Áfram Ísland :)

Ég reif mig náttúrulega upp eldsnemma í morgun og studdi rækilega við bakið á strákunum okkar í Íslenska handboltalandsliðinu ;) Hefur eflaust verið spaugileg sjón að sjá mig aleina hálfsofandi fyrir framan sjónvarpið að öskra "JESS" og "ÁFRAM SVONA" út í morgunsárið.
Áfram Ísland...og taka svo bara restina ;)
Var annars búin að spá Ísl. 4. sæti...en eitt af þremur efstu væri nú snilld :)

Komum við hjá Goðafossi um daginn...Mikael er svolítið berjablár þarna ;)

Þú átt að vernda og verja,
þótt virðist það ekki fært,
allt, sem er hug þínum heilagt
og hjarta þínu kært.

Fann þetta í krotað á bréfsnifsi þegar ég var að laga til, veit ekki hver höfundur er, en held að ég hafi fengið þetta sent í sms einhvertíman fyrir margt löngu...krúttlegt :)

Þetta er næstum eins krúttlegt:

Þetta er lítið og lélegt bú
og langt á milli bæja
drukkinn bóndi og digur frú
drullug börn o jæja.

Veit heldur ekki eftir hvern þetta er...fann þetta í sama draslinu og hitt...hehe, nú get ég hennt þessu drasli ;)

Það er sól og blíða...er að spá í að draga strákana með í berjamó...með góðu eða illu ;)

Till next...adios

Brokkgengur skokkari

Ég hnýtti á mig skokk skóna "eldsnemma" í morgun í sól og blíðu og hljóp af stað...en svo fór að halla undan fæti, eða eins og er sagt um íþróttamennina: "það tóku sig upp gömul meiðsl" ég fékk í hnéið og er búin að haltra um eins og gömul hæna í allan dag!
Spurning um að leggja bara hlaupaskóna á hilluna og reyna bara að fara í ræktina í vetur og styrkja þetta blessaða hné eitthvað...ekki dugar þetta svona kona!

Ég gleymdi annars að segja frá því um daginn, að á ferðalagi mínu til höfuðborgarinnar, sum sé bæði til og frá Rvk. þá varð ég vitni af þvílíkum glanna-rugl-akstri að ég bara á ekki til orð. Það eru greinilega margir hálfvitar á ferð um vegi landsins, fólk tekur framúr við fáránlegar aðstæður bara til að koma 1 min fyrr á áfangastað...ég hugsa að það sé frekar einskær heppni en hitt að ekki skuli vera fleiri slys á þjóðvegum landsins, og þá sérstaklega þessum spotta milli Rvk og Ak.
Voðalega væri nú gaman ef fólk æki bílum sínum gáfulega og eftir aðstæðum...og margir þurfa greinilega að rifja upp umferðarreglurnar, eins og að taka ekki framúr þegar það er óbrotin lína...það virðist svona smotterí hafa dottið út úr heila sumra!!!

Ökum varlega en snarlega ;)
Áfram Ísland

Till next...adios

Ég er komin heim með nýja skó...

...og gott betur en það ;)
Ég er sem sé komin heim eftir Reykjavíkurför mína...það var fín ferð og var hún mest notuð til að kaupa og kaupa og kaupa...Held ég sé búin að fá útrás fyrir kaupæði næsta árið eða svo...og kanski líka búin með eyðslufé heimilisins næsta árið eða svo...hehe...

Annars er ferðasagan í stuttu máli svona: Fór suður snemma miðvikud. fór með Kristján til góða læknisins, fór svo til Steinunnar bestu og hitti hennar fólk sem er allt frábært náttúrulega :) Adda skvísa dróg mig út á trampólínið...er ennþá að jafna mig eftir þá lífsreynslu! Svo gistum við strákanrnir hjá Árna og Siggu Láru sem var frábært eins og venjulega. Allur fimmtudagurinn fór í Smáralindina og allur föstudagurinn fór í Kringluna og Nexus á Hverfisgötunni (svo þar með er komin skíringin á kaupæði mínu). Þegar fór svo að rigna í dag og ég vissi af blíðu á Akureyri þá var ekki til setunnar boðið og brunað af stað, með stuttu stoppi hjá föður Kristjáns..komum heim um 8 leitið, þreytt eftir að hafa borið inn alla innkaupapokana, en sæl eftir fína ferð :) Bíllinn stóð sig vel, ljúfur í akstri og krúttlegur á að horfa ;) er sko ennþá að horfa á hann dásemdar augum...set inn myndaseríu af gripnum um leið og ég er búin að skrúbba af honum borgarrykið ;)

Jæja, held ég verði að koma mér og mínum í rúmið...þeir bræður sitja reyndar sem fastast við sjónvarpið og horfa á þær dásemdar dvd myndir sem Kristján fann í Nexus...svo það er best að byrja á að ýta við þeim...

Till next...adios

VW Passat

Ég hélt upp á sigur Íslendinga á Þjóðverjum í dag með því að kaupa mér Þýskan bíl ;) hehe....
Eftir langt og erfitt ferli var loksins tekin þessi stóra ákvörðun og þrátt fyrir minn ógurlega vilja til að kaupa mér Toyotu þá varð það ekki raunin að sinni :)
Nú bara vona ég hið besta...er að bíða eftir að fá bílinn afhentan, en það er sum sé verið að skipta um tímareim í honum. Svo verður brunað af stað til Reykjavíkur eldsnemma í fyrramálið!
Annars er allt gott að frétta af mér og mínum...liggjum í leti og slæpumst af öllum mætti fram að skóla ;) tók reyndar og henti helling út úr herberginu hans Kristjáns í gærkveld, svo nú er hægt að ganga um gólfið án verulegra farartálma.

Held ég láti þetta bara duga í bili...er dálítið þreytt eftir bílabisness dagsins ;)

Till next...adios

Keila

Ég var orðin passlega þreytt á bílaprufunum á miðvikudaginn þegar ég skellti mér í keilu með ættingjum og vinum...það er skemmst frá því að segja að það var rosa gaman og ég varð í þriðja sæti á eftir Sverri bró og Nonna bró...(greinilega svakalegir keiluhæfileikar í ættinni) reyndar tókum við svo annan leik í fljótheitum, en þar gekk mér ekki eins vel.
Síðan rauk ég heim og náði í krakkaskarann sem þar beið og brunaði í bíó...því það átti að storma á WALL-E...en ekki vildi betur til en það að þá var hætt að sýna hana kl.20:00 og var verið að sýna Mummy sem mér fanst ekki hæfa þeim börnum yngri en 12 ára sem voru með í för...svo ég fer aftur heim með barnaskarann...en restin af keiluliðinu skellti sér á Mummy.

Svo í gær, svona í sárabætur fyrir bíó missi dagsins á undan, þá skellti ég mér með krakkaskarann í keilu og svo í bíó á WALL-E kl. 18:00
Mér gekk rosa vel í keilu með krökkunum, fékk 135 stig og náði 4 fellum ;) reyndar voru mínir strákar svo metnaðargjarnir (eða eitthvað) að þeir voru þrusu fúlir yfir því að ná ekki fellu...samt í fyrsta skipti sem Mikael fer í keilu og annað skiptið sem Kristján fer...

Ég nennti ómögulega að halda áfram í bílaskoðunum í gær...og held ég nenni því ekki heldur í dag, finnst þetta með eindæmum leiðinlegt og skil ekki hvernig fólk nennir að skipta um bíla oftar en á 10 ára fresti! Væri fínt ef einhver kæmi bara með bíl handa mér og ég þyrfti ekki að hafa fyrir neinu...enda hef ég svo sem takmarkað vit á bílum svona over hoved ;)

Jæja, stefnan er tekin á sundlaug bæjarins...best að nota þetta góðviðri sem virðist ætla að ráða ríkjum eitthvað lengur, og er það vel :) verst að maður nennir ekki að gera neitt inni hjá sér þegar það er svona gott veður...;)

Till next...adios

Tívolíraunir

Ég þóttist vera voða góð í dag að fara með hann Mikael í Tívolí (ef tívólí skyldi kalla). Þetta skrapatól er staðsett á bílaplaninu við Glerártort og saman stendur af einu manndrápstæki, einu sæmó tæki og svo einhverjum uppblásnum hoppiköstulum! Ég fór í manndrápstækið með Mikael og í stuttu máli þá hélt ég að ég slyppi ekki lifandi úr þessu á tímabili....og ligg núna vælandi í sófanum með frosið rúgbrauð á lærinu! Þetta tæki snérist mjög-hræðilega hratt í hringi...óteljandi hringi...og ég þrýstist út í einhverja járnstöng með lærið svo stór sér á mér....er stokkbólgin og marin!
Svo er þetta rándýrt...þessi klukkutími í tívolí kostaði mig 5.000 kr. sem hefði kanski verið í lagi ef það hefði verið eitthvað gaman! Lélegasta þjónusta ever....og þeir sem voru að vinna þarna töluðu í besta falli lélega ensku en annars bara eitthvað babl!
Gæti ekki mælt með þessu þótt ég vildi...

Fór annars á bílasölu í dag og er með augastað á einum bíl...Toyota...ætla að sofa á þessu til morguns :)

Annars er gott veður og ég í góðu skapi...þótt ég væri í enn betra skapi ef lærið á mér væri ekki í steik...talandi um steik...er farin að elda kvöldmat, Kristján var að koma úr bíó...var að sjá The Dark Knight í annað skiptið ;)

Till next...adios

Frídagur verslunarmanna

Til hamingju með daginn verslunarmenn :)
Ég ætla nú samt að freista þess að finna opna búð í dag og athuga hvort ég geti ekki keypt mér mjólk, gos og snakk ;) planið er nefnilega að liggja í ógurlegri leti í dag...og það byrjaði amk vel með því að við sváfum öll fram að hádegi ;/

Ég held að verslunarmannahelgin hafi bara farið vel fram hér í bæ, allir voru voða rólegir og góð stemming á tónleikunum á íþróttavellinum í gær. Svo var flottasta flugsýning frá upphafi segja sumir...flott var hún...eins og milljón stjarna steyptist yfir oss í öllum regnbogans litum ;)

Ég gleymdi alveg að tjá mig um Batman myndina The Dark Knight sem ég sá um daginn...en ég verð að segja það að hún er þvílík snilld að vart hefur annað eins sést!!! Mæli eindregið með henni...stórmynd með stórleikurum sem sýna stórleik :)

Jæja, ætla að reyna að kroppa af mér maskara gærkveldsins...og tölta eftir snakki ;)

Till next...adios

Flugeldar

Ég hélt það myndi rigna inn kommentum eftir síðustu færslu mína...annaðhvort frá reiðum vottum eða einhverjum skottum...en það klikkaði...nema ein :)
Það er dimmt úti...held að sumri sé tekið að halla...einu sinni fanst mér verslunarmannahelgin vera til marks um lok sumars, núna er hún meira svona til marks um miðju sumars ;) það hlýtur amk að vera slatti eftir :)
Var annars á þessari flottu flugeldasýningu áðan, svei mér þá ef það er ekki bara flottara að vera á íþróttavellinum frekar en á tröppunum hjá mér, að horfa á sýninguna...kanski maður reyni bara að gera þetta að árlegum viðburði...;) amk ef það er gott veður ;)

Ég var voðalega dugleg í dag og fór í tvær grillveislur, eina í sveitinni um hádegið sem var ljómandi skemmtileg...samt leiðinlegt að Kathleen mágkona skuli vera að æða til Liverpool eftir rúmar tvær vikur...svo fór ég í annað grill seinnipartinn...það var mun frjálslegra...svona vínlega séð ;) svo maður var bæði glaður og góðglaður þegar stefnan var tekin á íþróttavöllinn...sum sé alveg frábær dagur að kveldi kominn...eða að nóttu kominn þar sem klukkan er víst orðin eitt!

Hætt að mala í bili...lífið er dans á rósrauðu skýi með hoppi og híi :)

Till next...adios

Hitabylgja

Í dag ku hafa verið heitasti dagur ársins...en hvað er svo sem hægt að segja til um það núna, þegar sumarið er rétt að byrja??? Ég bara spyr!
Ég ráfaði stefnulaus og hálf sljó um í hitanum í dag með fjóra krakka...enduðum í Listigarðinum þar sem yngir krakkarnir hlupu í gegnum úðara eins og óð...og urðu sum sé hundblaut, en það var allt í lagi því þau voru þornuð áður en við komum heim aftur.
Svo settist ég út og las bók í blíðunni og var að hugsa um að fara og skokka (hlaupa) smá þegar Sverrir bró hringdi í mig og bauð mér í bagga...ég gat náttúrulega ekki sagt nei við því, en mikið er nú mikið púl að stafla böggum í tuttugu og eitthvað gráðu hita! Hef sennilega misst ein 3 kg. af vökva við þetta...en er að reyna að bæta fyrir það með að sötra bjór ;) er nú samt ekkert spes dugleg við bjórinn...þetta er bara einn stuttur bjór og ég að verða svo syfjuð að sennilega er ekkert vit í þessu sem ég skrifa núna!

Svei mér þá ef ég hef ekki tekið smá lit í dag!!!

