er frændi hans, eða á bara fullt af peningum. Hver veit. En til þess að geta byggt hér upp farsælt og réttlátt samfélag, sem ég hygg að talsverður fjöldi manns vill, þá þurfum við einmitt að hætta að viðurkenna spillingu sem sjálfsagðan hlut.

Við eigum rétt á því að eftirlitsaðilar vinni störf sín á faglegan hátt í þágu okkar almennings. Hvað EF einhver mjög heilsuspillandi efni hefðu leynst í saltinu?

Svo bara rétt til umhugsunar: Ef við erum núna að byggja upp nýtt samfélag alveg frá grunni, hvernig viljum við hafa það? Viljum við hafa mikla stéttaskiptingu? Viljum við hafa mikin launamun? Viljum við hafa misjöfn réttindi fyrir misjafna hópa fólks? Spyrjið ykkur að þessum spurningum, og endilega upphugsið fleiri ;) og hugsið ykkur svo að þegar skipan nýja samfélagsins er tilbúin, þá veit enginn hvar hver lendir. Þú gætir lennt í efsta þrepi samfélagsins eða þú gætir lennt í því neðsta. Viljum við þá ennþá sömu skipan á málum?

Till next...adios

Siðferðilegt álitamál til umhugsunar :)

2012-01-05T19:05:00.002Z

Smá siðfræðileg pæling:
Það hefur örlítið verið í umræðunni núna, en samt reyndar furðanlega lítið, að stjórn Atvinnuþróunarfélags Eyjafjarðar réði Þorvald Lúðvík Sigurjónsson sem nýjan framkvæmdarstjóra nýverið. Málið væri kannski ekki umræðandi, nema fyrir þær sakir að hann hefur stöðu sakbornings og sætir rannskókn hjá Sérstökum saksóknara, vegna gruns um stórfelld fjársvik í störfum sínum sem forstjóri Saga Capital fjárfestingabanka og sem framkvæmdarstjóri hjá Kaupþingi á undan því. (Tengist málefnum Glitnis og Kaupþings).

Ein helstu rök Geirs Kristinns Aðalsteinssonar, formanns AFE og oddvita L-listans, eru þau að Þorvaldur Lúðvík hafi skarað framúr í persónuleikaprófi hjá Capacent, af þeim 10 sem fóru í það próf, en alls sóttu 37 um stöðuna.

Hér er hvorki ætlunin að ræða um sekt eða sakleysi Þorvaldar Lúðvíks, eða hvort hann sé hæfari eða óhæfari en aðrir til að sinna þessu starfi, heldur ætla ég mér að velta því fyrir mér hvaða afleiðingar þessi ráðning getur haft og reyna að komast að því hvort það hafi verið siðfræðilega réttmætt að ráða hann í þetta starf.

Það hafa komið fram gagnrýnisraddir á þessa ráðningu, sem benda á það að vafi leiki á um siðferði hennar og því ætla ég að reyna að nytjagreina þessa athöfn.
Ef við setjum þessa ráðningu inn í athafnanytjastefnu, þá þarf að skoða allar afleiðingar sem athöfn að þessu tagi getur haft og ef við setjum þetta inn í reglunytjastefnu, þá skoðum við hvaða almennar afleiðingar þessi athöfn getur haft.

Hvað myndi t.d gerast ef það yrði almenn regla, að það skipti ekki máli við ráðningar í opinber störf, að umsækjandi hefið stöðu sakbornings í sakamáli?
Skiptir máli hvaða staða það er sem ráðið er í? Myndum við t.d vilja að skólastjóri væri ráðinn inn í skóla sem sætti rannsókn vegna nauðgunar?

Fyrirfram er ekki hægt að segja til um hvaða afleiðingar þessi ráðning hefur, enda er sjaldnast hægt að sjá fyrir um afleiðingar gjörða og það er einmitt það sem gerir þetta að siðferðislegu álitamáli.
Ef það væri vitað að maðurinn komi ekki til með að fá nokkurn dóm, þá skiptir þetta sennilega ekki svo miklu máli, nema þá að þessi umræða sem er í gangi í augnablikinu getur skaðað ímynd AFE, sem er í sjálfu sér slæmt fyrir öll fyrirtæki og stofnanir ef orðspor og ímyndir þeirra skaðast. Er ekki alltaf betra að taka ákvarðanir sem ekki skaða ímynd og álit út á við?
Eða erum við orðin það fljót að gleyma að það skiptir ekki máli ef allt fer vel að lokum?

Eins og staðan er í dag, þá kannski skaðast engir einstaklingar við þessa gjörð, en ef svo færi að Þorvaldur Lúðvík yrði fundinn sekur um misferli að einhverju tagi, þá gæti það bitnað á mörgum. Þeir sem að ráðninguni standa myndu bera álitshnekki og vera sakaðir um dómgreindarskort við ráðningaferlið, bæði þá stjórn AFE og einnig starfsfólk Capacent og allir þeir aðilar sem að málinu koma. Það gæti allt eins farið svo að einhverjir misstu vinnuna vegna rangra og áhættusamra ákvarðana og myndu þá einnig fjölskyldur þeirra gjalda fyrir það með óbeinum hætti.
Það virðist þó ekki vera lenska hérlendis að fólk taki almennt ábyrgð á umdeildum ákvörðunum, svo þetta er kannski langsótt.

Ég myndi þó segja að þessi ráðning hafi óbein áhrif á samfélagið í heild, því með þessari ráðningu er verið að segja að það skipti í raun ekki máli hvort að viðkomandi sæti rannsókn eður ei. Og ef fólk er saklaust uns sekt er sönnuð, þá hlýtur það að ganga yfir alla.
Einnig veit ég að rannsóknir mála og dómsúrskurður tekur oft langan tíma oft til skaða fyrir bæði einstaklinga og samfélagið í heild. En það kostar endurskoðun á réttarkerfinu í heild, já og kannski fleira fólk í vinnu í þessum málaflokki, sem er allt annað mál en það sem ég fjalla hér um.

Mikilvægi þess að ráða þennan ákveðna mann í þessa stöðu er mér að mestu leyti hulin ráðgáta. Ef umsóknir hefðu verið fáar og margir ekki uppfyllt þær kröfur sem gerðar voru, þá hefði málið litið öðruvísi út. En umsóknirnar voru 37 eins og áður kom fram og 10 virðast hafa náð því lágmarki að vera teknir í persónuleikapróf.

Þetta persónuleikapróf gerir mig reyndar örlítið ruglaða, því jafnvel hinir harðsvífustu glæpamenn geta komið glimrandi vel út úr persónuleikaprófum. Er það ekki einmitt eitt af því sem einkennir þá sem „svífast einskins“ í viðskiptum? Að vera svalur og kúl og láta fátt sem ekkert koma sér úr jafnvægi. Maður hefur jafnvel lesið um fjöldamorðingja sem nágrannar og aðrir báru hina bestu sögu og þóttu hinir mestu ljúflingar. Einnig veit maður að til er fólk sem er nánast ófært um mannleg samskipti eða eiga erfitt með að tjá sig opinberlega, en samt eldklárt og rosalega fært í því sem það tekur sér fyrir hendur (nema kannski að sannfæra aðra um ágæti sitt). En þetta er kannski aðeins útúrdúr, og meira ætlað til umhugsunar en að ég sé að varpa fram staðreyndum.

Hvert er réttlætið við þessa ráðningu? Átti maðurinn hana skilið, eða var verið að ganga framhjá enn hæfara fólki vegna pólitískra tengsla eða vinskapar?
Ég er þess fullviss, að minnsta kosti einn annar umsækjandi hefur verið að minnsta kosti jafn hæfur, án þess að hafa kynnt mér aðra umsækjendur á neinn hátt. En í þetta stórum hópi umsækjenda, má bara gera ráð fyrir því. Ég gæti jafnvel ályktað sem svo að eitthvað annað en gríðarleg hæfni þessa einstaklings hafi stýrt þessari ráðningu, en ég kýs að leyfa fólki að dæma hvert fyrir sig. Það mætti jafnvel bera þessa ráðningu saman við ráðningu bæjarstjóra Akureyrar á sínum tíma, en ég kýs að gera það heldur ekki.

Ef ráðningin er á öðrum forsendum en hæfni, þá er hún óréttlæti í garð hinna umsækjendana.

Ef ráðinn hefði verið einhver annar umsækjenda (en enginn annar sætir rannsókn) þá hefði það ekki einu sinni átt að skaða Þorvald Lúðvík, því hann hlýtur að minnsta kosti að hafa verið í svipaðri stöðu og aðrir umsækjendur varðandi vinnu. Ég tek það fram að ég hef ekki nennt að kynna mér hvort eða í hvaða vinnu hann var, eða aðrir umsækjendur.
En það má alveg hugsa sem svo að einhver annar hafi meira þurft á þessari atvinnu að halda, og jafnvel verið jafn hæfur.

Ef ráðningin er fordæmisgefandi út í samfélagið, þá gæti hún haft skaðleg áhrif á mörgum og misjöfn um stöðum.

Í siðfræðilegum álitamálum stendur valið oft á milli tveggja slæmra kosta, hver er hinn slæmi kosturinn í þessu tilviki?

Ef valið er á milli þess að ráða hæfan mann sem sætir rannsókn á misferli og að ráða hæfan mann sem sætir ekki rannsókn af neinu tagi, af hverju er þá valið erfitt?
Og af hverju er þá maður ráðinn sem sætir rannsókn þegar talsverður fjöldi annarra er í boði?

Það liggur nærri að maður geti ekki einu sinni flokkað þetta sem siðfræðilegt álitamál, heldur sé þessi ráðning hreint og beint siðferðilega röng og lykti af spillingu og pólitískum hrossakaupum. Er þetta sú leið sem við viljum fara eftir hrunadansinn mikla?

Þessi gjörð stuðlar ekki að sátt og samlyndi í samfélaginu og veitir hinum almenna borgara varla öryggistilfinnigu yfir því hversu faglega málum sé háttað í stjórnsýslunni.

Til er ein góð formúla fyrir því að finna út hvort að athafnir séu réttar eða rangar og hún er svona: Leggið saman góðar og slæmar afleiðingar. Ef slæmar afleiðingar eru meiri en hinar góðu er athöfnin röng, ef góðar afleiðingar eru meiri en slæmar er hún siðferðilega rétt. (eða í það minnsta réttari)

Og að þessum orðum skrifuðum þá læt ég það í hendur ykkar lesenda að ákveða hvort að ráðning Þorvaldar Lúðvíks sé siðferðilega rétt eða röng.
Ég er búin að gera upp við mig hvað mér finnst.

Till next...adios

Hugsanir í hitamóki...

2011-12-15T23:47:00.002Z

Jæja, nú þarf ég ekki að skrifa ritgerðir eða lesa fyrir próf, og er í þokkabót lasin, svo núna ligg ég bara í rúminu með tölvuna og hugsa um mannlegt eðli.(hversu gáfulegt sem það nú er).
Ég var víst búin að lofa bloggi fyrir nokkru síðan, en sennilega búin að gleyma því hvað mér lá svo mikið á hjarta þá. Veit ekki hvort þetta er aldurinn, eða bara það að stundum er gott að gleyma bara því sem pirraði mann og halda áfram með bros á vör.

En það sem knýr mig til að setjast niður núna og skrifa (fyrir utan það að vera hvort sem er með annan fótin í rúminu vegna slappleika) er hugsunin um það hversu mikið við manneskjurnar látum stjórnast af græðgi, öfund og sleggjudómum. Þetta má allt setja saman í eitt orð sem er „öfgar“. Við erum nefnilega öfgakend með afbrigðum og við dæmum fólk of oft af orðum þess en ekki gjörðum.

Fólk getur nefnilega átt það til að segja alskonar orð án þess að hugsa nákvæmlega út í hvernig aðrir túlka þau orð eða hvaða afleiðingar þessi orð geta haft, sum orð vekja nefnilega öfgakennd viðbrögð hjá öðrum, án þess að viðkomandi hafi nokkurn tíman ætlað sér það, hann/hún var bara að segja sína skoðun, án þess kannski að hugsa málið til enda eða hvað áhrif það hefði.

Það er líka málið, af hverju má fólk ekki bara hafa sína skoðun í friði, að því gefnu að sú skoðun hafi ekki slæmar afleiðingar fyrir aðra, særi ekki eða meiði. En sú skoðun er kannski vandfundin.
Ef ég er t.d yfirlýstur trúleysingi og segi eða skrifa; að Guð sé ekki til og fólk sé fífl sem trúir á svona kreddu, þá er ég að særa og kannski skemma fyrir þeim sem trúa á Guð.
Á móti ef ég er yfirlýstur trúari og hef orð Guðs að leiðarljósi og segi eða skrifa; að trúleysingjar fari beint til helvítis þar sem þeir munu kveljast eilíflega, þá er ég að særa þá sem ekki trúa og jafnvel valda þeim vanlíðan. (Ég tek fram að þetta eru algerlega upphugsuð og skálduð dæmi sem ekki eiga sér neina hliðstæðu sem ég amk veit um).

Af hverju getum við ekki bara haldið okkar trú eða trúleysi fyrir okkur sjálf? Ef við erum kristin, þá biðjum við bænir, förum í krikju eða eigum okkar samtal við Guð eða Jesú öðrum algerlega að meinalausu. Og köllum ekki þá sem eigi trúa; villutrúarmenn eða að þeir eigi eitthvað verra skilið en aðrir.
Ef við erum trúlaus, þá bara höldum við því útaf fyrir okkur, og erum ekkert að hrópa það af hæstu fjöllum hvað allir séu nú vitlausir að trúa því sem ekki er hægt að sanna. Við hittum þá bara aðra sem eru í sama pakkanum, ræðum um tækni og vísindi eða hvaðeina sem okkur dettur í hug.

Ef við aðhyllumst Búddah, þá lifum við hófsömu lífi og ræktum okkar innri mann, þar sem sátt og innri friður er eitt æðsta takmarkið. Við erum ekkert að krefjast eins eða neins af öðrum.

En sem sagt, það sem ég vil sagt hafa er: afhverju þurfum við alltaf að enda í rifrildi um hver hefur rétt fyrir sér? Sérstaklega í ljósi þess að allir túlka allt misjafnlega, og þegar upp er staðið þá skiptir engu máli hver hefur rétt eða rangt fyrir sér. Það eitt eigum við sameiginlegt með öllum mönnum, dýrum og jurtum að tilvera okkar er endanleg. Hvert við förum eða förum ekki eftir þessa jarðvist er og verður alltaf okkur hulin ráðgáta...og kannski bara sem betur fer.

Eigum við ekki frekar að nota þær stundir sem við eigum saman í þessu lífi, til þess að hlúa að hvort öðru og rækta hið góða í okkur sjálfum og reyna að halda aftur af hinu slæma í okkur sjálfum. Ég held nefnilega að allir hafa í sér bæði eitthvað gott og slæmt, svo er bara spurning hvort þessara afla verður ríkjandi í fari okkar. En það er algerlega undir okkur sjálfum komið.

Allt sem við gerum og öll okkar viðbrögð, byrja í okkar eigin höfði. Það stjórnar enginn hugsunum okkar nema við sjálf. Við stjórnum ekki hugsunum annarra eða ráðum hvernig öðrum líður, við höfum bara vald yfir okkar eigin huga, en það vald er í raun svakalega mikið vald og vand með farið...notum þetta vald til góðs og ræktum kærleikann.

Ég tek það skýrt fram að ég er langt því frá heilög í þessum málum og á það til að dæma og hneikslast og fussa og sveija yfir hinu og þessu...en ég er að reyna að vanda mig í því að gera það ekki. Og þetta blogg er kannski aðallega fyrir mig sjálfa til að minna mig á að fara ekki út í að dæma og rífast um hluti...já og reyna að rækta það góða í mér :)

Till next...adios

Enn ein hugleiðingin...

2011-10-29T23:33:00.002Z

Hugleiðing um heimsmyndina...eða kannski sjálfsmyndina.

Núna ætla ég að segja ykkur nokkuð sem þið vitið öll; við erum upptekin af útliti okkar. Já og ekki nóg með það, heldur erum við einnig upptekin af útliti annarra, eða teljum að aðrir séu uppteknir að útliti okkar.
Er eitthvað rangt við þetta?
Já, því þetta leiðir til slæmrar sjálfsmyndar. Ef maður er alltaf að spá í hvað aðrir eru að spá í, þá verður maður ferlega upptekin að því að reyna að vera eins og maður heldur að allir vilji að maður sé, en gleymir alveg að vera bara maður sjálfur, sem jú flestir vilja að maður sé!

Svona einfalt er þetta bara.
En þótt að þetta sé svona frekar stutt og einfalt, og eina lausnin á þessu vandamáli sé sú; að við eigum að hætta þessari útlitsdýrkun og hætta að benda á og pota endalaust í hvort annað með niðrandi athugasemdum um holdafar eða klæðnað, þá er þetta víst flóknara en svo.
Það þarf nefnilega að breyta hugsunarhætti sem er orðinn viðurkenndur og ekki nóg með það, þá er hann ríkjandi og þykir töff.
Ástæða þess að ég ákvað að setjast niður og pota nokkrum stöfum í wordskjal, er sú að ég afrekaði það að horfa á fréttatíma tvö kvöld í röð. Í gærkv. var frétt um að heill hellingur af stúlkum í 10. bekk grunnskóla (15 ára sennilega) sem eru yfir kjörþyngd, reyni skaðlegar aðferðir til að létta sig, eins og að framkalla uppköst, svelta sig og þh. Þetta þykja mér slæmar fréttir og greinilegt að umræður og fræðsla um átraskanir og hversu alvarlegar afleiðingar þær hafa í för með sér, hafa vikið fyrir einhverju öðru.

Í kvöld var svo frétt um að Íslendingar séu á góðri leið með að verða feitasta þjóð heims, og einhvern vegin finnst mér mikið um svona „offitufréttir“ um þessar mundir. Ætli það geti verið tenging þarna á milli?

Fullorðið fólk talar mikið saman, og það talar einnig mikið um annað fullorðið fólk, já og líka um börn annars fullorðins fólks...hvort þau eru feit eða flott...já og börn hlusta mikið.

Við erum að ala upp börn með lélegt sjálfsmat, og þetta lélega sjálfsmat hafa þau frá okkur foreldrunum, sem erum alltaf að tala um feitu nágrannana eða hvað þessi eða hinn afrekaði í ræktinni, hvað sumir eru flottir en aðrir óflottir.
Hvers er annars að dæma um það?

En já...við erum öll misjöfn í útliti og einnig að byggingu, sumir eru alltaf stórir, alltaf hávaxnir, alltaf grannvaxnir eða alltaf stórbeinóttir, við skiptum ekki um genin sem ráða vaxtarlagi okkar. En við getum hinsvegar stjórnað hvort við verðum mikið grennri eða mikið feitari, hvort við borðum of lítið eða of mikið. En eins og allt annað sem er flókið í heiminum þá er þetta sára einfallt. Uppskriftin er svona:
Sættu þig við útlit þitt + borðaðu miðað við hreyfingu= Aukin vellíðan.

Auðvitað á maður ekki að sleppa því að borða ef maður hreyfir sig ekkert, því líkaminn þarf jú slatta af orku bara til að halda öllu kerfinu gangandi, við notum meira að segja orku þegar við hugsum, svo ekki vanmeta það að hugsa um að fara út að labba ;)
En það sem gerir þetta allt svo flókið, er neyslusamfélagið sem við búum í, já og við sköpuðum það sjálf og virðumst vilja búa við það að vera eins og við höldum að aðrir vilji að við séum.

Ef okkur langar til að missa nokkur kíló, þá er það í góðu lagi, en þá er líka ekkert óeðlilegt að það taki jafn langan tíma að ná þeim af sér eins og það tók að setja þau á sig. Og það er í þessu eins og öllu öðru, fara fokking MILLIVEGINN sem enginn virðist rata lengur.

Þú þarft ekki að eyða stórfé í brennslutöflur eða próteinduft eða einkaþjálfara...markaðurinn er bara búinn að segja þér að gera það.
Borðaðu bara aðeins minna en þú er vanur/vön, steiktu hamborgarinn þinn heima og notaðu tómatsósu (shitt gott sko) já og steiktu frönskurnar í ofninum á smjörpappír. Fáðu þér appelsínu þegar þig langar í kók...já og ekki trúa að diet-gos sé eitthvað tengt því að léttast.
Ég get gefið ykkur hundrað svona ráð, alveg frítt, nenni bara ekki að skrifa þau öll hér, nema ég verði beðin sérstaklega um það, þá er það ekkert mál.

En já...við skulum bara fara vel með okkur sjálf, vera góð við okkur og koma vel fram við alla aðra. Hættum að gagnrýna annað fólk og setja út á aðra, hjálpumst að og styðjum hvort annað. Tölum saman um áhyggjur og gleði. Verum til staðar fyrir hvort annað.
Ef þessum sáraeinföldu (en um leið flóknu og erfiðu...já það er fokking erfitt að hætta að smjatta á mistökum annarra) ráðum er fylgt, þá er ég viss um að margt myndi lagast í samfélaginu, meðal annars EINELTI sem virðist þrífast hvar sem er, en það sem verra er, þá eyðileggur einelti æsku fjölda barna á hverju ári.

Tökum höndum saman, ég mæli með þjóðarátaki í góðsemi ;)

Till next...adios

Hugleiðingar um virkjanir og baðferðir...

2011-10-18T19:01:00.000Z

Ég fór í bað um daginn, sem er ekki í frásögur færandi, en einhverra hluta vegna fór ég að hugsa um virkjanir í baðinu. Einu sinni var ég mjög hlynnt virkjunum, sá bara alls ekkert athugavert við það að sökkva einhverju landskika sem hvort eð er fáir nenntu að skoða og bara „urð og grjót“. Ég fór meira að segja upp að Kárahnjúkavirkjun þegar framkvæmdin var komin vel á veg, og fannst mest „töff“ hvað stíflan var mikið mannvirki og klikk flott að vera staðsettur á stað sem yrði á 200 metra dýpi þegar lónið væri orðið fullt.

Síðan þá hef ég bæði lært mikið og hugsað enn meira. Ekkert landsvæði á jörðinni er „bara eitthvað land“. Náttúran er ekki eitthvað sem við eigum að fara með að eigin geðþótta. Þurfum við fleiri virkjanir? Þurfum við að eyðileggja fleiri náttúruperlur? Hver einasti steinn og hver einasta þúfa er náttúruperla, allir staðir eru einstakir. Alveg eins og hver einasta manneskja er einstök.
Þurfum við fleiri álver? Og hefur fólk leitt hugann að því hvað álver er og afhverju erlendir álframleiðendur vilja reisa álver á Íslandi?

Álframleiðsla er talsvert langt ferli sem byrjar í námugreftri við migbaug jarðar, en þar eru báxít námur. Báxít er leirjarðvegur og úr honum er svo unnið súrál. Súrálið er svo flutt hingað í álverin þar sem mest mengandi ferli álframleiðslunnar fer fram; álbræðslan. „Til frumvinnslu á einu tonni af áli þarf um tvö tonn af súráli, 520 kg af kolefnisskautum, um 15 kg af álflúoríði auk raforku sem nemur 14.800 kWh.“ (Alur, álvinnsla hf. http://www.alur.is/drupal/?q=node/11 ).
Síðan eru álstangirnar fluttar erlendis aftur til hinna ýmsu staða í hina ýmsu framleiðslu. Við „fáum“ að sjá um þann hluta sem mengar mest, því að við erum jú svo heppin að eiga svo mikin mengunarkvóta!

Við íslendningar erum nenfilega svo ótrúlega fá, að vegna smæðar okkar, en stærðar landsins, þá getum við gert ýmislegt. Við teljum okkur huga vel að náttúruvernd og vera framarlega meðal þjóða í endurvinnslu og eigum fullt af ósnortnum fallegum náttúruperlum. Að mörgu leyti er það kannski rétt, en við erum heimsmeistarar í sóðaskap. Við erum sú þjóð í heiminum sem skilur eftir sig stæðsta sporið í umhverfissóðaskap. Ef allar þjóðir heims, skiluðu frá sér jafn miklu sorpi og íslendinar, þá þyrftum við 7 jarðir til að búa á!

Af hverju er alltaf einblínt á orkufrekan, mengandi iðnað, þegar rætt er um atvinnuuppbygginugu á landinu? Af hverju er ekki farið út í vistvænni framleiðslu, eins og t.d stórframleiðslu á grænmeti og ávöxtum? Það er tiltölulega auðvelt að byggja gróðurhús (amk miðað við álver) og til þess að vera með stóriðnað í gróðurhúsum, þarf lýsingu, hita og áburð (lífrænan). Ég er svo sem engin sérfræðingur í ræktun grænmetis og ávaxta, en veit þó að það er hægt að rækta allar heimins tegundir við réttar aðstæður, sem auðvelt er að skapa í gróðurhúsum þar sem aðgangur að heitu vatni og rafmagni er. Einnig held ég að gróðurhúsaljós þurfi að vera orðin ansi mörg til að þurfa jafn mikla orku og eitt álver.

En já, því ekki að byggja nokkur stór gróðurhús á Bakka við Húsavík? Rækta þar epli, banana, appelsínur og allar þær tegundir ávaxta og grænmetis sem við erum að flyja inn á hverjum degi. Við gætum hæglega mettað íslenskan markað og jafnvel farið í útflutning þegar fram í sækir. Hverju höfum við að tapa? Hver þekkir ekki muninn á íslenskum tómötum og erlendum? Ég get amk hæglega ímyndað mér svaðalega góða íslenska banana og appelsínur og og og....

Maður fær amk stundum á tilfinninguna að það sé eitthvað annað sem hangir á spítunni en hagur þjóðarinnar, þegar alltaf er einblínt á það sama og heimurinn hrynur ef við fáum ekki enn eitt álverið og þurfum þá kannski að reisa enn eina virkjunina...byggja stíflu!
Erum við ekki að verða vaxin upp úr stífluleiknum? Getum við ekki horft svolítið fram á veginn og hjálpast að við að halda landinu okkar eins og það er...amk ekki skemma meira.

Erlendir ferðamenn koma ekki til að skoða álverksmiðjurnar okkar, en ég er viss um að þeir myndu glaðir kíkja inn í risa gróðurhús og smakka á íslenskum bönunum.
Lækir eru lækir, ár eru ár og fjöll eru fjöll, eigum við ekki bara að hafa það þannig áfram?

Till next...adios

Hugleiðing

2011-10-03T20:12:00.002Z

Hugleiðing...

Það er til bók sem heitir „konan sem man“ og stundum dettur mér í hug hvort að ég sé eini íslendingurinn sem man. Ekki það að ég telji mig sérstaklega minnuga, er reyndar ef út í það er farið alveg fjarskalega gleymin. Ég á það til dæmis til að fara út í búð til að kaupa tannkrem, en kem heim með tvo fulla haldapoka af öllu mögulegu nema tannkremi. En þetta er nú útúrdúr.

