Laugardagur fyrir páska

Fór í búðar-leið-angur í dag, fólk virðist ennþá vera að tapa sér í neyslugleði. Kansi er fólk að flýta sér að kaupa og kaupa áður en að allir peningarnir verða búnir ;)
Annars kíkti ég inn í nýja Rúmfatalagerinn, þar sem "hættulegi rúllustiginn" er, það er búið að setja upp öryggisnet þar sem stelpan datt niður á opnurnardaginn, náttúrulega mun ódýrara heldur en að hafa öryggisvörð standandi þarna allan daginn. En rúmfatalagerinn hefur stækkað til muna, það verður að segjast...en afgreiðslukassarnir eru ennþá jafn fáir...sennilega ekki reiknað með neitti örtröð við þá, fólk er auðviðtað svo lengi að villast um í búðinni :)
Svo er páskadagur á morgun og skírn eldsnemma í fyrramálið, auðvitað hefur maður bara gott af smá nærandi hugleiðingu frá sr.Hannesi, snemma á páskadagsmorgun...og svo er spennandi að vita hvað Lilli litli verður skírður ;) Ég hef mínar hugmyndir með það, en læt það ekki uppi hér.
Sökkti mér niður í tertugerð í dag, svo átti ég nokkrar eggjahvítur í afgang, og sullaði sykri, kókos og súkkulaði saman við og bjó til toppa. Bakaði þetta alveg upp á von og óvon, því ónákvæmari vigtun hefur ekki verið gerð...en uppskriftin er svona ef einhver vill prufa:
6 eggjahvítur
hellingur af sykri
næstum allur pokinn af kókosmjöli
restin af súkkulaði-lakkrískurlinu
næstum heil plata af suðusúkkulaði

Hvíturnar og sykurinn þeytt saman (má gjarnan minka sykurinn) svo er rest hrært út í og sett með teskeiðum á smérpappír og bakað við 170°C í 15 min.

Ég hef nefnilega yfirleitt ætlað að gera eitthvað úr eggjahvítunum, þegar ég á þær í afgang úr perutertugerð, en svo gleymi ég því alltaf. Svo þetta var mikill áfangi, og topparnir vel ætir :)

Jæja, ég fór með guttana í vídeóleigu áðan, svo ætli það sé ekki best að fara að góna á eitthvað. Annars fannst mér svo sniðugt að taka dvd í dag, því þá þyrfti ég ekki að skila því fyrr en á mánudaginn...en það er víst bara opið á morgun, páskadag!
Hvert er heimurinn eiginlega að fara...er ekki bara hægt að hafa lokað á hátíðisdögum? Það var svoleiðis í þá gömlu góðu daga :)
Gleðilega páska :)

Till next...adios

Gullkorn

Það datt gullkorn upp úr honum Mikael í sveitinni á þriðjudaginn...(eins og reyndar oft áður). En ég var að lýsa kennurunum hans Mikaels fyrir honum Árna, (svona ef hann skyldi þekkja þær) við erum búin að ræða þetta eitthvað og ég segi svo: þær eru tvær ungar og svo tvær gamalreyndar, sem eru búnar að kenna þarna í hundrað ár. Þá segir Mikael Hugi: " Nei! Ekkert í hundarð ár! (mjög hneikslaður) Þær eru búnar að vera þarna miklu lengur!" hehe....

Till next...adios

The gambling women ;)