Það komu vottar-Jehóa í heimsókn til mín um daginn og töluðu um endalok heimsins eins og þeir hafa gert sl. 100 ár eða svo...og maður á náttúrulega að iðrast til að eiga vísa vist í paradís...en ég fór að spá...eigum við ekki frekar að njóta þeirrar paradísar sem við lifum í hér og nú? Í stað þess að lifa í eilífum ótta um hvað verður?
Mér finnst ég amk lifa í paradís, hef allt til alls, æðisleg börn, bestu ættingja ever og frábæra vini og kunningja :) og svo skemmir ekki sólin og góða veðrið fyrir ;)
Ps. þetta er ekkert illa meint um votta-jehóa...bara smá pæling :)

Till next...adios

Hulk-ína

Ég rakaði garðinn í dag og fannst voða sniðugt að vera í sandölum, því það var svo heitt og gott veður, alveg þar til ég kom inn...hef sjaldan séð grænni tær, nema þá kanski á Hulk! Hefði verið alveg kjörin í hlutverk The incredible HulkWomen ;) hehe...
Svo afrekaði ég það að fara út að skokka, sem ég hef ekki haft heilsu í að gera síðan í kvennahlaupinu í byrjun júní (þurfti alveg að vanda mig að skrifa ekki kellingahlaupinu.;)...Það var aldeilis fínt að skokka aðeins, fór nú hvorki langt né hratt en gott var það. Vígði nýju hlaupabuxurnar við þetta sama tækifæri og þetta er bara allt annað líf að hlaupa í svona sér hönnuðum fatnaði ;)
Og loksins tókst mér að kaupa ryksugupoka...eitthvað sem ég hef verið á leiðinni til að gera alltof lengi....allt í einu virkaði ryksugan bara miklu betur...datt eitt gott sparnaðarráð í hug þegar ég var að skipta um ryksugupoka....það má bara sauma utanum þá úr efnisafgöngum sem allir eiga heima hjá sér og nota sem púða ;) Gott ráð frá mér í kreppunni ;)

Jæja, best að bulla ekki meira í bili, ætla að skella mér á Batman myndina í kvöld, svona þegar Kristján kemur úr bíói ;) við bara skiptumst á að fara í bíó...hehe

Sól sól sól...

Till next...adios

I say hey hey hey

Það voru gífurlegar heyannir hjá mér í dag...fór fyrst í sveitina og rakaði dreifar og snéri á einu túni...en við svo búið varð ekki búið svo ég sló garðinn þegar ég kom heim...og það var puð, hálf ónýt sláttuvél og gras sem allir bændur væru löööööööngu búnir að slá ;)
Ég endurheimti hann Kristján minn í kvöld, það er voða gott að fá hann aftur eftir 9 daga í burtu...jafnvel þótt þeir bræður rífist örlítið ;)
Það er brostið á með þvílíkri blíðu að annað eins hefur ekki sést...í sumar ;)

Tja...einhverra hluta vegna hef ég ekki meira til málana að leggja á þessari stundu...en er létt í lundu :) hafið það gott í góða veðrinu :)

Till next...adios

Kristjánssögur II

Hér er ennþá sól og blíða og heyskapur...same old same old...eða new ;) held bara áfram að byrta áður óútgefnar smásögur eftir Kristján...Næsta saga heitir ekki neitt en er á þessa leið:

Það var einu sinni maður sem vildi sumarfrí. En konan hans sagði "Neeeheeeei! Þú verður að fá meiri PENINGAZ!" Öskraði hún. Þá keypti maðurinn sumarspil fyrir kvensu. Hún var upptekin af þessu svaka flotta spili að hann hljóp til Árna og fékk lánaðan bát.
Hann silgdi til Timbuktu og fékk sér ellefu undirskálar og elskaði þær að eilífu. Á meðan var kvensa orðin TJÚLLZ! "Hann er farinn >=(" vældi hún. Hún neyddist til að vinna sem þjónustustúlka fyrir Britney Spears að eilífu!!!
LOS ENDOS

Ég er búin að kaupa mér miða á tónleika með Ragnheiði Gröndal annaðkvöld, það verður gaman. Skemmtum okkur saman :)

Till next...adios

Kristjánssögur

Í þeirri von að Kristján komist ekki í bloggheima mína, þá ætla ég að stelast til að setja hér inn örlítið sem ég hef fundið eftir hann, þetta held ég að séu ritgerðir sem hann gerði í skólanum fyrir ca. 2-3 árum síðan.
Hér kemur sú fyrsta, ég tek það fram að ég breyti engu, hvorki orðalagi né stafsetningu.

Afhverju dans er lummó!!!
Dans er ónauðsinleg og þreytandi "hreyfing" sem hefur nákvæmlega engann tilgang! Að standa og hlusta á danskennarann röfla um spor sem eru nákvæmlega eins í hverri einustu viku er tímaeyðsla og leiðinlegri en að þurfa að horfa á málníngu þorna.
Það er neitt mann til að dansa við einhvern sem maður þolir alls ekki og hlusta á léleg lög eftir Justin Timberlake á meðan.
Dansarnir eru allir "skref fram, tvö skref aftur" og endurtaka sig eftir fimm spor. Íslenska, Danska, tæknimennt...jafnvel STÆRÐFRÆÐI er skárri en dans. Sporunum er gleymt á sekúntubrotinu þegar maður gengur út úr stað glæpsins.
Dans er eitthvað sem enginn hefur áhuga á og ætti aldrei að snúa aftur!!!

....svo mörg voru þau orð....ég ætla að láta hann Kristján minn lesa þetta eftir svona 5 ár eða svo ;)

Till next...adios

Sumar

Sumarið er komið, það fer ekkert á milli mála lengur. Ég fór í sund í dag og lá eins og skata og bakaðist í sólinni...tjill tjill tjill...skrapp svo í sveitina að snúa fyrir Sverrir en ekki fór betur en svo að ég stór skemmdi heyþyrluna...tja, kanski ekki beint mér að kenna...en frekar leiðinlegt samt.

Svo er ég einnig að toppa mig í bíó ferðum þessa dagana, fór að sjá Hellboy í gærkv. flott mynd, alltaf gaman af svona ofurhetjumyndum ;)

Jæja, litli gutti heimtar kósí kvöld með nammi og dvd áhorfi...og ég er hlýðin og vel upp alin móðir og geri eins og mér er sagt...

Sól sól sól :)

Till next...adios

Sumarfrí :)

Síðasti vinnudagurinn í leikskólanum var sl. föstudag, það var fínt, fékk meira að segja blóm og allt...varð voðalega hissa þegar leikskólastórinn færði mér rós svona í þakklætisskini fyrir samstarfið, enda fær hún topp einkunn frá mér sem yfirmaður ;)
En eftir að ég kom heim eftir vinnu, þá var nú nóg að gera. Ég pakkaði ofaní töskur fyrir mig og strákana, skrapp í búð og keypti stígvél á Kristján, skrapp í sveitina og náði í gítarinn hans Nonna bró...og svo var rokið að stað með Kristján út á flugvöll. Kristján fór sum sé suður til pabba síns (og fór svo reyndar á vestfirðina í sumarbústað daginn eftir) þar sem hann verður sennilega í viku tíma eða svo. Þegar flugvélin hans var farin í loftið þá brunuðum ég og Mikael til Egilsstaða. Við komum á áfangastað um kl.23:08 í rigningu og myrkri svo það var voða gott að koma til Árna og Siggu Láru, kjafta, fá sér öl og spila "meistarann"...ps. Árni vannn.

En auðvitað var skollin á þvílík blíða morguninn eftir, eins og alltaf þegar ég er fyrir austan (ég er nefnilega alveg viss um að það er alltaf gott veður á Egilsstöðum, því það er alltaf gott veður þar þegar ég er þar...svo svoleiðis er þetta bara). Við skiptum okkur niður í tvo bíla sem sagt: ég, Mikael, Nonni, Kathleen, Sigga Lára, Árni, Gyða og Friðrik litli og brunuðum á Borgarfjörð-eystri. Það var nú reyndar ekki brunað alla leiðina því leiðin er brött og holótt og örlítið glæfraleg á köflum, en vel þess virði. Það er nefnilega ákaflega fallegt þarna, við gengum upp á Álfaborgina og fórum út á bátahólma þar sem er friðað varpland og allt fult af lunda, súlum, æðarfugli og alveg geggjað að sjá lunda svona í návígi...flottir fuglar :)

Á laugardagskvöldinu þegar við komum heim frá Borgarfirði eystri þá var nú etið og drukkið...reyndar fór karlpeningurinn í golf og á meðan við skvísurnar sötruðum öl og leystum öll heimsins vandamál...en þegar þeir komu aftur þá var auðvitað tekinn póker sem ég vann :)

Á sunnudeginum fórum við svo á uppáhalds staðinn minn, sem er Skriðuklaustur og fengum okkur alveg geggjað hádegis-hlaðborð. Mér finst þetta alveg frábær staður, æðislegt hús og snilldar matur, það er sama hvað maður fær sér þarna, það er allt gott...sennilega besti veitingastaður á landinu :) ódýrt og svakalega gott....nammi namm!
En eftir mikið át og spjall þá fórum við Mikael að renna heim á leið, stoppuðum nokkrum sinnum, eins og að sjá leirhverina í Mývatnssveit, Mikael vildi reyndar ekki stoppa lengi því honum fanst svo hræðileg lykt þar ;)
Þegar við komum heim þá var skipt um föt og farið í sveitina í heyskap...og Mikael lét nú ekki sitt eftir liggja þar, hennti böggum á við fullorðinn mann og vildi bara "meiri vinnu" þegar við vorum búin að koma heyinu í hús ;) hann er efnilegur sveitakall :)
Svo sunnudagurinn var langur og strangur en skemmtilegur.

Í gær skruppum við svo á Dalvík að heilsa upp á ömmu Mikaels og svo fór ég í bíó um kvöldið á "MammaMía" sem ég verð að segja að er hrein snilld....ég hló og brosti nánast allan tímann og þurrkaði einu sinni smá tár ;) bara alveg eins og góðar myndir eiga að vera...og æðisleg lög og enn betri leikarar....ALLIR Í BÍÓ :)

Jæja, læt þessum laaaaaaanga pistli lokið í bili, veriði góð hvert við annað og njótið sumarsins í öllum veðrum :) við bara verðum ;)

Till next...adios

Nýtt hásæti ;)

Ég afrekaði það loksins í gær að kaupa mér nýtt klósett...það gamla var niðurbrotið með sírennslisvandamál og eflaust fegið því að fólk sé hætt að gefa skít í það! En mikið er nú nýja fína salernið mikið dásemdar tæki...passar alveg mínum prinsessu rassi og svo er bæði hægt að sturta lítið fyrir nr.1 og stórt fyrir nr.2...mikil eru tækniundur nútímans ;) hehehe...

Laununum mínum var kippt í liðinn í snarhasti í gær, leikskólastjórinn stökk í það að tala við launadeildina um leið og ég sagði henni frá þessari vitleysu...fljót og góð þjónusta þar :) núna á ég bara eftir að vinna í tvo daga og svo sumarfrí :) ekki það að þetta sé neitt svo voðaleg vinna, ég er bara farin að hlakka óstjórnlega til þess að geta SOFIÐ ÚT eins og strákarnir...svo ligg ég í leti í ca. 3 daga og verð svo eflaust að heyskapast eitthvað. Er einnig að plana að mála eitthvað af íbúðinni, amk baðherbergið (það verður nú að vera fínt eins og klósettið...þarf reyndar nýjan vask líka, sá gamli alveg að fara í vaskinn), herbergið hans Kristjáns og helst eldhúsið....svo endar þetta eflaust á því að ég mála ekki neitt! Get kanski reynd að mála bæinn rauðan einhverja helgina ;)
Annars fer Kristján suður á föstudagskvöldið og þá er planið að bruna beint austur á Egilsstaði, ætti að geta náð þangað um miðnæturbilið...

Well, nóg af plönum í bili...sólin skýn og ég ætla í sjoppu og kaupa hammara og ís á liðið ;)

Till next...adios

Hraun

Ég hef verið að hlusta á Rás 2 undanfarna daga í vinnunni, og komst að því að þetta með að hafa plötu eða plötur vikunnar er alveg snilld. Ég hafði nefnilega þá trú að hljómsveitin Hraun væri agaleg dauðarokkshljómsveit og væri vart fyrir miðaldra húsmæður eins og mig...en viti menn, þetta er hreint snilldar hljómsveit! Hraun er nefnilega með plötu vikunnar á Rás 2 og ég er búin að hlýða á þessa dásemdar tóna frá þeim í allan dag :) mæli með þessari plötu.

Nú eru aðeins 4 dagar fram að sumarfíi :) ég þarf samt að reyna að vera með einhver leiðindi í vinnunni á morgun, þar sem ég rak augun í það áðan að fíflin (sum sé fíflin á launadeild Ak.) hafa gert sér lítið fyrir og lækkað launin mín talsvert. Settu mig í að vera aðstoðarmatráður í stað matreiðslumanns II. Eins gott að þetta verði lagað, annars fær liðið ekkert að eta næstu 4 daga ;)

Alltaf er nú "gaman" þegar fólk í útvarpinu ruglar saman eða þekkir ekki merkingu málshátta eða orðatiltækja. Ég heyrði fullorðinn karlmann lýsa því yfir í útvarpinu í dag að: "þetta er þúfa sem varð að þungu hlassi"! Þar átti maðurinn við að eitthvað hafði vaxið með árunum, aðsókn að einhverju eða eitthvað svoleiðis. Kanski heldur blessaður maðurinn að þúfan verði að þungu hlassi og velti svo sjálfu sér ;) smá pæling.
Svo þoli ég ekki orðleysur sem er fari að nota í auglýsingum, eins og t.d. "Fríkeypis" arg...annað hvort er eitthvað frítt (sem er náttúrulega beint úr enskunni) eða ókeypis...ekki fríkeypis og hananú!!!