Mér skilst að nú sé fólk að fara að berja tómar tunnur á Austurvelli, og tilefni sé að nú sé forsetisráðherra að fara að flytja stefnuræðu sína. Að því tilefni vakna upp spurningar eins og;

Af hverju hlustar fólk ekki á stefnuræðu forsetisráðherrans og dæmir svo hvort það og þá hverju það vill mótmæla?
Hverju er fólk að mótmæla?

Já, ég veit að fólk er að mótmæla ástandinu í landinu, fólk er að missa íbúðir sínar, er búið að missa vinnuna og allt hækkar og hækkar. Ég er ekki að segja að mér finnist ástandið í landinu neitt til að hrópa húrra fyrir. En þar sem ég er konan sem man, þá man ég eftir mótmælum í janúar árið 2009 þar sem „hrunstjórninni“ svokölluðu var komið frá völdum.

Svo var boðað til kosninga og ný stjórn tekur við...og allir ættu að vera glaðir? Eða ekki? Nú vill sama fólkið og kom fyrri stjórn frá völdum koma þessari stjórn frá völdum og ef skoðanakannanir hafa rétt fyrir sér, þá eru allar líkur á að kosningar í dag myndi færa völdin aftur til þeirra sem höfðu þau á undan núverandi stjórn...humm...nú er ég kannski farin að flækja þetta um of.

Ef aðrir væru við völd, erum við þá viss um að ástandi í landinu væri betra? Ég tek það fram að ég er alveg hætt að botna neitt í pólitík í dag og myndi ekki treysta mér til að velja einn flokk fram yfir annan í kosningum, ef kosið yrði í dag.
Persónulega myndi ég vilja alla burt af þingi og ráða inn fólk á faglegum forsendum, ekki samt hagfræðinga, þeir myndu bara fækka fólki í landinu þangaði til að efnahagsástandið næði jafnvægi...hehe...(það verður að vera hægt að grínast smá líka).

Svo í lokin, þá held ég að við séum orðin alltof góðu vön. Það þarf ekkert langt aftur í tímann, til að sjá að hér hefur oft verið mun sárari fátækt en er hér í dag. Fólk gekk eða fór ríðandi langar leiðir (já frá fjölskyldu) til að vinna skítavinnu fyrir léleg laun. Í dag, þá fer fólk ekki einu sinni út á land til að vinna...og getur ekki hugsað sér að taka eina törn á sláturhúsi á Húsavík, og virðist þá litlu skipta hvort það eigi fjölskyldu eða ei. Nei, það er víst öruggara að vera atvinnulaus í Reykjavík heldur en í fásinninu út á landi.

Já og svo getur fólk jafnvel ekki leyft sér að fara í utanlandsferðir, svo mikil er fátæktin hér á landi.

Ég veit að ég er hundleiðinleg, og ég veit líka að það er til fólk sem á verulega bágt, en það er líka til fólk sem er bara verulega vælið og það skemmir fyrir hinum sem virkilega þurfa á hjálp að halda.

Ég hef það til dæmis bara mjög gott, en ég hef líka bara farið í tvær utanlandsferðir á ævinni, þá fyrri 1987 og seinni 2005. Ekki að mig hafi ekki langað, en ég tók bara þá ákvörðun að nota frekar launin mín í fæði, klæði og húsnæði (leigu) fyrir mig og strákana, heldur en að fara reglulega í utanlandsferðir og standa svo í biðröð fyrir utan mæðrastyrksnefnd.
Ég veit ekki hvort þetta heitir stolt eða bara heimska...kannski sitt lítið af hvoru. En maður bara moðar úr því sem maður hefur og er ekkert að barma sér. Svo hef ég heyrt að fólk sem fer mikið til útlanda sé ekkert að njóta þess almennilega...orðið hversdagslegt.

Grasið er líka yfirleitt bara sölnað hinumegin þegar maður er loksins kominn yfir.
En, já...hvað vildi ég sagt hafa með þessari hugleiðingu? Æ, ég veit það varla sjálf, kannski bara reyna að vekja einn eða tvo til umhugsunar um hvernig þjóðfélagi við viljum búa í. Viljum við vera freka spillta barnið sem grenjar og öskrar við minnsta mótlæti eða viljum við vera prúða vel upp alda barnið sem er þakklátt fyrir það sem það fær og kann að þakka fyrir sig?

Það er talsvert langt síðan að ég gerði upp við mig hvernig ég vil vera, og er enn að vinna í því (maðu er svo agalega breiskur), þetta kostar allt vinnu og það að fara í gagnum lífið með talsverðri meðvitund. En það verður hver og einn að gera upp við sig hvernig hann vill lifa sínu lífi.
Góðar stundir 

Till next...adios

Icesave kosningar...:/

2011-03-31T20:19:00.000Z

Ég fór á fyrirlestur í dag þar sem Lee Buchheit ræddi um Icesave-samninginn, kosti hans og galla. Þetta var aldeilis prýðilegur fyrirlestur og gott að fá smá innsýn inn í allt þetta flókna mál, beint frá manni sem hefur starfað fyrir okkur íslendinga í samningaviðræðum við UK og NL.

Þetta mál er allt hið versta, og auðvitað vill enginn borga einhverja skuld sem hann hefur ekki stofnað til, en samt sem áður, þá berum við alltaf samfélagslega ábyrgð og skattar okkar fara í að halda uppi samfélagi sem við tökum öll þátt í.
Það er hart tekist á um JÁ eða NEI, á að samþykkja eða fella þessa samninga?
Það sem eftir stendur hjá mér, eftir að hafa hlýtt á fyrirlesturinn í dag og þær spurningar sem fram voru bornar er þetta: Við erum í þeirri aðstöðu að standa frami fyrir tveimur valmöguleikum sem báðir eru slæmir. Veljum við möguleikann á að segja já og borga þá samninga sem teljast vera þeir bestu sem náðst hafa, eða veljum við möguleikann á að segja nei, neitum að borga, förum með málið fyrir dómstóla sem dæma annað hvort okkur í hag eða óhag
.
Ef málið færi fyrir dóm og við myndum vinna málið, þá væri þetta mál úr sögunni og allir glaðir...ekki satt?

Ef það fer fyrir dóm og við töpum málunum, þá þurfum við að setjast við samningaborðið eina ferðina enn, algerlega án þess að hafa neitt til að semja um, og þyrftum að borga á milli 5,5 – 11 milljarða $ á skilyrðum sem við hefðum lítið um að segja.

Svo þegar ég fór að velta þessu fyrir mér, þá er þetta svolítið eins og ef við byggjum við hliðina á mikilli umferðargötu og við þurfum komast yfir. Málið er að umferðin er mjög þung og hröð og engin leið yfir nema að hætta lífi og limum. En til að komast yfir þá getum við byggt brú, en það tekur tíma og kostar okkur talsverða peninga. En ef við förum þessa leið, þá komumst við yfir heilu á höldnu og getum gert allt það sem við viljum eftir það...já og hlaupið yfir brúna að vild ;)

En svo getum við farið þá leið að reyna að hlaupa yfir götuna, kannski sleppum við yfir ósködduð og höfum þá grætt þann tíma og peninga sem hefðu farið i byggingu brúarinnar, en því fylgir því áhætta að ekið verði á okkur og kannski færi það alveg með okkur eða tæki okkur langan tíma að jafna okkur; enn lengri tíma en bygging brúarinnar hefði tekið og með enn meiri kostnaði.

Munurinn á þessum tveimur leiðum er að það er vitað hvert önnur leiðin liggur, en hin liggur á ókunnar slóðir þar sem við vitum ekki hvað tekur við...fallegt skógarrjóður eða botnlaust kviksyndi.

Gleðilegan kosningadag þann 9.apríl

Till next...adios

Svejk

2011-02-03T09:31:00.003Z

Hef ákveðið að geyma aðeins að skrifa um slúður...bara nenni því ekki strax ;)

Þess í stað ætla ég að minnast örlítið á mun áhugaverðara efni, en það er leiksýningin sem við erum að æfa af fullum krafti í Freyvangi þessar dagana.
Það er sm sagt komið á hreint að Svejk verður frumsýndur þann 19.febrúar, sem er laugardagur. Þetta snilldar leikrit er byggt á hinni þekktu bók Góði dátinn Svejk eftir Jaroslav Hašek.
Þessi leikgerð er alger snilld, mikið að gerast og held ég að óhætt sé að segja að þetta verður veisla fyrir öll skynfærin :)

Þar sem bókin er skrifuð sem háðsádeiluskáldsaga, þá verður nú ekki hjá því komist að mikið er um háðsdeilu í verkinu...við lifðum í skrýtnum heimi og gerum enn. Er sagan alltaf að endurtaka sig? Förum við alltaf í hringi? Eru þeir einir heilir á geði sem taka ekki þátt í vitfyrringu samfélagsins?

Að minnsta kost er hægt að lofa áhorfendum góðri skemmtun sem skilur eitthvað eftir og einnig er þetta verk fyrir alla...stálpaða krakka, unglinga, fullorðna og heldri borgara :)

Hægt er að panta miða og skoða nánari upplýsingar á freyvangur.net

Hlakka til að sjá ykkur í Freyvangsleikhúsinu :)
Muna að brosa :)

Till next...adios

Af stjórnlagaþingi og slúðri

2011-02-01T09:06:00.002Z

Jæja, 1.febrúar í dag árið 2011 og ég sest við tölvuna. Þetta verður án efa frekar stefnulaust blogg, en þar sem ég nenni ekki að fara að læra alveg strax, þá ákvað ég að skella inn nokkrum hugleiðinugm á þessum vettvangi.
Það sem verið hefur mest í umræðunni undanfarið er blessaða stjórnlagaþingið, eða þá ógilding þess.
Í stuttu máli, má segja að fólk kenni hvort öðru um, sá sem er í einum flokki segir eitt og sá i hinum flokkinum segir annað. Einum finnst þetta asnalegt og vill ekki vera með og annar skilur ekkert í neinu, langaði bara að vera með en svo er allt komið í rugl. Við erum sem sagt að haga okkur nákvæmlega eins og við bönnum börnunum okkar að haga sér.

Við tölum illa um náungann, ljúgum, plötum, förum ekki eftir leikreglum og allir hugsa bara um rassinn á sjálfum sér.
Ef svona ástand væri ríkjandi í skólastofu, eða innan ákveðins hóps grunn-eða leikskólabarna, þá væri búið að senda fullt af pósti heim og halda marga fundi. Sennilega væri einnig búið að boða foreldra þeirra, sem oftast ættu upptökin af slagsmálunum, marg oft á fund. Því svona ástand má ekki vera í skólum landsins.

En svona ástand hefur ríkt í okkar þjóðfélagi í mörg ár.

Alþingismennirnir sem kjörnir eru af okkur hinum (já og af sjálfum sér líka) hætta að vinna fyrir þjóðina og fara að vinna á móti hvorum öðrum um leið og fæti er stigiðinn í hið háa Alþingi. Eða svo virðist að minnsta kosti vera.

Ríkisstjórnir er kosin af almenningi og einnig allir óbreittir þingmenn, hvort sem þeir eru í stjórn eða stjórnarandstöðu. Allt þetta fólk á að vinna að heilindum fyrir land og þjóð. Það á að taka vel ígrundaðar ákvarðanir og það á að taka afstöðu til ALLRA mála...að sitja hjá finnst mér að ætti ekki að vera í boði. Eða höfum við eitthvað með fólk að gera inn á þingi sem er "alveg sama" eða hefur ekki skoðun á málum???

Já og þetta með stjórnlagaþingið; í upphafi skal endirinn skoða, segir máltækið. Þetta virðist hafa klikkað eitthvað, sem er reyndar með ólíkindum. Einhverra hluta vegna datt manni nú ekki í hugað farði yrði af stað með jafn dýra og viðamikla framkvæmd, eins og stjórnlagaþingskosningar, án þess að lagaleg umgjörð væri skýr og pottþétt. Eða áttu þetta að vera ómerkilegri kosningar en aðrar kosningar?

Ég tók þá ákvörðun frekar snemma að taka ekki þátt í kosningu til stjórnlagaþings. Ekki vegna þess að ég væri á móti lýðræðislegum kosningum (eins og sumir sögðu um þá sem kusu að kjósa ekki) heldur vegna þess að mér fannst framkvæmdin öll á þessu frekar undarleg. Það var svolítið eins og þessu væri bara hent fram mest til að róa fólk og dreifa huga fólks. Kannski átti að reyna að draga athygli fólks frá þeirri staðreynd að AGS (IMF) stjórni talsvert meiru hér á landi en fólk almennt rennir grun í.
Það er heldur ekki stjórnarskránni að kenna hvernig komið er fyrir þjóðinni, auðvitað má eflaust laga hana eitthvað, en best væri að byrja á að fara eftir henni áður en rokið er í að semja nýja. Eða eigum við alltaf bara að breyta þeim lögum sem ekki er farið eftir?

Það virðist brenna hvað mest á þjóðinni að fá auðlindir landsins aftur í þjóðareign. Eðlilega. En þegar við kjósum flokk sem leggur áherslu á að einka(vina)væða allt, færast eignir yfir á hendur fárra.

Það hefur verið starfandi stjórnarskrárnefnd síðan 1944 (með smá mannabreytingum) og sú nefnd hefur lagt fram breytingar. Og það ætti að vera í höndum þeirrar nefndar að leggja fram breytingatillögur sem mætti svo kjósa um ef þurfa þykir.
Ef stjórnarskrárnefnd þætti ástæða til að boða til stjórnlagaþings til að breyta stjórnarskránni, þá gott og vel. En þá ætti það líka að vera vel undirbúið hvernig staðið væri að því, frá UPPHAFI TIL ENDA. Þetta er ferli sem ætti að taka um ár.
Einnig er þetta eitt af því, sem má alveg bíða þar til að þjóðin hefur náð að krafla sig upp úr mestu efnahagslægðinni...ég hygg að minnsta kosti að þessi milljarður hafi verið betur settur í heilbrigðis- eða menntakerfið.

Kannski ættum við bara að leggja meiri áherslu á að kenna siðfræði og ekki bara í skólum, heldur í fullorðinsfræðslu líka. Það virðist amk vera fullorðna fólkið sem æðir áfram skarandi elda að eigin köku, skít sama um það þótt að það kvikni í hjá nágrannanum í öllum látunum...

En já, þetta með slúðrið, ég skil bara ekki slúður. Sennilega best að geyma umræðu um slúður þar til næst...fyrst ég missti mig aðeins í stjórnlagaþingsskrifum ;)
Gæti sennilega haldið áfram að skrifa miklu fleiri línur en þið nennið að lesa :)

Till next...adios

Hugleiðing

2011-01-16T22:50:00.003Z

Oft notar maður tækifæri, eins og áramót, til að setjast niður og líta yfir liðið ár. Hvað hefur maður gert og hvað hefur gerst. Svona nokkurs konar dagbók yfir árið í stuttu máli. Ég hef gert þetta af og til, þegar ég hef munað eftir því eða bara svona til gamans. Núna ætla ég að skrifa örlítið, ekki beint til gamans, heldur aðallega til að reyna að marka nýtt upphaf...nýtt ár.

Í dag er reyndar sextándi dagur janúarmánaðar, og áramótin þar að leiðandi liðin hjá fyrir rúmum tveimur vikum. En áramót eru reyndar tákn um að nú sé að byrja nýtt ár, fyrirfram ákveðinn tímapunktur, og sá tímapunktur sem ákveður að nú sé ár liðið getur verið alla daga ársins. Tilefni þess að ég sest niður og rita þetta er það, að í dag er nákvæmlega ár síðan að Hafþór kvaddi þennan heim. Og því miður kvaddi hann ekki neinn og þar að leiðandi enn sárara og erfiðara að takast á við það að hann sé farinn.

Þetta síðasta ár hefur verið mjög erfitt fyrir Mikael Huga, því eðlilega er erfitt að takast á við föðurmissi þegar maður er aðeins á níunda ári, þó að sjálfsögðu sé það alltaf erfitt. Margar spurningar hafa vaknað og engin svör munu nokkru sinni fást. Þær vonir sem maður hafði um að Hafþór myndi ná sér uppúr óreglu sinni, voru nú slökktar í eitt skipti fyrir öll.

Ég hef aldrei verið neitt sérstaklega hlynnt minningargreinum, og í raun aldrei skrifað sjálf minningargrein, nema þá hér á blogginu, já og í hausnum á mér, en það sem er þar fer sjaldnast á blað. En mig langar í örfáum orðum að minnast Hafþórs Heiðarssonar.

Hafþór var ákaflega ljúfur og góður maður, sem vildi allt fyrir alla gera. Myndarlegur og með mikinn húmor. Þegar ég kynntist honum vorið 2000, þá var hann nýkominn úr meðferð og var harð ákveðinn í því að nú væri hann kominn á beinu brautina og lífið var dásamlegt. Hann geislaði af gleði og átti ekki erfitt með að heilla flesta í kringum sig. Við áttum margar góðar stundir saman, sem ég mun alltaf geyma í huga mér.

En því miður þá fara hlutirnir ekki eins og ætlað er, þótt viljinn sé fyrir hendi. Hafþór fór að drekka aftur, og þá fyrst kynntist maður því hversu hræðilegur sjúkdómur alkóhólismi er. Eftir fyrsta „alvöru“ fylleríið hans eftir að við byrjuðum saman, þá var ég alveg miður mín og henti honum út, ákvað að nú væri okkar samskiptum lokið. En það fór þó ekki svo, sem betur fer. Hann fór aftur í meðferð, og þegar hann er búinn að vera í meðferð í einhvern tíma, þá kemst ég að því að ég er ófrísk. Fyrst vissi ég varla mitt rjúkandi ráð, en þegar hann hringir í mig úr meðferðinni, þá segi ég honum frá því og ég hef bara varla fyrr né síðar heyrt í jafn glöðum manni. Honum fannst þetta það besta í öllum heiminum og aðvitað ákváðum við að halda áfram að vera saman og allt yrði nú í himnalagi.

En í stuttu máli sagt, þá kom Mikael Hugi í heiminn þann 18.júní 2001 sem var alveg dásamlegt og hann yndislegasta barn í heiminum...en alltof stuttu eftir það fór Hafþór að drekka aftur. Hann reyndi sitt besta og hann langði svo mikið að vera í lagi og hugsa um strákana sína. Þótt ég tæki þá ákvörðun, stuttu eftir fæðingu Mikaels, að ég gæti ekki búið með Hafþóri lengur vegna óreglu hans, þá héldum við alltaf góðu sambandi eftir það.

Ég setti honum þau skilyrði að hann mætti ekki hringja eða hitta Mikael ef hann væri drukkinn, en annars var honum alltaf frjálst að hafa samband. Ég veit að margir voru hissa á að ég skyldi ekki loka á hann alveg, en ég hef aldrei séð eftir þessari ákvörðun minni.

Mikael Hugi elskaði pabba sinn ákaflega mikið og þótt það liðu stundum nokkrir mánuðir á milli þess sem þeir hittust, þá stökk hann alltaf upp í fangið á honum og það var eins og þeir hefðu hittst í gær. Þeirra samband var mjög sterkt, enda finna börn oftast best hvernig fólk er innrætt, og Hafþór hafði ákaflega fallega innviði, þótt hann væri smátt og smátt að leggja sjálfan sig í rúst. Hann var sjálfum sér verstur. Hann sagði mér oft hversu mikið hann langaði að vera heill. En honum fannst hann líka hafa brugðist svo mörgum að samviskan kvaldi hann, og áfengi deyfir...
Ég sá hann síðast í lok nóvember árið 2009, hann kom hingað í heimsókn, hitti Mikael og drakk kaffi og spjallaði. Þá hafði hann verið inni á meðferðarheimili og fannst allt ganga í rétta átt. Hann var afar þakklátur í hvert skipti sem hann hitti Mikael og þegar við kvöddumst, þá þakkaði hann mér fyrir hvað ég væri góð móðir og hversu vel ég hugsaði um drenginn hans. Honum fannst gott að vita að hann þyrfti ekki að hafa áhyggjur af honum.

Stuttu síðar fór hann aftur suður og stuttu fyrir jólin féll hann. Ég átti alltaf von á því að heyra frá honum, að hann myndi hringja um jólin, eða á nýja árinu (2010), því hann var vanur að hafa samband annað slagið, fá að heyra í Mikael og bara spjalla. Hann sagði oft að honum finndist svo gott að tala við mig, því ég kæmi honum alltaf í svo gott skap. En ég lét hann líka oft heyra það. Ég held að Hafþór sé eini maðurinn sem ég hef rifist við, öskrað á, lamið, hent út úr bíl og grátið með.

„Stundum þarf maður að vera vondur til að vera góður“ er sagt, ég reyndi þetta oft, ýtti honum oft frá mér og hélt honum í vissri tilfinningarfjarlægð, þrátt fyrir samskipti okkar. Í þessi tæp níu ár, þá passaði ég mig á því að hleypa honum ekki of nærri mér, og svo allt í einu er hann ekki lengur hér og manni fannst að allt sem maður hafði gert í von um að hjálpa, hefði kannski gert illt verra. En auðvitað veit ég að ég hefði engu getað breytt, sama hvað ég hefði gert...en samt...
Snemma morguns, þann 16.janúar 2010 lagði hann Hafþór af stað í sína hinstu sjóferð.
Ég mun alltaf minnast hans með hlýhug og halda góðu minningunum. Hann var góð sál, en því miður eru það einmitt þeir hinir hjartgóðu sem eiga undir högg að sækja í lífinu.

En nú er liðið ár og tími til kominn að horfa fram á veginn, sleppa tökum á því sem maður ræður ekki við og getur ekki stjórnað.
Núna síðustu jól voru Mikael frekar erfið, hann saknaði pabba síns og talaði of um hann. Ég gaf Mikael snjóbretti og fleira í jólagjöf og hann var mjög ánæður með það, en sagði við mig á jóladag: „mamma þú getur ekki gefið mér bestu jólagjöf í heimi“ og ég spurði þá hvað það væri, þá sagði Mikael: „að fá pabba minn aftur“.
Mikael á sem betur fer margar góðar minningar um pabba sinn og engar slæmar, það finnst mér mjög mikilvægt og er þakklát fyrir. En sorgin á eftir að sitja lengi í hjarta hans, því að tíminn læknar engin sár, bara kennir okkur að lifa með þeim.

Takk fyrir allt Hafþór minn, vona að þú hafir fundið þá ró í hjarta þér sem þú þráðir svo mjög. Samverustundir okkar voru góðar, viðburðaríkar og stundum stormasamar, en þó fyrst og fremst lærdómsríkar. Þú átt alltaf stað í hjarta mér.

Till next...adios

Jó!

2010-12-07T13:13:00.002Z

Ævinlega...
Var bara að tjekka hvort ég kynni ennþá að fara hérna inn...og viti menn; ég kann það :)
Ætla annars ekkert að skrifa neitt að neinu viti hérna núna, skelli kannski inn smá færslu þegar ég er búin að klára verkefnin sem ég á eftir í skólanum, já og er ekki að vinna ;)
Jebbs...letihaugurinn ég ætlar bara að vinna í jólafríinu sínu sem öryggisvörður á Glerártorgi ;) Þess vegna á ég einmitt að vera að læra núna, en ekki skrifa hér...mér hefur reyndar nokkrum sinnum dottið í hug að skella hér inn færslum um alla þá ótal hluti sem fara í taugarnar á mér, eins og stjórnlagaþingið og fúlt fólk, en ég hef bara ekki nennt því ;)

Kannski reyni ég að henda inn færslu fyrir jól, og svo áramótaávarpi ;) ýmislegt hefur svo sem á dagana drifið þetta árið...sumt gleðilegt en annað sorglegt. En svona er lífið.

Jæja...mér er sennilega óhætt að bulla hérna ógurlega þar sem að ég hygg að flestir séu búnir að gleyma þessu bloggi mínu ;) hehe..svo ég get bara farið að nota þetta sem dagbók og treyst fyrir mínum duldustu hugsunum...Kæra dagbók... ;)

Knús út í heiminn :)
Till next...adios

Áramót 2009-2010

2009-12-30T20:50:00.002Z

Sælt veri fólkið :)

Já ég vona sko sannarlega að allir séu sælir og glaðir eftir jólin, já og að árið hafi verið sem best. Ég var að velta fyrir mér að skrifa svona annál, fyrir árið sem er að líða, hvað hefur gerst merkilegt og hvað ég hef gert merkilegt...en þegar ég fór að hugsa meira um það, þá datt mér rosalega lítið í hug!

Ég var náttúrulega í skóla nánast allt árið...tók sumarnám, sem reyndist svo talsvert mikið minna gáfulegt en stóð til. Ég fór til Reykjavíkur 1 sinni á árinu, í febrúar og ég fór 1 sinni til Egilsstaða, í júlí. (Ferðalög ekkert alveg að fara með mig).

Mikael Hugi æfði fótbolta í sumar og ég fór með hann á eitt fótboltamót á Ólafsfirði og annað á Árskógsströnd. Kristján var í unglingavinnu og vann á Minjasafninu á Ak.já og byrjaði svo í VMA nú í haust! Orðinn stór strákur ;)
Svo eins og sést hefur þetta ár liðið tiltölulega átakalaust, en einnig verið afar skemmtilegt, uppfullt af skemmtilegu fólki og góðum stundum með góðum vinum :)

Sumarið var ljúft, byrjaði með hita og sól, sem leiddi af sér margar sundlaugarferðir og heitupottasólbaðsstundir ;)

Já og svo var ég með í haustverkefni Freyvangsleikhússins, en þá var sett um Memento mori eftir Hrefnu Friðriksdóttur. Það var klikk gaman að taka þátt í því :)

Það hefur svo sem alveg verið nóg að gera hjá manni, þótt maður hafi ekki verið að flengjast út um allar trissur :)

Það sem situr eftir í huga mér, þegar ég lít til baka, þá er það allt það góða fólk sem er í kringum mig :) Bæði fjölskylda og vinir, mér finnst ég endalaust heppin að þekkja svona mikið af yndislegu fólki :)
Svo ég vil enda þessar hugleiðingar mínar á því að þakka öllum liðið ár og vona að hið nýja verði ykkur öllum uppfullt af gleði og hamingju :)
Knús á ykkur öll!