Það varð lítið úr fögrum fyrirheitum mínum í gær, með að laga til eða fara í búð...enda bæði leiðinlegt ;) Ég fór bara í sveitina í staðin og fanst það fín skipti. Árni og co voru mætt á svæðið og ég fór að kíkja á lilla litla í fyrsta skiptið. Hann er náttúrulega fjallmyndarlegur eins og allir í þessari göfugu ætt. :) Þegar í bæinn var komið aftur, þá hentist ég inn í Nettó og keypti eitthvað smotterí, held ég láti það bara duga yfir páskana...á til nóg af kartöflum og læri í frystinum, svo fer ég bara í heimskóknir inn á milli, já og skírnarveisluna sem er víst á páskadag :)
Í gærkveldi var svo PÓKERKVÖLD hjá Árna bró. þar voru samankomnir miklir pókerspilarar og snillingar á sínu sviði, Árni, Sverrir, Pálmi og Villi og svo fékk ég að vera með, hafði reyndar bara spilað póker tvisvar um jólin með litlum árangri. En það fór nú svo að ég gersamlega rústaði þeim köppum í póker ;) svo nú bíð ég bara eftir að rauðvínsflöskurnar fari að streyma til mín ;) hehe...
Þetta er nú bara svolítið gaman þegar maður kemst aðeins inn í þetta...átti engan vegin von á því að vinna..þótt það hafi náttúrulega sannast þarna hið fornkveðna: "heppinn í spilum, óheppinn í ástum."
Í gær afrekaði ég það að þvo gardínurnar í stofuglugganum....ég reyndar þvoði þær í þvottavél (tvisvar, því ég nennti ekki að strauja þær í gær), og svo straujaði ég þær í dag! Alveg ótrúlega dugleg...ætla samt að kaupa straufríar gardínur næst :)

Till next...adios

Gleði gleði

Nú er ég næstum komin í páskafrí...bara eitt hópvinnuverkefni í fyrramálið og svo frí :)
Ég fékk út úr prófinu (30%) í upplýsingarýni í morgun...og fékk 9,2 :) brosti alveg hringinn...þetta var hæsta einkunn sem gefin var og bara 4 sem náðu því...vá hvað ég er miklu gáfaðri en ég held ;) Kennarinn byrjaði líka á því að segja að meðaleinkunnin hefði verð 6,2 og að 10 hefðu fallið!!! Svo ég fer inn í páskafrí með gleði í hjarta. Var líka búin að fá út úr "Afbyggingu 20.aldarinnar" prófinu, og náði því...var með 18,5% af 30% rétt, sum sé náði með ca.6. Enda kennarinn Ítalskur fasisti ;) bara glöð að hafa náð.
Ég er að reyna að skrifa niður innkaupalista fyrir búðarferð páskanna....nenni bara ekki að vera að þvælast í búðir á þessum dögum, ætla frekar að þvælast í heimsóknir, á skíði, í gönguferðir og sund svo eitthvað sé nefnt..já og eina skírn, en það á víst að skíra litla frænda Árnason á laugard. fyrir páska...held ég ;) Mér hefði nú þótt flottast að láta skíra hann á skírdag af jó-Hannesi skírara-presti ;) hehe... En mikið verður nú gaman fyrir litla guttann að heita Elísabetus Katarínus Árnason ;) tja...eða ekki ;)
Ákvað að skella inn einni mynd af honum Mikael Huga, í þungum þönkum...er kanski að hugsa um óréttlætið í heiminum ;) Ef einhverjum finnst ég setja oftar inn myndir af Mikael en Kristjáni, þá er það einfaldlega vegna þess að myndir af Kristjáni má ekki taka nema á sérstökum hátíðis og tillidögum...ekki mikið fyrir sviðsljósið ;)
Jæja, annaðhvort verð ég að fara að laga til eða drífa mig í búðina...

Till next...adios

Heilsufréttir

Heilsan er bara að verða nokkuð góð. Ekki orðin 100% en það kemur. Ég mætti galvösk í skólann í dag, held samt að HA sé eini skóli landsins sem ekki er kominn í páskafrí ;) en það er svo sem í lagi. Fer bara í tvo tíma í fyrramálið svo er ég komin í frí...tja, þarf reyndar að skrifa eina ritgerð...
Annars var ég alveg standandi bit og hissa og kjaftstopp (sem gerist nú ekki oft) þegar ég sá dóminn í máli 10 ára stelpunnar, sem varð fyrir því að skella hurð á höfuðið á kennaranum sínum. En eins og eflaust allir vita var móðir stúlkunnar dæmt til að greiða kennaranum litlar 10.000.000 kr. í skaðabætur.
Það fyrsta sem ég hugsaði var: ég tek báða strákana úr skóla...þori ekki að hafa þá þar ef þeir skyldu lenda í einhverju svipuðu.
Hvernig í óskupunum er þetta hægt? Hvernig er hægt að gera 10 ára barn, ábyrgt fyrir svona óviljaverki? Ég veit að hún skellti hurðinni, en að hún hafi ætlað að slasa kennarann, það er allt annar handleggur.
Svo er eitt skrítið, ef ég á barn í skóla sem slasast í skólanum, t.d dettur á hausinn, eða viðbeinsbrotnar eða eitthvað, þá borgar skólinn/leikskólinn fyrstu heimsókn á slysó. Og ég held að skólinn beri amk einhverja ábyrgð á krökkunum í skólanum. Eðlilega, ekki getum við foreldrarnir vaktað þau í skólatíma...nóg er nú samt ;)
Og hver getur borgað 10 millur í skaðabætur? Á bara að leggja líf þessarar fjölskyldu í rúst í eitt skiptið fyrir öll? Svo fá nauðgarar smá dóm og þurfa kanski að borga 500 þús.!!!
Girr...er frekar fúl yfir þessum dóm...en þarf að fara að elda kvöldmat, svo þið fáið frið frá frekari pirringslosun ;)