Læt röfli lokið í bili, tölum fallegt mál og segjum falleg orð við hvort annað ;)

Till next...adios

B & B

Er með bronkítis og barkabólgu...fór sum sé aftur til doktors í gær, sem sendi mig í lungnamyndatöku sem kom ekkert út úr. En ég er komin á einhvert sterapúst núna og verð eflaust orðin fílhraust með vöðva og bringuhár eftir viku tíma eða svo! ;)

Ég byrjaði á að fara í gegnum fataskápinn hjá mér í dag (skrítið að tala um að fara í gegnum skápa...hummm...þá kæmi ég út úr skápnum inn á baði hjá mér!) og þar kom nú ýmislegt skrítið í ljós! Ég á t.d fleirihundruðogfimmtíu sokkabuxur!!! Og heilan haug af fötum sem ég nota ekkert og hendi ekkert....hummm, en þetta er amk í meiri röð og reglu en það var :)

Jæja, það rignir og rignir....fer að hafa það á tilfinningunni að sumarið sé bara að bíða eftir því að ég fari í frí ;)
En við skulum bara syngja og dansa í rigningunni og láta okkur fátt um finnast, því lífið er yndislegt :)

Till next...adios

Hraðflug

Það kann að vera að ég hefi lauslega minnst á það áður, hér á þessum merka miðli mínum, hvað tíminn flýgur hratt áfram! Allt í einu er bara ein vika og einn dagur þar til að ég fer í sumarfrí og verslunarmannahelgin á næsta leiti! Ég veit ekki afhverju, en einhverra hluta vegna, þá finnst mér sumarið alltaf vera næstum búið eftir verslunarmannahelgina...hummm, sem er auðvitað fjarri lagi, bara einhver meinloka í mér ;/
Af heilsufari er það að frétta að ég er ennþá með hóst, hor og hálsbólgu...há-in 3 ...en við svo búið verður ekki búið og á ég pantaðan tíma hjá lækni á morgun...og þar ætla ég sko að væla meira en síðast...enda heyrðist ekkert í mér þá ;)
Það var annars næstum fyndi þegar ég hringdi á heilsugæsluna í morgun og spurði hvort það væri laus tími hjá einhverjum lækni eftir kl.14 í dag...afgreiðsludaman fór bara að hlæja og sagði að ég væri bjartsýn! Ég taldi það hinsvegar vera af því góða að vera bjartsýnn og spurði hvort það væri þá laus tími á morgun...og viti menn, það var laus tími kl.14 ;) hehehe...afgreiðsludaman varð nærri hissa þegar hún tjáði mér það :)
Jæja, best að ganga nú ekki alveg fram af ykkur með veikinda væli....
Planað er að Kristján fari suður til föðurhúsa á föstud. eftir viku og þá ætla ég að pakka mér og Mikael niður og brenna austur á Egilsstaði :)
Svo það er eins gott að doksi gefi mér pensilín svo ég "horist" ekki yfir fólkið á héraði ;)

Njótið sólarinnar :)

Till next...adios

Hrós

Ég fékk hrós í vinnunni í dag, ekki svo sem eins og það sé í fyrsta skiptið, en þetta var bara svo einstaklega skemmtilegt. Það var nefnilega einn lítill gutti sem settist niður og fór að borða matinn sem ég hafði eldað í dag og sagði svo: "ummm, þetta er sko góður matur, þetta er bara alveg eins og á veitingahúsi". hehe...alltaf gaman að fá svona heiðarleg hrós frá litlum krökkum, þau eru sko ekkert að reyna að smjaðra fyrir einum eða neinum.
Svo heyrði ég samtal nokkura krakka í dag, þau voru greinilega að tala um einhverja sem hét Ásta, og ein lítil sagði: " Ásta byrjar á S og svo kemur Ö,... ÁSTA, sko bara!" :)
Já, það er gaman í vinnunni ;) reyndar alveg hellingur að gera þar sem ég verð bara ein og einráð í eldhúsinu næstu tvær vikurnar.
Annars hef ég verið að smá ná mér eftir rosa-risa flensuna sem ég fékk...hef bara ekki lent í öðru eins laaaaanga leeeeengi...er enn með smá hor, hósta og hálsbólgu, en þetta er allt á réttri leið...vonandi :)

Mikael Hugi er sokkin ofaní Pokémon-spila-söfunu...alveg forfallinn, hann fékk smá af afmælispeningunum sínum til að kaupa spil og fór með vini sínum í búðina í gær...svo þykjast þeir ætla að safna spilunum saman... sem virðist felast í því að Mikael á að leggja til peninga í spilakaup og vinur hans eiga helminginn á móti honum...hummm...og ekki nóg með það, ég fór út að borða í gærkveldi í góðra kvenna hópi, sem var náttúrulega svaka gaman, en þegar ég kom heim, þá hafði Mikael keypt eitt stórt spil af vini sínum á 8.000 kr.!!! Minn bara bjargaði sér og náði í peninginn sem ég hafði ætlað að leggja inn á reikninginn hans og borgað gaurnum si svona...ég varð náttúrulega alveg æf og las honum pistilinn og sagði að það yrði hans fyrsta verk morguninn eftir að fara til vinar síns og skila spilinu og fá peninginn til baka. Svo kom gaurinn morguninn eftir með peninginn, svo sennilega hafa fleiri mæður en ég skammast ;) Hann er samt ennþá að reyna að selja Mikael spilið en er kominn ofaní 2.500 kr.!!!!hehe...á greinilega framtíð fyrir sér í bisness ;)

Knúsumst um stund...

Till next...adios

Öll él byrtir upp um síðir...

og rigningin styttir upp ;)
Það var að bresta á með blíðu, sólin skín og fuglarnir fara að syngja...svona þegar þeir verða orðnir nógu þurrir til þess.
Horið í nefinu á mér er einnig farið að stytta upp...samt dropar aðeins ennþá...en ég vonast eftir sólskini þar líka fljótlega :)
Ætlaði að skrifa eitthvað voða spennandi hér inn...en gleymdi því þegar ég fór að tala um hor... eins og glöggt má sjá, þá hefur líf mitt ekki verið þrungið spennu síðustu dagana.

Stefni á að kaupa bókahillur og koma skikki á annars óskipulagðan kaos gang, hér í íbúðinni...sem gerir lítið annað en safna óþarfa blaða-drasli... Ætla samt að losa mig við eitthvað af gæða-bókmenntum, svo ef einhver vill eiga: Sven Hassel, Alester McClean og Stephan King, þá má hafa samband :)

Hætt í bili og farin í háttinn...

Till next...adios

EM

Spánverjar urðu Evrópumeistarar í fótbolta...sem kom mér verulega á óvart af þeirri einni ástæðu að ég hélt með þeim ;) en þrátt fyrir það unnu þeir leikinn við Þýsku útrýmingarbúðirnar...hummm...örlaði nokkuð á fordómum þarna...tja, nei nei...;)
Spánverjar voru einfaldlega bestir og áttu leikinn...ásamt flestum leikjum sem þeir spiluðu á EM.
Nú er þykjustu kunnáttu minni á fótbolta lokið...hehe...en ég veit líka að Torres (sem var bestur og skoraði sigurmarkið) spilar með Liverpool og það eitt dugar náttúrulega alveg til að Spánn átti manns stuðning óskiptan :)

Annars skánar heilsan mína óskup hægt... en ekki hljótt, hósta ennþá eins og hýena og er vægast sagt orðin pínu þreytt á þessu...þarf að gera svo ótal margt...byrja sennilega á því að kaupa mér nýtt klósett, það gamla brotnaði við smá sírennslis-reddingar...æ það var hvort sem er gamalt og ömurlegt...hæfir enganvegin svona prinsessurassi eins og mínum ;)

Nú er smá kuldakast, rok, rigning og birrr kuldi...en það er bara ágætis tækifæri til að viðra fleece-peysuna og dúnúlpuna og hressandi að finna norðan garrann narta í kinnarnar ;) góða verðrið verður áður en varir :)

Jæja, ætla að lesa dálítið í "Við enda hringsins" og fara svo að sofa þegar rúmfötin eru þornuð...ég er alltaf svo skipulögð ;) svo er bara harkan sex og vinna í fyrramálið!
Hafið það gott í öllum veðrum :)

Till next...adios

Hóst og hor hf

Það er engu líkara en að sýklalyfin hafi hleypt af stað ógurlegum hóst og hor dreka...ég vaknaði kl. 8 í morgun og hóstaði stanslaust fram að hádegi! En maður horfir á björtu hliðarnar og ég á ekki von á öðru en að ég verði komin með all svakalega magavöðva eftir alla áreynsluna :)
Annars ákvað ég í dag að fikra mig áfram með smá "náttúrulækningar" svona meðfram sýklalyfsátinu...en sú meðferð felst í því að prufa áhrifamátt súkkulaðis á svona sýkla. Hef sum sé ákveðið að fórna mér í talsvert súkkulaði át næstu dagana og athuga hvort ég lagist ekki :) er ennþá að finna út rétta magnið en svona 50 gr. þrisvar á dag er kanski fínt til að byrja með ;)

Spánverjarnir unnu Rússana í gær á EM mér til mikillar gleði :) það var nú nógu grátlegt að Rússa-prússarnir hafi unnið Eurovision þótt þeir tækluðu ekki boltann líka!
Svo núna ætla ég að halda með Spáni á móti Þýskalandi á sunnudaginn...Spánn er líka fyrsta landið sem ég kom til fyrir utan Ísland ;) en það var uppúr miðri síðustu öld...ætla ekki að fara frekari orðum um ferðalög mín um heiminn...enda yrði það ansi stuttur pistill ;)

Núna hellast yfir mig tölvupóstar þar sem ég er beðin um að kaupa ekki bensín af N1 og Skeljungi minnir mig...ég er nú ekkert alltof viss um að þessi félög beri ábyrgð á hækkandi heimsmarkaðsverði...hummm...og finnst hálf fáránlegt að ráðast á tvö félög með þessum hætti...held það væri vænlegra til árangurs að hætta bara að kaupa bensín hjá öllum olíufélögunum...en hver er tilbúinn til þess??? Svo er þetta svo ömurlega leiðinlegur póstur...alveg píning að lesa sig í gegnum þetta!!!
Jæja, hætt að tuða og farin að leggja mig...og smá súkkulaði :)

Till next...adios

Sýkill

Var með alslappasta móti í morgun, röddin nánast alveg horfin og heilsan líka. Druslaðist samt í vinnuna en var rekin heim rétt fyrir hádegið...náði að elda fyrir hádegið...og sagt að vera heima á morgun líka...leikskólastjórinn ætlar bara að grilla pylsur oní liðið.
Rosalega er nú annars gaman að hafa manneskjulegan yfirmann :)
En ég dreif mig til læknis í opin tíma kl.3 í dag og ég held að hann hafi vorkennt mér svo fyrir raddleysið að ég fékk skýklalyf...hann sagðist ætla að leyfa mér að njóta vafans...sagðist svo sem ekki finna neitt að mér...svona fyrir utan hita, hálsbólgu, kvef, hausverk og hæsi ;) en það var fínt að fá smá sýklalyf þótt ekki væri nema fyrir sálartetrið mitt...
Svo núna ligg ég bara í rúminu og væflast um alheimsnetið...og nenni einganvegin að standa í þessum slappleika :(
Það er nefnilega einhvernvegin þannig að ef ég geri ekki hlutina, þá eru þeir bara ekki gerðir...hummm....skrítið ;) svo núna eftir þessa slöppu viku þá bíða skítug gólf, óhreinn þvottur, ósleginn garður...fullur af njóla, eftir mér í stórum stöflum og af einhverjum ástæðum þá er þetta alltsaman mun meira spennandi en að liggja í rúminu hóstandi með hor...og nóg af því!

Jæja, held ég hætti bara núna áður en ég væli meira...er að verða ofsalega dugleg í sjálfsvorkunninni þessa dagana ;)
Passið ykkur á pestum...

Till next...adios

Hálfpartin...

lasin...eða alveg lasin en má ekki vera að því. Er búin að vera með slen og hálsbólgu og kvef síðan á mánudag, en þar sem ég hef engan til að leysa mig af í vinnu þar sem ég er að leysa af...þá hef ég ekki þann munað að geta leyft mér að liggja í rúminu lasin, nema bara eftir vinnu ;)
Er annars að skána, en missti þá röddina, er hás eins og hæna...og ekki er það fyllerí um að kenna, þar sem ég hef ekki farið á slíkt í hummm...einhvern slatta langan tíma :)

Ég lét það samt eftir mér að fara í bíó í gærkveld á Hulk...maður er nú svo menningarlegur ;) annars er þetta fín mynd, eiginlega bara ágætis fjölskyldumynd, því hún er rómó, spennó, fyndin og svolítið um dráp og slagsmál...sum sé eitthvað fyrir alla :)

Svo er leikfélagsstjórnarfundur í kvöld...þannig að ég held ég reyni að leggja mig aðeins og safna orku fyrir fundinn og vinnuna á morgun...
Það er reyndar kostur við að vera svona hás því núna vorkenna strákarnir mér miklu miklu meira og ég fæ meiri frið...þótt ég hafi verið mun slappari á mánudaginn t.d. ;)

Till next...adios

Afmælisafmæli

Ég er náttúrulega ekkert að standa mig hérna á blogginu þessa dagana...skamm ég...en ég þykist bara hafa svo mikið að gera núna...