Till next...adios

Gleðileg jól og farsælt komandi ár :)

2009-12-25T19:31:00.002Z

Gleðileg jól til ykkar allra :) knús og kærar kveðjur,
þakka allt gamalt og gott og vona að nýja árið verði uppfullt af gleði og hamingju :)

Till next...adios

Jólajólajóla

2009-12-21T14:11:00.002Z

Þetta er reyndar frekar villandi titill á bloggi, þar sem ég er voða voða lítið búin að jóla og er einhvernvegin fremur afslöppuð með þetta allt saman ;)
Er svo sem búin að kaupa einhverjar gafir, svo þetta verður allt í góðu :)
Svo koma Nonni bró og Kathleen um jólin frá Liverpool og það verður nú gaman :)

Enda eiga jólin að snúast um að hafa það gott, vera með ættingjum og vinum og borða góðan mat ;)en ekki missa sig í þrifnaðaræði og bakstursbrjálæði...nóg er nú af áreiti og stressi í kringum mann þótt maður taki ekki þátt í því ;)

Annars fékk ég inn síðustu einkunnina mína í dag...svo niðurstaðan var eftirfarandi:
Hagnýt íslenska: 8,5
Íslensir fjölmiðlar I: 8,5
Sjónlist-tónlist: 8,5
Málstofa í nútímafræði: 8
Nútímahugtakið: 8

og ég er bara reglulega sátt við þessar einkunnir :)

Svo nú er bara að tækla ræktina fyrir jólin, borða um jólin og njóta þess að vera til og knúsa strákana mína :)

Gleðileg jól allir saman og megi nýja árið færa ykkur endalausa hamingju og gleði :)

Till next...adios

Jólafrí ;)

2009-12-07T18:56:00.002Z

Já, nú er maður bara dottinn í jólafrí ;) fun fun fun :)
Skilaði síðustu ritgerðinni fyrir helgi og hélt upp á það að fara í sveitina og hjálpa til við rúning á fimmtud. og föstudag :)
Gott að hreyfa sig aðeins eftir endalausar setur yfir facebook...nei ég meina yfir ritgerðarskrifum ;)

En hann Mikael er amk með tímasetningar nokkuð á hreinu, því hann varð svo lasinn seinnipart föstudag...og er búinn að vera slappur síðan litla skottið mitt :) En þetta er allt að koma, og ég vona að hann komist í skólann á morgun svo ég geti hætt að vera svona löt ;)

Svo var Kristján minn í stærðfræðiprófi í dag...og ég búin að krossa alla putta og vona að hann hafi náð þessu...finnst annars að það ætti að banna stærðfræðipróf, amk fyrir aðra en stæðrfræðinga eða þá sem virkilega vilja læra þetta ;)

Þannig að framundan er að kaupa jólagjafir, laga til, þrífa og fara í ræktina eins oft og ég mögulega get ;)

Látið ekki jólastressið fara með ykkur ;)

Till next...adios

Ritgerðir

2009-12-01T00:10:00.003Z

Já, þegar maður ætti að vera að skrifa ritgerð, þá er mun meira freistandi að skrifa bara blogg í staðin ;) En það er ein af mínum mörgu snilligáfum að ýta stöðugt á undan mér því sem ég á að gera...er alltaf á síðustu stundu og dunda mér frekar við ekki neitt heldur en gera það sem ég ætti að vera að gera; skrifa ritgerð ;)
Annars tókst mér að klára eina í dag og sendi hana yfir í alnetið áðan, svo er bara að vona það besta. Svo núna á ég bara eftir að skrifa eina ritgerð...en hana þar ég samt að skrifa á morgun ;)en það er svona að vera ekki lögnu búin að því sem maður gat löngu verið búin með ;)

Svo er ég næstum búin að liggja í rúminu síðan á afmælinu mínu...endalaust flensuves...kannski ekki búin að vera nógu dugleg að liggja í rúminu og þess vegna búin að vera hálf-drusluleg í tvær vikur...hummm...en vona að þetta fari nú að lagast allt saman. Veit ekki hvort þetta er aldurinn eða bara tilviljun ;)

Svo núna planar maður að gera heilan helling í jólafríinu, sem er alveg að bresta á, eins og að mála bæði bað og eldhús, þrífa og tjilla :) Nenni samt ekki að missa mig í einhverju 12 sortum og rugli...baka bara með honum Kristjáni bakara ;) lukkast alltaf vel kökurnar hjá honum...eða reyni að halda kökuáti í lágmarki og taka ræktina með stæl í desember, það er sennilega eina vitið :)

Jæja, best að fara að sofa og safna orku fyrir ritgerðarskrif morgundagsins ;)
Knús á ykkur öll frábæra fallega fólk :)

Till next...adios

40

2009-11-17T00:29:00.004Z

Allt er fertugum fært, segir einhversstaðar, og ég vona bara að svo sé ;)
Ég átti nefnilega afmæli í gær og þótt ótrúlegt megi virðast þá var ég bara að detta í fertugt...ég á sennilega aðeins eftir að venjast þessari tugabreytingu, en so far so good ;)
Að tilefni þessa merka áfanga, þá hélt ég partý á laugardagskvöldið...það kom fullt af frábæru fólki og bara gaman! Eins og í öllum alvöru partýum þá kom löggan en það var bara gaman, þeir voru hressir og sætir ;)
Svo að afmælisdagurinn sjáflur, 15.nóvember var afar rólegur ;) enda vissara að taka því rólega komin á þennan aldur ;)
Svo ég vil bara nota tækifærið og þakka öllum fyrir góðar gjafir og góðar kveðjur :) þið eruð aldeilis frábær :)

Annars er ennþá fullllllt að gera í skólanum, og verður út þennan mánuð, en reyndar er ekkert svo mikið að verða eftir af þessum mánuði, svo nú er bara að bretta upp ermarnar og klára dæmið ;)

Jæja, best að reyna að skrifa bara pínu oftar hér inn, en hætta að bulla í bili ;)
Er ég ekki annars alltaf að tala um að skrifa oftar hérna ;) hehe...eitthvað minna um efndir ;=)

Take care :)

Till next...adios

Hér er skóli um skóla frá skóla til skóla...

2009-10-21T20:25:00.002Z

Já, þessa dagana snýst bara allt og þá meina ég ALLT um skólann. Endalaus verkefnavinna, lestur, fyrirlestrar og ritgerðarvinna...og sér bara ekkert fyrir endann á því fyrr en í lok annarinnar...
Ég ásamt þremur öðrum skvísum, vorum með fyrirlestur um Tímann (já hið yndislega blað Framsóknarflokksins, en það er því miður ekki lengur gefið út...snökt snökt) í síðustu viku, og það tók bara hellings tíma að undirbúa það. En auðvitað var þetta klikk flottur fyrirlestur hjá okkur ;)

Svo byrjaði strax (og var reyndar byrjaður) undirbúningur undir næsta fyrirlestur, sem ég var með í dag, ásamt Ellu gellu. Þar var gerólíkur fyrirlestur á ferðinni, eða um Rousseau og eitt af verkum hans. Mikið hafði nú Rousseau kallin margt skynsamlegt til málanna að leggja, þótt hann endaði svoldið klikkaður...kannski varð hann einmitt bara klikk út af græðgi og vægðarleysi fólks, en honum fannst eignarhald af hinu illa og aðeins leiða til slæmra hluta...eins og er að sýna sig aftur og aftur og aftur...þeir sem eiga peninga, eignir og hafa völd, eru endalaust að traðka á hinum. En auðvitað rúlluðum við Ella þessum fyrirlestri upp, án teljandi taugaáfalls ;)en það tók líka laaaaaaangan tíma að lesa, pæla og koma þessu saman...

Í dag er LETIDAGUR...eða þar að segja eftir að ég kom heim úr skólanum...var alveg harð ákveðin í því að læra ekki neitt eftir allt fyrirlestrarbröltið :)

En á morgun reynir maður að grynnka eitthvað á þeim verkefnum sem hafa setið á hakanum...af nógu er að taka...svo eru "bara" eftir 4 ritgerðir plús verkefnasúpa ;)

Núna á föstudaginn, 23.október kl.20:30 er lokasýning á Memento Mori...svo nú er síðasti séns að drífa sig í leikhús og horfa á þetta snilldarverk, sem vekur upp spurningar um mannlega hegðun, tilfinngar, gleði og sorg...allur pakkinn á 1500 kr. það gerist ekki betra en það ;)

Svo styttist í að ég eigi afmæli...og ég er mikið að spá í að hafa bara "opið hús" þar sem allir gætu kíkt við sem vilja þekkja mig :) Þetta er planað 14. nóvember...svo takið frá daginn, en nánari upplýsingar verða settar á facebook þegar nær dregur...já og kannski bara hingað inn líka ef ég man ;)

Jæja, ekki gengur að skrifa bara og skrifa hér, fyrst ég ákvað að vera löt og læra ekkert núna seinnipartinn ;) reyndar vorum við litla fjölskyldan frekar þreytt og tókum smá síðdegisblund...sjaldan verið jafn rólegt í kotinu ;)
Svo komst ég að því að ég er ekki lengur ein fullorðin á heimilinu...það var nefnilega hringt frá Gallup áðan og spurt eftir Kristjáni Esra! Ef það er ekki skýrt merki um að fullorðinsárum sé náð, þá veit ég ekki hvað ;)...smá högg bara ;)

Till next...adios

hummm...

2009-10-08T00:58:00.002Z

Nú ætlar ríkið að spara, sem kom svo sem ekki á óvart, en manni finnst helv...hart þegar verið er að taka afar lágar upphæðir af félagasamtökum, upphæðir sem skipta ríkið ekki miklu máli, en viðkomandi félög öllu máli.

Þarna er ég t.d að tala um styrki til áhugaleikfélaga, sem eru ekki háir, en hafa hingað til dugað svona eins og fyrir hálfum leikstjóra...já og leikfélögin notað miðasölu til að borga hinn helminginn...lítið gagn af hálfum leikstjóra ;)
Menningarlega séð, og þá sérstaklega fyrir fámennari sveitafélög og dreifðar byggðir landsins, þá er þetta stór slys!

Það eru ótal margir sem hafa notið góðs af starfi áhugaleikfélaga, bæði sem þátttakendur og einnig sem áhorfendur...bjargað geðheilsu fólks, sinnt félags- og sköpunarþörfum þess, svo fátt eitt sé nefnt.
Já og svo eru ótal önnur félög sem vinna góð og þörf störf, sem verða fyrir niðurskurði sem hamlar eða setur starfsemi þeirra í mikla hættu.

Ég er bara afar leið yfir þessu öllu...já og fyrst að ég er byrjuð þá er ég einnig leið yfir óréttlæti og mannvonsku, stríði og hörmungum, hroka of yfirgangi, spillingu og valdagræðgi.

Hvar í ósköpunum gleymdum við að hugsa um hvort annað, án þess að ætlast til einhvers í staðin?
Hvenær fór mannskepnan að tapa virðingu fyrir sjálfri sér, misnota, pynta og drepa?
Hvenær fór eigingirni og fyrirlitning á umhverfinu að verða að sjálfsögðum hlut?

Það er margt sem ég ekki skil...og það bara eykst með árunum.
Ég ætla að láta þetta duga í bili af neikvæðum hlutum og hugsunum...en þrátt fyrir að vilja alltaf sjá það jákvæða, þá er manni hollt að hugsa stundum um það neikvæða í tilverunni og hvernig við viljum hafa hlutina.

Annars er lífið dásamlegt :)
Knús á ykkur öll :)

Till next...adios

Kristján Esra afmælisbarn :)

2009-09-29T11:45:00.003Z

Í dag eru nákvæmlega 16 ár síðan hann Kristján minn fæddist...nánar tiltekið kl.17:20 ef mig minnir rétt ;) Ótrúlegt alveg hvað tíminn líður hratt, nú hamast hann bara í VMA og líkar vel. Agalega sætur og prúður piltur með alveg heilan haug af hæðnishúmor í sér...veit ekki hvaðan hann hefur það...hummm...en annars ákaflega alvörugefinn og hugsi...reyndar einnig uppfullur af ábyrðartilfinningu, sem ég get enganvegið áttað mig á hvaðan kemur ;)
Reyndar finnst Mikael hann Kristján núna vera orðinn nógu gamall til að flytja að heiman, Mikael vill nefnilega fá herbergið hans Kristjáns ;) hehe...

Nú er ALVEG að bresta á frumsýning...ekki laust við smá skjálfta...bara 3 æfingakvöld eftir og OMG ég sennilega farin á taugum eftir tvö kvöld ;)
Algerlega brjálað að gera í skólanum, svo þetta er bara allt eins og það á að vera ;)

Jæja, hef ekki tíma í meiri skrif...þarf að koma mér í skólann...læra...ræktina...skutla í fimleika...sinna afmælisbarninu...og koma mér á æfingu...já og læra meira...;)

Till next...adios

Frumsýning eftir viku...

2009-09-25T10:27:00.002Z

Memento mori veður frumsýnt í Freyvangsleikhúsinu föstudaginn 2.október kl.20:30!
Sýningafjöldi verður takmarkaður, svo nú er um að gera að tryggja sér miða í tíma...a.t.h að sýnt verður í litla salnum :)
Þetta er sýning sem engin má láta framhjá sér fara :) Spannar allan tilfinningarskalann og er eins og ferskur fjallablær inn í menningarlíf þjóðarinnar :)

Annars er bara fínt að frétta...endalaust mikið að gera, læra læra læra...skóli skóli skóli...æfa æfa æfa...ræktin ræktin ræktin...reyndar hefur ræktin setið örlítið á hakanaum undanfarið, bæði vegna ógurlegra strengja í fótunum eftir síðustu ferð þangað, og einnig vegna ógurlega mikils lærdóms. Svei mér þá ef maður er ekki að fara í gegnum erfiðustu önnina í skólagöngunni núna.
Svo sé ég til þegar þessi önn er búin, hvað ég tek mikið nám eftir áramót...en núna um jólin, þá á ég (af því gefnu að ég nái öllum áföngunum sem ég er í núna) aðeins eftir 6 einingar af náminu. Svo einingalega séð, þá þyrfti ég bara að dúllast við ritgerðarvinnu. En reyndar eru einhver skyldufög sem ég hvorki vil né get sleppt :)

Og svo þarf ég nú bara að öllum líkindum að reyna að finna mér einhverja vinnu eftir áramót...og kanski fyrr. En það er seinna tíma vandamál ;)

Jæja...ætla að skella mér í ræktina og svo í sláturgerð í sveitina, skutla svo Mikael í og úr fimleikum og svo á æfingu í Freyvang...reyna svo að koma inn nokkrum mínútum fyrir lærdóm og eldamennsku :)

Till next...adios

Þrotlausar æfingar...;)

2009-09-18T22:51:00.002Z

Smá uppdeit...sem er svo sem ekkert nýtt, dagarnir fljúga framhjá og ég hef varla tíma til að gera allt sem ég þarf að gera.
Skóli, lærdómur, ræktin, borða, æfingar í Freyvangi...já og svo reyni ég að sinna strákunum örlítið og hjálpa til í sveitinni...kindastúss, göngur...réttir...osfrv.

Mikael Hugi fór í sinn fyrsta tíma í fimleikum í dag, honum fannst það bara gaman og ég er að vonast til þess að hann haldi þessu áfram. Hann gæti orðið efnilegur í fimleikum, því hann er svo skolli sterkur strákurinn...og hefur það að sjálfsögðu frá mömmu sinni ;)Hann er reyndar einnig að spá í að halda áfram í fótboltanum, en taka kannski eina æfingu á viku þar, í staðin fyrir þrjár. Enda veitir ekkert af því að hann fái útrás fyrir alla orkuna ;)

Kristján er bara ánægður í VMA, duglegur að mæta og er JÁKVÆÐUR, sem er bara næstum nýtt þegar skólakerfið á í hlut...held að þessi skólabreyting hafi verið afar góð fyrir hann...enda full mikið að vera í sama skólanum í 10 ár ;) hehe...
Ég fór á foreldrakynningu í VMA í síðustu viku og leist bara svona agalega vel á skólann...enda gott starf unnið þar og frábært starfsfólk :)

Skólinn hjá mér gengur bara ágætlega...það sem af er...maður sér reyndar fyrir sér ótal verkefnaskil og ritgerðir sem fara að skella á manni af fullum þunga...en maður verður bara að taka því :)

Stefnt er að frumsýna "Memento mori" föstudaginn 2.október í Freyvangi og standa æfingar yfir á fullum krafti...er búin að vera á æfingum öll virk kvöld, en nú er smá æfingahlé sem verður notað til þess að, slappa af í smá stund (eða eina kvöldstund...sem sagt í kvöld) og svo er planið að halda áfram að taka á í ræktinni og jafnvel læra eitthvað ;)

Átakið "Í form fyrir fertugt" er nú í algleymi enda styttist óðum sá tími sem maður hefur fyrir þetta átak...en um leið og þetta átak verður búið, þá hefst átakið "í form fyrir fjörutíuogfimm" en það er á langtíma planinu ;) hehe...

Jæja, best að hætta að bulla hér...er að vonast eftri smá sól næstu dagana...væri til í smá sólbaðsheitaliggipott...ja svona þegar mestu marblettirnir eru farnir af lærunum eftir kindastússið...einhverra hluta vegna datt mér í hug "blettatígur" eftir síðustu kindahelgi ;)
En þetta "grær" áður en ég gifti mig ;)

Till next...adios

Sól sól sól

2009-09-05T17:16:00.002Z

Í dag skín sól :)
Það er ekki verra...ég þurfti að fara í búð, (þar sem ísskápurinn minn var orðinn tómari en hausinn á mörgum pólitíkusinum...eða útrásarvíkingnum)og eftir að hafa keypt bæði eitthvað að borða og drekka (eins og kaffi og 70% súkkulaði, þá ákvað ég að kaupa sokka handa Mikael...sem er nú kanski ekki í frásögur færandi, nema hvað, að ég fór út úr þessari frábæru barna-og unglingafatabúð "Casino" með tvennar buxur, tvennar peysur og eina vettlinga...en enga sokkana...missti mig aðeins ;)Það eru bara svo flott og ódýr föt þarna að það er ekki annað hægt en að kaupa þau ;) og reyndar var Mikael farið að vanta föt, svo það var ekki bara að ég væri að tapa mér að ástæðulausu ;)

Og svona til að róa mig niður eftir verslunarleiðangurinn, þá hentist ég í ræktina og skokkaði 4 km á bretti...lét það duga, vegna þess að, bæði var ræktin að loka og ég á leiðinni í sund...vá...það er bara mest slakandi ever að liggja í sólbaðsheitaliggipottinum í sólinni og gera nákvæmlega EKKERT :) og þarna lá ég og bæði soðnaði og steiktist í tæpa tvo tíma :)

Svona eiga haust að vera...ég segi nú ekki annað ;)

Till next...adios

Öfgaleysi

2009-09-02T17:39:00.002Z

Ég hef aldrei misst mig í neinum öfgum, aldrei "bara þurft" að gera hitt eða þetta eða verið "forfallin" eitthvað. Og fundist það bara fínt, mér hefur hingað til ekki þótt það sérstaklega spennandi að vera bundinn af því að þurfa bara að gera eitthvað eða verða ómögulegur/skapvondur/pirraður ella.

Nú er ég búin að vera pínulítið dugleg í ræktinni ( og hlaupa) undanfarið, og er ekki frá því að ég sé að fá smá snert af því að langa til að langa...hef nefnilega ekkert komist í ræktina í allan dag (og kem ekki til með að komast vegna anna) og er svona næstum ómöguleg útaf því. Tja eða það að ég er að verða eitthvað lasin, það er a.m.k nettur pirringur í mér, eða svona óþægindi, kanski bara hiti ;)

En þetta kemur sennilega í ljós, reyndar finn ég það að manni líður bara mun betur bæði líkamlega og ekki síst andlega, þegar maður fer að hreyfir sig og tekur hraustlega á því ;) Tala nú ekki um þegar maður fer að sjá enn meiri árangur..þolið eykst...six-pakkið sprettur fram...upphandleggsvöðvarnir bólgna upp og skeggrótin dökknar...hehe...ok, kanski aðeins orðum aukið, ég er nú bara að meina það að hafa meira þol og halda bingó-vöðvunum í algeru lágmarki...maður biður vart um meira á þessum síðustu og bestu ;)

Skólinn byrjaði í gær, var alveg búin eftir að hafa þurft að mæta í tvo tíma eftir hádegið ;) hehe...er svo reyndar búin að vera í skólanum í ALLAN dag, eða byrjaði kl. 8 og kláraði núna kl.17 og svo er æfing í Freyvangi kl. 19 svo það er best að fara að gefa á garðann og hætta að bulla hérna eins og bjáni.

Svo er bara að muna það, að hversu slæmt sem maður heldur stundum að maður hafi það....þá gæti það alltaf verið verra! Svo brosum og verum glöð :)

Till next...adios

Leika...sér ;)

2009-08-29T10:45:00.002Z

Já, þá er það komið á hreint, búin að fá hlutverk í Memento Mori og bara ánægð með það hlutverk, það eru spennandi tímar framundan ;)
En planið er sem sagt að byrja æfingar 31.ágúst og frumsýna fyrstu helgina í október. Það verða takmarkaðar sýningar, því það þarf að fara að æfa og sýna kabarett á eftir þessari sýningu, svo nú verða allir að vera fljótir til og panta sér miða þegar miðasala hefst :)

Karakterinn minn er ódauðleg kona sem er að gera upp ástarmál sín í gegnum aldirnar...og eðli málsins samkvæmt eru þau þó nokkur ;)
Annars held ég að það sé hiklaust hægt að mæla með þessari sýningu, hún er bæði dramatísk á köflum og einnig bráð fyndin...en best að segja ekki of mikið...hlakka til að sjá ykkur öll í Freyvangsleikhúsinu :)
Og þar sem það eru víst að nálgast 10 ár síðan ég lék síðast í leikriti í Freyvangi, þá er ekki laust við að ég sé þegar orðin afar spennt og nett stressuð....skyldi maður geta þetta ennþá? ;)

Ég fór í draugagöngu í gærkveld, Kristján harðneitaði að fara með, en Mikael var mun kjarkaðri...reyndar var hann orðinn frekar skelkaður þegar við vorum að koma á svæðið...bara af tilhugsuninni einni saman ;) En svo þegar þetta byrjaði allt saman, þá fannst honum þetta bara fyndið og skemmtilegt...held að það hafi orðið dálítið spennufall hjá honum þegar hann sá að þetta var ekkert svo hræðilegt ;)
Ég varð reyndar pínu svekkt...var að vonast eftir því að verða hrædd og fá að öskra svolítið...agalega gott fyrir sálina að öskra stundum ógurlega...en það getur maður víst ekki gert hvar sem er, a.m.k ekki án þess að þykja í besta falli stór skrítinn ;)
Nú hlakka ég bara til að fara í göngur og geta öskrað þar og gargað...og ég verð þá ekkert endilega að góla á kindurnar, þótt að þær haldi það alltaf og hlaupi heim á leið ;)

Ég fór annars í ÁTAK í gær, en þar er opið hús þessa dagana, það var alveg fínt...er samt hrædd um að þar sé oftast of mikið af fólki fyrir minn smekk...en þar sem ég vil helst hafa einka stöð fyrir mig og örfáa útvalda, þá hugsa ég að ég haldi mig bara við Vaxtarræktina ;)

Læt þetta duga í bili...verð að reyna að eiga eitthvað eftir til að skrifa, ef ég þykist ætla að halda áfram að blogga...fyrst mér tókst að halda því áfram eftir ágætis sumarfrí ;)

Till next...adios

Að leika eða ekki leika...

2009-08-27T19:56:00.002Z

Fór á samlestur í Freyvangi í gærkv. en þar var samlesið verkið "Memento mori". Þetta virðist vera hið skemmtilegasta verk og spennandi að sjá hvernig niðurraðast í hlutverk...spurning um að stökkva ef manni hlotnast eitthvað bitastætt ;)

Annars er annar samlestur í kvöld, en þar sem ég er að reyna að kvelja hann Kristján á busaballið í VMA í kvöld, þá veit ég ekki hvort ég fer.
Annars er Kristján ekki á því að fara á þetta ball...hann er ekki líkur mömmu sinni á þessum aldri ;) hehe...hefði fátt stoppað það að fara á svona böll ;)
Það eru sennilega ekki margir foreldrar sem eru í baráttu við að fá börnin sín til að FARA á ball...;) annars hef ég grun um að hann hafi betur og verði bara heima...
Busunin hjá honum var í dag, svo nú er hann orðinn fulgildur í framhaldsskólasamfélaginu...vá hvað maður á eitthvað stóran strák...en samt svo lítin ;)

Mikael byrjaði svo í Brekkuskóla í dag...og ég er endalaust ánægð með það ;) hehe...verður gott að fá að pústa ein í tvo daga áður en skólinn byrar hjá mér...en hann byrar 1.sept.
Svo fór ég í ræktina í gær...enn í átakinu "í form fyrir fertugt" og það er bara fínt...finn svo sem enga breytingu á mér, nema hvað mér líður betur andlega og líkamlega...vigtin er enn söm við sig ;) og six-packið sennilega bara best geymt inn í ísskáp...hehe

Látið ykkur líða vel og leyfið ykkur að vera happy...no matter what :)

Till next...adios

Af skólamálum og öðrum málum ;)

2009-08-20T15:01:00.002Z

Nú eru skólarnir að bresta á einn af öðrum.
Ég fór með Kristjáni í morgun að sækja stundarskrána í VMA, svo byrjar skólinn hjá honum í fyrramálið...mig hlakkar ekkert sérstaklega til að koma drengnum á fætur fyrir klukkan 8 í fyrsta sinn í tæpan mánuð ;) en það hlýtur að hafast :)
Svo fer ég með Mikael í viðtal í Brekkuskóla á miðvikudaginn í næstu viku og svo byrjar skólinn hjá honum á fimmtud. Svei mér þá ef það verður ekki bara gaman að koma rútínu á liðið á ný...já og mig líka ;) úff...þetta að "sofa eins lengi og ég nenni" er ekki alveg að gera sig til lengdar ;) Annars byrjar HA 2.september svo ég fæ örlítið frí fyrir mig ;)

Reyndar hefur nú bjargað miklu að hafa þurft að drífa Mikael á fótboltaæfingar flesta morgna...en það er líka búið eftir þessa viku. Svo vona ég bara að hann haldi áfram í boltanum í vetur...hann er reyndar líka að spá í fimleika, bretti og körfubolta ;)

Íþróttalöngun þeirra bræðra er afskaplega misskipt ;)

Annar var ég að koma úr ræktinni rétt í þessu, fór með Ellu gellu sem kann allar réttu æfingarnar...ég er búin að uppgötva vöðva sem ég vissi ekki að væru til ;) hehe...en reyndar er bara rosalega gott og hressandi að púla svona annað slagið :)

Svo var viðtal við mig í Morgunblaðinu í dag ;) af því að ég er brjáluð (ok, kanski ekki brjáluð, en pínu ósátt) út í LÍN, en þeir vilja ekki lána mér nema 80% námslán í vetur...vegna þess að ég tók sumarlán í sumar...og það kom aldrei fram að sumarlánin skertu vetrarlánin...og þetta er allt í fokki hjá þeim.
Greinilega eru skilaboðin þau að fólk eigi frekar að hanga atvinnulaust og þiggja bætur, heldur en að nota tímann og læra og fá þá námslán! Og það er ekki eins og maður sé að betla út einhvern styrk, heldur þarf maður að borga hverja krónu til baka með vöxtum...
En þetta er a.m.k að vekja einhverja athygli, því að ég verð svo einnig í smá viðtalið í svæðisútvarpinu í dag ;)

Svo ég sé fram á meiri útgjöld í vetur en áður, vegna framhaldsskólagöngu Kristjáns, og mun lægri tekjum...vei vei...aldeilis að mann getur farið að hlakka til ;)

En ef einhver veit um litla vinnu handa mér sem er afar vel borguð ;) þá má endilega hafa samband ;) ég get allt og kann allt...og er þar að auki hógværðin uppmáluð :)

Well...best að reyna að gera eitthvað að viti...er að græja herbergi fyrir Mikael, skrifborð og stól og svona fyrir skólann...og eins gott að ég er komin langt í háskólanáminu, því ég held að það þurfi háskólgráðu til að geta sett saman þennan skrifborðsstól ;)
Já og svo langar mig endilega í smá sól núna takk :)

Till next...adios

Heimapróf

2009-08-13T22:44:00.002Z

Á að vera að taka heimapróf, en nenni því ekki, þess vegna skrifa ég frekar einhverja þvælu hér inn ;)
Ég fór í litun og klippingu í dag, og það má segja að það varð svakaleg breyting á mér...hárið styttist um u.þ.b 10 cm. (í það minnsta) svo ég rétt hangi í axlarsíddinni...og svo ákvað hún Harpa (sérleg hárgreiðslukona mín, sem fær alltaf að ráða öllu) að sennilega væri betra upp á gáfnafarið að lita mig nú aðeins dökkhærða á ný ;)
Enda fór ég að spá, að kannski væri bara dáldið töff að vera ljóshærð bimbó á sumrin en dökkhærður hugsuður á veturna ;)
En þegar ég verð búin að rusla af þessu heimaprófi og fá einkunn, þá kemur það víst í ljós hvernig nýji háraliturinn virkar ;)
Annars er ég bara ennþá að venjast sjálfri mér...en strákarnir mínir, þessar elskur, segja að minnsta kosti að ég sé voða sæt og fín svona :)

Það er góð regla að spyrja alltaf bara börning sín hvernig maður lítur út ;)

Annars á Nonni bró afmæli í dag :) til hamingju með það bróðir kær :) ég bíð svo bara spennt eftir köku og kræsingum ;)
Annars er planað grillrauðvínspartý hjá Öllu mágkonu á laugard. og án efa verður það snilld...:) Annars man ég vart eftir öðru eins skemmtanalífs-sumri...tja í það minnsta varla síðustu 20 árin eða svo ;) bara endalaust eitthvað um að vera og það er BARA GAMAN :)

Ég skokkaði 6,6 km í Kjarna í gær og er ekki frá því að strengirnir hafi lagast talsvert við það :)
Svo það gengur bara ágætlega að hreyfa sig meira...en ég er alveg viss um að baðvogin mín er biluð, hún sýnir alltaf sömu töluna!!!