Passið ykkur á öllu sem má ekki, því það er bannað ;)

Till next...adios

Að gubba...

eða ekki gubba, það er spurningin. Ég var amk heima í allan dag með ógleði, hausverk og almenna vanlíðan. Fyrsti skóladagurinn sem ég sleppi síðan ég hóf skólagöngu í haust, og ég er algerlega miður mín yfir að hafa verið lasin! Svo átti ég líka að sjá um miðasölu í Freyvangi í kvöld, en tókst að plata það inn á Sverrir bró. af mikilli snilld. Mér tókst nú samt sem betur fer að klára ritgerðina í fjölmiðlafræði, um æsifréttamennsku, í gær og ætlaði að skila henni í tíma í dag, voða góð. En ég má skila henni á mánudagsmorguninn í staðinn :)
Jæja, hef ekki orku í meiri skrif, ætla að skríða í sófann og horfa á MA og MR í spurningakeppninni gettu betur og vona það besta.

Till next...adios

Kreppa

Landsbankinn hlýtur að vera stöndugur banki, ekkert krepputal þar á bæ. Þeir héldu amk "glæsilegustu árshátíð sem um getur" sl. helgi. Eða eins og stendur í Fréttablaðinu: " Starfsmenn voru leystir út með gjöfum og fékk hver um sig ferðatösku. Þá hlaut starfsmannafélagið íbúð í Kaupmannahöfn sem það hefur til umráða fyrir sína félaga." Tja maður spyr sig...er ekki hægt að leyfa okkur hundtryggum kúnnum til fleirihundruðogfimmtíu ára að njóta einhvers af öllum þessum aukapeningum sem þeir virðast eiga? Á starfsmaður Landsbankans sem hefur kanski unnið hjá bankanum í 6 mánuði, meiri rétt á ókeypis ferðatösku og ódýrri gistingu í Köben heldur en ég...sem hef átt viðskipti við bankann síðan ég var 18 ára????? (Fer ekkert út í að telja hve mörg ár). Svo að ég blæs á allt tal um yfirvofandi kreppu, fyrst bankinn lætur svona. Annars lærði ég það í rýni um daginn að allar svona spár auki líkurnar á að það gerist, meira að segja nánast tryggir að það gerist. Þess vegna var Dabbi Odds alltaf að tala um "góðæri". Annars fór þetta margumrædda góðæri algerlega framhjá mér, og þá hlýtur það að gilda um kreppuna líka ;)

ps. talandi um Davíð Odds...ég sá hinn margumtalaða og umdeilanlega Þorstein Davíðsson um daginn...og get sagt ykkur það, í trúnaði, að hann er NÁKVÆMLEGA eins asnalegur og hann lítur út fyrir að vera ;)

Góðar stundir :)