Hann Mikael Hugi minn ofurkrútt og dúlla átti afmæli núna 18.júní og er þar með orðinn 7 ára :) Til hamingju með það elsku Mikael minn ;)
Svo á hún Guðrún Mist Þórðar bró. dóttir afmæli í dag...og svo hann Róbert Árna bró. son afmæli 24.júní...bara allt að gerast í ættinni :) Til hamingju með afmælin ykkar Guðrún og Róbert :)

Annars var tvöföld afmælisveisla fyrir Mikael, fyrst kaffi í sveitinni 17.júní fyrir nánustu ættingja og svo all svakaleg stráka veisla á sjálfan afmælisdaginn. Þar mættu 10 gaurar af 16 sem boðið var...og það var mikið fjör og mikið gaman hjá þeim. :)

Svo er ég búin að vera í sveitinni síðan á fimmtudaginn, eftir vinnu sum sé, að hjálpa Sverri að setja kindurnar upp á fjall...og því verki lauk í dag...stefni á tjill leti dag á morgun með smá viðkomu í afmælisveislu :)

Jæja, ætla að fara að koma mér og mínum í rúmið...kíkja fyrst aðeins á fallega sólarlagið...og dreyma síðan rómantíska drauma um riddara á hvítum fák.....eða eitthvað :)

Till next...adios

Dadaradda dadada...

Jamm, fór á Indian Jones í dag...flott mynd og skemmtileg...Harrison Ford er náttúrulega endalaus töffari ;)
Fór í gær og keypti reiðhjól handa Kristjáni, smá tilraun til að fá hann til að hreyfa sig ööööörlítið meira ;) annars var þetta svo fott hjól að ég var að spá í að eiga það sjálf...hehe....en ég myndi aldrei tíma að kaupa svona flott hjól handa mér, en hvað gerir maður ekki fyrir ungana sína? ;)
Er svo að fara á Vestmannsvatn í fyrramálið að ná í hann Mikael minn, ég veit ekki hvort okkar hlakkar meira til. Ég heyrði aðeins í honum í gær og hann var nokkuð brattur, en vildi fá að vita hvenær ég myndi sækja hann ;)

Tónlist og Tíska er stórviðburður sem verður haldinn í Vaðlareitnum annaðkvöld. Þar verða Helgi og hljóðfæraleikararnir að spila tónlist og svo verður einnig tískusýning á fötum hönnuðum af þeim Helga og Beate. Ég verð að tískusýnast og er bara pínu spent...hvet alla til að mæta...herlegheitin byrja kl.20:30...held það kosti 1000kr. inn...eða út, þetta verður náttlega undir berum himni...svo vonandi verður gott veður.

Jamms, hætt í bili, er alveg að missa mig á Facebook þessa dagana svo kanski er ég latari við að skrifa hér inn...en það er bara á meðan að nýjabrumið er ennþá á snjáldurskinnunni ;)
Góðar stundir :)

Till next...adios

Pælingar

Ég hef unnið í eldhúsi við eldamennsku og því sem að henni snýr í nærri 16 ár og til tilbreytingar þá ákvað ég núna að vinna í eldhúsi á leikskóla í sumar...hehehe, hámarks tilbreyting ha? ;)
En það var nú reyndar ekki ætlunin að ræða það hversu lengi ég hef unnið við þetta, heldur það hversu lítil virðing er borin fyrir þessum störfum.
Sérstaklega miðað við að ef maturinn í mötuneytinu (hvaða mötuneyti sem er) er ekki eins og til er ætlast, þá verður allt vitlaust og í besta falli talað um það í vikur á eftir.

Ég fór nefnilega að velta þessu fyrir mér í dag eftir að leikskólastjórinn sagði að hún hefði fengið ákúrur frá stéttafélaginu sínu í fyrra, fyrir að hafa vaskað upp í eldhúsinu....hummm....hux....hux...og það var ekki út af því (eins og ég hélt) að hún væri að fara út fyrir sitt verksvið, nei, það var vegna þess að hún gæti átt það á hættu að missa virðingu samstarfsfólks síns!!!!! Whats going on???

Ég veit ekki betur en að við þurfum öll mat til að lifa.
Ég held að öllum þykir okkur góður matur góður og vondur matur ferlegur...sættum okkur ekki við einhvern óþverra just be cause...
En er þá bara allt í lagi að líta niður á fólk sem eldar mat og vaskar upp?
Eða skúrar gólfin?
Því miður er ég hrædd um að sárafáir ef nokkrir geri sér grein fyrir mikilvægi starfa sem oft eru talin lítils virði.
Hvar værum við ef enginn tæki ruslið frá húsunum okkar? (Alveg í rusli)
Ef enginn losaði stíflur úr niðurföllum? (í djúpum skít)
Ef enginn eldaði fyrir okkur mat? (Svöng...svo sársvöng...svo.....)
Ef enginn vaskaði upp diskana okkar? (Hummm...pappadiskar í ruslinu sem enginn tekur...)
Ef enginn skúraði gólfin okkar? (Allar stofnanir myndu verða að loka, spítalar lokaðir o.s.frv.)
Ef enginn passaði börnin okkar? (og við þyrftum að gera það sjálf ;)
Og aumingja Enginn að þurfa að gera þetta allt ;) hehe...

Nei, svona í alvöru talað, öll störf eru mikilvæg, hvert á sinn hátt, og mikið væri nú gaman ef fólk vendi sig af því að tala niðrandi um aðrar stéttir....maður má alveg vera fúll út í kokkinn ef hann eldar vondan mat... eða skúringarkonuna ef hún skúrar illa... eða verðbréfadílarann þegar hann hefur tapað öllum peningunum okkar... eða kennarann þegar börnin okkar kunna ekki neitt... eða lækninn sem skilur eftir ör... eða Davíð Oddson þegar það er komin kreppa á Íslandi...en við skulum bera virðingu fyrir störfum hvers annars og sérstaklega þeim sem elda mat :)

Till next...adios

Módel in action

Þegar ég var rétt ófarin í sveitina í kindahlaup, í gær, þá hringdi Helgi Þórsson í mig, en hann og konan hans hún Beate eru miklir fatahönnuðir, handverksfólk og snillingar. Þau ætla sum sé að hafa tískusýningu í Vaðlareitnum nk. föstudagskvöld og vantaði eitt auka módel vegna mikils dugnaðar þeirra við fatasaum! Auðvitað stökk ég til, eins athyglissjúk og ég er nú...og þurfti að mæta hjá þeim í myndatöku. Þetta var ákaflega skemmtilegt og sennilega ennþá skemmtilegra þegar ég fattaði í sveitinni hjá Sverri, eftir myndatökuna sum sé, að ég var kafmáluð með svartar rendur í hring um augun...enda horfðu kindurnar á mig stórum augum ;)
Það verður spennandi hvernig tekst til á föstudaginn, hvort ég enda ekki bara í tískubransanum í ....æ í einhverjum tískubransalöndum ;) hehe.

Till next...adios

Buzzy day

Ég dreif mig á fætur eldsnemma í gær og hljóp í kellingahlaupinu með Kathleen mágkonu. Það var rosa gaman þótt ég hafi gersamlega verið búin á því í lokin. En að fá fínan fjólubláan bol og gull verðlaunapening er nú ekki ónýtt ;) En við vorum pottþétt meðal þeirra 10 fyrstu að hlaupa 4 km. Svo var haldið upp á það með kaffi latte og stórri sneið af súkkulaðiköku með rjóma :)
Um kvöldið var okkur Kristjáni boðið í mat og svo fór ég á stór- skemmtilega tónleika með Túpílökunum :) Er pínu þreytt í dag eftir annir gærdagsins...en þetta var snilldardagur :)

Reyndar var hringt í mig frá sumarbúðunum í gær, Mikael var eitthvað hálf hnugginn, saknaði mömmu sinnar ógurlega, ég talaði við hann í síma í smá stund og vona að það hafi nú lagað líðan hans. Heyrði amk ekkert meira frá þeim. En auðvitað er nú pínu gott til þess að vita að hann sakni mín ;) bara ekki það mikið að það skemmi sumarbúðadvölina...enda sagði ég honum bara að skemmta sér með krökkunum og tíminn myndi líða fljótt.

Ætla að leggja mig aðeins og hjálpa svo Sverri að hlaupa á eftir gemlingunum :)

Ps. Er komin með Facebook :) kann ekkert á þetta ennþá og fólk má sennilega eiga von á að fá alskyns rugl frá mér á næstunni ;)

Hafið það gott í rigningunni krúttin mín :)

Till next...adios

Vestmannsvatn

Þá er litli stubburinn minn farinn á Vestmannsvatn og verður þar í sumarbúðum í heila viku!!! Á leiðinni austur segi ég við Mikael: "Það verður nú skrítið að sjá þig ekki í heila viku" og þá segir Mikael: "Mamma, stundum verða krakkar bara að gera eitthvað án þess að forledrarnir séu með"! Svo það verður sennilega eins og mig grunaði að þessi sumarbúðadvöl á sennilega eftir að verða örlítið erfiðari fyrir mig en hann ;)
Þegar við komum á staðinn þá var hann feiminn í ca. 15 sek. og var svo rokinn...enda hitti hann strax stráka sem bæði voru með honum í bekk og fyrrum leikskólafélaga...veit ekki hvort hann vill nokkuð koma heim eftir viku ;) En auðvitað var ég ánægð yfir því hvað hann var glaður með þetta allt og ekkert mál að ég færi. Svo vorkenndi hann bara Kristjáni ógurlega að hann færi ekki í sumarbúðir heldur hengi bara heima ;) ekki viss um að Kristján sé sammála því.

En þetta tekur greinilega á, því þegar ég kom heim seinnipartinn þá gerði ég það sem ég geri oftast þegar ég er barnlaus (Kristján er nú varla barn lengur) ég fór að sofa! Ætlaði það svo sem ekkert, en ég skreið upp í sófa, ætlaði að horfa á restina af Leiðarljósi, og steinsofnaði...var sum sé að vakna... rúmum 2 tímum seinna ;) geysp...geysp!

Jæja, best að reyna að borða kvöldmat og sofa svo pínulítið meira...eins gott að ég er aldrei með svokallaðar "pabbahelgar", ég væri alltaf sofandi ;)

Svo núna er bara að taka þá drasstísku hvort maður á að hlaupa í kellingahlaupinu á morgun... I´m gona sleep on it ;)

Till next...adios

Undirbúningur

Það tekur á að undirbúa viku sumarbúðadvöl, held að ég og Mikael í sameiningu höfum verið síðustu þrjá tímana eða svo, að pakka niður og merkja föt. Mikael er reyndar orðinn mjög spenntur og að fá að pakka niður með mér kom rosa tilhlökkun af stað hjá honum, held að hann eigi eftir að fíla þetta í botn ;)

Skólinn (strákanna) gerir mig endalaust pirraða...náði að pirra mig á marga vegu í dag. Strákarnir fengu einkunnirnar sínar sendar og þar sé ég að á blaðinu hans Kristjáns er hann skrifaður með "vottorð" í sundi. Ég varð eitt spurningamerki í framan og spurði hann afhverju, hann sagði að sundkennarinn (sem væri sennilega í roti núna ef hann væri ekki framsóknarmaður) hafi skrifað þetta vottorð og hann Kristján sum sé einungis setið í heita pottinum á meðan að ég hef haldið að hann hafi synt og synt...veit ekki hvort þetta má án leyfis foreldra...ætla að hringja alveg brjáluð í skólann á morgun. Verst að ég hef ekki tíma til að fara sjálf í skólann, þarf að vinna og svo keyra Mikael á Vestmannsvatn.

Einnig varðandi Mikael, fékk póst frá fyrrum kennurum, þar sem þeir voru búnir að skipta bekknum upp í þrjá bekki (í stað eins stórs). Krakkarnir fengu nefnilega að velja sér þrjá vænlega bekkjarfélaga og það átti að ábyrgjast að þeir myndu lenda með amk einum af þeim. Mikael er auðvitað ekki með neinum þeirra í bekk sem hann valdi sér!

Veit ekki alveg hvort þetta er samsæri gegn mér...en maður spyr sig :/

Jæja, ætla í sturtu og upp í rúm og vona að ég sofi betur en síðustu nótt...geysp!

Till next...adios

Óhagstæð kaup í Hagkaup

Hagkaup er búð þar sem Íslendingum finnst rándýrast að versla!!! Amk mér ;)
Eftir vinnu í dag, þá byrjaði ég á að borga tannlækninum hans Kristjáns og fór svo með strákana í Hagkaup, aðallega til að kaupa föt og stígvél á Mikael fyrir sumarbúðadvölina hans.
Í fyrsta lagi, þá er þetta dru... léleg búð (reyndar ekki sú eina) því úrvalið af strákafötum er lítið sem ekkert! Það mætti halda að strákar séu varla þriðjungur kynjanna á þessum aldri...en fyrir rest gátum við grafið upp tvennar gallabuxur, tvenna boli, eina peysu, regngalla, sokka og skó (engin fundust passleg sígvél í þessum leiðangri) og ég er ekki að ýkja þegar ég segi að þetta kostaði nú bara nálægt þrjátíuþúsundkallinum!!!! Ok, viðurkenni að ég keypti mér líka sokkabuxur og skóhorn...en thats it!
Það er sum sé dýrara að kaupa föt á barnið heldur en að borga dvölina í sumarbúðunum....athyglisvert!
En auðvitað þurfti ég hvort sem er að kaupa föt á krakkann hvort sem var...svo ég er steinhætt að væla ;)
Ég gat nú reyndar ekki stillt mig um að spyrja eina afgreiðslukonuna í barnadeildinni afhverju þau væru með svona lítið úrval...eða ekkert....í þessari stráka-stærð, og hún sagði að þau væru sko með mikið af þessum fötum, en þetta væri bara svo stór árgangur að þau kláruðust strax!!! hehehehe....oft hefur maður nú heyrt skemmtilegar afsakanir :)

Svo þetta hefur verið dýr dagur...fyrst tannsi og svo föt...ekki kanski heppilegt að standa í svona stórræðum sama daginn..hehe, annars fékk Kristján flúor á tennurnar og er búin að vera þvílíka dramadrottningin síðan, hrækjandi og kveinka sér í tíma og ótíma...á voða bágt og segist ekkert geta borðað vegna óbragðs! Svo skapið er eftir því "gott".
Það var líka hringt í mig frá BT í dag, þeir ætla að prufa að strauja tölvuna hans Kristjáns í von um að geta lagað hana þannig...annars er hún ónýt!