Jæja...best að reyna að fara að sofa í nýlitaða hausinn sinn...síðasti tíminn í fyrramálið í skólanum og svo að taka þetta blessaða próf...geysp...
Ég er annars búin að leggja inn beiðni fyrir sól, þarf endilega að ná nokkrum sólbaðsheitiliggipottum í sumarfríinu mínu ;)

Till next...adios

Loksins...

2009-08-11T23:28:00.002Z

Það kom að því að ég blogga smá ;)
Ég eginlega lofaði sjálfri mér að blogga þegar ég tengdis umheiminum á ný eftir netleysi undanfarna daga, tja eða viku!

Þetta hófst allt saman einn fagran dag í júlí...hehe...eða svona, netvandræði mín þar að segja. Fékk hringingu seint um kvöld, þar sem tungulipur maður gerði mér tilboð sem ég gat ekki hafnað (ekkert skrítið þótt maður sé alltaf að koma sér í einhver vandræði;)..."sér tilboð bara fyrir Akureyringa og aðeins í kvöld" og ef ég færi með allt mitt hafurtaks, net, síma og gsm, yfir til Tal þá væri ég að spara ógurlegar upphæðir. Ef ég hefði haft tíma til að hugsa þetta örlítið lengur, þá hefði ég eflaust sagt nei, þá hefði ég líka kanski fattað að sparnaðurinn lægi sennilega í því að ég hefði bara ekkert net...
En ég sagði já, og stuttu seinna hófust vandræðin, ég var aftengd og ekki tengd, og svo smá tengd og svo ekkert tengd og þegar upp var staðið þá var ég netlaus í heila 7 daga! En ég endaði líka á því að gefa skít í Tal og fara yfir til Símans ;) og í stað þess að spara, þá jók ég bara umsvif mín og pantaði mér líka Sjónvarp Símans í gegnum netið..., en það er örugglega eitthvað sem maður getur ekki verið án ;)

Svo í stað þess að spara, þá bara eyði ég aðeins meiru, en er þá NETTENGD og ánægð ;)
Ég var svo sem alveg ánægð fyrir, það eina sem ég var ekki ánægð með var netleysið, sem ég var að nefna...

Sumarskólinn skemmtilegi er alveg að verða búinn...bara eftir að setjast niður og taka eitt próf...svo eftir helgi þá verð ég sem sagt komin í rúmlega tveggja vikna sumarfrí :) BARA FRÁBÆRT ;)

Er búin að reyna að fara annað slagið út að skokka, sem hefur gengið ágætlega...fyrir utan eitt fall, en það grær áður en ég gifti mig ;)
Svo fór ég í ræktina í gær, undir strangri leiðsögn Ellu gellu, og í dag get ég nánast ekki gegnið fyrir strengjum ;) en það er líka bara frábært :) hehe...stefni á skokk á morgun, eftir dekur í lit, plokk og andlitsbað...næs næs næs...

Versló var líka snilld hér á Ak...fór út að skemmta mér með frábæru fólki bæði á föstudagskvöldi og sunnudagskvöldnu...algerlega óvænt á sunnud. en mikið afskaplega var það nú gaman :)
Ég er farin að halda að það sé alltaf skemmtilegast þegar "djömmin" koma á óvart og eru algerlega óskipulögð ;)
En hitt er líka gaman ;)

Jæja...ætla að hætta í bili...vona að ég verði pínulítið duglegri að henda hér inn nokkrum orðum ;)
Knús á ykkur öll sem ennþá nennið að kíkja hér inn :)

Till next...adios

facebook...

2009-06-15T23:28:00.002Z

http://www.facebook.com/elisabet.k.fridriksdottir

Þetta er slóðin inn á facebook hjá mér ;)
ÉG er augljóslega að vanrækja bloggið um þessar mundir...en facebook græðir á því ;)

Annars er allt ljómandi hjá mér. Mikael er í íþróttaskóla KA og æfir einnig fótbolta hjá þeim :) Kristján er að vinna á Minjasafninu, aðallega í garðvinnu sem honum finnst nú ekkert alltof spennandi ;) en hann er líka búinn að fá inní í VMA og það er bara flott ;)

Ég leik mér bara í sumarnámi við HA og stunda sólböð og sundlaugar af miklu kappi :) bara snilld að vera í skóla á sumrin...vinna hvað??? ;)

Well...reyni kanski að skrifa smá meira hérna fyrir lok júní ;)

Till next...adios

Ísland í 2.sæti ;)

2009-05-20T22:34:00.002Z

Já, eins og margoft hefur komið fram, þá er ég afleitur spámaður ;)
Auðvitað var bara litla Ísland í 2.sæti í Eurovision og þetta var mest spennadi stigagjöf síðan 1999 eða sl.10 ár ;)eða eins og glöggir hafa þegar áttað sig á þá urðum við líka í 2. sæti þá...en töpuðum reyndar naumlega fyrir Svíagæru nokkurri.
Það var mun betra að tapa stórt fyrir krúttlegum Norsara ;)

Annars ætla ég ekkert að hafa þetta langt núna...ætti kanski bara að reyna að skrifa örlítið minna í einu hér inn en þá kanski pínu oftar í staðin ;) þótt það séu eflaust skiptar skoðanir með það eins og allt annað ;)

Kindurnar bera og bera og sólin skín :)
ef ekki væri fyrir fjandans skólakerfið (og þá meina ég grunnskóla) þá væri bara allt í himnalagi... það er náttúrulega bara alltof auðvelt að hafa ekki alltaf eitthvað djö ves! Well...er hætt áður en ég skrifa eitthvað sem ég sé eftir seinna....löngu seinna ;) hehe...

Till next...adios

Eurovision :)

2009-05-16T13:21:00.002Z

Bara örstutt...er á leiðinni í sveitna í sauðburðinn og sólina ;)

Ég ætla að spá Íslandi 5.sæti í kvöld í Eurovision
einnig ætla ég að spá Albaníu 1.sæti og Noregi 2.sæti.

Svo er bara spennandi hvernig fer...
Hafið það öll rosa gott í sólinni :)

Till next...adios

Kosningakjaftæði....

2009-04-24T17:52:00.003Z

Leið mín lá niður á Glerártorg áðan, ég var svo sem ekkert að spá í hvaða dagur væri, svo ég var pínu hissa á að mæta fullt af fólki með rós í hendi. Það þaut í gegnum huga minn hvort það væri verið að opna blómabúð, eða hvort að Valentínusardagurinn væri...en eins og fyrri daginn þá hafði ég rangt fyrir mér. Glerártorg var sum sé ekki bara fullt af fólki með kaupæði, heldur einnig frambjóðendum.
Þarna höfðu flokkarnir fundið sér staði á víð og dreif um torgið, vildu greinilega ekki troða hvorum öðrum um tær þarna, þótt þeir reyni það á öðrum vígstöðvum.
Framsóknarflokkurinn var að gefa kaffi (sýndis mér) norðlenskt að sjálfsögðu, Samfylkingin gaf rósir (flest öllum greinilega nema mér) og svo sá maður bæði Frjálslyndar- og Sjálfstæðisblöðrur á lofti hér og þar. Reyndar sá ég ekkert Vinstri Grænt og (þótt það geti vel verið að þeir hafi verið þarna án þess að ég hafi séð það) þeir fengu nú smá prik hjá mér fyrir það.
Þetta er nefnileg alveg ofar mínum skilningi. Ég kýs Sjálfstæðisflokkinn ekkert frekar þótt þeir gefi börnunum mínum blöðru (sem ég hefði sko ALDREI leyft) eða Samfylkinguna þótt ég fengi rós. Eða þótt Sigmundur Ernir hafi laumað miða ofaní innkaupakörfuna hjá mér og sagt: "þú leyfir þessu nú að fljóta með heim til þín".
Ég fór reyndar að spá í eitt, þarna voru allir þessir aðilar að ausa út gjöfum, en enginn svo mikið sem gerði tilraun til að gefa mér neitt!
Já og hann Sigmundur Ernir hefur örugglega ætlast til að ég færi bara með miðann heim og léti einhvern með viti lesa hann þar.
Annað hvort er ég þá bara svona ósýnileg, eða það hefur bara enginn lagt í að tala við mig.Eða þá að ég lýt út fyrir að vera þroskaheft eða án atkvæðaréttar!
Ég tók reyndar eftir einu, en það er að frambjóðendur Framsóknarflokksins eru laaaaang sætustu frambjóðendurnir. Mér finnst að þeir ættu að hafa bókstafinn K fyrir krútt ;) Þórarinn Péturson er t.d. ekkert smá krútt ;)
Ég held samt, því miður, að það skipti í raun engu máli hvað maður kýs þegar upp er staðið. Þetta kemur allt á sama stað niður, alltaf eru einhverjir óánægðir sama hvaða leið verður farin í þessum kreppumálum.
Ef ég myndi ákveða einn rigningardag að fara út í pólitík, þá myndi ég ekki taka þátt í því að bera gjafir á fólk, ég myndi ekki vilja kaupa atkvæði fólks eða láta múta mér hvað ég á að kjósa. Hitt er annað mál að vera til staðar og ræða við fólk á opinberum stað, eins og á Glerártorgi daginn fyrir kjördag, allt í góðu.
Í besta falli hefði ég viljað fá áritaða mynd af sætu strákunum í Framsókn, X-K fyrir krútt ;) eða þá X-B fyrir Bráðmyndarlegir menn ;)hehe

Muna svo að kjósa rétt...og allt er rétt ef þú ert sáttur við það :)

Till next...adios

Apríl

2009-04-03T09:00:00.002Z

Þetta fer að verða spurning um að láta bloggin heita bara eftir mánuðum, þar sem ég er farin að blogga bara einu sinni í mánuði...það, eða blogga oftar ;)

Annars liggur mér margt á hjarta, og ég skil ekkert í sjálfri mér að vera ekki búin að fá útrás á þessum vetvangi fyrir margt löngu síðan!

Nú auglýsa bankarnir sem aldrei fyrr (nýju ríkisbankarnir), þeir auglýsa grimmt fjármálaráðgjöf og hversu mikið við eigum að teysta þeim. Persónulega finnst mér þetta ekki flókið reikningsdæmi, ég fór eftir ráðum bankans fyrir margt löngu, fór í auka lífeyrissparnað og tapaði svo 200þús kalli af því á einni nóttu, hefði komið mun betur út fyrir mig að sleppa þessum auka lífeyrissjóð og leggja bara sjálf inn á bankabók 5 þús á mánuði...eða bara troða í koddaverið ;)
Svo hér er ókeypis fjármálaráðgjöf frá mér: Ekki taka mark á neinu sem bankastofnanir (eða fólkið sem er að launum fyrir að ljúga fyrir það) segja. Persónulega er mér alveg sama þótt að starfsmaður í Nýja Landsbankanum sé með tvo hesta á húsi!

Svo er það blessuð kreppan...það virðist vera yfirlýst stefna hjá Akureyrarbæ að láta kreppuna ekki bitna á neinum nema þeim sem minna mega sín; börnum, gamalmennum og sjúkum!
Sparnaðurinn virðist fólginn í því að leggja niður Reykjaferðir hjá 7.bekk í öllum skólum, stytta skólaferðalög 10.bekkjar (amk í Brekkuskóla) og svo eru þeir að spá núna að stytta bara skólann yfir höfuð, svo þeir þurfi ekki að borga kennurum og öðru starfsfólki laun...reyndar hélt ég að þetta væri aprílgabb, en svo las ég um þetta aftur í gær...svo þeir eru varla að missa sig í aprílgöbbum í marga daga ;)
Pesónulega finnst mér að bærinn gæti byrjað sparnaðaraðgerðir sínar á því að fækka eitthvað bæjarstjórum á launum ;)

Nú er loka törnin að byrja í skólanum, reyndar mesta kennslan yfir staðin, en núna á ég bara eftir að skrifa tvær ritgerðir, skila einu stóru verkefni og taka þrjú próf!

Það er kanski bara best að byrja á einhverju ;)

Till next...adios

Meee

2009-03-16T21:06:00.002Z

Jó hó...
Fór á Kaldbak í gær, í sól og blíðu...renndi mér niður á skíðum hálfa leið og svo restina á snjóþotu. Fanst bæði æði en fékk þó meira kikk út úr snjóþotubruninu...enda þorði ég hraðar á því tæki ;)
Var ekki alveg sama í bröttustu brekkunum, þótt ég viðurkenni það náttúrulega ekki fyrir neinum!
Svo fór Sverrir bró. suður í gær og til Liverpool í dag, og ég er góði fjárhirðirinn á meðan ;) Svo ég er búin að fara tvisvar í fjárhúsin í dag og skóla og fund þess á milli. Hef einhvernvegin á tilfinningunni að þetta verði annasöm vika og sennilega líka fjót að líða ;)
Well...ætla að þykjast vera að læra, þarf víst að klára eitt verkefni í kvöld...geysp, langar nú meira að skríða bara í bólið ;)
En ekki dugir slór við að moka flór ;)
Ha de bra :)

Till next...adios

Home sweet home :)

2009-03-02T01:18:00.002Z

Er komin heim eftir hina ágætustu Reykjavíkurferð :)
Fór til augnlæknis, keypti mér ný gleraugu sem ég fæ einhverntíman send í pósti og hitti gott fólk :)
Var í hinu besta yfirlæti hjá Árna bró og co eins og vanalega :)
Á laugardegi þegar ég var á leiðinni úr Vesturbænum í Hafnarfjörðinn, þá sé ég hvar hann Gunnar Þórðarson tónlistarmaður stendur og spjallar við einhvern fyrir utan eitthvað hús vestur í bæ...ég hugsa með mér hvað það sé nú merkilegt í stórborginni að sjá svona "frægt" fólk.
Þegar ég kem norður seinnipartinn í dag, alveg laus við að nenna að elda, og bruna beint á Subway, þá er fyrsta fólkið sem ég sé Þorgerður Katrín og Kristján Arason ;) Svo ég sá bara fleira "frægt" fólk á Akureyri en í Reykjavík...þessa helgina :)

Ég er fegin því að það er lítil umferð á Akureyir :)

Knús á ykkur öll :)

Till next...ados

Bolsprengösk...

2009-02-24T10:45:00.002Z

Ef ég ætla að reyna að blogga amk tvisvar í febrúar á þessu ári, þá verð ég víst að drífa í því...tíminn líður hratt og hraðar!
Ég var að koma frá tannsa, var pyntuð þar ógurlega og tekinn einhver tannsteinn, hélt á tímabili að það myndu örugglega fara einhverjar tennur með...en það virðist hafa sloppið til!
Annars er ég búin að vera ákaflega pirruð undanfarið, sérstaklega sl.laugardag, en þá var ég bara hreinlega í hinu versta skapi allan daginn. Held að mér hafi tekist að safna saman öllum pirringi sl.árin og það helltis yfir mig. En ég notaði þá daginn bara í að skúra og laga til, fyrst að dagurinn var hvort sem er ónýtur ;)
Svo strax á sunnudaginn (konudaginn) var ég í þessu ljómandi góða skapi, en svo varð ég aftur dáldið pirruð þegar ég kom heim í gær eftir laaaaaaangan skóladag. En þá beið eftri mér tölvupóðstur frá skólanum hans Mikaels, þar sem var sagt að það væri útivistardagur á morgun (eða í dag sem sé) og þau ættu að koma með snjóþotur/sleða til að renna sér á...bla bla bla...Það er nefnilega svo að Mikael á ekki snjóþotu eða sleða, en hann á hinsvegar þessi fínu skíði sem hann hefur meiri áhuga á. Og þar sem þessi fuck póstur kom svo seint, þá voru góð ráð dýr. ÉG stökk í Hagkaup, þar sem var búið að loka öllum "venjulegum" búðum og sem betur fer var nú til þota þar, reyndar sagði búðarkonan að allir Stiga sleðar væru uppseldir í landinu!
Well...en ég þurfti sem sagt að kaupa þessa þotu, fyrir þennan eina dag í dag og ætla rétt að vona að Mikael renni sér margar ferðir ;)

Annars er búið að grafa hér upp allan garðinn og laga stríflufrárennsli...sem betur fer ;) það var víst allt orðið missigið og vitlaus halli á öllum lögnum. En ég er voða fegin að geta þvegið þvott á ný ;)
Svo er ég að fara til Reykjavíkur á fimmtud. mæta hjá augnlækni á föstudaginn og ætla rétt að vona að eitthvað verði hægt að gera fyrir þetta blessaða auga mitt, þar sem ég sé alltaf ver og ver með því...ekki gaman :(

Vínland eftir Helga Þórs var frumsýnt í Freyvangi síðustu helgi. Þetta er alveg snilldar sýning, alveg óhætt að mæla með henni við alla, konur sem kalla og krakka lakka...

Jæja, best að reyna að gera eitthvað af viti fyrir skólann á eftir...og vinna í þessum pirringi mínum, er mest hrædd um að ég sé að breytast í gamla sínöldrandi kellingu sem aldrei er ánægð...púfff, skelfileg tilhugsun ;/

Till next...adios

Já sæll...

2009-02-11T20:17:00.002Z

Ég er búin að vera ofurlöt við að blogga undanfarið...hef verið öllu duglegri á Facebook en það er allt önnur saga ;)
Þórður bró og Alla mág tóku sig til síðustu helgi, gerðu sér lítið fyrir og skírðu litlu prinsessuna :) Hún var skírð Sigríður María :) til hamingju með þetta allt :)

Af málum lands og þjóðar er lítið annað að frétta að allt er í helvítis fokking fokki og ekki sér fyrir endann á þessari vitleysu...myndun nýrrar ríkisstjórnar virðist ekki hafa gert neitt sérstakt kraftaverk...enda er ég bara að styrkjast í þeirri trú að það þarf miðjuflokk til að stýra þessu öllu saman...allir öfgar til hægri eða vinstri geta aldrei látið gott af sér leiða...og hana nú! Annars ætla ég ekki að eyða stöfum eða orku í að skrifa um kreppu, ríkisstjórn, seðlabankastjóra, forseta eða forsetafrú ;) þetta er bara ett stórt samsæri ;)

Nú er allt komið í fokk aftur í frárennslismálum...aftur komin stífla og ég þarf algerlega að vakta það að snillingarnir fyrir ofan mig setji ekki í þvottavél...þau eru sko alveg búin að gera það þrisvar i þá þrjá daga síðan allt fór í ves..og ég hamast með drullusokkinn og reyni að ná í liðið sem á hinar íbúðirnar... en þessu fólki virðist vera þokkalega nákvæmlega sama hvað gerist í þessu húsi eða hvernig ástandið er...enda eru þau ekki í þeirri aðstöðu að geta ekki sett í þvottavél :(
Annars hafa fæst orð minnsta ábyrgð, heyrði að konu sem þurfti að borga hálfa millu í málskostnað vegna bloggskrifa um einhvern hundaræktenda...svo ég held að það sé best að hætta hér...;)

Annars er ég búin að plana ferð til Rvk. síðust helgina í feb. er búin að panta mér tíma hjá augnlækni og alles ;)
Það er brjálað að gera í skólanum, verkefni og verkefni og svo smá verkefni...svo þarf ég kanski að byrja á eitthvað af þessum 4 ritgerðum sem á að skila fyrir vorið ;)
Svo er 10.bekkur svo duglegur að selja kaffi þegar það er eitthvað um að vera í skólanum að ég er bara nánast í fullri vinnu við að búa til tertur og salöt ;) og best að gera eitthvað af viti :)

Till next...adois

Völvuspá ;)

2009-01-27T13:46:00.002Z

Eins og fram kom í síðasta bloggi mínu, þann 22.jan, þá spáði ég stjórnarslitum fyrir 26.jan. og viti menn...stjórnarslitin urðu bara akkúrat 26.jan ;) svo ég tilnefni hér með sjálfa mig sem völvu vikunnar ;)

Annars er tilefni þessarar bloggfærslu minnar í dag, sú að ég er stórhneiksluð! Það liggur sum sé í loftinu að Jóhanna "minn tími mun koma" Sigurðardóttir, verði næsti Forsetisráðherra landsins og mér lýst bara ljomandi vel á það og finnst einmitt merkilegt að núna loksins sé KONA á leiðinni í þetta embætti...sú fyrsta hér á landi.
Svo er ég að skoða visir.is áðan og þar er bara fyrsta frétt: Fyrsti samkynhneigði forsetisráðherrann" Halló! hvaða fuck máli skiptir kynhneigð hennar? Það eitt að hún skuli ekki vera með typpi, (sem virðist alltaf vera aðal málið og leitt hefur þjóðina í ógöngur-því typpum virðist oft (ekki alltaf) fylgja græðgi yfir það að komast yfir sem mest...)já, hvar var ég...humm, já sem sagt Jóhanna er kona og það er merkilegt hversu langt hún hefur náð í þessum karlaríkjum stjórnmálanna...og því ber að fagna, og ekki síður því að hún virðist vera eina KONAN með viti í þessu argaþrasi þarna um þessar mundir!
En að draga kynhneigð hennar inn í þetta, finst mér ósmekklegt og óviðkomandi því sem hún stendur fyrir á þingi.
Ég tek það fram að ég hef alls ekkert á móti hommum eða lesbíum og finst það algert aukaatriði við persónuleika fólks, eins og það er rauðhært eða dökkhært...og þar fyrir utan verð ég bara að upplýsa það að ég hafði ekki hugmynd um að Jóhanna Sig.væri samkynhneigð...og var einmitt að frétta af Páli Óskari um daginn ;) hehe...

Jóhanna Sig. fyrsta gráhærða konan sem forsetisráðherra ;)

Lifi Ísland :)

Till next...adios

Bylting

2009-01-22T09:06:00.002Z

"Megir þú lifa áhugaverða tíma" segir í Kínverskri bölbæn, eitthvað virðist þetta að vera að koma fram hér...kanski einhver Kínverji verið fúll eftir allar kínverjasprengingar hér öll áramót og skellt þessu á landann ;)
Annars byrjaði vikan á smá pirringi út í allt og allt...mánudaguar virðast ætla að verða ansi strembnir, sérstaklega að sitja seinnipartinn á fyrirlestri í 90 min án pásu...og um Austur Asíu...þarna kemur bölbænin aftur fram ;) hummmm...
En þegar ég kom heim um 6 leytið á mánud. þreytt og búin á því, þá var það fyrsta sem ég sá að rusl flæddi hér út og uppúr öllum ruslatunnum! ARG...og þar sem rusla kallarnri sætu koma alltaf á þriðjudags morgnum, þá þurfti ég að byrja á að "laga til í ruslinu". Kenni þessu leikhúspakki sem er um helgar á efstu hæðinni um stóran hluta af þessu...og svo eru þau líka voða dugleg að henda vínflöskum í ruslið...og ég sem hélt að þetta listabóheim pakk væri svo náttúrvænt og umhverfiselskandi...
Talandi um leikhúspakk...mér var óvænt boðið í leikhús á laugardagskvöldið og var náttúrulega svakalega ánægð með svona leikhúsboð :) en var ekki alveg jafn ánægð með sýninguna "Falið fylgi". Það var svo sem margt gott, smá fyndið og vel leikið, en það var bara einhvern vegin byrjað á mörgu sem var aldrei klárað. Svona pínu eins og höfundurinn hafi byrjað á einhverri hugmynd og svo fengið aðra hugmynd og því ekki klárað fyrstu hugmyndina...það var svona ýjað að og gefið í skyn og svo datt bara botninn úr öllu saman. Veit einnig ekki hvernig í fjáranum þetta heitir "Falið fylgi" því frambjóðandinn og kosningabarátta er í algeru lágmark, hefði betur heitið "Fólk í fári" eða eitthvað svoleiðis ;)
Annars er allt í lagi að sjá þetta...sérstaklega fyrir leikhúsrottur, ég er svo all svakalega skrítin að mér finnst gaman í leikhúsi jafnvel þótt að það sé leiðinlegt ;)
Og þetta er ekkert leiðinlegt...hefði bara þurft að skrifa þetta betur og svo skil ég heldur ekki tilgang með veggstubbum sem er alltaf verið að stökkva yfir...annaðhvort er veggur eða ekki veggur...er það ekki???