Till next...adios

Æsifréttamennska

Ég er að hamast við að skrifa ritgerð um æsifréttamennsku, eins og glöggt má sjá, þá gef ég mér ekki tíma til nens annars en ritgerðarstarfa, þar sem skiladagur er ekki seinna en nk.föstudag! En ég er svoooo duglega að finna mér eitthvað annað til dundurs að ólíkindum sætir.
Var voða dugleg í gær og fór á gönguskíði, reyndar er þetta bara í annað skiptið í vetur sem gönguskíðin eru dregin fram og ekki dugir það! Upp í fjalli var lítið sem ekkert skygni, þoka og akkúrat ljósaskiptin, svo ég sá nánast ekki neitt nema rétt fram fyrir tærnar á mér...en ekki skyldi það nú stoppa mig, fyrst maður var á annað borð komin upp í fjall :) Ég gekk og gekk og gekk það ágætlega til að byrja með, svo var mér farið að finnast eins og ég væri alveg lost, hélt ég væri komin rúmlega hálfa leið út á Þelamörk, þegar slóðin virtist loksins fara í hina áttina. Það hefur eflaust verið mjög spaugileg sjón að sjá mig á gönguskíðunum, sérstaklega þegar ég fór niður brekkur...ég fór MJÖG varlega...en sem betur fer voru nú engin vitni af þessum skíðaafrekum mínum ;) og ég ákvað að fara sem fyrst aftur þegar skyggnið væri örlítið betra :)
Svo dreif ég mig með strákana á skauta í dag...sem kom nú ekki "til af góðu" en það var nefnilega einhver skautaferð hjá 1.bekk, svo ekki varð vikist undan. Reyndar var þetta voða gaman, og Kristján fílar sig vel á skautum, en Mikael aftur á móti meiddi sig á fótunum, skautarnir eitthvað nuddast utaní, og tilkynnti það að hann ætlaði aldrei aftur á skauta!
Svo núna er ég bara þreytt, með smá hálsbólgu og kvef að reyna að sökkva mér niður í ritgerðarskrif en gengur hægt.
Jæja...æsifréttamennska here I come ;)

Till next...adios

Brandari dagsins

Sporðdreki: Lífið hefur mikinn tilgang núna, þar sem viss manneskja spilar stóra rullu. Hún ríkir yfir þér og afgangurinn af heiminum fellur inn í dauflegan bakgrunninn.

Þetta var í stjörnuspá dagsins á mbl.is held þetta ætti frekar að heita brandari dagsins. Í þessi skipti sem ég rek augun í stjörnuspána er hún alveg út úr kú...og þar sem ég er líka að læra gagnrýna hugsun, þá er ég auðvitað alveg hætt að trúa á svona bull eins og stjörnuspár, forspár og hrakspár...húmbúkk! ;)
Annars er ég löt í dag, nenni ekki að skrifa eða læra, ætla nú samt með strákana í Freyvangsleikhúsið og leyfa þeim að sjá Þið munið hann Jörund :) það verður nú gaman að sjá það í annað skiptið ;) Endilega drífa sig í leikhús everyone :) Ætla að athuga hvort sófinn sé ennþá mjúkur...