En þetta er nú allt saman alveg dásamlegt og lífið yndislegt :)

Till next...adios

Nýja vinnan

Þá er maður byrjaður í nýrri sumarvinnu, er í eldhúsinu á Iðavelli, sem er leikskóli. Verð þar til 18.júlí en fer svo í sumarfrí og nenni ekki að vinna meira í sumar ;) Enda tómt ves að redda Mikael endalaust pössun...svo er ég líka löt, eins og marg oft hefur komið fram, og nenni barasta ekki að vinna meira í sumar :) kanski hjálpa ég jú Sverri bró eitthvað í heyskapnum...fer sennilega eftir því hversu mikið hann verður búinn að heyja þegar ég fer í frí ;)
Annars er þetta fín vinna á Iðavelli, ekkert stress og læti, en samt slatti að gera...verð að viðurkenna að ég er bara þreytt eftir tvo síðustu daga, en það er nú líka kanski vegna þess að þetta er talsvert öðruvísi vinna en sauðburður ;) aðallega heitt að vera svona inni.
Nú eru bara þrír dagar þar til að Mikael fer í sumarbúðir, og ég orðin spent ;) hann líka reyndar, honum finnst samt erfiðast að bíða eftir afmælinu sínu :)

Það er pínu skrítið ástand á heimilinu núna, PS3 tölvan hans Kristjáns biluð, svo stundum snýst hann bara í hringi og veit ekki alveg hvort hann er að koma eða fara...hehe, fór með hana í BT í dag til að láta kíkja á gripinn, sagði afgreiðslumanninum að það lægi ekkert á viðgerð, ég væri alveg róleg, hann glotti bara :D

Svo kom Sigga vinkona í heimsókn í gær, var í skreppiferð frá Norge, var verið að skíra barnabarnið hennar.....hummm, ég harðneita að vera jafngömul og fólk sem á barnabörn! ;)
hehe...
Well...best að elda kvöldmat handa gormunum...

Till next...adios

1.júní Sjómannadagurinn

Tíminn heldur áfram að fljúga, nú er fyrri sumarvinnunni minni lokið og sú seinni tekur við á morgun. Annars leið maí ótrúlega hratt og var mjög gaman að stússast í sveitinni :)

Ég fór í viðtal upp í skóla á fimmtudaginn, þar var farið yfir þroskamatið sem Mikael fór í um daginn, hann kom bara í meðaltali út úr öllu, og mér fannst þetta bara í góðu lagi, en kennararnir vilja nú samt að hann sé eitthvað skoðaður meira...er nokkuð viss um að það verður ekki hætt að kvabba í mér fyrr en það verður komin einhver athyglisbrest-greining á hann.
Einu sinni var talað um "lyka-börn" þegar börn voru almennt farin að ganga um með húslykla til að komast inn þegar foreldrarnir voru farnir að vinna báðir úti, ég man eftir þessari umræðu síðan ég var krakki, þetta þótti verða æ algengara á stuttum tíma. Í dag held ég að það sé óhætt að tala um "stimpil-börn" það þarf að stimpla þau öll, greina þau öll og troða í hinn og þennan kassann.
Afhverju mega börn ekki bara vera eins og þau eru, misjöfn eins og þau eru mörg???
Ég skil svo sem þegar sum börn eru algerlega stjórnlaus í einu og öllu, að eitthvað verði að gera, en þegar það eru smávægileg vandamál á ferðinni, afhverju er þá ekki bara hægt að leysa þau í rólegheitum án þess að troða börnum í greiningar? Æ það er svo margt sem ég ekki skil...

Var annars í rosa skemmtilegu partýi á föstudagskvöldið, rosa flottur matur og fullt af víni og skemmtilegu fólki, enda stóð fjörið frá kl.19:00-04:00 svo ég var alveg afskaplega þreytt í gær.

Er svo að fara í leynifélagspartý á eftir...og þar verður gaman að venju :)

Jæja, ætla að láta þetta duga í bili, heilinn í mér ennþá hálf dofinn eitthvað...til hamingju með daginn sjómenn :)

Till next...adios

Sól og blíða

Alltaf er nú gott að vera úti í góða veðrinu :) Tók mig meira að segja til og sló garðinn þegar ég kom heim í dag. Varð reyndar litði oní endurvinnslutunnuna mína margumtöluði...og viti menn, við mér blasti mjólkurferna, sem stóð ósamanbrotin í einu horni tunnunnar. Ég bölvaði í hljóði yfir því að einhver asn... hefði nú sett óskolaða fernu oní tunnuna, en mikið hafði ég nú rangt fyrir mér, fernan var ekki óskoluð, heldur var hún hálffull af mjólk!!! Ég á bara hreinlega ekki til eitt einasta orði yfir sumt fólk!
Mikið væri nú gaman að búa í einbýlishúsi :)
Annars hef ég minna en ekkert að segja eða skrifa, er bara þreytt og ekkert nema eldhúsdagsumræður í sjónvarpinu...vei vei...held bara að rúmið sé mest spennandi í stöðunni :)

Till next...adios

Slysalegt

Rétt í þann mund sem ég hætti að skrifa bloggið á föstudaginn og ætlaði að fara að græja mig fyrir "Killer Joe" þá hringdi vinur Mikaels í mig og sagði að hann hefði meitt sig í fætinum og gæti ekki labbað heim og hvort ég gæti ekki náð í hann. Ég auðvitað stökk út í bíl (ennþá í fjárhúsagallanum) og náði í drenginn og þar sem hann var mjög aumur og gat lítið stigið í fótinn þá auðvitað druslaði ég honum inn í bíl en lét hann svo nánast hoppa á einum fæti frá bílunum og inn heima...en studdi svona aðeins við hann. Sagði að hann hefði nú sennilega bara marist illa á lærinu. En sem betur fer þá kíkkaði ég nú á lærið á honum þegar heim kom og sá þá bara stærðar holu inn í lærið á honum. (En hann hafði sem sé verið að príla yfir grindverk, ásamt öðrum, sem rak sig í Mikael og hann datt ofaná grindverkið, sem var svona með oddmjóum spýtum). Svo ég gríp hreint viskastykki , vef því utanum lærið á honum og segi að við skulum bara skreppa upp á slysó...Mikael varð nú hálf skelkaður við það, en ég held að Kristján hafi orðið ennþá skelkaðri þegar ég segi honum að ég þurfi með Mikael upp á slysó.
Og auðvitað þurfti að sauma saman lærið á Mikael Huga og er hann nú með 5 spor í lærinu og risa plástur! Ótrúlegt samt hvað það hafur hægt lítið á honum....
En sem betur fer var hægt að fresta leikhúsinu þar til kl.10 um kvöldið og var ég mjög ánægð með að missa ekki af þeirri sýningu. Killer Joe er alger snilld! Rosalega vel leikið og flott plott.

Svo var það Eurovision í gærkveldi...þar sem við unnum næstum því...;) En Ísl. voru amk næst efstir af norðurlandaþjóðunum...við unnum Svíjagríluna og það eitt er nóg fyrir mig ;) hehe...
Svo var grill í sveitinni og rosa gaman að vera öll í kássu að horfa á Eurovision :) gáfum líka einkunnir og var það mun gáfulegri stigagjöf heldur en hjá hinum löndunum...Annars varð ég frekar fúl yfir því að þegar Ísl fékk 12 stig hjá krúttlegu dönunum...þá var Eurobandið ekki sýnt í mynd...heldur bara rússa plebbinn sem vann :( Held að Serbneska sjónvarpið ætti að skammast sín...en þetta blessaða sigurlag Rússa verður eitt af þessum sigurlögum sem enginn man lengur en í korter eftir keppni...ekki man ég hvernig það er!
Jæja, ætla að skipta um umbúðir á rassinum á Mikael ;) og koma mér svo út í sólina :)

Till next...adios

Einkunnir og Eurovision

Eurobandið klikkaði ekki í gær og kom okkur í aðal keppnina, alveg eins og tölfræðin sagði til um ;)
annars var maður spauglaust alveg að springa úr monti þegar þau fluttu lagið, gæsahúð og þjóðarrembingur í bland...og svo voru mikil gleðiöskur hjá mér og strákunum þegar það var sagt að Ísland hefði komist áfram :) Auðvitað erum við best ;) eins og alltaf, hinar þjóðirnar fatta það bara ekki alltaf ;)

Fékk síðustu en ekki sístu einkunnina mína í gærkveldi, fékk 8 í Upplýsingarýni, svo nú eru allar einkunnir komnar og lítur þetta þá svona út í heildina:

Afbygging 20.aldar: 7 meðaleink; 7,2
List og fagurfræði: 7 meðaleink; 8,2
Upplýsingarýni: 8 meðaleink; 6,72
Siðfræði og álitamál: 8 meðaleink; 6,5
Ljósvakamiðlun: 8,5 meðaleink; 8,3
Inngangur að fjölmiðlafræði: 9,5 meðaleink; 7,48

Mér reiknast það sem svo, að ég hafi sum sé 8 í meðaleinkunn :) MONT MONT MONT ;) hehe.
Er bara gríðarlega ánægð með þessar einkunnir og sérstaklega þar sem ég tók 2 auka einingar, svo hver veit hvað maður gerir næst ;)

Jæja, ætla að drífa mig úr fjárhúsagallanum og í fínu fötin fyrir leikhúsferð á eftir...Killer Joe...
spennó, svo sjálf aðal Júróvisjón á morgun...ÁFRAM ÍSLAND.....ÁFRAM ÍSLAND.....ÁFRAM ÍSLAND.....

Till next...adios

Nr.1 :)

Númer eitt !...og þá er ég ekki að tala um Eurovisíon...heldur mig :) Ég fékk nefnilega 9,5 í fjölmiðlafræði og var með hæstu einkunnina :) Er gersamlega að rifna úr monti, er bara þokkalega sama hvernig söngvakeppnin fer og alles...brosi bara hringinn samt ;) Annars fór ég að spá í tölfræðilegt aðhvarf í dag, og samkvæmt því, þá eru gríðarlega miklar líkur á að Ísland komist upp úr undankeppninni í ár...en þetta er nú tölfærðin :)
(Þetta hlýtur að virka rosalega háskóla-gáfumanna-lega...tíhí)

Ég fór með mömmu í hið nýja Nettó í dag, og nú getur maður óskað Akureyringum til hamingju með að hafa loksins eignast alvöru stórmarkað. Ég hafði það á tilfinningunni að ég væri stödd í stórborginni...nú getum við lagt af molbúaháttinn og orðið alvöru stór-bær :) Það er hátt til lofts og vítt til veggja og fullt af sömu hlutunum í sömu hillustæðunum...so whatt þótt það taki mann klukkustund lengur að versla í matinn, bara vegna vegalengda í búðinni, við Akureyringar eigum hvort sem er nokkra klukkutíma auka í sólarhring sem Rvk.-ingarnir nota í akstur á milli staða ;)

Evrósisíon er að byrja....spennnnnnnó.....have fun :)

Till next...adios

Letilíf

Nennti ekki á foreldrafélagsfund í Brekkuskóla áðan.
Nenni heldur ekki að blogga.
Set inn tvær dýramyndir í sárabætur fyrir æsta aðdáendur mína...sem ég veit að leynast víða ;)
Fyrst er hér mynd af sætu lambi...


Og svo mynd af kisa og kisu...sem heita reyndar Snúður Bolluson (kallaður Vælir) og Bolla...Hafið það sem best í blíðunni framundan...og áfram Ísland :)

Till next...adios

Afmæli og Evróvisíon

Hún Kathleen Caroll, sem er svo heppin að vera mágkona mín ;) á stórafmæli í dag...er orðin fertug en lítur út fyrir að vera þrítug :)Hér er hún ásamt Nonna bró. en þessi mynd er sennilega tekin um jólin 2006
Til hamingju með afmælið Kathleen :)

Það er fyrsti í Eurovisíon í dag og eftir sléttan hálftíma hefjast herlegheitin...svo maður getur verið syngjandi glaður næstu dagana. Fattaði það reyndar áðan að ég á 3 stutta bjóra inn í ísskáp, spurning um að drekka einn þeirra á hverju keppniskvöldi ;) Alltaf partý hjá mér...hehe.

Iron Man var flottur, bara með betri hasarkallamynd sem ég hef séð...ég varð ekki fyrir neinum vonbrigðum með Járnkallinn minn ;) hann er reyndar svolítið straumlínulagaðri heldur en hann var í hasarmyndablöðunum í denn...en flottur er hann, og hann Robert Downey Jr. er snilldargóður sem aðal töffarinn ever! Þetta er pottþétt mynd sem verður keypt á DVD daginn sem hún kemur út ;)

Jæja, ætla að gíra mig í Júró gír...góða skemmtun í kvöld :)

Till next...adios

Silast...