Jæja, það er víst bylting í landinu...allt að verða vitlaust, ég spái að ríkisstjórnin sundrist fyrir 26.janúar. Ég fór meira að segja smá í mótmæli á þriðjudkv. fín varðeldastemming á Ráðhústorgi ;) Ég er ekkert hissa á að allt sjóði uppúr í Reykjavík, fólkið þar er bara meira tens, það er nú bara nóg að fara inn í Kringluna til að finna það ;) of mikill ys og þys...;)

Jæja, þarf að taka mig til í skólann, sé fram á brjálaða ritgerðar og verkefnavinnu...þarf að vera með fyrilestur strax á mánduaginn sem ég er nákvæmlega ekkert byrjuð að undirbúa mig fyrir, enda vissi ég það líka bara fyrir 2 dögum að ég ætti að vera með þetta á mándud. En ég verð bara fegin þegar það er frá ;)

Litla frænka er komin með nafn já, hún heitir Sigríður María :)

Knúsumst í kreppunni og brosum í byltingunni :)

Till next...adios

Föðursystir

2009-01-13T15:47:00.002Z

Ég er náttúrulega löngu orðin föðursystir margra barna...ótrúlegt hvað helmingur bræðra minna er duglegur við að fjölga sér ;)
En sum sé Þórður bró og Alla mág eignuðust sum sé eina stóra stelpu um eitt leytið í dag :) og við ég nota tækifærið og óska þeim innilega til hamingju með það :)
Vil einnig nota tækifærið og benda á bloggfærslu mína í gær, þar sem ég spáði því að barnið kæmi í heiminn í dag ;) ...eða á föstud.en það var bara svona vara vara dagur ;)
Já, stúlkan var sum sé einnthvað um 18 merkur og 56 cm em ég man rétt (sem er ekkert endilega rett, á í mesta basli með að muna svona).

Annars er ég að hamast við að laga til fyrir saumaklúbb í kvöld, á eftir að fara í búð og laga enn meira til svo það þýðir lítið að hanga bara við tölvuna :) ætlaði bara að gera kunngjört um fjölgunina í stórfjölskyldunni :O)

Till next...adios

Skólamál

2009-01-12T15:29:00.002Z

Fór í bókainnkaupaleiðangur í dag...þurfið að kaupa óvenju fáar bækur en þær voru líka óvenju dýrar. en þessar þrjár bækur sem ég keypti kostuðu um 16.000 kallinn!
Fór annars að spá í það við afgreiðslukassann að ég væri kanski með svolítið undarlega samansettar vörur, ég var sum sé með 2 bækur um stjórnmál Comparative Politics og Íslenska stjórnkerfið, eina bók um barnabókmenntir Í Guðrúnarhúsi og svo dósayddara með hauskúpumynd og einn stóran tréblíant, sexstrendan og feitan sem stendur á Learning-to-write pencil...hummm...spurning hvort ég hefði átt að kaupa þetta í sitt hvoru lagi ;) og muna eftir einu skólabókinni sem ég get hugsanlega skilað frá í fyrra :)

Mér tókst að klára herbergið hans Kristjáns í gær :) nú er það málað í Mývatnsbláum lit og með eikarparket á gólfinu...bara geggjað :) langaði nú mest til að flytja bara sjálf inn í herbergið...en það er víst ekki í boði. Nú er næst á dagskrá að reyna að koma skikki á restina af íbúiðnni.
Ég er búin að lesa Kristjáni pistilinn um umgengni um "nýja" herbergið, þar skal hlýta mjög ströngum reglum sem kallaðar verða "umgengnisreglur" ;)
Hann fékk fyrstu skammirnar í dag, þegar ég kom heim þá fann ég tvö poppkorn á gólfinu hjá honum...sennilega verð ég svo mikið að passa upp á þetta eina herbergi að restin af íbúiðnni verður bara eins draslaraleg áfram og hún er búin að vera ;)

Alla mágkona er víst ekki búin að eiga enn...ég spái því núna að ef hún kemur ekki með krakkann í heiminn á morgun, þá muni hann fæðast þann 16.janúar en sá dagur ku vera í alveg sérstöku uppáhaldi hjá Þórði bró: ;)

Jæja, ætla að láta þetta duga í bili og gera smá nostalgíu verkefni um Dísu ljósálf :) fyrir barnabókmenntaáfangann...

Till next...adios

Afmæli Þórðar

2009-01-09T17:14:00.005Z

Í dag er 9.janúar 2009 og því á Þórður bróðir afmæli í dag :) og vil ég nota tækifæri og óska honum til hamingju með það og skella inn einni mynd sem ég fann af honum, örugglega honum til mikillar ánægju :) Ekkert virðist vera að gerast hjá Öllu, en hvur veit...dagurinn ekki alveg búinn ennþá ;)
Skólinn minn byrjaði í gær... stuð stuð stuð...fór svo í dag og keypti bjór og vonast til að það komi mér í gegnum málningarvinnu í kvöld ;)
Ég er annast stór hneiksluð á verkum ríkisstjórnarinnar varðandi sparnað og sameiningu í heilbrygðiskerfinu...ekki alveg að fatta hvað þeir eru að hugsa...kenni alþjóða gjaldeyrissjónðum um stóran hluta af þessum gjörningi...skamm skammms.
Veit ekkert hvað ég á meir að segja í bili...

Till next...adios

Spá

2009-01-07T21:23:00.002Z

Rakst á stjörnuspána á Mbl.is og fanst hún voða mikið ég:

Sporðdreki: Það getur reynst þér skeinuhætt að hlaupa í blindni eftir athugasemdum annarra. Leyfðu málum að hafa sinn gang og njóttu lífsins með bros á vör.

Ákvað að henda þessu hér inn svona í tilefni dagsins eða eitthvað ;)

Skólinn byrjar á morgun, verð í 16 einingum, þótt ég hafi verið búin að lofa mér að taka ekki meira en 15 ein. á þessari önn...en þar sem að ég gat ekki valið einn 3 ein áfanga sem mig langaði að taka...vegna árekstra...þá varð ég að velja tvo 2 ein áfanga í staðin...

Ég er svona nokkurnvegin að verða búin að berja gólfið í Kristjáns herbergi sundur og saman...svo ég vonast til að geta þrifið og málað á morgun og skellt parketinu á um helgina :)
Þá á ég "bara" eftir að koma dótinu hans Kristjáns fyrir og þrífa restina af íbúðinni hátt og lágt, því blessaða rykið, sem kom þegar ég fræsti í gær og eyðilaggði ryksuguna, hefur náð að smjúga um allt og er alls staðar...En ég fer bara í ríkið, kaupi kassa af bjór og geri þetta líka um helgina ;) hehehe...

Alla mágkona ekki ennþá búin að eiga, allar líkur eru nú á því að Þórður bró fái bara barnið í afmælisgjöf þann 9.jan ;) Spennandi :)

Till next...adios

Gleðilegt ár :)

2009-01-04T16:57:00.002Z

Í dag er 3.janúar 2009 og ég þarf að æfa mig í að skrifa nýja ártalið 2009 :)
Þetta þýðir reyndar það að ég er búin að vera hrikalega löt fyrstu 4 daga ársins...hummm, er reyndar búin að lofa sjálfri mér bót og beturn strax í fyrramálið, vakna ekki seinna en 9...eða 10 ;) og rífa strákana á fætur. Það ku vera síðast séns á að rétta við sólarhringinn því strákarnir byrja í skólanum á þriðjudaginn...6.jan 2009, á sjálfan þrettándann ;)
Ég fór á Ljótu hálfvita tónleika á föstudaginn 2.jan 2009 og það var gaman, það voru svo margir á Græna hattinum að við fengum ekki sæti nema við barinn, sem varð til þess að auðvitað rann bjórinn hratt og örugglega niður og auðvelt að nálgast áfyllingu ;)
Nú þarf ég bara að reyna að komast að því hvað ég gerði við diskinn sem ég keypti og hafði ekki mikið fyrir að láta árita...
Í gær var svo alveg tvöfalt boð...fyrst kaffiboð í sveitinni og svo snilldar kjúllaréttur og Trivial spurningakeppni hjá Árna og Siggu Láru um kvöldð :) fun fun fun :) Gott ef þynnkan var ekki bara nokkuð í undanhaldi þegar ég kom heim um 11 leitið í gærkv.
Svo í dag er búin að vera mikill leti dagur, er búin að plana lengi að fara út að labba, en held ég þurfi að hugsa það aðeins lengur...kanski þangað til að ég þarf að elda kvöldmat og hef ekki tíma til þess ;)
En ég er bara sæmilega bjartsýn á árið 2009 og vona að það veiti öllum gæfu og gleði :)
Svo bíður maður bara spenntur eftir því hvenær Alla mágkona fer í fæðingu...var skráð inn í dag ef ég man rétt...:)

Hafði það gott, flott og látið ekki smott...erí pirra :)

Till next...adios

Áramót 2008-2009

2008-12-31T15:53:00.002Z

Jebb...árið er liðið í aldanna skaut, sagði einhver hér áður fyrr ;) nú eru bara 8 klst. eftir af árinu 2008 þegar þetta er ritað. Ég og Mikael fórum áðan og keyptum tertu og bombu ;) ákváðum að styrkja björgunarsveitina og kveðja þetta ár með stæl.
Kristján er pínu eirðarlaus, enda er hann vanur að vera í Reykjavík um áramót, en eitthvað lítið hefur heyrst þaðan um þessar mundir...svo meiningin er að aka með stráka, salat og skotflaugar í sveitina á eftir og hrella með látum alla þá sem þar verða ;)
Árni bró og co eru mætt á svæðið og verða einnig í sveitinni...:) fun fun fun :)

Meiningin var að líta um öxl og horfa yfir farinn veg ári 2008, en auðvitað þegar mér dettur það í hug þá dettur mér ekkert í hug...en í stuttu máli þá:
Gekk vorönnin í HA ljómandi vel, tók 17 einingar og fékk ágætis einkunnir að mig minnir, frá 7-9,5
Um páskana þá komu Árni bró og co norður og skírðu yngsta fjölskyldumeðliminn...fékk litli prinsinn nafnið Friðrik sem gat ekki passað betur :)
Eitthvað fór ég nú á skíði, bæði gönguskíði og svigskíði og það var fjör :)
Í mai þá var ég í sveitinni að hjálpa Sverrir bró við sauðburðinn, sem var voða gaman og kærkomin tilbreyting frá skólabókum.
Í júní-júlí var ég að vinna á leikskólanum Iðavelli, sem matráður og það var fínt, var samt hálf lasin í 3 vikur sem var ekki jafn fínt...en lagaðist eftir sterapúst og verkjatöflur ;) Ég hætti í leikskólanum upp úr miðjum júlí og var leyst út með blómvendi ;) aldeilis gott fólk sem vinnur þarna.
Daginn sem ég fór í sumarfrí, þá flaug Kristján til Rvk. en ég og Mikael ókum austur á Egilsstaði. Vorum þar í góðu yfirlæti hjá Árna og Siggu Láru og fjölsk. og Nonni og Kathleen komu líka og þetta var voða skemmtileg helgi. Fórum á Borgarfjörð eystri, þar sem ég var að koma í fyrsta skipti, snilldarstaður...og fórum líka á Skriðuklaustur sem klikkar ekki í fegðurð, góðu veðri og frábærum mat :)
Svo fórum við norður aftur í heyannir ;)og Kristján kom aftur úr Rvk.eftir viku dvöl þar...
Sumarið leið með heyskap, sundferðum og leti...keypti mér svo nýjan (notaðan) bíl í ágúst, nánar tiltekið 12.ágúst og brunaði á honum til Reykjavíkur þann 13.ágúst. Bíllinn VW Passat er rosa krúttlegur og er árgerð 2000
Jamm...ég fór sum sé með strákana í borgina, með Kristján til doksa og þá báða í Kringlu-Smáralindar kaupæði...eyddum peningum hægri vinstri í bæði föt og skemmtun ;)
Fljótlega eftir að norður var komið, þá byrjaði skóli hjá mér og strákunum.
Svo var þetta vanalega, göngur, réttir, sláturtíð og kabarett í Freyvangi.
Ég tók 18 einingar í HA núna á haustönn og gekk það ljómandi vel, fékk eina 7,5 fjórar 8 og eina 8,5 í einkunn...Sum sé 8 í meðaleinkunn og er bara glöð með það. Annars lítur út fyrir árekstra í stundarskrá og púsl á komandi vorönn og kanski get ég ekki tekið þá áfanga sem hugur stendur til, en það kemur í ljós.
Eitthvað hefur maður nú farið á af tónleikum á árinu, einnig í leikhús og bíó og er það alltaf jafn gaman :)

Ég er eflaust að gleyma að minnast á heilan helling sem gerðist skemmtilegt á árinu, en það mjatlast þá bara inn seinna ;) held ég verði bara að fara að brytja í salat og koma mér og mínum í sveitina :)

Vonandi eigið þið öll góð og gleðileg áramót og vonandi verður nýtt ár fullt af gleði og hamingju :)

Till next...adios

Krúttípúttí

2008-12-27T20:43:00.002Z

Jólin hafa liðið hratt, eins og vanalega þegar það er gaman og gott :)
Vorum í sveitinni á aðfangadagskvöld í góðu yfirlæti, góðum mat og góðum gjöfum...
Vorum svo bara heima á jóladag í leti leti, eldaði reyndar kalkúnabringu í kvöldmatinn ásamt hangiketinu góða úr sveitinni.
Í gær var svo fjölskylduboð í sveitinni og þar mætti öll nánasta fjölskydan sem er stödd á svæðinu...svo koma Árni bró. og Co á mánud. og þá verður bara enn meira gaman :)
Í dag ætlaði ég að vera voða dugleg og hreyfa mig eitthvað...en úr því varð lítið og í stað þess fór ég bara í kaffi til vinkonu minnar og borðaði meiri kökur :D
Svo kemur krúttlegast hluti bloggs dagsins: ég fór í 10-11 fyrir kvöldmatinn, vantaði eitthvað smotterí, Mikael fékk 500kr. og skrapp í Jón Sprett til að kaupa sér smá nammi...svo bíð ég eftir honum og sé að hann kaupir sér nammi fyrir 150 kr. svo þegar við löbbum út þá biður hann mig að bíða fyrir utan 10-11 og segir að ég megi ekki koma með, eigi bara að bíða, ég verð hálf óþolinmóð og held að drengurinn ætli að kaupa sér meira gotterí þar, "ég verð enga stund" segir hann...og ég sé að hann labbar beint að afgreiðsluborðinu og segir eitthvað við afgreiðslumanninn og svo kemur hann út aftur. Ég spyr hann hvað hann hafi verið að gera þá segir hann: "Ég var að gefa fátæka fólkinu pening" ...ég fór bara næstum að grenja...fanst þetta svo sætt og gott hjá honum, hann hafði þá farið og sett 200 kr.í rauðakross söfnunarbauk :)
Ég er kanski ekki alveg að klúðra uppeldinu á drengunum á allan hátt ;)

Hafði góðar og gleðilegar stundir :)

Till next...adios

Gleðileg jól :)

2008-12-24T11:30:00.002Z

Gleðileg jól allir saman :)
Óska ykkur gleðilegra jóla og farsældar og friðar á nýju ári
Þakka allt gamalt og gott og vona að ánægjulegar samverustundir með vinum og ættingjum verði enn fleiri á nýju ári...hó hó hó :)

*<:o)

Till next...adios

Shittttt

2008-12-20T19:11:00.002Z

Var dugleg í dag...málaði aðra umferð yfir gluggana og eru þeir bara alveg snilld ;) get tekið að mér að mála fyrir fólk ;)
Svo byrjaði ég á að rífa af teppið, ákvað að "drífa" það af og mála svo herbergið snöggvast. Hummmm...ég var voða voða voða bjartsýn þar! Í fyrsta lagi var teppadruslan ógeðslega föst, greinilega ekki verið sparað límið á sínum tíma...púfff, en það hafðist fyrir rest...en ekki tók betra við, það var dúkadrusla undir teppinu og þegar ég reif hann af þá varð eftir brúnt-lím-eitthvað ógeð á gólfinu sem þarf að skafa eða meitla af. Og ég er sum sé búin að meitla af pínuponkulítið horn og sé ekki fram á að klára helv...gólfið fyrir jól. Það er amk ógurleg bjartsýni að ég verði búin að klára að gera gólfið klárt undir parket fyrir þorláksmessu, eins og til stóð!
En ég verð bara að halda áfram að púla á gólfinu, ekkert annað í boði.

Gleymdi annars að geta þess í gær (var svo uppnumin af gerfisveinka) að ég gerði nokkuð sem ég hef ekki gert áður!
Ég fór í húðhreinsun. Og ég held að ég geri það bara ekkert aftur!
Þetta byrjaði ágætlega, en svo byrjaði gellan að misþyrma á mér nefinu...kreisti og kramdi og þjösnaðist á því...sagði svo að það væri ekkert til að kreista!!!
Ég var með hjartslátt í nefinu og eldrauð sem Rúdólf.
En ég fór líka í lit og plokk, svo þetta var ekki alveg vonlaust ;) hehe

Jæja, er búin í bakinu og ætla að vera löt í kvöld...

Till next...adios

Plat

2008-12-19T18:12:00.002Z

Ég fór með Mikael í jólasund áðan, eða hann fór í sund og ég horfið á, þetta var á vegum sundfélagsins Óðins og var bara ljómandi gaman. Nema það að þegar við komum þá var eitthvað jólasveinaræksni að væflast í anddyrinu, svona pínulítið eins og hann vissi ekki hvort hann væri að koma eða fara. Grindhoraður með augljósa gerfibumbu...
Þegar sundið er búið er hann enn að væflast, býður öllum börnum góðan dag og gefur þeim sundhettu merkta Símanum úr Coca-Cola pokanum sínum. En þar sem ég stóð í anddyrinu á meðan að Mikael klæddi sig, þá fylgdist ég með sveinka góða stund...og er ekki frá því að hann hafi bara verið aðeins við skál! Hann skjögraði annað slagið, og ruglaði hreinlega, var svo búinn að taka af sér húfuna fyrir rest svo að englakrullulufsuskegghárið varð ennþá gerfilegra...og þurfti samt mikið til!
Mikael tók með hálfum huga við bláu Síma-sundhettunni, sem hann sagðist aldrei ætla að nota og tilkynnti mér hátt og snjallt þegar að við vorum komin út að þessi jólasveinn hafi sko verið gerfi!!!
Og ég gat bara hreinlega ekki sagt annað en já...datt ekki í hug að reyna að ljúga að barninu að þessi jólasveinaómynd væri alvöru.
Svo sagði Mikael líka að þessi hefði sagst heita þvörusleikir, og þvörusleikir hefði sko verið í Brekkuskóla í dag og hann leit bara alls ekki svona út!!! ;) hehe
Ég hef bara að ég held, aldrei séð aðra eins veru...nánast ekki hægt að kalla þetta jólasvein...virkaði eins og einhver róni fyrir utan vegg hafi verið dreginn inn og hent í búning...og fengið fleig að launum ;) hehe
Well...hætt að dissa sveinka ;)

Ég málaði gluggana í Kristjáns herbergi í gær, held ég verði að fara aðra umferð í kvöld...eins gott að gera þetta almennilega ;) held samt að það sé bjartsýni að ég geti klárað herbergið, hennt öllu inn í það og lagað til og skreytt fyrir aðfangadag...en sjáum til...í versta falli verður bara lítið skreytt og mikið breytt ;)

Það er djö...kuldi úti, svo það er fínt að vera inni og mála...drakka kakó og liggja undir sæng :)
Hafið það gott í kuldanum krúttin mín :)

Till next...adios

Hvolf

2008-12-17T23:40:00.002Z

Það er ekki hægt að ímynda sér með nokkru móti að það séu jól eftir rétta viku, þegar maður gengur inn í íbúðina mína um þessar mundir.
Það er allt í drasli, svefnherbergið mitt á hvolfi, aðallega legó-kubbar um öll rúm og gólf...stofan full af öllu, parket á stofuborðinu, rúmið hans Kristjáns þar líka (ekki uppá stofuborðinu reyndar, en upp við það) og slatti af dótinu hans, gangurinn er einnig fullur af drasli, hillur og samtíningur úr herberginu hans Kristjáns.
Það jólalegasta hér innandyra er eflaust herbergið hans Kristjáns, ekki af því að það er hreint, fínt og snyrtilegt...nei, vegna þess að nú liggur yfir því hvít-ryk-hula...svona næstum eins og snjór yfir öllu!
Ég er með ryk í hárinu og allsstaðar, búin að juða og juða gluggana í þessu margumrædda herbergi, með, reyndar, ágætis árangri. Nú vona ég bara að ég verði það dugleg í fyrramálið að ég skríð ekki aftur upp í rúm, heldur fari bara að mála :) og kanski...eða ég lifi í þeirri veiku von, að kanski verði ég búin að þessu fyrir jól. En þá á ég reyndar eftir að laga til og þrífa alla hina hluta íbúðarinnar...og úfff púfff, það verður að ég held, bæði erfiðara og leiðinlegara heldur en að juða upp málningarský!

Best að fara að sofa bara og vonast til þess að ryk-skýið verði að einhverju leiti sest í fyrramálið ;) Mjá...

Till next...adios

Kærustur

2008-12-16T00:05:00.002Z

Ég rölti með Mikael á sundæfingu í dag, á leiðinni frá skólanum í sundið þá sagði hann mér þetta: "Mamma, ég veit um einn strák sem á tvær kærustur og hann er búinn að kyssa þær allar!"
Hehe...svo sagði hann reyndar líka að þessi strákur væri dálítið ruglaður, næstum alveg eins og einn sem er með honum í bekk ;) en þess ber að geta að þessi "kærustumargi" ungi drengur er í Lundarskóla ;)
Annars stóð Mikael sig vel í sundi, synti alveg eins og herforingi, af meira kappi en forsjá...sennilega hefur hann það frá mér ;)
Ég fór á ógurlegt skrall sl.laugardagskvöld, á jólahlaðborð með vínklúbb Ak. á RUB23, flottur matur og góð vín og góður félagsskapur...endaði alveg með hressasta móti ;) var samt ekki eins hress daginn eftir, þegar ég var að steikja laufabrauð í sveitnni og þurfti að nota allan minn vilja til að æla ekki ofaní steikarpottinn ;) varð voða fegin þegar Sverrir bró plataði mig upp í fjárhús...það var hressandi þótt það hafi kanski ekki verið alveg jafn mikil hjálp í mér og til stóð...en eitthvað af hrútum komst samt í kindurnar ;)

Ástandi í efnahagsmálum landsins virðist ekkert vera að batna nema síður sé...nú er hver sparnaðaraðgerðin að reka aðra og allir í lausu lofti með allt.
Sumar aðgerðirnar eru samt næstum því meira en lítið skrítnar, það á t.d að moka Keflavíkurflugvöll sjaldnar og lýsa hann minna en verið hefur...samt ekki að minnka öryggið...uuu...ég veit að ég er næstum ljóska, en hefur þá ekki verði mokað og lýst of mikið hingað til, ef það er hægt að minnka þetta án þess að minnka öryggið??? Spyr sá sem ekki veit og lítið vit hefur á flugi.
Svo eiga náttúrulega allir háskólar landsins að spara...en jafnframt að fjölga nemendum, svo að þeir sem að misst hafa vinnuna geti farið í skóla...ekki er ég heldur að fá þetta reikningsdæmi til að ganga upp, enda alltaf verið léleg í stærðfræði.

Tunglið veður í skýjum...bókstaflega...jólasveinarnir detta inn um gluggann hver á fætur öðrum. Fór í Toys-R-us í dag, þar er bara ekki hægt að kaupa nokkurn fjára fyrir minna en 2000kr. og ég er ekki að ýkja nema um svona fimmhundruðkall ;)
Eins gott að jólasveinarnir séu vel efnum búnir og fái vinnu næsta sumar í kreppunni ;)
Hætt að bulla í bili...

Till next...adios

Próff

2008-12-09T08:49:00.002Z

Jæja, þá er ég að fara í "prófið" í dag...á ennþá eftir að lesa helling, svo ég ákvað að blogga bara aðeins...ekki virðist prófið ætla að lenda á heppilegum degi, því ég er ða fyllast af hálsbólgu og kvefi...aaaaaaaatjú!!!

Ég fór með Kristján til tannlæknis í dag, tvisvar reyndar, þurftum að bíða svo lengi að við fórum heim og biðum aðeins þar...áttum sum sé að mæta kl.3 en komust að korter fyrir fjögur, eitthvað var þá minn góði vilji til að láta ekkert fara í taugarnar á mér og brosa út í einn farinn að veikjast á þeim tímapunkti. Enda var ég að lesa og lesa og mátti ekkert vera að því að hugsa um tannheilsu drengsins. En það er víst allt í skralli hjá honum, eins og vanalega, glerungseyðing og ves...ég kenni náttúrulega um lyfjanotkun á yngir árum (hummm, þetta hljómar kanski undarlega). En nú er bara drengurinn kominn í gos og safa bann...sem á eftir að verða erfitt...fyrir mig altso ;)
Humanity- An Introduction to cultural Anthropology liggur hér á borðinu og horfir biðjandi á mig...best að lesa eitthvað fyrir prófið á eftir...og hnerra og snýta og aaaaaatjú!

Bless you...

Till next...adios

Desember

2008-12-04T19:00:00.002Z

Tíminn líður hratt...
Það er víst kominn desember...
Eitt próf eftir í skólanum, og ég að stinga út með Sverrir.
Það er nú aldeilis fínt að fá útrás í skítnum eftir allt andlega puðið í skólanum.
Þarf reynda að fara að lesa eitthvað undir þetta próf, en er ekki komin í gírinn ennþá...dett sennilega í hann degi fyrir próf...púfff, það væri mér líkt!
Það er allt í rugli ennþá í pólitíkinni, enda skrítin tík þessi pólitík!