Till next...adios

Jibbíjei

Jæja, þá eru prófin búin í þessari viku ;) Nú þarf ég bara að drusla af einni ritgerð fyrir 14.mars og þá er maður svo gott sem komin í páskafrí. Sem reyndar verður eitthvað undirlagt af lestri og meiri ritgerðarskrifum. Mér gekk bara vel í prófinu í dag, amk betur en á þriðjudaginn, en þá þurfti ég líka að skrifa svörin á ensku, og kanski mest spurning um hvort kennarinn skilur mig ;) hehe... Annars verð ég bara fúl ef ég fæ undir 8 í prófinu í dag, enda las ég og las og las allan daginn í gær! Held ég hafi bara ekki farið út úr húsi, nema eldsnemma um morguninn þegar ég fór með Mikael til tannlæknis.
Annars hefur Mikael lofað bót og betrun í skólanum, en spyr mig samt annað slagið hvort hann þurfi ALLTAF að vera þægur í skólanum...held að honum finnist það algerlega óvinnandi vegur. Ég átti nú reyndar í stöðugum bréfaskrifum við kennarann hans í gær, þar að segja, hún sendi mér póst um að hún yrði á "einhverju ADHD námskeiði" þann dag sem ég átti að mæta í viðtal í næstu viku. Svo hún vildi gefa mér tíma í staðinn á þriðjud. Ég skrifaði til baka að ég væri í skólanum allan þriðjudaginn (hún getur sko bara hitt mig eftir hádegið) og þá skrifaði hún til baka hvort ég gæti ekki bara skrópað í skólanum!!! Ég þurfti að bíta mig í puttana til að skrifa ekki eitthvað miður fallegt, var næstum búin að spyrja hvort hún gæti bara ekki alveg eins skrópað í því sem hún var að gera.....en sleppti því. Sagðist komast á miðvikud. þótt ég þurfi að hoppa í burt úr hópavinnu, en það var bara eini dagurinn sem hún átti lausan handa mér... Mér finnst stundum óþolandi tillitsleysi hjá kennurum (nú verður Alla brjáluð) að ætlast til að maður geti stokkið í skólann hvenær sem þeim hentar, en þeir geta ekki hliðrað til fyrir mann. Í þessu tilviki var ég búin að segja að ég kæmist, miðvikud, fimmtud og föstud. í þessari viku, og miðvikud. fimmtud. og föstud. í næstu viku! Æ ég nenni annars ekki að pirra mig mikið yfir þessu, var nógu pirruð í gær...en þá var ég líka á fullu að lesa og þoldi enga truflun ;) Annars er ég mest hrædd um að þessir blessaðir kennarar ætli að reyna að klína einhverri greiningu á guttann. Ég fór nú í viðtal fyrir áramót og talaði við tvo kennara, eftir að Mikael og annar gutti voru að henda snjóboltum í bíla...og þá var ég nú bara spurð að því hvort að Mikael væri ekki bara ofvirkur! Og auðvitað hlýtur það bara að vera, fyrst að barnið nennir að hreyfa sig og á bróðir sem er greindur ofvirkur. Svo í viðtalinu í byrjun janúar, í skólanum, þá var bara allt í svona lukkunnarvelstandi...gekk allt svo vel og bla bla bla...held að kennaranum veiti ekki af svona ADHD námskeiði, er sennilega með athyglisbrest sjálf ;) tí hí...Kanski er ekki þorað að segja neitt við mann, nema að þær séu tvær saman...maður spyr sig.
Jæja, ætli ég sé ekki búin að drulla nóg yfir kennarastéttina í bili...bið alla kennara í ættinni afsökunar :) Annars er ég með lausn á þessu öllu saman, það eiga bara að vera fleiri kennarar og færri börn í bekk! Hver ræður við 25 börn í bekk??? Ekki ég, ég tek reyndar ofan hattinn fyrir þeim sem taka að sér að kenna, ég tæki það kanski að mér fyrir þreföld forsetalaun...en myndi þó hugsa málið!

Till next...adios

Eitt búið...

and one to go...Var í einu prófi í dag, 30% sem ég held að hafi gengið þokkalega. Ég verð a.m.k brjáluð ef ég fell...þá vaknar kennarinn upp dauður einn morguninn ;) hehe...nei, kanski ekki alveg. Reyndar mundi ég nú alveg nokkur atriði sem ég hefði átt að hafa með, þegar ég var komin út úr stofunni, en það er líka alltaf svoleiðis. Svo er ég að fara í annað próf á fimmtudagsmorguninn, og vona bara það besta. Stefin á að eyða morgundeginum að mestu í lestur. Nenni ekki að lesa neitt í dag, þarf líka að ná í Mikael í afmæli, elda kvöldmat og fara á fund!
Talandi um Mikael....ussss, hann er að fyllast af einhverjum "töffara stælum" um þessar mundir, fékk tölvupóst í dag, um að hann hefði farið oft útaf skólalóðinni og ekki hlýtt neinum! Eins gott að ég var bara að sjá þennan póst og hann verður í afmæli í rúman hálftíma í viðbót... En ég þarf a.m.k að mæta í viðtal í skólanum næsta fimmtudag, og á bréfinu að dæma sem ég fékk, þá á ég allt eins von á því að hann verði bara rekinn úr skólanum!!! Glæsileg byrjun á skólaferli hans ;)
En auðvitað er bara gaman að eiga bara börn sem þarf að hafa eitthvað fyrir, alveg ómögulegt ef maður þarf ekki að mæta nokkrum sinnum í skólann útaf smá veseni...;)
Annars er Kristján líka að verða svo hryllilega "rólegur", ekkert vesen með hann í skólanum, nema þá einna helst að fá hann til að læra...agalega latur við námið, og virðist slétt sama, reyndar sagði hann við mig um daginn að hann ætlaði að verða heimsfrægur heilaskurðlæknir. Svo glotti hann ógurlega ;D Gaman að þessu öllu saman...
Tja...best að gera eitthvað af viti...or nott, ætla að leggjast í leti í 20 min. og æfa ræðuna sem Mikael fær að heyra á eftir ;)

Till next...adios

Fall er fararheill...