...inn einkunnir, var að fá eina í dag, fékk 8 í siðfræði og álitamál :) bara mjög ánægð með það, enda líka bara 2 sem voru hærri en ég...og það er alltaf ennþá skemmtilegra að vera nálægt toppnum :) Þið verðið bara að umbera montið í mér örlítið...hehe.
Annars lítið að frétta, maður er að komast í Eurovisíon fíling, samt spurning hvort maður verður ekki búin að fá alveg nóg eftir 3 kvöld!!! En maður horfir amk á þegar Ísland er í undanúrslitum...svo fer lokakvöldið eftir því hvort við komumst áfram, hvort maður horfir með báðum eða bara með öðru og drekkur bara þess mun meira ;) hehe...
Jæja, þetta verður bara að vera stutt núna, ætla að elda kvöldmat og drífa mig í bíó...jammm, tekin var sú drasstíska ákvörðun að skella sér á Iron Man! Framhald í næsta bloggi...;)

Till next...adios

Skóla-fól

Um daginn gerðist það í Brekkuskóla að einhverjir gormar tóku sig til og rispuðu eina tvo bíla út á bílaplani, sem voru í eigu einhverra kennara. Og hverjum haldiði að hafi verið kennt um??? Jú, einmitt, honum Mikael mínum og vini hans :( Reyndar kom bara almennur póstur á alla foreldra þar sem var talað almennt um þetta atvik, og engum kennt um og foreldrar beðnir um að ræða við börn sín. Ég gerði það náttúrulega og Mikael var alveg miður sín yfir þessu...þ.e.a.s hann var miður sín yfir því að enginn í skólanum trúði því að hann hefði ekki gert þetta! "Mamma það trúir mér enginn og mér er kennt um" sagði hann með tárin í augunum. Ég er reyndar ennþá að bíða eftir að vera boðuð á fund í skólanum og er að hugsa um að bíða bara róleg eftir því og ræða þetta í leiðinni.
Annars fór ég að hugsa um að það er alls ekki þægilegt að vera kennt um eitthvað sem maður gerir ekki, hvað þá ef maður er bara 6 ára!
Mér finnst a.m.k að kennarar hljóti að þurfa að hafa eitthvað meira í höndunum en bara að stökkva á næstu ólátabelgi og kenna þeim um!
En ég er náttúrulega bara svolítið sár og bitur út í skólakerfið...og á eftir að díla við það í ein 9 ár í viðbót....púfff!

Ég fór í Nettó í gær, sem er svo sem ekki í frásögur færandi, nema það að þar standa yfir víðáttumiklar breytingar. Maður er alveg klukkutíma lengur í búiðnni en vanalega, vegna þess að það er búið að færa allt til og jafnvel þarf maður að elta hillurnar. Ég stóð hjá einni hillu og var að ákveða hvort ég ætti að kaupa Betty-Croker karmelluköku eða Brownies....en þá fór bara hillan í burtu. Ég reyndi nú að fylgja henni eftir með augunum og þegar hún stöðvaðist þá stökk ég til og reyndi að hrifsa til mín einn pakka...þá fór hillu fjárinn aftur á stað og ók nærri yfir tærnar á mér. Ég gargaði Æ og þá stoppaði hún...hillan sko...ég heyrði að einhver sagði "bíddu aðeins" og svo náði ég að hrifsa til mín karmelluköku og haltra í burtu. Ekki var nú neitt verið að biðja mann afsökunar á ákeyrslunni...ef ég hefði verið pínu úrill þá hefði ég eflaust skammast eitthvað, en ég nennti því ekki, var bara fegin að sleppa með allar tær óbrotnar.
Annars vorkenni ég bara aumingja fólkinu sem vinnur í búiðinni, búnar að vera breytingar og læti þarna í einhverjar vikur, en sem betur fer þá ætla þeir nú víst að loka alveg í eina 3 daga og klára herlegheitin. Spurning hvað fyrsta búðarferðin í nýja Nettó á eftir að taka marga klukkutíma...

Till next...adios

Stríð

Ég vaknaði nokkuð spræk í morgun og dreif mig í sveitina, við Sverrir vorum voða dugleg að marka, sprauta, gefa ormalyf og setja lambærnar út í góða veðrið, samt slatti eftir inni enn ;)
Á heimleiðinni hugsaði ég um að nú skyldi ég aldeilis leggja mig í sófann fram að kvöldmat...en þegar ég var að rölta að húsinu þá fattaði ég að það átti víst að taka garðarusl úr görðunum í dag.(Svona hreinsunarvika í gangi...hummm)
Þar sem ég hafði lengi ætlað að saga niður örfáar greinar sem stóðu svolítið út á götu, þá ákvað ég að fresta leti-sófanum og náði í sögina góðu. Ég sagaði og sagaði og tók nokkrar greinar sem voru full neðarlega fyrir minn smekk...og þá fór ég að spá í runna helv.... sem er hér við eitt húshornið, þetta er risa runni með risa risa RISA stórum göddum allsstaðar! En runninn var farinn að vaxa ískyggilega fyrir einn gluggann.
Og ég fór að saga, og runninn fór að stinga mig og ég sagaði meira og í hvert skipti sem runna kvikindið stakk mig þá sagaði ég eina grein í viðbót! Auga fyrir auga! Í stuttu máli þá var ég í garðinum frá kl.17:00-20:00 og þótt ég sé útúrstungin með blóðidrifnar hendur þá er minna eftir af runnanum heldur en mér...hehe. En runna skrattinn elti mig alla leið inn og ég var að tína síðustu gaddana úr hárinu á mér í sturtu...hann ætlaði ekki að gefa sig!
En ég var og er algerlega að niðurlotum komin...hefði sennilega verið gáfulegra svona heilsufarslega að henda mér í sófann heldur en að henda mér í runnann...
En veðrið er gott eigi að síður :)
Farin að leggja mig í sófann...

Till next...adios

Sikk

Er heima veik, er druslulegri en drusla og slappari en grá-sleppa...
Var með ægilegt samviskubit yfir að hafa ekki komist í sveitina í dag og var þess full viss að allt færi í steik í fjarveru minni...en svo hringdi ég í Sverrir áðan og allt gekk ljómandi vel í dag! En í sveitina skal ég á morgun með góðu eða illu!!! Einnig átti ég að vera á stjórnarfundi hjá Freyvangsleikhúsinu í kvöld en missi líka af því :(
Annars skemmtilegri fréttir :) Ég fór í ljómandi skemmtilegan saumaklúbb á þriðjudagskvöldið, það voru verðlaun í boði fyrir þá sem löbbuðu í klúbbinn og þar sem Lára litla á heima næstum á hjara Akureyrar þá var þetta langt og strangt labb...ég var næstum búin að ræna reiðhjóli af gömlum kalli sem hjólaði framhjá...ef hann hefði haft bögglabera aftaná þá hefði ég tyllt mér ;) En það voru veg-leg verðlaun og labbið þess virði. Góður matur, gott vín og síðast en ekki síst alveg frábær félagsskapur :)
Svo fékk ég eina einkunn í dag, ég fékk sum sé 7 í afbyggingu 20.aldar, sem er áfanginn sem yndislegi ítalinn kenndi svo listilega af sinni alkunnu snilld ;) Gott ef hitinn lækkaði ekki um einar 7 kommur þegar ég sá einkunnina áðan :)
Jæja, ætla að leggja mig og reyna að losna við sleppuna fyrir fyrramálið ;)

Njótið lífsins því það er frábært :)

Till next...adios

Hvítasunnudagur

Gleðilega hvítasunnu og mæðradag :)
Í tilefni dagsins var ég í fríi frá burðarstörfum og notaði daginn í þvott, tillagningu og skúringar :) núna lítur stofan bara vel út í fyrsta skiptið síðan um jól...en ég hugsa að ég geti talið mínúturnar þangað til að hún fer á hvolf aftur! Reyndar er ég búin að tuða í strákunum nokkuð oft í kvöld að ganga betur um.En þeir taka því eins og hverju öðru tuði...
Annars er ég búin að vera voðalega löt í dag...drattaðist ekki á fætur fyrr en um hádegið, ætlaði svo að skella í pönnsur í kaffinu en varð ekkert úr því vegna skúringa...en svona í sárabætur þá bakaði ég pönnukökur handa strákunum í kvöldkaffi :) Svo er bara að drífa sig í sveitina í fyrramálið í áframhaldandi sauðburð í sumarblíðunni, sem byrjaði í dag ;)
Jæja, er voða eitthvað hugmyndasnauð í og veit ekkert hvað ég á að skrifa...nenni ekki einu sinni að skammast út í neitt og þá er nú mikið sagt...

Till next...adios

Hvítasunnuhelgarhret

Já, það hefur ekki verið sérlega gott veður í dag, fyrst var kalt og suddi en svo varð kaldara og fór bara að snjóa. Öll tún voru orðin mjalla hvít þegar ég fór úr sveitinni eftir kaffið í dag. En það er víst von á betri tíð með blóm í haga mjög fljótlega...svo þá verður vonandi hægt að koma slatta af lambám út. Voðalega er ég farin að tala bóndalega ;) hehe...
Allt annað, tata...fékk einkunn nr. tvö í dag, en það var List og fagurfræði (prófið sem mér gekk illa í) og ég fékk 7 mér til mikillar furðu. Tel það full víst að kennarinn hafi tekið á þessu mjög mjúkum höndum, hélt að ég hefði klúðrað þessu próf big time! Jæja, bara ánægð með þetta, enda var þetta svona auka fag, sem ég lagði enga ofuráherslu á, meira svona til gamans og næla mér í tvær auka einingar, sem ég hef eflaust ekkert að gera við ;) en ég veit þó að þetta er hægt...vonandi, á reyndar eftir að fá út úr 4 áföngum ennþá...og þar á meðal crazy enska prófinu í afbyggingu 20.aldar. Mér skylst að það sé bara nokkuð gott að fá 6 úr þeim áfanga... Jæja, best að vera ekki að spá of mikið í þessu svona fyrir fram, þetta er víst komið úr mínum höndum og í heldur kennaranna :)
Hafið það gott í snjónum...og munið að sumarið kemur aftur á sunnudaginn :)

Till next...adios

Burður

Fyrst létu þær á engu bera, en svo byrjuðu þær að bera :)
Eftir bongó blíðu í gær var frekar kalt og rigningarsuddi í dag og þá ákváðu einmitt ærnar að skjóta úr sér lömbum sem aldrei fyrr. Öll plön okkar Sverris um að marka og færa til fé varð marklaust og dagurinn fór bara í að flytja þær nýbornu í spil. Þar sem var nóg pláss í gær var orðið fullt af tvílembum í dag. Gaman að því, mætti samt hlýna aftur í hvelli takk :)
Annars er tíðindalítið úr fjárhúsunum...og af mér...tók annars á móti "fyrsta lambinu mínu" í dag, það kom bara haus en fæturnir voru eitthvað beiglaðir undir því, svo ég þurfti að ýta hausnum aftur inn (hann var nú sem betur fer ekki kominn allur út) og finna lappir og tosa svo út aftur.
Fór að spá hvað við mannfólkið, (þótt ósjálfbjarga séum fyrstu 20 árin) erum heppin að fæðast með hausinn fyrst...það yrði örugglega alveg agalega vont ef það þyrfti að ýta hausnum á barni inn aftur og leita af höndunum....hummmm...bara smá pæling ;) hehe...
Læt þessu bulli mínu lokið í bili, ætla að leggjast í leti-sófann minn :)
Ekki bólar á fleiri einkunnum...

Till next...adios

Góð byrjun...

á prófeinkunum...fékk fyrstu einkunnina í dag, og fékk sum sé 8,5 sem ég er bara ánægð með, sérstaklega þar sem aðeins 2 fengu 9 og enginn hærra en það. Svo er bara að krossa alla putta og vona að restin verði a.m.k. einhversstaðar þar í grenndinni ;)
Annars er ég bara á fullu í sveitastörfunum þessa dagana, nóg að gera og ég bara þreytt eftir daginn, en maður kemst nú ekki í skemmtilegri vinnu en þetta...sérstaklega þegar veðrið er svona æðislegt eins og það var í dag :)
Jæja, veit ekkert hvað ég get bullað hér meira í bili, mér hlýtur að detta eitthvað sniðugt í hug seinna...ætla að kíkja á kjúllann í ofninum.
Hafið það gott í góða veðrinu :)

Till next...adios

Sex af sex :)

Einhvernvegin svona leið mér eftir síðasta prófið í gær:
En ég náðist ekki á mynd og fékk því þessa lánaða, enda Mikael mun skemmtilegra myndefni en ég ;)
Já, það er gaman að vera búin í prófum, en nú byrjar taugastríð nr.2...að bíða eftir einkununum og einhvernvegin hef ég það á tilfinningunni að ég gæti þurft að bíða slatta. Svo það er gott að hafa nóg að gera ;)
Hélt upp á próflokin í gær með þvi að byrja á að fara og láta skipta um dekk á bílnum, svo nú er hann kominn á sumartúttur. Svo fór ég í sveitina og reyndi að gera eitthvað gagn :)
En um kvöldið var náttúrulega aðaldjammið, en þá hittist bekkurinn minn heima hjá einni og þar var grill og öl að vild...alger snilld :) Var samt eitthvað svo þreytt og át svo hryllilega mikið yfir mig að ég fór bara heim fyrir miðnætti, en þetta var rosa gaman og frábært að vera í svona samheldnum og skemmtilegum bekk :)
Ég er samt ekki ennþá alveg að átta mig á því að skólinn sé búinn, prófin búin og ég búin með heilt ár af háskólanámi...kanski nokkrir dagar þangað til að fattarinn fer alveg í gang.