Annars gegnur vel að halda mér upptekinni...þegar ég kom heim úr fjárhúsunum áðan þá var aftur allt komið á flot hjá mér...reyndar ekki jafn mikið og um daginn, en nóg samt, eins gott að ég var ekki lengur að heiman, því blessaðir nágrannarnir eru ekki alveg með þeim skörpustu...þau eru ennþá að spyrja hvaðan vatnið komi ;)
En ég hringdi í stíflulosara og mæta þeir eldsnemma í fyrramálið með rörmyndara með sér og alles...nú skal sko tekið á vandanum...amk til lengri tíma en síðast ;)
Bíllinn minn fíni er líka að fara í lækinsskoðun í fyrramálið því eitthvað smálegt þarf að laga fyrir frekar fúlan skoðunarmann hjá bifreiðarskoðunnarstöðinni...hann var greinilega eitthvað pirraður í geðinu kall greiið. En ég ákvað að láta það ekki á mig fá og þakkaði honum bara fyrir græna miðann sem hann límdi á fína bílinn minn :) Ætla svo að mæta aftur í næstu viku og láta hann plokka miðan af ;)

Ég var nefnilega að ákveða að ég ætla að reyna að láta ekkert fara í taugarnar á mér...ég vel bara að brosa og leysa vandann og láta pirrandi og mis heimskt fólk svífa frammhjá með bros á vör :)
Ef þér lesandi góður finnst þetta too mutch þá so what ;) hehe

Læt þessum gleðipistli lokið í bili, ætla að klára heimtökumatinn minn...má ekki vaska upp sko, svo ekki bætist í flóðið ;) og taka ákvörðun um hvort ég nenni á borgarafund í Deiglunni...efa það samt ;)

Till next...adios

Af bíói og bulluskjóðum

2008-11-29T17:19:00.002Z

Jamms og jæja,
Ég fór í bíó í dag með Mikael og vin hans, Kristján nennti ekki með og þykist vaxinn upp úr teiknimyndum. Við fórum að sjá Madagaskar II og hún var mjög góð, ég hló eins og strompur oft á tíðum. Komst reyndar að því í upphafi bíósins að ég er djéskotans aumingji, fór næstum að grenja yfir Coca-Cola auglýsingu...er ekki að grínast, fékk tár í augun og alles, er næstum ennþá klökk ;) hehe...ýki smá núna.
Eftir bíóið þá fórum við á Bláu könnuna og fengum okkur kakó, þar sat við næsta borð einn stríðnispúki frá Húsavík, veit engin deili á þessum vinalega kalli, en hann fíflaðist í strákunum og ekki leiddist þeim það :)
Svo átti að kveikja á jólatrénu á torginu, þar var danska fánanaum flaggað sem aldrei fyrr...annað hvort hef ég ekki tekið eftir honum áður, eða bara óvenju mikið að horfa á umhverfið núna...hummmm...vi bliver dansk snart ;)
Tónlistarskólinn var nýbúinn með atriði þegar okkur barr að garði, eða torgi...og við tóku "kynnarnir" sem voru Lápur og Skrápur, ég verð bara að óska þeim til hamingju með það að þeir voru leiðindarskjóður!
Þeir röfluðu og bulluðu en bara alls ekki neitt fyndið kom út úr þeim, því miður. Eftir allt það bull þá kynntu þeir bæjarstjórann til leiks, eða ræðuhalda og þá gáfust nú mínir menn upp og vildu heim í snatri, var nokk sama um þetta jólatré!
Enda voru þessar 15 min eða svo sem við stoppuðum þarna ekki mjög barnhæfar...og varla hefur bæjarstjórinn toppað það ;)

Jæja, er að hugsa um að skrifa bara ekki meir í bili, er einhvernvegin í þannig skapi að ég gæti átt það til að skrifa eitthvað sem ég sæi eftir...og ekki er það nú gott. Er mikið að spá í að fara í sveitina á morgun, stinga út skít og athuga hvort mér líður ekki betur á eftir :)
Það þurfa margir að stinga út hjá sér skítnum þessa dagana ;)

Reyndar fór ég í gær og keypti jólagjöf handa sjálfri mér ;) og búin að opna hana og prufa. Keypti mér snjóbuxur og úlpu...þetta svínvikaði í útiverunni í dag, svo nú er bara að bíða eftir að koamst á skíði :)

Ha de bra :)

Till next...adios

Tja...hvað getur maður sagt?

2008-11-24T22:40:00.002Z

Það voru umræður á alþingi þegar ég kom heim úr skólanum í dag, var verið að fjalla um vantraust tillögu á ríkisstjórnina. Það var mikið rifist, hróp og köll, þennan tíma sem ég hlustaði með öðru eyranu, þóttist vera að læra með hinu eyranu...en var svona meira að skoða stöðuna á Facebook ;) En svo þurfti ég að drífa mig út úr húsi um sex leitið og þá var enn rifist í útvarpinu.
Eftir síðbúinn kvöldmat og smávegis lærdóm þá sest ég við sjónvarpið, þar var verið að sýna frá borgarafundi í Háskólabíó, þar var líka mikið sagt og klappað og púað...ætlaði reyndar að gera tilraun til að horfa aftur á Heroes-þátt, svo ég skipti yfir á borgarafundinn í auglýsingahléum...veit svei mér ekki hvort var skrítnara á að horfa, Heroes eða borgarafundinn. Fyrir mér var þetta svona álíka raunverulegt.
Verð bara að segja að ég skil ekki neitt í neinu, ég skil ekki afhverju ríkisstjórnin uppfræðir ekki okkur almenning um athafnir sínar, svo við höldum ekki öll að þau séu ekki að gera neitt...ég skil heldur ekki þá sem láta frysta lánin sín til þess að geta notað peninginn sem ella hefði farið í lánaafborganir (eins og áður) til þess að sukka bara pínu meir. Ég hef nefnilega bara lúmskan grun um það að við almenningur (allir nema ég náttlega) séum bara búin að lifa í sukki og svínaríi undanfarin ár og nú eru það timburmenn sem sumir eru að reyna að forðast með að fá sér bara nokkra snafsa í viðbót!
Hverjir hafa ekki farið í utanlandsferðir upp á krít sl.ár?
Hverjir hafa ekki tekið lán algerlega að nauðsynjarlausu? t.d til að kaupa sér flatskjá, risa jeppa, hjólhýsi, hunda eða eitthvað sem við ættum eðlilega að komast af án!
Í fyrsta sinn í laaaangan tíma þá vorkenndi ég þeim greijum, sem sátu á borgarafundinum, úr ríkisstjórninni...það var alveg drullað yfir þau....reyndar vorkenndi ég þeim ekki lengur í fréttatímanum á eftir, þar sem parið "krúttlega" Geir og Ingibjörg Sólrún sögðu að þetta hefði verið fínn fundur...hummm, tala um að skvetta vatni á gæs, ég veit það a.m.k að ef ég hefði setið þarna í þeirra sporum, þá hefði ég löngu verið gengin grátandi á dyr.

Jæja, ég varð bara aðeins að pústa, er að þykjast vera að læra fyrir próf, svo það er best að koma sér bara í rúmið :)
Njótið alls hins besta sem kostar ekki neitt :)

Till next...adios

Gaga

2008-11-18T20:36:00.002Z

Ég hef haft svo mikið að gera undanfarið að ég hafði ekki einu sinni tíma til að blogga á sjálfan afmælisdaginn minn...en ég er nú vön að koma því að hér til að fiska eftir afmæliskveðjum ;)
Annars er Facebookin alveg að bjarga mér þar, því ég hef aldrei á æfinni fengið jafn mikið af kveðjum, svo fékk ég slatta af sms-um líka og líka svona face to face ;)
En afmælisdagurnn 15.nóv. var sum sé bara alveg hinn besti dagur, þótt ég hafi þurft að mæta í skólann kl.12 og taka svo viðtal fyrir jólablað Vikudags og vinna það, þá endaði dagurinn í matarboði, rauðvíni og afslöppun og það var nákvæmlega það sem ég þurfti :) Hefði ekki haft orku í djamm þótt ég hefði reynt það...

Ég er sem sagt búin að klára eitt vídeó verkefni, sem á að sýna í skólanum á morgun og sennilega líka á N4 um jólin ;) og núna er ég á fullu að safna og vinna efni í jólablað Vikudags, þetta er hellings vinna (púl að plata ættingja og vini til að skrifa fyrir sig ;) hehe) en þetta er rosa gaman. Svo þarf ég líka að gera ritgerð sem skila þarf nk.mánudag, eitt heimapróf fyrir þriðjud. og svo verður bara næs tími eftir viku og bara desember próf eftir :) Það sem bjargar mér líka alveg er að við vorum tvær að vinna vídeóverkefnið og verðum tvær að vinna ritgerðina ;) Alltaf gott að vinna með góðu fólki ;)

Það er víst ennþá kreppa, þótt ég gleymi því stundum þegar ég hef engan tíma fyrir fréttir ;) en þó frétti ég af formanni vor, afsögn hans og leyfi á Kanarí ;) Ég skil hann Guðna vel að hafa stokkið úr landi, ekki fengi hann frið hér, vona bara að hann njóti frísins. Það besta í stöðunni núna fyrir framsókn væri að moka þessu gamla liði út, sem er hvort sem er alltaf að rífast, og skella inn nýju orkumiklu fólki :)
Annars er ég alveg komin inn á þá línu að stofna bara nýjan flokk, held að nafn Framsóknarflokksins hafi borði of mikla hnekki til þess að hægt sé að bjarga honum...en það finnst mér reyndar líka um Sjálfstæðisflokkinn!!!

Jæja, var búin að lofa mér að fara snemma í rúmið í kvöld, tek með mér smá lesefni fyrir ritgerðarbrölt á morgun ;)

Góðar stundir allir saman og takk fyrir allar afmæliskveðjurnar :) líka þeir sem gleymdu að senda mér kveðju, veit að það var ekki með vilja ;)

Till next...adios

Texti

2008-11-15T00:19:00.002Z

Það er mikið að gera á litlu heimili, en nenni nú ekki að væla yfir því núna. Það var þriðji í kabarett í gærkveldi, en þá vorum við með styrktarsýningu fyrir hann Jón Gunnar, það gekk glimrandi vel, fullt hús og fjör :) Í tilefni þess ætla ég að skella hér inn einum texta sem ég samdi og var notaður í kabarett, það var alltaf verið að glamra þetta lag á píanó á hæðinni fyrir ofan, já píanósnillingurinn hefur tekið talsverðum framförum sl.ár ;) En lagið er sum sé "Slipping through my fingers" með ABBA og var náttlega í ABBA myndinni ógurlegu sem er enn í bíó ;) en nó bull, hér kemur textinn sem by the way er saminn fyrir kreppu ;)

Sól rís á ný
Gyllir fjöll
Fegrar fjörðinn allan
Kindur á beit en kýrnar fjósi í
Ég held af stað geng um tún horf‘á gróður dafna
Og Þarf mér að tilla hér um stund

Sú tilfinning að horfa yfir fjörðinn
Er engu lík og allir þekkja það
Sem átt hér hafa stund og ævi sína
Og alltaf elskað það

Gengur mér úr greipum þessi jörð og þessi dalur einhvertíman?
Nú margs ég sakna
Gengur mér úr greipum þessi jörð?
Sé ég virkilega allt það fagra allt það góða er mér hlotnast
Og ætt að þakka
Gengur mér úr greipum þessi jörð?

Draumaheim í allt er gott, enginn kvíðatregi
Vitjar mín fólk sem hér áður gekk um grund
græddi upp jörð, ól sín börn án allra ofurþarfa
og gerði fagra fjörðinn það sem hann er.

Sú tilfinning að horfa yfir fjörðinn
Er engu lík og allir þekkja það
Sem átt hér hafa stund og ævi sína
Og alltaf elskað það
Gengur mér úr greipum þessi jörð og þessi dalur einhvertíman?
Nú margs ég sakna
Gengur mér úr greipum þessi jörð?
Sé ég virkilega allt það fagra allt það góða er mér hlotnast
Og ætt að þakka
Gengur mér úr greipum þessi jörð?

Sú tilfinning að horfa yfir fjörðinn
Er engu líka og allir þekkja það
Gengur mér úr greipum?

Sól rís á ný
Gyllir fjöll
Þurrkar tár af vanga
Ég áfran held, brosi af tilhlökkun á ný

Lífið er dásamlegt :)

Till next...adios

Crazy days

2008-11-10T17:58:00.002Z

Svo mikið að gera, svo lítill tími...nú er allt í gangi í skólanum, verkefni og ritgerðir dynja á manni sem aldrei fyrr, auðvitað er mikill léttir að vera þó laus við kabarett...en samt ekki alveg, það verður nefnilega aukasýning á kabarett nk.fimmtudagskvöld kl.21:00 en það verður styrktarsýning fyrir hann Jón Gunnar ofurkrúttfrænda ;) Endilega allir að mæta, sjá frábæra sýningu og styrkja gott málefni og góðan mann :)
Tók reyndar og úrbeinaði heil óksöp af rollum í gær(ekki ein samt), sem voru svo hakkaðar og settar í poka, gott að eiga hakk í kreppunni ;)
Svo er saumaklúbbur í kvöld hjá henni Gústu :) ekki verður það nú leiðinlegt :)
Svo verður bara skóli og verkefnavinna það sem eftir er vikunnar...ég er farin að láta mig dreyma um jólafrí...og er harðákveðin í því að taka alls ekki meira en 17 einingar eftir áramót ;)
Jæja, er stokkin í að elda pasta fyrir strákana og svo í klúbb ;)
Hafið það gott allir saman :)

Till next...adios

Fyrsti í kabarett

2008-11-08T01:23:00.002Z

Jæja, það var kabarett sýning hin fyrri í kvöld, gekk bara alveg glimrandi vel...næstum of vel svona fyrir föstudagskvöld segja sumir ;)
Svo verður bara sýning og ball annaðkvöld...svo nú er bara að dusta rykið af góða skapinu og dansskónum og skella sér á skemmtun og ball :)
Annars er ennþá allt á fullu hjá mér, vantar marga tíma í sólarhringinn...var á árshátið í gær hjá Kristjáni mínum, hann stóð sig eins og hetja...rosa flottur strumpur, blár og sætur ;)
Svo var sjóræningjasund hjá Mikael mínum í dag, hann kafaði eftir gulli og gersemum stanslaust í 45 mínútur...hann verður flottur í sundinu einhvern daginn :)
Óskup sem maður á flotta stráka :)
Svo ég hef mest verið að sinna strákunum svona á milli skóla og æfinga þessa dagana, svo er ókristilegur skóli í fyrramálið...á laugardagsmorgun sem er ekki fallegt af kennaranum, en svona varð þetta bara að vera. Svo eftir skóla þarf ég í verkefnavinnu og svo seinni kabarettsýning og ball um kvöldið...og svo heimspekikaffihús og rolluúrbeining á sunnudaginn...dúdíraríra...
Er að leka niður og farin að sofa...
Góðar og glaðar stundir :)

Till next...adios

Afmæli Árna

2008-11-05T11:22:00.003Z

Árni bró á afmæli í dag, og langar mig hér með að óska honum til hamingju með afmælið :)
Til hamingju Árni og hafðu það gott í dag og alla daga :)

Langar einnig að óska Obama til hamingju með að hafa náð kjöri til forseta USA, þetta er greinilega stór dagur í dag ;)

Vona svo bara að alir hafi það sem best í kreppunni...muna bara að besta ráðið við henni er: kreppa - rétta, kreppa - rétta ;)

Till next...adios

Allt á fullu

2008-11-04T17:23:00.002Z

Ákvað að gefa mér örfáar mínútur til að rita hér inn smá bull, bara svona láta vita að ég er ekki alveg hætt að blogga ;)
Nú er rosa törn í skólanum, verkefni og ritgerðir sem þarf að skila...úfff, og svo var ég náttúrulega svo "gáfuð" að taka þátt í kabarett í Freyvangi og þar með eru öll kvöld undirlögð...held að þetta sé kallað að hugsa ekki fram í tímann, enda hef ég aldrei verið þekkt fyrir það ;)
Annars er ég að verða vitlaus á krepputali, finnst þetta hljóma í eyrum mér allan daginn, auðvitað er þetta allt saman slæmt, en ekki batnar það ef maður er komin með gubbu af endalausri umræðu en engum gjörðum.
Heyrði smá umræðu í útvarpinu í morgun, þar sem fólk mátti hringja inn og tjá sínar skoðanir, þar hringdi ein kona með þá alvitlausustu hugmynd sem ég hef nokkru sinni heyrt!
Hún sagi, sem rétt er, að þeir sem skulduðu eins og af húsnæði og annað, væri að taka á sig auknar skuldir vegna kreppunnar, sum sé lánin að hækka eins og allir vita. En þetta fannst henni ekki réttlátt, heldur vildi hún láta senda skuldabréf á alla þá sem ekki skulda svo þeir geti borgað meira líka! Jamm, þetta er kanski pínu ruglingslegt, en svona var þetta. Svo ef ég tæki mig sem dæmi, sem á ekki neitt, en skulda ekki neitt (nema þá námslánin mín) þá væri alveg upplaggt að ég fengi bara að borga kanski eins og 20 millur eða svo, svona bara svo ég geti fengið að vera með í skuldadansinum....dahh...Auðvitað er óréttlátt að skuldir og afborganir á húsnæði sé búið að hækka upp úr öllu valdi, en vonandi skánar það eitthvað einhverntíman og fólk á þó sitt húsnæði eftir sem áður...en á ég bara að borga helling fyrir ekki neitt...eiga ekki neitt eftir sem áður??? Held að þessi kellingarskrukka hafi ekki alveg verið að hugsa heila hugsun...

Jæja, búin að hella úr smá úr skálum reiði minnar...á samt slatta eftir sem ég þori ekki að gusa yfir alnetið ;)

Till next...adios

Hananú

2008-10-30T18:45:00.002Z

Fór í ræktina í dag, eftir einn skrítnasta tíma í HA frá byrjun...ætla ekki einu sinni að skrifa um það að svo komnu máli...kanski seinna.
Mikael Hugi kom heim í dag í 4 húfum...mjög ánægður með sig, enda var orðinn talsverður skortur á húfum...nú er næsta skref að ná honum heim í slatta af vettlingum ;)
Annars virðist lesturinn að vera að koma hjá honum, svo það eru jákvæðar breytingar þar á bæ.
Ekki sömu sögu að segja um gelgjuna í augnablikinu...sá að hann hafði ekki unnið í tímum eða skilað heimanámi í stærðfærði síðustu vikuna, var náttúrulega ansi þung á brún...Kristján litli hafði ekki mjög sterka málsvörn, eða eins og hann sagði: "ég er bara ekkert góður í stærðfræði" hummm...ég sagði honum líka það að ekki batnaði það ef hann ynni ekki í tímum og skilaði ekki heimanámi. Svo nú er drengurinn kominn í tölvustraff og er í afar megnri fýlu inni hjá sér!

Kabarett æfingar eru bara öll kvöld núna, brjálað að gera í skólanum, svo þetta er að öllu leiti bara alveg ljómadi allt saman ;)
Fór i skóbúð í dag að leita af kuldaskóm á Kristján, það gekk erfiðlega, því lítið sem ekkert var til í hans stærð! Og bara ekkert væntanlegt...kallinn í skóbúðinni sagði bara að það væri sko ekki von á neinum vörum. Vei vei vei...var svo harðákveðin í því að láta ekki kreppuna pirra mig í dag, að ég hamaðist í ræktinni og hékk á Facebook...;) hehe...þarf samt að klára eina ritgerð við fyrsta tækifæri...well, koma tímar koma ráð ;)
Hafið það gott í snjónum...

Till next...adios

Ææææ

2008-10-28T16:45:00.002Z

Akkúrat núna, þá finnst mér Íslenska ríkisstjórnin og ráðamenn vera aumingjar. Og ef þeir vilja lögsækja mig fyrir meinyrði, þá bara gott og vel.
Var að- lesa það inn á mbl.is eða visir.is að Færeyingar vilji lána okkur aur...eða einhverja milljarða. Mér finnst þetta óskup fallegt af færndum vorum Færeyingum, en um leið hugsaði ég: hvurslags djöfulisns aumingjaskapur og heimskuháttur kom okkur hinum venjulega Íslendingi, í þessa hrikalegu stöðu að við þurfum að fá lán hjá þjóð, sem nb. er ekki einu sinni fullvelda ;)
Mér finnst að ríkisstjórnin geti bara sagt af sér í hvelli og þjóðstjórn Færeyinga tekið við stjórninni...þeim viriðist amk ganga betur en okkur að stýra sínu skipi.
Ég er nú að reyna að hugsa ekki alltof mikið um þetta allt, svo sem nóg annað að hugsa um, en stundum verð ég bara alveg foxill yfir þessum drulluháleistum sem lögðu landi í rúst.
Þetta er bara eins og ef maki manns til fjölda ára, sem maður hefur treyst fyrir börnum, búi og fjármunum öllum, myndi bara berja mann í buff, nauðga og skilja eftir allslausan og nakin á öskuhaugunum!

Skamm Dabbi Odds
Skamm Geir H.H
Skamm ríkisstjórn
Skamm útrásaraumingjar

Já ég er bara fúl!
Það er alveg nógu erfitt að þurfa að búa á skítaköldu landi, með snjó og roki stæstan hluta ársins, þótt maður þurfi ekki að hokra upp á haugum líka!
Það verða engin knús og faðmlög til þess að bjarga málunum...
Eflaust verður runnin reiðin af mér eftir smá stund og ættjarðarástin kviknar á ný...en þangað til...skrambans!

Till next...adios

Músagildran

2008-10-27T17:00:00.002Z

Maður var reyndar í hálfgerðri músagildru í gærmorgun, bíllinn á kafi í snjó og maður lét ýmislegt fara í sínar fínu pirrur, eins og fasta bíla sem voru fyrir manni og stelpur sem vissu ekki einu sinni hvort fasti bíllinn þeirra væri framhjóladrifinn eða ekki ;) en það er allt önnur saga sem verður ósögð látin hér ;)
Leikhús ferð var farin í LA, í alvöruleikhúsið, þá meina ég samkomuhúsið, en ekki rýmið sem er í Dynheimahúsinu og innifelur í sér slagsmál um sæti og þh. En þetta var sum sé ALVÖRU leikhúsferð...nema kanski það að leikararnir flestir, voru ungir og nokkuð óreyndir. Nú er ég alls ekki að lasta áhugaleikhús þegar ég segi að þessi ferð í LA minnti mikið á leikhúsferð í áhugaleikhús :)
Kanski sýnir það bara hversu áhugaleikfélög mörg hver (og þá auðvitað sérstaklega Freyvangsleikhúsið) standa framarlega í leiklistarheiminum. Kanski á þetta efir að slípast hjá þeim, en mér fanst þau mörg hver ekki sannfærandi í leik sínum. Og sýningin datt niður dauð á tímabili...og þá er ég ekki að tala um morð, heldur bara þegar ekkert er að gerast...sem er arfaslæmt þegar um morðgátu-leikrit eftir Agöthu Cristie er að ræða ;)
"Gamla" fólkið í sýningunni fær plús hjá mér, meira að segja Alli Bergdal sem ég er ekkert rosa skotin í ...var bara nokkuð góður.
Nú var ég víst búin að lofa honum Þránni Karlssyni að kjafta ekkert um söguþráð verksins, svo ég fer ekki meir út í það...nema það að í miðri sýningu mundi ég allt í einu hver morðinginn var ;) sá þetta í sjónvarpinu fyrir margt löngu...held ég...hafði amk rétt fyrir mér ;) enda svo svakaleg rannsóknarlögga í mér ;)
Mæli samt algerlega með því að allir farí leikhús...því það er gaman ;) held samt að það verði betra og skemmtilegra stykki á fjölum Freyvangs í vetur en þetta ;) Gaman að segja frá því að við vorum á tímabili að spá í Músagildruna í Freyvangsleikhúsinu og hefðum potttttþéttttt gert það betur en LA ;) ekkert mont...nei, bara veit það ;)

Jæja, hætt að bulla...ætla að elda kvöldmat og fara á kabbaæfingu í kvöld...og mæta ólesin í tíma á morgun...old news ;)

Till next...adios

Í fyrsta skipti...

2008-10-23T12:10:00.002Z

Fyrir rétt um ári síðan, var ég í fyrsta skipti með debetkortareikninginn minn réttu megin við núllið. Í fyrsta skipti síðan ég fór að hafa eigin stjórn á fjármálum mínum (samt ekki beint eigin stjórn, þar sem maður var í einhverju kallastússi) þá var ég ekki með yfirdráttarheimild í notkunn. Og oftar en ekki talsvert mikilli notkunn...Góðærið sem Dabbi kóngur predikaði svo oft um var svona álíka raunverulegt fyrir mér og keisarinn í Kína á 17. öld, vissi að þetta snerti einhverja en það var laaaaangt í burtu frá mínum veruleika.
Svo loksins...loksins....LOKSINS...þegar mér tekst að vera skuldlaus og jafnvel eiga smá afgang og leggja fyrir og sjá fram á bjarta framtíð peningalega séð...þá hrynur hagkerfi lanskins með stæl!
Og hver á að redda því??? Jú, hún litla ég og allir þeir ótal ótal mörgu sem eru í nákvæmlega sömu sporum og ég...og þá meina ég, fólk sem hefur lifað spart í ótal ár en rétt komið yfir erfiðasta hjallann...fólk sem hefur ekki hendst til útlanda oft á ári og ekið um á jeppum og hagað sér eins og þeir sem valdið hafa.
Er þetta réttlátt?
Ég bara spyr.
Sorry barlóminn núna, þarf að skrifa 2.kafla í ritgerð og taka eitt próf í dag...og kaupa kuldaskó á gelgjuna og þar sem mánuðurinn er alveg að verða búinn en samt ekki búinn þá verður maður ennþá fúlli útí ástandið...ekki það að ég hafi tapað pening, heldur er bara ca.helmingi dýrara að fara út í búð í dag en það var fyrir mánuði síðan...þannig að ég sé fram á að klára þessar krónur sem ég á bæði hratt og örugglega ;) þökk sé þessum ótrúlega hæfileikaríku stjórnmálamönnum okkar sem stýra landinu....væri ekki í lagi að svifta þá þessum stjórnunarréttindum sínum?

Farin að læra...

Till next...adoios

Mikil viska

2008-10-21T21:02:00.001Z

Ég fékk þetta sent í tölvupósti í dag, og ákvað að skella því hér inn í stað þess að forvarda þetta á einhvern fjölda ;) það fylgdi ekki með hver höfundurinn er, en mikil er sú viska sem hér fer á eftir:

Ég vakna þennan morgun og vel að hann sé góður
vel að hann sé yndislegur, myrkur og hljóður
ég vel að kúra um stund og staðnæmast við það
hve stórkostlegt sé lífið ef fátt amar að.

Ég ákveð því að velja að vandamálin fá
vistuð séu hjá mér til þess eins að ljá
tilverunni ennþá fleiri tilbrigði og fleti
ég tek þeim opnum örmum svo nýtt mér þau ég geti.

Og eftir litla stund ég vel að fara á fætur
faðma þennan morgun og allar hans rætur
hita mér gott kaffi af kærleik þess ég nýt
kex smyr með osti í blöðin svo ég lít.

Að endingu ég segi við þig sem þetta lest
þetta er góður dagur, hafðu það sem best
ég óska þess að hugsanir fallegar þig finni
ég faðmlag þér sendi og kveð þig að sinni.

Till next...adios

Það var allt á floti allstaðar....

2008-10-21T08:57:00.002Z

Það var ekkert spes að koma heim úr skólanum í gær...en fram að því hafði gærdagurinn verð alveg stór fínn. Fór á fund með forseta Íslands, Hr. Ólafi Ragnari Grímssyni, sem var fínt, spurði hann að spurningu og tók í hönd hanst á eftir...en fram að þessu hafði ég aðeins séð kallinn í sjónvarpinu ;)
Svo fór ég á fund í Brekkuskóla og hitti eina fína konu sem er að kenna honum Mikael Huga mínum að lesa ;) það var fínt og við báðar ánægðar með kappann ;)

Svo kom ég heim og þar var bara allt á floti! En niðurfallið hafði stíflast út úr húsinu og bæði vatn úr þvottavél efrihæðarinnar og svo gegnumrennsli úr ofnum búið að fylla þvotta húsið og hálfa íbúðina mína...eldhúsið, gangurinn, baðið og forstofan...allt á floti!
Eftir að ég var búin að snúast í nokkra hringi og bjarga gellustígvélunum mínum úr flóðinu, þá hringidi ég í Friðbjörgu og af góðsemi sinni kom hún og hjálpaði mér :) væri sennilega annars ennþá að þurrka ;)
Dúkurinn í eldhúsinu fékk að fjúka út og einnig teppi fram á gangi, en þetta var gersamlega gegnsósa og hefði eflaust ekki þornað fyrir jól!
Svo það var svo pöntuð pizza í kvöldman og svo brunað á kabarett æfingu...fun fun fun.