Till next...adios

Afmæli í sveitinni

Í dag, 4.maí, á litli bróðir afmæli, hann Sverrir og óska ég honum innilega til hamingju með það :) Í tilefni dagsins þá skelli ég hér inn mynd af Sverrir með nokkrum vinum sínum:
Hér er hann í góðra kinda hópi :) Ég ætla að drífa mig í sveitina eftir síðasta prófið á morgun, svona aðallega til að athuga hvort ég finni ekki tertuafganga ;)
Var annars pínulítið dugleg áðan (ekki að tala um lærdóm) ég fór nefnilega aðeins út að skokka, skokkaði í 20 min og var að niðurlotum komin...Fór að spá í hvernig stæði á því að mér finnst ég vera í verra formi núna en þegar ég byrjaði að skokka í fyrra sumar. Fattaði svo allt í einu, að þegar ég byrjaði þá, þá var ég náttúrulega búin að vera að vinna í rúm 15 ár í eldhúsi FSA og alltaf á þönum! (er ekki einu sinni að ýkja núna)...Þess vegna var ekkert tiltökumál að skokka út í Kjarnaskóg og aftur til baka í fyrsta skokki, núna er ég náttúrulega búin að SITJA á skólabekk síðan í haust og lítið hreyfst á mér rassinn við það. Svo sennilega verð ég lengur að koma mér í form núna en sl. sumar...spurning um að reyna að missa þetta ekki niður...en hvað get ég sagt...ég er bara löt!
Jæja, ætla að reyna að lesa eitthvað í Critical Thinking fyrir prófið í fyrramálið... og ef einhver heyrir mikil gleðiöskur um hádegisbilið á morgun (já það gæti heyrst suður og austur líka...og til annara landa jafnvel) þá er það ég að fagna próflokum :)
Til hamingju með afmælið Sverrir :)

Till next...adios

Lazy cow

Jamms, ég er löt belja í dag...þyrfti að vera að lesa og lesa en fór þess í stað í langan göngutúr með strákana. Við byrjuðum á því að labba út í Sunnuhlíð, en þar var svona vorhátíð þar sem krökkum fæddum 2001 voru gefnir reiðhjólahjálmar, svo fengum við líka pylsur sem var ljómandi :) Svo gengum við niðrí bæ, komum við í BT þar sem eytt var í myndir og tölvuleik, síðan rölt áfram inn í miðbæ og svo heim. Ég var alveg að niðurlotum komin eftir "alla" gönguna og fór að horfa á mynd með Mikael og við sofnuðum samviskusamlega í sófanum...dugleg :)
En er loks sest niður með bækur fyrir framan mig, en það gengur eitthvað illa að festa hugann við námið, kanski er það öll sólin sem skín núna úti. Það er alveg ekta vorveður, sól, logn og hlýtt :) Ég hef kanski fengið smá sólsting í dag (þótt sólin hafi nú ekki skinið mikið í göngutúrnum), þessvegna er ég svona sljó eitthvað. Svo bakaði ég köku...setti í þvottavél...sem minnir mig á það, þvottavélin er löngu búin...best að hengja upp og panta pizzu :)
Svo er Evróvisión þáttur í sjónvarpinu í kvöld...tata...á morgun segir sá lati...

Till next...adios

Fimm af sex

Þetta er alveg að hafast. Var í siðfræðiprófinu áðan, það er reyndar ekki ennþá búið en ég hafði bara ekkert meira að skrifa og fór heim eftir rúman klukkutíma. Annars gekk mér bara ágætlega eða var heppin með prófspurningar ;) Þetta er náttúrulega alltaf spurningin um hvort maður er spurður að því sem maður veit ;) Annars hef ég í hyggju að halda upp á að þetta próf sé búið með því að nördast yfir "Leiðarljósi", elda svínasteik og byrja svo á að læra undir síðasta prófið. Kristján ætlar í bíó með vinum sínum í kvöld, að sjá Iron Man, svo við Mikael verðum bara að slappa af og læra. Annars langar mig óskaplega að sjá Iron Man,... Kristján vill samt ekki að ég fari með þeim félögunum í bíó ;) hehe...en Iron Man var nefnilega uppáhalds-hasarmyndapersónan mín í gamla daga :)
Annars er þetta líka spurning um að halda bernskuminningunum um Iron Man ómenguðum eða svipta honum inn í nútímann með þeim afleiðingum sem því kann að fylgja...set málið í nefnd :)

Till next...adios

Aðfaradagur 1.mai uppstigningardags

Síðasti séns að blogga í apríl á þessu ári, og ég get ekki látið það framhjá mér fara, þótt ég eigi að vera að lesa...einnig er mér boðið í all svakalegt próflokapartý í kvöld (sumir eru búnir fyrr en aðrir) og ég get heldur ekki látið það framhjá mér fara...þótt ég eigi að vera að lesa ;)
Einnig virðist það virka svo vel að hafa orðið "fyllerí" inn í bloggfærslum hjá mér, fólk kommentar bara sem aldrei fyrr og þá gleðst ég í sálu minni :)
Svo nú vona ég bara að ég geti haldi aftur af mér og komið mér heim á skaplegum tíma...múhahaha! Je je...In my dreams ;) Annars ætlar bekkurinn minn að hittast og bera saman bækur sínar varðandi siðfræðina eldsnemma á morgun (kl.13) svo ég verð bara að vakna og vera spræk :) og lesa... Verð bara að viðurkenna, að þótt mér finnist all svakalega gaman í skólanum, þá verð ég voða fegin þegar prófin eru búin og ég fer "bara" að vinna :) Reyndar er ég nú fyrst um sinn aðallega að fara að skemmta mér í sveitastörfum, taka á móti lömbum og dreifa skít...I love it :)

Till next...adios

Tvö eftir

Var í prófi áðan í "inngangur að fjölmiðlafræði" þetta er reyndar frekar mikið rangnefni á þessum áfanga, því ég held ég myndi treysta mér til að vinna á hvaða fjölmiðli sem er eftir þetta! Þetta ætti að heita: "fjölmiðlafræði krufin til mergjar". :) Annars gekk mér ljómandi vel í prófinu og á von á prýðilegri einkunn út úr þessum áfanga :)
Svo nú á ég "bara" eftir próf í siðfræði á föstud. og upplýsingarýni á mánud. Svo ég er ansi hrædd um að það verði ekki fyllerý hjá mér á næstunni ;) Talandi um fyllerý...ég þarf greinilega að blogga meira um fyllerý og þynnku, því ég hef bara ekki fengið jafn mörg komment á bloggfærslu leeeeengi, eins og á síðustu færslu ;)
Sumarið er komið í pásu, eins og það var gott veður um daginn...í tvær vikur eða eitthvað, þá er bæði kalt og rok núna. En ég vona að þetta sé bara tímabundið ástand sem lagast fyrr en síðar.
Tjæja...ekki dugir að slóra, best að læra siðfæði (ekki veitir mér af;).

Till next...adios

Þrjú af sex

Þá er ég hálfnuð í prófunum, var í list og fagurfræði í morgun, púfff, miðað við 2 eininga áfanga, þá var þetta nú bara strembið próf...eða þá að ég var frekar illa lesin :/ Sem er svo sem engum nema mér að kenna, það er svona að sturta bara í sig allskyns tegunum af áfengi á laugard.kv. og liggja svo bara eins og asni í gær og lesa bara aðeins um kvöldið. Ég hef svo sem ekki lagt mikla áherslu á þennan áfanga, þar sem ég tók þetta nú bara svona auka, mér til ánægju og visku auka :) En að fara að skilgreina listkenningar í prófi, er bara of flókið fyrir minn þunna heila :)
Samt svo sem gott á mig, því ég fékk svo mikið samvskubit eftir prófið að ég er búin að sitja og læra undir næsta próf (sem er á morgun) í 4 tíma án þess að blikka auga!
Best að halda áfram að lesa...ætla að skríða upp í sófa með hann Þorbjörn Broddason undir hendinni...

Till next...adios

Annar í sumri

Tjæja, er nú búin með 2 próf og 4 eftir...gekk bara ágætlega í dag, held að ég nái amk, en verð ekkert að brillera út úr þessum áfanga...say no more :)
Annars hélt ég upp á þetta í kvöld með mjög dramatískumn hætti, ég og Stella Artois, sérleg vinkona mín, skúruðum gólfin saman, það var gaman.
tölvan er að fara að slökkva á sér og ég í rúmið.

Till next...adios

Sumardaguinn fyrsti

Gleðilegt sumar :)
Þar sem ég vil ekki segja neitt neikvætt á sumardaginn fyrsta, þá verður þetta stutt blogg... er annars að lesa undir próf og þess vegna verður þetta stutt blogg...mér finnst íslendingar fyndin þjóð og hló eins og vitleysingur þegar ég sá myndir af "átökum bílstjóra og lögreglu" í sjónvarpinu í gærkveldi. Sem sýnir kanksi best hvað ég er rugluð.

Till next...adios

Óþolandi

Til eru stofnanir hér á landi sem algerlega óþolandi er að eiga samskipti við en samt kemst maður engan vegin hjá því. Þessar stofnanir ganga dags daglega undir nafninu bankar. Alltaf þegar ég þarf eitthvað að erindast í banka, þá fær maður bara svona "já já þetta er allt í lagi, við sjáum um allt og engar áhyggjur" á þessum tímapunkti ætti maður strax að fara að hafa verulegar áhyggjur! Sem dæmi get ég nefnt, að þegar ég tók þá drasstísku ákvörðun að hætta hinu hefðbundna brauðstriti og sikella mér í skóla mér til gamans og fræðslu, þá fór ég í minn viðskiptabanka og fór að ganga frá námslánum, yfirdrætti fyrir námslánin og allt þetta skemmtilega. Svo afþví að ég er með svona "launavernd" í bankanum, þá spurði ég auðvitað hvort hún dytti út eða hvort ég þyrfti að breyta einhverju varðandi það. Og svarið var: "nei, ekkert mál, þetta verður bara óbreytt og þú þarft ekki að hafa neinar áhyggjur:" Allt gott og blessað með það, bankinn dregið af þessar krónur í launaverndina í hverjum mánuði samviksusamlega. Svo allt í einu í dag, fékk ég bréf um það að ekki hefði verið greitt í þessa títtnefndu vernd og nú myndi hún falla úr gildi ef ég hringdi ekki í hvelli í aðra af tveimur undirrituðum kellingum. Og ég hringi, ekki hress, fór meira að segja að gá hvort þetta hefði ekki alltaf verið skuldfært...og jú jú. Ég var náttúrulega ekkert voða hress í símann (hef samt þann rosalega galla að ég get enganvegin verið dónaleg í síma við fólk sem ég þekki ekki neitt, alveg sama hversu mikið mér misbýður) og sagði farir mínar ekki sléttar. Hurru, þá virkar þessi fjandans launavernd þannig að þeir hafa kroppað af lífeyrissparnaðinum mínum á móti þessu sem þeir hafa dregið af mér! Svo þegar ekkert kemur í lífeyrissjóðinn (eðlilega þar sem ég er bara að leika mér í skóla) þá verð ég að gjöra svo vel að borga miklu miklu miklu meira ef ég ætla að halda þessari vernd + það að borga tæpar sex þúsundir í "vanskil". Svo dæmið verður þannig að núna þarf ég að borga tæpar 3 þús á mánuði í þessa vernd í staðin fyrir 6 hundruð. En mismuninn hefur bankinn bara hirt af lífeyrissjóðnum mínum algerlega án þess að gera mér grein fyrir því. Ég man amk ekki betur, en þegar sölumaður bankans hringdi og bauð mér þennan frábæra kost, að ég borgaði alltaf bara viss prósent af laununum mínum og ekki krónu meir! Svo að trygging sem ég hélt að ég væri að borga tæpan 10.þús á ári, kostar mig í raun ca.36.þús á ári...peningaplokkið fór bara fram þar sem maður vissi ekki af því!!!
Niðurstaðan er sú að annað hvort er ég bæði auðtrúa og heimsk eða að bankarnir eru ósvífin glæpasamtök sem svífast einskyns til að plokka af manni aleiguna!

Ætla að reyna að róa mig niður og lesa The Age of Extremes og The New Century lokapróf í afbyggingu 20.aldarinnar á föstudaginn ;/

Till next...adios

Próf

Þegar stundarskráin mín á netinu, er farin að komast fyrir á einum skjá og ekkert hægt að skrolla niður til að skoða meira, þá þýðir það bara eitt: það eru að koma próf! Mér hálf brá meira að segja þegar ég fattaði áðan að ég á bara eftir 3 skóla-daga, sum sé á morgun, miðvikudag og föstudag...og er reyndar í fyrsta prófinu líka á föstudaginn ;/
En eins og allkir vita þá er sumardagurinn fyrsti á fimmtudaginn og þar með frí í öllum skólum :) sem er auðvitað ljómandi skemmtilegt ;) Reyndar kanski ekki alveg eins skemmtilegt að þurfa etv að eyða megninu af honum í próflestur, en kanski reyni ég bara að vera dugleg að lesa fyrir fimmtudaginn (je right!).
Ég var svo ljómandi dugleg að koma mér hjá ritgerðarskrifum um helgina að mér hefur sjandan tekist betur upp í því, en oft verði góð ;) ég var náttúrulega á fullu allan föstudaginn, eins og áður hefur komið fram, og bætti því reyndar við að stökkva í leikhús LA og sjá Dubbeldush (ég hélt sko að ég ætti miða á laugardkv.) svo ferlið um kvöldið var: Freyvangur - Leikfélag Akureyrar - Freyvangur. Var mjög þreytt á laugardaginn og var mjög þakklát þegar okkur var boðið í grill um kvöldið :) Í gær fór ég svo í sveitina að hjálpa Sverrir að sprauta ærnar, kom svo heim um 4 leitið og ætlaði þá að byrja á ritgerð en var eitthvað svo lengi að væflast eitthvað og erfitt að byrja, svo ég skellti mér bara á gönguskíði :) Þegar ég kom heim aftur þá eldaði ég lagsagna fyrir strákana (já og mig náttúrulega) og var þá orðin svo þreytt að ég fór afar snemma í háttinn.
Svo morguninn í morgun fór í ritgerðarsmíð frá kl.8-12 en ég náði að klára og vona svo bara það besta. Þetta er víst ritgerð upp á 35% af lokaeinkunn, svo ég vona bara það allra besta ;)
Jæja, ætla að reyna að gera eitthvað af viti...(hóst hóst)

Till next...adios

Hlaup

Gott ef ég fann ekki bara að hlaupaskórnir mínir höfðu saknað mín síðan síðast er ég stökk í þá...en það eru víst alveg 5 mánuðir síðan!!! Ég tók mig nefnileg til í sumarblíðunni sem var í dag og fór í fyrsta skokk ársins. Ég var búin að vera innilokuð í skólanum frá kl.8 og til kl.15 svo mér fanst þetta gáfulegra heldur en að skríða upp í sófa. Ég skokkaði í 25 min. og blés eins og hvalur og var rauð í framan eins og tómatur eftir þessa þrekraun. Núna er ég alveg kreisí þreytt í fótunum en rétt ófarin fram í Freyvang til að æfa smá glens fyrir lokapartýið og sturta í mig bjór í tilefni lokapartýsins og þess að ég er búin í ljósvakamiðlunaráfanganum :) var í prófi í dag og gekk bara fínt! Sigrún Stefáns kallaði okkur meira að segja "gullhópinn" sinn, því við værum svo æðisleg :) geeeeeegjað.
Jæja, ég verð sennilega bæði með harðsperrur og þunn á morgun, svo ekki búast við bloggi þá...liggaliggalá...
Ps. ég er bara mjög sennilega að fara að kaupa mér nýrri bíl, allt að gerast, sem er líka eins gott því minn gamli gráni er farinn að láta undarlega, nú er bara að skokka í bankann og fá lán í veikri íslenskri krónu ;)
Lifið heil og góða helgi...lífið er yndislegt og það er komið sumar :)

Till next...adios

Væl

Ég á að skila 2000 orða verkefni á fimmtudaginn, ég er byrjuð og afraksturinn er: Mikill fjöldi rannsókna einn og sér bætir ekki upp það sem rannsóknirnar skortir í gæðum. Svo nú á ég bara eftir 1985 orð...Á eftir að lesa rúml. 200 bls. bók fyrir próf á föstudaginn í Ljósvakamiðlun, þetta er lokapróf og allt uppúr bókinni, svo það er best að vera búinn að lesa hana...Svo þarf ég að skila 3000 orða ritgerð um lauslæti á mánudaginn sem er ekki komin langt á leið. Þetta myndi óneitanlega ekki virka jafn yfirþyrmandi ef ég þyrfti ekki að vera í skólanum frá 8-17 á morgun, hinn og þar hinn...;/
Svo er líka lokasýning og partý á föstudagkvöldið í Freyvangi...og ég að fara í leikhús (LA) á laugardagskvöldið.
Væri kanksi upplagt að reyna að byrja á einhverju og hætta að væflast á netinu og blogga eins og asni!

Till next...adios

Leti

Bloggfærslur mínar hafa oft byrjað á "leti" eins og leti, letidagur, letistuð, og er ég því að spá hvort ég sé ekki bara svolítið löt að eðlisfari...hummm, mér finnst amk mjög gott að liggja í leti annað slagið og gera minna en ekkert. Einn svoleiðis dagur er í dag.

Mikael spáir stundum í hvað hann langar ekki að vera, eða hvað hann langar að vera...og setur alltaf rök fyrir þessum hugleiðingum sínum. Í morgun sagði hann allt í einu: "ég myndi ekki vilja vera gæs" og ég segi bara nú, og fannst það svo sem ekkert skrítið, en þá sagði Mikael "Þá væri ég alltaf með gæsahúð" ! Hehe..
Svo man ég eftir einu sem hann sagði fyrir dálitlu síðan: "Mamma, ég myndi ekki vilja vera kind...því það er alltaf labbað ofaní matnum þeirra"....svo sem algerlega rökrétt :)


Till next...adios

Lauslæti

Ég var með framsögu um lauslæti í dag, átti reyndar að gera það í gær, en þar sem kennarinn þurfti að fara á fund var því frestað. Ég er sum sé að skrifa ritgerð um lauslæti og var með framsögu um hana í dag. Það gekk bara ótrúlega vel og ég held að ég hafi náð að ræða flesta hluti sem tengjast lauslæti, amk virtist kennarinn nokkuð sáttur, nema kanski þegar ég sagði að fólk tengdist oft lauslæti stéttum og félagsstörfum og tók sem dæmi, leikarastéttina, kóra og kennara ;) hehe...kom reyndar inn á það einnig að auðvitað væri ekkert meira lauslæti þar en einhversstaðar annarsstaðar...bara stimpill sem virðist festast við sumt "hópastarf" . Reyndar er ætlun mín ekki að rekja framsöguna frekar á þessum miðli, en áhugasamir geta fengið keyptan glærupakka um efnið á sanngjörnu verði hjá mér :)
Svo byrjar ljósvakamiðlunartörn hjá mér á morgun, svo ekki má búast við bloggi fyrr en í fyrsta lagi næstu helgi ;) eins og þetta sé hvort sem er eitthvað gáfulegt hjá mér...
Annars þarf ég nauðsinlega að koma frá mér smá áliti sem er eftirfarandi: Mér finst asnalegt að mótmæla afstöðu Kínverja til Tíbet með því að áreita íþróttafólk á hlaupum með ólimpíueldinn hér og þar um heiminn. Reynið bara að berja á kínverskum stjórnvöldum heima hjá þeim! Mér finnst asnalegt að ráðherrar séu að skreppa til útlanda á einkaþotum, og kosta hellings meira en venjulegt flugfar! Mér finnst líka asnalegt að kellingar eða kallar sem ráðherrar fari til landa þar sem stríð geysa, eins og Afganistan eða Írak og þykist ætla að laga ástandið þar! Hverjum er ekki sama um hvað ráðherrakelling frá Íslandi segir...halda þau virkilega að þau geti stoppað eitthvað þarna???? Veit varla hvort maður á að flokka þetta undir heimsku eða bara geðbilaða bjartsýni! Mér finst einnig asnalegt af ráðherra að segja að þeir lækki sko bara ekkert bensíngjöld ef bílstjórar láti ekki af ólöglegum aðgerðum sínum...eins og að loka ólöglega lagt bíla ráðherra inni...hehe, talandi um ólöglegheit!
Ætla að hætta núna...pizzan var að koma ;)

Till next...adios

Fréttir af fréttamennsku

Jæja, best að byrja bara upp á nýtt...var sko búin að skrifa helling í gær, en þá tók tölvan upp á þvi að verða batterýlaus og ég hafði ekki tíma til að endurræsa og hlaða áður en ég stökk á svið í Freyvangi...en byrjum á byrjunni :)
Ég var á RÚVAk alla fimmtudaginn og fanst alveg svaka gaman, tók tvo viðtöl og gerðir fréttir uppúr þeim og var farin að fíla mig sem þaulvanan fréttamann...hehe ;) Annars fannst mér allt fólkið þarna alveg frábært og greinilega góður vinnustaður, kanski á maður eftir að vinna við þetta einhverntíman, hvur veit! Ég var reyndar mjög þreytt eftir daginn og rétt orkaði að fara í sjoppu, kaupa hammara og skríða upp í sófa rétt fyrir sjónvarpsfréttir. Á föstudaginn þá fór ég svo fram í Freyvang og tók að mér afleysingarhlutverk, lék gleðikonu og múg-konu. Þetta gekk með góðri hjálp góðra samleikara, en var samt tæpt þegar ég missti næstum niður um mig pilsið í einu dansatriði. Sú sem ég leysti af er nefnilega ca.helmingi mjórri en ég og ég fann bara smelluna í pilsinu smellast frá í miðjum skottís! En þetta tókst....svo lék ég sama leikinn í gærkveldi, nema án nokkura pilsavandræða :) En þetta var bara gaman, hentar mér vel að stökkva á svið án allra æfinga, taka tvær sýningar og svo búið :) Fínt að fá smá fiðring...

Það áttu tvær mágkonur mínar afmæli rétt um daginn, Alla þann 30.mars og Sigga Lára þann 4.apríl og langar mig að óska þeim til hamingju með það :)
Jæja, ætli það sé ekki best að reyna að drífa af þessa ritgerð um lauslæti sem ég þarf að skila á morgun...á eftir að finna einhver 2500 orð í viðbót, gæti kanski reynt að skrifa eitthvað um hórurnar í Englandi á tímum Jörundar hundadagakonungs ;)

Till next...adios

Skipulag

Maður þarf víst að fara að huga að vori og sumri og því sem fylgir skólafríum, hvort sem það er mitt frí eða strákanna ;) Best væri nú ef ég gæti bara verið í fríi í allt sumar eins og þeir, en þar sem ég hef ekki fengið fjársterkan aðila til að ausa í mig pening í sumar, þá verður það víst bara draumur. Ég gerðist dugleg áðan og pantaði sumardvöl fyrir Mikael í viku á Vestmannsvatni. Það er tiltölulega stutt í burtu, og hann vildi ekki vera lengur en í viku. Þessi eina vika kostar líka nærri þrjátíuþúsundkalla, svo það verður bara að duga. Ef allt fer samkvæmt áætlun, þá verður þetta fyrsta heila vikan sem ég og Mikael höfum verið aðskilin síðan hann fæddist. Hann hefur mest verið frá mér í 3 nætur minnir mig, þegar ég skrapp til Köben þarna um árið ;) En hann er nú orðinn stór strákur og getur þetta...það er bara ég sem er strax komin með smá hnút í magann ;) hehe. Fór samt að reikna það út, að þetta er ekkert svo brjálæðislega dýrt, svona miðað við sólarhrings gæslu. Ef mér t.d dytti í hug að stinga af í viku, fá barnapíu og borga henni 300 kr. á tímann, þá væri ég að borga yfir 50 þús. En Mikael hlakkar til og vill þetta og það er mest um vert. Svo núna á ég bara eftir að redda honum pössun í ca.5 vikur í sumar.
Kanski stafar reyndar hnúturinn í maganum útaf því að ég er að fara á RÚVAk á morgun....er pínu stressuð, verð alveg að viðurkenna það.
Jæja, ætla að dríbba mig í rúmið :)

Till next...adios

Vér mótmælum allir

Þar sem ég er svona mest í skólanum og hugsandi um afbyggingu eða mælskubrögð, þá missi ég stundum pínulítið hvað er um að vera í litla landinu. Ég var nú samt búin að heyra af mótmælum atvinnubílstjóra í borg óttans og var hálft í hvoru að vonast til að þeir færu nú bara að dæmi Frakka og ferðu eitthvað róttækt! Mér finnst að það eigi að sturta vörubílshlössum af sauðataði á tröppur stjórnarráðsins, það sýnir amk álit sem ekki fer framhjá neinum og er hægt að þrífa í burtu án allra kemískra efna...ólíkt málningu. En það vantar fútt í þetta...velta við bílum, kveikja í bílum (bara ekki mínum) og svona alvöru mótmæli...ekki mótmæla undir stjórn lögreglunnar, þá er nú bara betur heima setið! Sá annars í sjónvarpinu að tvær unglingsstúlkur hentu eggjum í stjórnarráðið og ég hef sjaldan séð löggur hlaupa eins hratt og á eftir þessum tveimur "stórglæpamönnum" ;) hehe...

En málið er að ég sum sé var að koma heim úr skólanum rúmlega 4 í dag og heyri þá þessi voða læti, flaut og lúðra...ég hugsaði: "ætli geti verið að Akureyringum hafi dottið í hug að mótmæla" en fannst það samt pínu ólíkleg. En viti menn, svo ekur hersingin hér niður Þórunnarstrætið og lestin ætlaði bara engan endi að taka! Ég glotti við tönn og var bara nokkuð ánægð, því þótt við séum ekki farin að velta við bílum og kveikja í (sem má nú alveg missa sín) þá er þetta allt á réttri leið, við eigum ekki endilega að láta traðka á okkur ALLTAF!

Annars fanst mér líka fyndið þegar var talað við Sturlu Böðvarsson samgöngumálaráðherra, og honum afhentur áskorunarlisti, að stjórnvöld lækkuðu hluta sinn í bensínkosnaði...þá segir hann: "við þurfum nú að nota þessa peninga til að byggja nýja vegi, sinna sjúklingum og sjúkrahúsum"! Hummmm...eitthvað er hann nú að gleyma sér kallanginn, veit ekki betur en að hluti ríkisins af bensíninu eigi að vera eyrnarmerktur vegagerð og því tilheyrandi...og kemur bara sjúkrahúsum ekkert við! Sennilega átt að höfða til vorkunsemi okkar þarna...við vorkennum frekar veikum sjúklingum en holóttum vegum ;)
Miklu meira en nóg í bili.
Látið ekki mótlætið á ykkur fá :) eða mótmælin ;)

Till next...adios