Till next...adios

Gjaldþrot

2008-10-17T17:30:00.002Z

Það hlaut að koma að því að ég færi sömu leið og bankarnir og yrði gjaldþrota...þó kanski eini munurinn að ég er ekki búin að eyða helling af peningum sem ég átti ekki...bara öllum sem ég átti, eða því sem næst ;) Nú sé ég bara til hvort ríkið geti ekki bara þjóðnýtt mig svona eins og bankana ;)
Annars kemur þetta væl mitt til af því að ég fór í dag og keypti nagladekk undir kaggann...púfff, ég held bara að þau hafi hækkað eitthvað í verði síðan síðast...það kostaði mig sum sé rúman 61.000 kr. að setja bílinn á vetrardekk...samt fékk ég 10% afslátt.
Svo þarf ég að kaupa sumardekk í vor, því kallarnir spurðu mig hvort ég ætlaði virkilega að hirða þessi dekk...enda voru hundgömul og slitin vetrardekk undir bílnum, svo ég bað þá bara að henda þessum druslum...hlýt að vera búin að safna fyrir sumardekkjum í vor ;)

Jæja, best að væla ekki meira í dag, heldur hafa bara gaman að þessu, ég er amk fær í flestan snjó ;)

Till next...adios

Tilraunir

2008-10-17T11:45:00.002Z

Hann Mikael Hugi minn er rosalega duglegur að leika sér við aðra stráka og þarf helst að vera að leika sér við aðra frá því að hann kemur heim og fram að kvöldmat. Þetta er alveg gott og blessað, nema að uppátækin geta orðið anski skrautleg.
Mikael og vinur hanns eru t.d búnir að grafa heljarinnar holu í garðinum, sem var svo voða voða erfitt að moka ofaní þegar ég komst að þessum uppgrefti þeirra...enda voru þeir bara að grafa eftir fjársjóði, svo þetta var mjög eðlilegt! Svo í gær þá laumuðust hann og þessi mest uppátækjasamasti vinur hans inn í eldhús, náðu sér í mjólk og nesquikk í krukku og fundu haus af fugli úti sem þeir skelltu út í koktelinn! Kristján greiið fann krukkuna út á tröppum, sér haus af fugli í kakógumsinu og bregður svo að hann missir krukkuna og glerbrot, kakó og fuglshaus út um allar tröppur! Ég varð bara ekkert rosa glöð, æsi mig aðeins við strákana sem taka á rás út og hafa vit á að láta ekki sjá sig í svona korter...svona á meðan ég var að þrífa upp ógeðið og afæsast aðeins.
Svo komu þessi grei, til mín inn í eldhús, ekkert nema skömmustulegheitin uppmáluð og lofuðu öllu fögru....og ætla að sjálfsögðu ekkert að gera þetta aftur. Þeir mokuðu meira að segja aðeins betur ofaní fjársjóðsholuna sína, einnig virðist hluti af moldinni hafa gufað upp eða verið tröðkuð niður ;)

Jæja, nóg af prakkarasögum. Ég fór á KEA í gærkveldi, á vínkynningu, drakk þar slatta af misgóðum rauðvínum og fann svo á mér þegar ég labbaði heim...kláraði svo kafla í ritgerð og sendi frá mér, það á svo alveg eftir að koma í ljós hversu gáfulegt það hefur verið ;)
Núna er planið að leggja sig og fara svo með bílinn í dekkjaskipti...held að það sé bara komin tími á nagla...það er bara rétt ókominn snjór ;)

Till next...adios

Annaðhvort

2008-10-15T19:26:00.002Z

Annaðhvort er öllum sem lesa þetta blogg sama um efnahagskreppu Íslendinga, eða þá að það les bara enginn þetta blogg....ég hélt amk að ég fengi alveg svakaleg komment eftir síðustu færslu, en nei, nei....ekki orð ;(
En ekki dugir að gráta það, heldur halda bara ótrauður áfram og hella út skálum sínum, hvort sem þær eru fullar af reiði eða gleði ;)
Það er búið að vera svolítið mikið að gera undanfarið, próf, verkefni og svo á ég að skila fyrsta kafla af ritgerð sem ég er ekki byrjuð á....hummm, já á morgun ;) En ég slæ þessu bara upp í kæruleysi og ætla á fund í Freyvangi í kvöld ;)
Svo tók ég svo hrikaleg á því í ræktinni í dag að ég er að farast úr strengjum og all svakalega þreytt...svo ég bara dæli í mig súkkulaði og kaffi :) Annars hef ég ekki farið svo lengi í ræktina að það var alveg komin tími á svakaleg átök ;) verð að reyna að vera duglegri að fara...reyndar er þetta einungis tímaleysi að kenna en ekki því að ég sé löt...

Jæja, landi er sennilega ennþá í rúst efnahagslega séð...og fíflin sem komu okkur oní skítahauginn eru að semja fyrir okkar hönd um lán...verð að segja að ég hef verulegar áhyggjur af þessu. Ríkisstjórnin og Dabbi Odds eiga að skammast sín og segja af sér ekki seinna en í gær!!!
Annars verð ég bara að fara að gera eitthvað í málunum...
Við eigum að sjálfsögðu að ganga bara Norðmönnum á hönd og hreinsa fyrir þá olíu (þeir vilja jú fá olíuhreinisstöð á Vesfjörðum) og veiða fyrir þá fisk og þeir gefa okkur af olíugróða sínum í staðin ;) þeir eru jú frændur okkar :)

Jæja, ætla að tjilla í hálftíma áður en ég göslast fram í Freyvang...geysp...

Till next...adios

Áríðandi skilaboð til allra Íslendinga!!!

2008-10-13T19:13:00.002Z

Ég er með mjög áríðandi skilaboð sem snerta alla landsmenn:
Þau fyrri eru þau að það er okkur beinlínis stór hættulegt að taka lán hjá alþjóða- gjaldeyrissjóðnum. Það verður til þess að þeir beinlínis stjórna landinu og neyða okkur inn í einkavæðingu til að við getum borgað þeim lánið aftur...myndum stefna hraðbyr inn í það að verða þriðja-heimsríki!!!
Það er mun skárri kostur að fá lán hjá Rússum, sem myndu jú hafa ítök hér á landi, jafnvel skella hér niður herstöð og við myndum kanski bara vera bombuð í burtu einn slæman veðurdag, en það yrði amk (vonandi) nokkuð sársaukalaust og taka fljótt af.
Lang besti kosturinn er að fá lánaðan aur hjá vinum og frændum okkar Normönnum :) Við myndum þurfa að standa með Norðmönnum í öllum ákvörðunum og okkur yrði stjórnað dálítið þaðan, en ég hugsa að það sé bara mun betra en þessi fukking stjórn sem við höfum yfir okkur núna!!!

Svo ég vona að landsmenn taki höndum saman og klikkist algerlega ef sjallaliðinu dettur í hug að fá hörmungarlán hjá alþjóða gjaldeyrissjóðnum!!!!!

Önnur mikilvæg tilkynning er:
Að ég hef tekið að mér umboðssölu á klósettpappír fyrir gelgjuna mína sem er að fara í 10.bekkjar skólaferðalag í vor :)
Þetta er klassa pappír, og algerlega nauðsynlegt að eiga góðan mjúkan pappír á bossann í kreppunni ;) Það eru 48 rúllur í pakkningunni og kosta aðeins kr. 5.600 :)
Ég tek við pöntunum í síma 699-0817 milli kl.8-20 alla daga :)

Látum í okkur heyra og leyfum ekki ribböldum í sjallaflokknum að rústa landinu ;)
Og svo brosa líka til hvers annars ;)

Till next...adios

Reykjavík - Rotterdam

2008-10-09T21:59:00.002Z

Var að koma heim úr bíó, og fyrst ég þurfti hvort sem er að kveikja á tölvunni þá ákvað ég að henda inn smá kommenti um myndina.
Reykjavík-Rotterdam er bara ein besta íslenska mynd sem ég hef séð!!! Hún er vel gerð, góðir leikarar, spennandi, fyndin og bara snilld :)
Mæli með því að fólk streymi á þessa mynd og gleymi krepputali í 90 min eða svo.

Það var viðtal við einhvern kall (ritstjóra viðskiptablaðsins minnir mig) í útvarpinu í dag, og hann sagði að "nú væri tími til að eyða en ekki spara" sem er svo sem alveg lógíst...eins og ég hef alltaf sagt; fólk þarf að fara út að borða, kaupa sér föt og allt það sem fólk gerir vanalega, svo að það fari bara ekki allt á hausinn!!!
Ég ætla sko ekki að láta mitt eftir liggja í að halda þessu landi á floti og mun eyða af fremsta megni...bíóferð, leikhúsferð, veitingastaðaferð..... þetta eru góðar fjárfestingar sem stuðla að góðu skapi sem er algerlega nauðsynlegt um þessar mundir :)

Brostu og allur heimurinn brosir með þér......gráttu og þú verður blautur í framan ;)
Góðar stundir :)

Till next...adios

Í tilefni dagsins

2008-10-09T08:55:00.000Z

Venjulegur bankastarfsmaður misreiknar sig um 20.000.- krónur árlega.

Ég vildi að Davíð Oddsson væri venjulegur bankastarfsmaður

Till next...adios

Útrás

2008-10-08T15:39:00.003Z

Ég ætla ekki í neina útrás eins og bankarnir, maður er nú aldeilis að fá að finna fyrir þessu einkavæðinga-mikilmennskubrjálæði sjálfstæðisflokksinns og félaga hans!
Nei, ég ætla mér hinsvegar að fá smá útrás!!!!
Fór í búðina áðan, held að fólk hljóti að hafa haldið að ég væri að hamstra fyrir krepputímana, en það var bara orðið svo langt síðan að ég fór í búð að það vantaði bara allt mögulegt...og það kostaði sitt....shitt!
Svo tróð ég öllu saman í 4 poka og skellti í skottið á bílnum, fór út í Húsasmiðju og keypti ól á köttinn og tók svo bensín á bílinn (náði að eyða 24.000 kr. á hálftíma). Þetta allt gekk reyndar óskup pirringslaust fyrir sig...það var ekki fyrr en heim var komið. Fukking drusla (þá meina ég ekki bílinn) var búinn að leggja í bílastæðið mitt og bílar í löngum röðum niður allt bílastæði. Ég var komin hálfa leið niður að löggustöð þegar ég fann stæði! Og þurfti tvær ferðir með troðfulla poka úr bílnum og heim! Mikið afskaplega var eigandi bílsins heppinn að vera ekki nálægur þegar ég var að rogast heim með pokana....og fólk yfirleitt bara heppið að verða ekki á vegi mínum!

En jæja, það tók svo langan tíma að ganga frá vörunum að ég var nú farin að róast töluvert, sem betur fer, þegar strákarnir komu heim ;) Nú er meiningin að reyna að læra eitthvað þangað til ég skelli pylsum í strákana og mér í saumaklúbb :)
Það verður nú gaman :)

Till next...adios

Jammogjæja

2008-10-07T08:16:00.002Z

Mig dreymdi í nótt að ég keypti mér hamstur eða naggrís...hann var stór og feitur og hljóp svo eitthvað í burtu frá mér. Var einnig að spá í að kaupa hvolp, en hætti við það og skellti mér á hamsturinn...fanst það eitthvað gáfulegra á þessu augnabliki.
Einnig dreymdi mig að ísskápurinn minn var tómur, átti bara háfan líter af mjólk og einn líter af AB mjólk en var viss um að ég ætti miklu meira!
Skyldi þessi draumur tengjast eitthvað efnahags/bankamálunum á Íslandi í dag?
Ég bara spyr ;)

Till next...adios

úúúúú...efnahagsástand

2008-10-06T17:32:00.002Z

Ég þorði ekki annað en að fara inn á einkabankann minn, rétt í þessu, til að athuga hvort "allir" peningarnir mínir væru ekki örugglega þarna ennþá ;) ...jú að megninu til voru þeir það, reyndar búið að draga af mér eitthvað þjónustugjald fyrir enga þjónustu!!!
En það er þá bara vonandi að þetta þjónustugjald stuðli að því að bankinn fari ekki á hausinn :)
Ég er alveg dottinn oní umræðurnar á alþingi og get enganvegin einbeitt mér að því að lesa undir prófið á morgun...svo ef mér gengur illa þá er það fokking ríkisstjórninni að kenna (já, ég er bara ein af þeim sem getur ekki tekið ábyrgð á mínum málum, það er ALLTAF einhverjum öðrum að kenna ef illa fer ;)
Annars ætla ég bara að bjóðast til að geyma pening fyrir fólk sem á of mikið af honum...tek aðeins smávægilega þóknun fyrir ;) áhugasamir vinsamlegast kommentið endilega á bloggið og ég hef samband ;)

Till next...adios

Dauðasyndirnar

2008-10-05T18:04:00.003Z

Snilld - frábært - æðislegt...þetta er svona mín gagrýni í mjög stuttu máli á leikverkinu Dauðasyndirnar sem er verið að sýna hjá LA núna. Reyndar er þetta gestasýning frá Borgarleikhúsinu, en hún verður ekkert verri við það :)
Þetta var frábær uppsetning og svaðalega vel leikin...greinilegt að þarna var fagfólk á ferð sem var ekkert að gleyma sér í "of margar sýningar" komplexum, heldur nýttu sér út í ystu æsar hversu vel þau kunnu textann sinn og höfðu vakandi auga með öllu sem gerðist í kringum það!
Ætla ekki að segja of mikið til að skemma ekki fyrir þeim sem eiga eftir að sjá þessa sýningu. Ég mæli amk algerlega með henni :)

Jæja, verð víst að fara að læra, er búin að vera í sveitinni í allan dag...mest að borða og horfa á Liverpool vinna Man.C....jiiiiiiha :)
Svo var maður náttlega að segja bless við Nonna bró sem er að arka af stað til Liverpool með viðkomu í Reykjavík. Óska honum og Kathleen velfarnaðar á nýjum slóðum :)

lesa...lesa...

Till next...adios

Kreppan er öllum til góðs

2008-10-04T18:45:00.002Z

Ég var í snilldar matarboði í gær, þar sem niðurstaða umræðna kvöldsins var sú að kreppan væri bara af hinu góða. Hún mindi að lokum leiða til þess að smá þjóðhreinsun verður af þessum sveppum sem þykjast sjórna og ráða öllu....og í næstu kosningum mun vonandi enginn kjósa sjálfstæðisflokkinn ;)

Ég fór í ræktina í fjórða skiptið á fimmtudainn...var svo hryllilega sniðug að fara fyrst á Bautann með bekknum, þar sem ég tróð í mig kjúklingaloku, frönskum og salati...í stuttu máli þá var ræktartíminn erfiður og ég bara fitnaði ef eitthvað var!
Eitthvað var greinilega búið að gera fyrir sturturnar á svæðinu, því síðast þegar ég fór þá rétt lak vatnið úr sturtunni, svo ég þurfti nánast að hlaupa á milli dropanna til að blotna. En í þetta skiptið var krafturinn svo mikill að það lá við að það væri ekkert skinn eftir á mér eftir sturtuna...varð að halda mér í svo ég þeyttist bara ekki oní niðurfallið!
Annars var þetta fínt :)

Mikael kom heim úr skólanum í gær án tösku, án úlpu, án húfu og án leikfimisfata...ótrúlegt að hann skuli ekki gleyma sjálfum sér í skólanum einhvern daginn....ég rak hann með harðri hendi af stað aftur í skólann og sagði honum að sækja það sem á vantaði. Plataði Kristján til að fara með honum...þeir komu svo með flest til baka nema úlpuna...svo ég vonast bara eftir góðu veðri á mándudaginn :)

Well...er á leiðinni í leikhús í kvöld að sjá Dauðasyndirnar...fun fun fun...

Till next...adios

Fyndið :)

2008-10-03T14:36:00.002Z

Rakst á þessar samræður, sem hafa átt sér stað fyrir nokkru, milli Winston Churchill og Lafði Astor, og finnst þetta fyndið :)

Lafði Astor: "Ef ég væri gift þér myndi ég setja eitur í kaffið þitt."

Winston Churchill: "Ef þú værir konan mín, þá myndi ég drekka það."

Lafði Astor: "Þú ert fullur"

Winston Churchill: "Já, frú. Ég er fullur. En á morgun verður runnið af mér en þú verður ennþá ljót."

He he...

Annars er ég að reyna að lesa, en það gengur nokkuð hægt, en samt örugglega...hehe. Ég fór á styrktartónleika Aflsins í Sjallanum í gærkveldi, það var rosa gaman. Skil ekkert í öllu þessu fólki sem mætti ekki...það var fullt af fínum hljómsveitum og til styrktar góðu málefni. Veit ekki hvort að Akureyringar eru svona menningarlausir...hummm!
Það var líka uppboð á tónleikunum, margt eigulegt boðið upp...ég missti mig aðeins í uppboðinu og keypti forláta eyrnatól...eða Professional Reference Earphones eins og það útleggst á engilsaxneskunni...Þau ku víst vera snilld, en mér gengur hálf illa að láta þetta hanga inn í eyrunum á mér...kanski er ég bara með svona lítil eyru ;/
Jæja, best að lesa meira, er að fara í miðannapróf á þriðjudaginn og á eftir að lesa heilan haug...svo er ég náttúrulega voða upptekin alla helgina, matarboð í kvöld og leikhús og partý annaðkvöld...buzy byzy...:)
Gleðilega helgi :)

Till next...adios

Dah!

2008-10-01T22:19:00.002Z

Ég var að horfa á fréttir núna kl.22:00, ég bara varð að sjá fréttirnar aðallega vegna þess að ég hef ekki haft neinn tíma (eða gefið mér hann) til að læra í dag, og á eftir að læra helling...þess vegna fór ég náttúrulega að horfa á seinni fréttir. (Ekki spyrja mig nánar út í þessa röksemdarfærslu mína, því hún heldur hvorki vatni né vindi).
Það sem vakti athygli mína í þessum fréttatíma var að nú ætlar Akureyrarbær að hækka allar gjaldskrár sínar um A.M.K. 10% (sem eftir mínum skylningi verður ekki minna en 15%...maður er nú farinn að þekkja þetta pakk sem situr í bæjarstjórn)...svo var talað við bæjarstjórann...og eins og vanalega var það aumkunarvert.
Auðvitað þótti henni alveg hræðilegt að velta þessari hækkun yfir á heimilin/fjölskyldur í bænum sem mega náttúrulega ekkert við meiri hækkunum en verið hafa (nema náttúrulega launahækkunum) en þetta var og verður bara svona. Hún hefði næstum geta sagt: "Sorry guys, get ekkert að þessu gert". En ég spyr: Getur þetta fukking bæjarfélag ekki bara tekið á sig hækkanir alveg eins og heimilin í bænum??? Getur bæjarfélagið ekki bara þraukað og tekið lán og hjálpað vaxtarpíndu fólki í bænum??? Á bæjarfélagið ekki að hjálpa í stað þess að velta öllum hækkunum yfir á okkur???
Ég segi bara fuss og svei!
Ef ég væri bæjarstjóri þá væru hlutirnir nú ekki svona, sei sei nei...hér væri allt í blóma og allt annað gert en að hækka útgjöld þeirra sem minnst mega við því :)
Ég er nefnilega svo sniðug ;) og ætla líka að verða bæjarstjóri þegar ég er orðin stór :)

Well...verð víst að senda einhver verkefni frá mér fyrir háttinn...og þá kanski betra að fara að vinna eitthvað í þeim ;)

Á meðan að allt hækkar sem hækkar getur þá getum við þó brosað til hvors annars...það kostar ekki neitt og ber góðan ávöxt ;)
Vá hvað ég er góð í spakmælunum...múhahaha :)

Till next...adios

The snow is falling....

2008-09-30T09:12:00.002Z

Ef mig misminnir ekki, þá var bara kominn hellings snjór og kuldi og alles á sama tíma fyrir ári síðan...svo þótt það sé smá slydda og kuldi úti, þá glottir maður bara við tönn og leitar að vettlingunum sínum :)
Nú á rikið banka...aftur...mér finnst þetta pínu skrítið allt saman, enda hef ég lítið sem ekkert fjármálavit....múhahaha.
Þetta er samt pínu svona eins og ef ég sel bíl...og sá sem kaupir bílinn af mér keyrir hann í klessu nokkrum árum síðar...og heimtar að ég kaupi aftur af honum bílinn!!! (eða amk að ég láni honum fyrir nýjum).
Annars virðist bankinn minn (já já auðvitað á ég banka...) ætla að koma sterkur inn og bjarga málunum. Kaupa bara Glitni og leyfa ríkinu að eiga smá part, bara svona til að það líti ekki út fyrir að landsbankinn eigi meiri pening en seðlabankinn...hehehe!
Þetta er Ísland í dag :)

Till next...adios

Hann á afmæli í dag :)

2008-09-29T09:32:00.003Z

Hann Kristján Esra minn á afmæli í dag og er (eða verður kl.17:19) orðinn 15 ára :) Þetta er náttúrulega alveg ótrúlegt...og ég sem bara yngist með hverju árinu sem líður ;) hehe...Hér er hann við uppáhalds iðju sína...þessi mynd er nú sennilega tekin í sumar, og hann hefur alveg stækkað helling síðan ;)

Það er allt að gerast í banka/peninga/stjórnmálum landsins núna, virðist vera...allir á fundum og feykilegt fjör. Ég segi nú bara eins og þeir sögðu í spaugstofunni á laugardaginn...hvar eru allir peningarnir sem bankarnir eru búnir að græða síðustu ár??? Nú geta þessir háu herrar sagt að þeir voni að fólk hafi verið "svo fyrirhyggjusamt" að leggja fyrir pening þegar "allir áttu nóg af honum" ...en áttu bankarnir ekki að vera svo gáfulegir? Nei, þeir máttu náttúrulega bara setja allan sinn gróða í að kaupa hluta í félögum og fyrirtækjum sem eru löngu farin á hausinn...og núna eiga bankarnir bara engann pening til að lána Jóni eða séra Jóni!!! Sniðugt á Íslandi ;)
Ég las snilldar pistill eftir Illuga Jökulsson í Fréttablaðinu um helgina, þar sem hann var að benda Dabba dúdda á að hætta bara sem seðlabankastjóri, mikið var ég svakalega sammála Illuga, eins og ég er reyndar oft. Ætti að gera þennann mann að forsætisráðherra ;)hehe...
Well, hætt að bulla og farin í skólann...
Njótið dagsins í dag og bara sem allara flestra daga :)

Till next...adios

Djamm jamm

2008-09-28T14:01:00.002Z

Sá fáheyrði atburður gerðist í gær að ég fór á ball...það var nú skrall....:)
Annars var voða gaman, ég var nefilega ekkert á leiðinni neitt og ekki í einum einasta djamm/ball gír, en mér var bara ekki gefinn kostur á að segja nei ;) og sé heldur ekki eftir því að hafa farið...langt síðan að ég hef dansað svona svaðalega mikið. Árni bró var á djamminu með bekkjarfélögum sínum úr Hrafnagilsskóla svo við systkinin vorum í rosa stuði...svo kom Sverrir bró og keyrði okkur heim...krúttleg fjölskyldustund ;)
Svo í dag er ég þreytt og örlítið þunn og er alvarlega að spá í að rölta i búð og kaupa haug af snakki og gosi :)
Einnig þarf ég að reyna að lesa svolítið fyrir skólann...geysp...ég hlýt að hressast ef ég rölti í búðina...góða skemmtun í dag everyone :)

Till next...adios

Lærdómur

2008-09-26T14:40:00.003Z

Ég var búin að hugsa mér að sitja sveitt og læra í allan dag...svo uppgötvaði ég það að strákarnir áttu bara að eiga frí í dag, svo það er viðbúið að eitthvað verði minna úr verki en til stóð.
Ég skrapp í ræktina í gær, í 4 skiptið, já já, þið komist ekkert hjá því að lesa um ræktartímana mína...hehe...var svo sem tíðindalítið í ræktinni...engir sýniþarfargaurar í þetta skiptið.

Ég er annars voða andlaus eitthvað, var að koma úr búiðinni, er þreytt og nenni ekki að læra...sennilega vegna þessa að það liggur svo mikið fyrir að ég veit ekkert á hverju ég á að byrja!

Kanski ég lakki bara á mér neglurna og sjái svo til hvort ég fyllist ekki dugnaði og andagift ;)

Till next...adios

How to Argue and Win Every Time...

2008-09-24T20:27:00.002Z

Mig bráðvantar þessa bók: How to Argue and Win Every Time eftir G.Spence. Svona ef einhver lúrir á henni þá þætti mér vænt um að fá hana lánaða :)
Hún er sko ekki til á Amtinu og þetta eina eintak sem bókasafn HA hafði er í útláni og Lögberg lánar þessa bók ekki út!!!
Ekki það að ég ætli að sökkva mér niður í rökræður og hafa alltaf betur ;) heldur er meiningin að skrifa um hana ritgerð.
Annars er fullt að gera hjá mér í lærdóm...geysp...drakk mér til óbóta af kaffi í dag, þetta átti að vera svo fínt til að halda mér vakandi, en þá varð mér bara svo illt í maganum að ég þurfti að leggja mig seinnipartinn ;/
Svo er netið eitthvað að stríða mér...kemst ekki inn á msn og ekki inn á Facebook...svo ég sennilega bara neyðist til að lesa skólabók í kvöld ;)
Það var sláturgerð í sveitinni í gær...sennilega var sett nýtt hraðamet í sláturgerð...enda fagmenn á ferð ;) tókum ein 20 slátur á 2 tímum...er bara ekkert að ýkja núna...

Jæja, hef ekki meira að tjá mig um í bili...var jú reyndar á kynningarfundi hjá 8.-10. bekk í Brekkuskóla í morgun, svo var farið til umsjónakennara, ég lét plata mig í bekkjarráð...hugsaði greinilega ekki nógu skýrt á þessum tímapunkti...var sennilega í einhverju sykur sjokki eftir allt kökuátið...en 10.bekkur var að selja kaffi og kökur...og það er bara ekki hugsunarvænn morgunmatur ;) en ég humma þetta einhvernvegin fram af mér ;) hehe...

Till next...adios

Amerískt...

2008-09-23T08:14:00.002Z

Ég ákvað að sinna bandarísku genunum í Kristjáni í gær og fara með hann á Ameríska-daga í Hagkaupum! En hann var búin að biðja um það síðan fyrir helgi...svo heim var komið með sælgætis-epli, eplakanil-muffins og einhvern hræðilega vondan djús í risa flösku, ásamt öðru eðlilegu fæði ;) kjúllabitum og svoleiðis :) Það er nú aldeilis gott að gelgjan fái smá nasaþef af þessum hluta uppruna síns svona eins og einu sinni á ári ;)
Annars er hann orðinn svo hryllilega duglegur að vakna á morgnana, alveg sjálfur, að það hálfa væri nóg! Þegar hann loksins tekur sig til, þá líka vaknar hann fyrir allar aldir eða kl.06:10 og ég er sum sé vöknuð við hann ca. 06:11 en þá er hann að brasa við að fá sér morgunmat í eldhúsinu og það fer ekki hljóðlega fram. En auðvitað á maður ekki að kvarta...það sem áður tók mig u.þ.b. 45 min að koma honum á fætur, tekur hann sjálfan 1 min. :) Vona bara að hann haldi þessu áfram sem allra lengst :)

Ég náði þeim áfanga í gær að fara í 3 skiptið í ræktina, svo ef ég gefst upp núna þá hefur tíminn ekki kostað nema 15.000 kr. ;) hehe...nú verður maður bara duglegur og kemur út í plús :)
Annars held ég að það sé ekkert hætta á að ég nenni ekki í ræktina, mér finnst þetta nefnilega bara pínu gaman...svo er svo mikið af spaugilegu fólki þarna. Í gær var t.d einn sem sennilega var kraftlyftinga stússari, því hann var með sæmilega bumbu og svaka grifflur og labbaði framhjá tækjunum reglulega (var sennilega inn í horni þar sem eru bara lóð og jötna dót). Mér fannst aðallega fyndið hvað hann var alltaf að rölta þetta fram og til baka...held að hann hafi kanski bara pínu verið að sýna sig með flottu grifflurnar sínar ;)
Svo var þarna líka einhver ofurkrafta kona...var búin að sjá hana hamast inn í jötnahorninu í lóðum, svo kom hún og stökk í eitt tæki rétt hjá mér og dróg að sér einhverja stöng nokkrum sinnum af miklum móð. Ég auðvitað ætlaði líka að prufa sama tæki og settist og reif í stöngina...en hefði nú sennilega fyrr rifið vöðva en að rífa upp þessi lóð sem héngu á stönginni!!! Var ekki pinninn í einum 60 kg. Þegar ég var búin að setja pinnann í 40 þá rétt drullaði ég stönginni að mér...en ekki meira en svo ;)
Ég held samt að ég vilji ekkert verða svona ofurkrafta kelling...fínt að geta opnað krukkur nokkurnvegin hjálparlaust...bið varla um meir ;)

Jæja, þarf að fara að drífa mig í skólann...svo í sláturgerð...bissý Krissý :)

Till next...adios

Partýstúss og Skriðjöklar

2008-09-21T17:44:00.003Z

Þar kom að því að ég færi í partý!
Gústa bauð gömlu og nýju eldhúsliði í partý í gær og þar var náttúrulega vel veitt til hægri og vinstri :)
Ég lét auðvitað ekki mitt eftir liggja í að eta, drekka og tala...mest tala samt!
Held að ég hafi ekki átt mikið eftir ósagt eftir partýið hjá Gústu, því ég talaði svo hryllilega mikið...hún verður sennilega að reyna að halda annað partý svo að hinar geti komist að líka ;) hehe...
Svo tókst mér að draga stuðboltana Evu og Svanhvíti með á hótel KEA þar sem Skriðjöklarnir voru að spila...það var fínt, dansaði smá og drakk smá, gekk svo heim og það gekk vel :)
Við vorum náttúrulega svo miklar prinsessur við gellurnar að við bara gengum inn á ballið þótt við værum miðalausar og allt...en við vorum bara svo glæsilegar ;) tíhí.
En ég entist nú ekki alveg allt ballið...veit ekki hvort ég var svona þreytt eftir að hafa hlaupið um "öll fjöll" fyrr um daginn...eða eftir að hafa talað frá mér allt vit í partýinu ;) en eitthvað var það!

Í dag er ég líka búin að vera þreytt og löt...og ætla að auka enn meira á leti mína með því að panta pizzu í kvöld :)

Mér reyndar tókst að láta Kristján taka mynd af mér fyrir málstofuverkefni í fyrramálið, en við áttum að taka myndir af okkur og reyna að ná til áhorfandans og vekja upp umræður og eitthvað blabla...best að henda inn myndinni...augnablikk...here it is :)
Fyrirmyndin er sum sé Frelsisstyttan ef einhverjir hafa ekki fattað það ;) en hugmyndin er að túlka togstreitu kvenna við að sinna heimilisstörfum, vera flottar og fínar og vera einnig hlaupandi upp um öll fjöll :)
Ég held á bókinni Örvænting eftir Stephan King í annari hendinni og pizzuskera í hinni ;) en það er svona kyndill nútímakvenna ;) hehe...

Leti er í lagi...stundum ;)

Till next...adios

Fool for Love

2008-09-19T10:42:00.002Z

Ég fór í leikhús í gær og sá "Fool for Love" sem var fín sýning sem hafði þó einn stóran galla.
Sá galli er KK, sá kappi er aldeilis ljómandi góður söngvari og lagasmiður, en leikari er hann ekki og hefur ekki meiri hæfileika á því sviði en fuglahræða í roki. Það vakti furðu mína að þessi ágætu lög hefðu ekki bara verið leikin af bandi (þetta litla sem hann spilaði "læv" þar að segja) og fenginn "alvöru" leikari í hlutverkið. Ég sá alveg fyrir mér Þráinn Karlsson eða Árna Tryggvason...hefði verið snilld að sjá þetta hlutverk amk leikið af manni sem getur leikið. Hannes Örn Blandon hefði líka rúllað þessu upp, og hann kann líka á gítar ;) hehe....Jæja, best að blammera ekki KK í spað. Hinir 3 leikararnir sem ég man ekkert hvað heita (gleymdi alveg að kaupa mér leikskrá) voru fínir, samt hafði maður á tilfinningunni stundum að þeir væru búnir að leika þetta svo oft, og kynnu rulluna sína svo vel, að stundum var full mikil værukærð yfir þeim. Hefði viljað halda spennunni allan tímann, það var eins og þau dyttu út stundum. En þetta var alveg fínt, ekki eins gott og "Killer Joe" en ég sé alls ekkert eftir því að hafa farið í leikhúsið...alltaf gaman í leikhúsi :)

Annars er lítið að frétta, ég fór í sveitina á miðvikud. að hjálpa til við smölun og frádrátt sláturlamba. Á eftir að bera þess merki enn um stund, þar sem lærin á mér eru þakin marblettum, meira stórum en smáum. Ætlaði í ræktina í gær, en ákvað að láta það bíða aðeins meðan mesta marið væri að jafna sig...kanski reyni ég að ýta sjálfri mér af stað í dag ;)

Jæja, ætli ég reyni ekki að lesa eitthvað...geysp...stefnir í brjálaða djamm helgi um helgina, Pub-Quis í kvöld (ef ég hundskast af stað) og brjálað partý annaðkvöld...

Góða helgi gott fólk :)

Till next...adios

Að hella úr skálum...

2008-09-17T11:49:00.003Z

Ég er algerlega búin að ákveða að fara aftur í ræktina á morgun...ætlaði í dag, en þar sem ég fer í sveitina seinnipartinn að reka inn og draga úr sláturlömb, þá verð ég náttúrulega að hvíla mig svolítið mikið í dag! ;)
Ég fór á fund í gærkveldi hjá sundfélaginu Óðni, þar sem Mikael er byrjaður að æfa sund, þá verður maður nú að reyna að sýna áhuga og stuðning....Það er skemst frá því að segja að fundurinn var hrútleiðinlegur (með fullri virðingu fyrir hrútum) og var mér að engu gagni. Það var aðallega verið að tala um þau börn sem eru farin að keppa og dúdderí varðandi það. Geysp, hvað ég var fegin þegar þessi fundur var búinn...það vakti reyndar furðu mína hversu fáir foreldrar voru þarna, miðað við að þetta er víst svo vinsælt að það eru langir biðlistar af krökkum sem langar í sund!
Svo var annar fundur í morgun, kynningarfundur fyrir 2.og 3. bekk í Brekkuskóla. Eitthvað var það nú svipað gaman...engar nýjar fréttir, en svo sem allt í góðu að kíkja í skólann og svoleiðis. Mæting foreldra var ekkert til að hrópa húrra fyrir heldur, eða u.þ.b. helmingur.
Svo á víst að fara að skylda mann til að koma í skólann og vera inn í bekk eða í frímínútum í 2 klst. á önn...(eða vetri, man það ekki). Mér finst þar reyndar frekar kjánalegt, finst í góðu lagi að kíkka við, en að vera píndur í það...hummmm...ekki þarf kennarinn hans Mikaels að koma í vinnuna til mín ;) hehe...nú geri ég alla kennara ættarinnar brjálaða ;)

Vaknaði við voða mikið rok í nótt...fór fram og þar sem stofuglugginn, sem snýr í suður, var opinn upp á gátt þá voru öll laufblöð og sandur bæjarins komin inn í stofu til mín...ekkert spes gaman, reyni kanski að ryksuga þegar ég nenni ;)

Jæja, ætli ég dembi mér ekki í verkefni sem ég er búin að humma fram af mér í allan morgun...hafið það gott....rok(-k) og ról :)

Till next...adios

Ræktin

2008-09-15T18:19:00.003Z

Í dag fór ég í líkamsrækt.
Það er flóknara heldur en að fólk heldur.
Ekki sjálf athöfnin, heldur að undirbúa sig undir það að fara í ræktina.
Ég byrjaði á því að reyna að finna mér föt til að fara í.
Íþróttabuxur: Ekki gat ég farið í hlaupabuxunum mínum, því þær eru ansi þröngar, en þegar maður er á hlaupum er það í lagi, en ekki þegar maður er í nágvígi við annað saklaust fólk! Það endaði með því að ég rændi íþróttabuxum af Kristjáni, svörtum og víðum Nike :)
Bolur: Þar versnaði í því. Ég á bara gamla ljóta slitna boli. Ekki gekk nú að fara í "Reykjavíkurmaraþon" bolnum mínum,(frá í fyrra) þá hefði ég eflaust virkað of "pró" sem gekk náttúrulega ekki í fyrsta tíma...maður má ekki gefa saklausu fólki ranga mynd af sér. Ekki gekk að fara í kvennahlaupsbolnum fjólubláa, það var bara eitthvað svo of kellingalegt! Sorrý, get bara ekkert að því gert, þetta eru flottir bolir, en ekki í fyrsta tíma í ræktinni. Að endingu rændi ég hvítum bol af Kristjáni- Addidas :)
Skór: Ég á náttúrlega þessa forlátu góðu hlaupaskó, en þar sem þeir eru úti-hlaupnir og skítugir, þá gekk það ekki...fann eldgamla skó (sem ég notaði þegar ég fór í ræktina með Gústu fyrir ca.10 árum, og entist í ca. 10 tíma ;) dustaði rykið af þeim og reyndi að ná af þeim mesta kattarhárinu og þá var ég bara nokkuð klár. Þessi ferill tók samt u.þ.b. 20 min.
Held að það hafi verið einfaldasti hluti ræktarinnar að kaupa blessaða kortið og eyða þar með langt um efni fram...en maður verður nú að reyna að fíla kreppuna ;)
Svo fór ég í ræktina sem tók mig um 45 min. Ákvað að vera nú ekkert að ofgera mér og mínum strengjum :)
Svo þarf náttúrulega að þvo öll þessi föt fyrir næsta tíma...þetta tekur allt sinn tíma ;)
Þetta er ég, voða hissa á hvað ég var dugleg í ræktinni ;)

Ræktum sjálf okkur :)

Till next...adios

Strengir

2008-09-15T13:27:00.002Z

Það er best að hætta að hneikslast á bloggleti annara og skrifa bara sjálfur ;)

Það bar svo við um þessar mundir, eða nánar tiltekið síðustu helgi, að smala átti saman öllu fé á fjalli...og var það gert, nema náttúrulega þær sem urðu eftir, þær urðu eftir.
Á föstud. skrapp ég í sveitina og smalaði Kaupangstúnið með Sverri bró og Friðriki Inga frænda, gekk það með ágætasta móti, ég þurfti amk ekki að hlaupa mikið, þótt Sverrir hafi þurft að hlaupa talsvert ;)
Á laugard. var svo fjallið smalað, frá Fiskilæk að Bíldsá og gekk það sæmó, frekar var féið tregt til túns að taka og vildi heiðar heimsækja enn um hríð...(alveg að farast úr skáldmæli og er að reyna að auka við málskrúð mitt...vona að fólk fyrrist ekki við;).
En fyrir rest komum við kindunum í hús og eftir smá matarhlé, þar sem einnig var horft á seinnihálfleik Man.United og LIVERPOOL, þar sem Liverpool vann náttúrulega ;) þá var farið að draga í sundur. Gekk það bara ljómandi.
En svo voru náttúrulega þeir sem fæst fé eiga en vilja stjórna mest, búnir að færa til smölun í Fnjóskadal, svo að ég og Sverrir stukkum þangað (eða fórum á pikkuppnum) til að draga í sundur þar. En svo skemmtilega vildi til að kindabílsbílsstjórinn gat komið þá um kvöldið og við náðum að troða öllu okkar fé (eða Sverris) á bílinn. Svo þótt við værum ekki að koma í sveitina fyrr en klukkan var farin að ganga ellefu, þá vorum við nú bara sæmilega ánægð yfir því að þetta væri búið :)
Svo ég bruna af stað í bæinn með Mikael Huga og Guðrúnu Mist innanborðs, en þá vill nú ekki betur til en svo að ég keyri á heimaganginn, hana Esmeröldu litlu :( Hringi alveg skelfingu lostin í Sverrir, sem kemur hlaupandi og bjargar geðheilsu minni...ég gat nú reyndar ekki mikið gert, þar sem lambið kom stökkvandi út úr háu grasi og nánast hljóp á bílinn...en samt leiðinlegt að kála lambinu sem ég hafði mikið fyrir að halda lífinu í í vor...en þessu verður víst ekki breytt.
Í gær var svo frekar rólegur dagur, ég skrapp í sveitina og náði í nokkrar kindur með Sverri, sem voru á Króksstöðum, en fór svo í bæinn og lagaði pínu til...og planaði heil óskup...nú verður herbergið hans Kristjáns tekið í frumeindir fljótlega :)

Reyndar vour merkilegustu fréttir helgarinnar þær, að ég KEYPTI MÉR KORT Í LÍKAMSRÆKT á föstudaginn !!! Er reyndar ekkert farin að nota það, þar sem ég er alveg að farast úr strengjum eftir átök við kindur, en það er best að drolla ekki lengur og drífa sig af stað :)

Till next...adios

Jón Gunnar krútt :)

2008-09-10T17:24:00.002Z

Ákvað að skella hér inn bréfi, sem fer í sveitapóst Eyjafjarðarsveitar nk.laugardag, en það er varðandi hann Jón Gunnar sæta frænda :) Þar sem ég held að margir sem kíkja hér inn á bloggið (þótt ég hafi ekki hugmynd um fjölda þeirra) kannist við kauða og vilja gjarnan leggja sitt af mörkum til að hjálpa honum. En hér er bréfið:

Veitum Jóni Gunnari lið !!
Eins og flestir vita þá varð Jón Gunnar Benjamínsson á Ytri Tjörnum fyrir alvarlegu slysi fyrir tæpu ári og er eftir það bundinn við hjólastól. Jón Gunnar hefur sýnt ótrúlegan dugnað við að koma sér út í lífið á nýjan leik en betur má ef duga skal. Hann er nú að fara í kostnaðarsama endurhæfingu til Frakklands þar sem vonir eru bundnar við að ný meðferð geti hjálpað honum til að ná frekari bata.

Jón Gunnar hefur um árabil verið gleðigjafi í lífi okkar sem búum í þessu sveitarfélagi og aldrei horft í tíma eða fyrirhöfn þegar þurft hefur að taka til hendinni. Nú höfum við tækifæri til þess að greiða örlítið inn á þessa skuld. Ef við tökum okkur saman og leggjum hvert og eitt örlítið af mörkum getum við létt undir með honum í baráttunni sem er framundan.

Hært er að leggja inn á reikning sem hefur verið stofnaður í hans nafni í Landsbankanum, rekningsnúmer: 0162-05-270209, kennitala 270375-3679. Við hvetjum ykkur til þess að koma þessu einnig á framfæri við þá sem ekki fá sveitapóstinn okkar og þið vitið að vildu leggja málefninu lið. Ef fólk vill hafa annan hátt á er hægt að hafa samband í síma 463 1236 eða 868 7121 og við nálgumst framlagið til ykkar.

Vinir og velunnarar Jóns Gunnars

Með fyrirfram þökk fyrir ykkar framlag :)

Till next...adios

Af handbolta og heimsendi

2008-09-09T17:55:00.002Z

Mikael Hugi kom galvaskur heim úr skólanum í gær, dróg upp þetta fína plakat af Ísl.handboltalandsliðinu (áritað og alles) og tilkynnti mér það að hann ætlaði að æfa handbolta!!!
Ég tók nú ekkert alltof vel í það, þar sem drengurinn er nýbyrjaður að æfa sund og einhverra hluta vegna þá finnst mér bara alveg nóg að 7 ára börn æfi bara eitt í einu (bara einhver sérviska í mér...náttlega). En ekki vildi hann láta það stoppa sig, og sagði það ekkert mál að æfa 4 daga vikunnar, 2x sund og 2x handbolta...ég var svona næstum orðin fortöluð um þetta og á fremsta hlunni með að samþykkja allt saman, þegar ég rak augun í það að strákarnir í hans aldursflokki æfa mánudaga og fimmtudaga, eða nákvæmlega sömu dagana og sundið er...og næstum á sama tíma, eða handb.æfingunum lýkur á sömu mínútu og sundið byrjar. Þannig að ég slapp fyrir horn, og ekki verður minst á handbolta hér á þessu heimili í nokkra daga....svo vona ég bara að hann jafni sig á þessu :) Plakatið fína er samt komið upp á vegg, rækilega límt með límbandi...þarf sennilega bara að mála yfir það eftir einhver ár ;)

Kristján tilkynnti mér hinsvegar, þegar ég kom heim úr skólanum í dag, að heimsendir yrði á morgun! Ekkert voða gaman að koma heim og fá þær fréttir, ekki einu sinni komin úr útiskónum. Reyndar fór hann að lesa sér til um þetta á netinu (og er kanski enn að því) og sagði nokkru seinna að það væru 0% líkur á heimsendi á morgun, því að þetta "svarthol" eða eitthvað sem "kremur öll atóm" byrjar ekki að virka fyrr en 21.október eða svo...
Þetta var víst rætt fram og aftur í skólanum hans í dag...ekki gott að fylla gelgjuhugann heimsendahugsunum, nóg er nú að gerast þar samt ;)

Jæja, Mikael sofnaði í sófanum...(var samt ekki á neinum æfingum í dag) svo ég er að spá í að reyna að vekja hann og gefa honum og Kristjáni kvöldmat, hengja upp úr þvottavélinni og kanski lesa eitthvað í skólabókum...Verum nú góð við hvort annað :)

Till next...adios

Réttar réttir

2008-09-08T18:33:00.002Z

Dreif mig og strákana eldsnemma á fætur í gærmorgun og svo brunuðum við austur í Fnjóskadal, eftir morgunmat og eftirrekanir ógurlegar.
Dásamlegt veður, sól og blíða og fullt af kindum í Illugastaðarétt...sem allir aðrir áttu! Sjaldan eða aldrei höfum við (ok, Sverrir bró.) átt svona fátt fé á réttinni eða tvær fullorðnar og fjögur lömb ;) En þetta var nú samt bara gaman og næstu helgi verða svo göngur og meiri réttir...og hellings fleira fé til að draga ;)

Ég á við alvarlegt vandamála að stríða, veit ekki alveg hvernig ég á að höndla það. Ég þarf nefnilega að lesa heila djö...kássu af bókum, greinum og þh. fyrir skólann, sem væri kanski í lagi ef ég yrði ekki alltaf svo hryllilega þreytt þegar ég er að lesa...sem endar yfirleitt (næstum undantekningalaust) með því að ég sofna!
Jafnvel þótt ég sitji á hörðum stól með kaffibollann límdan á hendina...þá sofna ég samt!
...var ég ekki eitthvað að skrifa um þetta á síðasta skólaári líka...hummm!
Sé fram á að sofa mikið í vetur ;)

Jæja, ætla að halda áfram að lesa fyrir kynjafræði, reyna að byrja að lesa fyrir mannfræðina og elda mat í leiðinni...buzy buzy days :)

Till next...adios

Sláturhús 5

2008-09-06T12:20:00.002Z

Vaknaði í morgun við fyrsta hanagal...eða við síðasta þrastartíst! Þetta var alveg eldsnemma, löngu fyrir fyrstu mjaltir og allt. Stökk fram í eldhús, sá nokkra fiðurskúfa á flögir, grimma ketti dansa stríðsdans í kring um öskrandi þröstinn. Ég næ í sóp og sópa kattaróhræsunum í burtu, tek skelkaðan fuglinn og hendi honum út um eldhúsgluggann, hann virðist vera í lagi, þótt ekki flygi hann langt. Ákvað að geyma að ryksuga upp þetta smá fiður þar til dagrenning væri opinberlega viðurkennd, og skreið aftur upp í rúm.
Var vakin aftur miklu seinna af skelkuðum unglingi. Hann sagði að það væri allt út í fiðri og blóðslettum á ganginum og eldhúsinu. Þar sem unglingurinn er mjög dramatískur, þá hélt ég að hann væir bara að gera mikið úr þessum örfáu dúskum á eldhúsgólfinu. Reyndist ekki vera raunin. Kattarófétin höfðu farið aftur og náð sér í annan þröst, eða þann sama, (gleyndi að merkja þann sem ég henti út) slátrað honum á hrottafenginn hátt svo að fiður og blóðslettur voru út um allan gang og allt eldhús, hafa samt farið mun hljóðlegar í þetta skiptið. Svo lá næstum ónartaður fuglinn við matardallinn.
Unglingurinn ryksugaði, ég fór út með líkið og henti því í tunnuna (ekki endurvinnsluna samt) og unglingurinn þvoði líka upp blóðsletturnar. Ætla í tónabúðina og kaupa risa stjóra bjöllu og hengja um háls kattarins. Er líka að spá í að koma á laggirnar dún og fiðurhreinsun og reyna að græða eitthvað á þessu...

Till next...adios

Lesleti

2008-09-05T16:44:00.002Z

Er búin að vera löt hér inni undanfarið, enda svo sem ekki haft mikið að segja...og hef ekki enn ;)
Skólinn náttúrulega byrjaður á fullu og ég engan vegin komin í lestrar-lærdóms gírinn...vona að það fari nú samt að bresta á ;)

Aðafundur Freyvangsleikhússins var sl. miðvikudagskvöld, þar náði ég að koma mér út úr stjórninni og ætla nú bara að njóta þess að kvabba í nýrri stjórn...hehe...

Svo eru Illugastaðarréttir á sunnudaginn...svo hauststörfin eru að bresta á af fullum þunga ;)

Mikael er voða duglegur við að skilja eftir fötin sín og annað lauslegt í skólanum eða í sundi, svo ég fór í göngutúr með hann í dag og fann tvennar peysur ;) kom við í Vaxtarræktinni og spurði um verð á árskortum...þetta er amk fyrsta skrefið í að koma sér í ræktina...búin að vera á leiðinni þangaði í ...hummm....einhver ár ;)
Núna er bara að láta vaða...verð að gera eitthvað, ligg bara á meltunni og hreyfi mig ekki neitt...ekki get ég hlaupið fyrr en hnéið á mér "lagast" :) Svo nú á bara að taka á því!!!

Jæja, búin að ausa full mörgum loforðum núna út á alheimsnetið ;) læt þetta duga í bili...

Till next...adios

Sölukaup

2008-09-01T16:05:00.002Z

Ætla að byrja á að óska sjálfri mér til hamingju með að hafa selt gamla grána (sum sé gamla bílinn, Renault 19 módel 1990) á 30 þús. kall, í dag :)
Þessi peningur dvaldi reyndar stutt við í veskinu, því ég fór nánast beint í BIKÓ og keypti baðvask og blöndunartæki fyrir sambærilega upphæð ;)
Kom einnig í fyrsta skipti inn í Europrice og það er búð sem kemur skemmtilega á óvart...þarna er bara hægt að kaupa allt milli himins og jarðar (ekki gæludýr samt) á ótrúlega óokruðu verði :) þarna náði ég sum sé að eyða meiri pening ;)...Ég kom nefnilega bara miklu í verk í dag, nema náttúrulega að lesa allt sem ég á að lesa fyrir morgundaginn...sem er alveg slatti ;/
Mikael er á sínu fyrsta sundnámskeiði, eða sinni fyrstu sundæfingu...byrjaður að æfa sund með Óðni, vona bara að það gangi vel og hann verði næsti Michael Phelps ;) Nafnið hlýtur amk að vera ágætis byrjun ;)
Jamm, jamm...þarf að fara og gera ofurinnkaup á Kristján, sundskýlu, leikfimisföt og skó...það er alltaf eitthvað...ótrúlegt hvað lappirnar á drengnum hafa stækkað í sumar!!! Allt skótau orðið of lítið...
Svo er leynifélagsfundur í kvöld....ekki lesa þetta...rosa leynilegt...usss..usss.....;)

Hafið það gott í haustblíðunni...já, það er komið haust...liggur í loftinu....en það þarf ekkert endilega að vera slæmt...göngur og réttir....sláturgerð og gæsamergð ;)

Till next...adios

My mind is clear ;)

2008-08-28T19:40:00.002Z

Ég er búin að vera hálf heyrnarlaus í nærri tvær vikur (fyrst ég er hálf sjónlaus þá var þetta lítið að bögga mig) en ákvað loks að gera eitthvað í því í gær og skrapp til læknis. Í stuttu máli var hausinn á mér fullur af skít...eða eyrað af merg...og það var skolað út í snarhasti. Mér leið pínulítið eins og það væri verið að sprauta vatni lengst inn í hausinn á mér og núna er ég sum sé með hreinan huga...no dirty thougts now ;) reyndar var eyrað sem ég heyrði með líka fullt af merg, og sá mergur var svo pikk fastur að ég þarf að hella olíu í eyrað á mér til að losa eitthvað um það...og mæta svo aftur hjá góða lækninum í næstu viku. En þið getið rétt ímyndað ykkur hvernig mínar hugsanir eru í dag...búið að smúla á mér heilann og með hausinn fullan af extra virgin ólífuolíu ;)

Strákarnir okkar mættu til landsins í gær, eins og sennilega allir vita, bein sjónvarpsútsending í 5 tíma var kanski aðeins ýkt, en svo sem allt í lagi, maður gat þá bara gert eitthvað gáfulegt á meðan. Annars er þjóðarstoltið alveg að sliga mann þessa dagana, það komu bara næstum tár þegar Óli forseti hnýtti stórriddarakrossinn um háls Óla heimspekings. Yfirmáta stórkostleg stund.
Ég gerði nú ekki beint fræðilega úttekt á því, en í fljótu bragði fanst mér eins og konur allra handboltakappanna væru ljóshærðar, og fór þá að hugsa um að konur flestra "frægra" kappa, t.d. íþróttamanna, Formúlu gauka og allsskonar dúdda, eru ljóshærðar! Og þar af leiðir að eina leiðin til þess að ná sér í "frægan" mann er að vera ljóshærð...
Endilega reynið nú að vera eitthvað ósammála þessum fræðum mínum ;)

Till next...adios