...vona ég a.m.k, því ég datt svo hryllilega á rassinn í dag! Ákvað, eftir lestur kommúnistaávarpsins, að drífa mig og strákana niður á Glerártorg, og gangandi skyldi farið! Kristján og Mikael duttu báðir á leiðinni niðureftir, en ég náði nú að tölta áfallalaust. Hugsaði með mér að það yrði nú miklu auðveldara að labba uppeftir í hálkunni, minni hætta á að detta. Blótaði því samt aðeins að hafa ekki bara farið á bílnum ;) En svo á heimleiðinni, flaug ég mjög snyrtilega á rassinn, með einn haldapoka í hendinni (sem innihélt m.a. ljósaperur). Og auðvitað var ég á jafnsléttu og ekki komin nema rétt af stað, hugsa að fullt af fólki í bílum á leið hjá hafi verið skemmt. En þetta var næstum sætt, það var eins og fótunum hafi verið kippt undan mér...svo sem ekkert stórslys, bara aum kinn.

Allt annað; ég fór í leikhús í gærkveldi, á Fló á skinni sem LA er að sýna við fádæma vinsældir (var næstum búin að skrifa; við fáránlegar vinsældir) um þessar mundir. Verð nú að viðurkenna að ég var mest spennt að sjá þetta, vegna þess að ég lék sjálf í þessu stykki fyrir réttum 8 árum síðan. Og þótt ég sé algerlega ekki hlutlaus, þá verð ég bara að segja að ég held að þetta hafi verið miklu skemmtilegra, flottara og betur leikið hjá Freyvangsleikhúsinu ;) Mér fannst einhvernvegin alltof langt gengið í fíflaskapnum, ef það hefði verið dregið örlítið úr aveg tilgangslausum hálfvitagangi þá hefði þetta verið betra. Einnig finnst mér staðfæringin og stílbreytingin ekki til framdráttar. En þetta er nú bara mín skoðun. Mér fannst nú samt rosa gaman, en samt sennilegra að ég hefði skemmt mér betur ef ég hefði ekki alltaf verið að bera leikritin saman...varð meira að segja pínu skerí þegar ég uppgötvaði að ég mundi ótrúlega mikið af textanum, og gladdist ég hjarta mínu þegar ég heyrði "orginal" setningar :)
Jæja, læt gagnrýni lokið í bili...ætla að lesa eitthvað mikið fyrir háttinn.
Passið ykkur á hálkunni ;)

Till next...adios

Skamm skamm

Nú er víst búið að fella dóm um að það má ekki skrifa ljótt um náungann í bloggi, svo ég er að hugsa um að leggja þessi blogg skrif mín á hilluna, áður en ég þarf að punga út mörghundruðþúsundköllum í miskabætur ;)

Ég fór á fyrstu árshátíð Mikaels í gær, agaleg stolt móðir sem horfði á sætasta strákinn í 1.bekk leika "vetur" ásamt heilum helling syngjandi krakka skara. Svo fengum við okkur súpu og brauð og áttum fína stund, svo fór Mikael í vistun og ég fór að sinna "fótbrotna" bílnum mínum! Ég heyrði nefnilega einhver læti í bílnum á leiðinni og svo spólaði ég bara af stað, en sá mér til mikillar ógleði, þegar ég var komin í skólann, að það var punkterað á bílnum! Ég náttúrulega reif upp tjakkinn og reyndi að ná dekk andsk...undan, en allar rær voru fastari en allt fast, og þar að auki var ég með drasl felgulykil! Ég hringdi í Þórð bróðir, sem kom og reyndi líka en með svipuðum árangri, allt pikk fast. Þar sem ég vildi nú ekki tefja hann meira úr vinnunni, þá hringdi ég bara í dekkjaverkstæði og grenjaði út smá hjálp og brátt kom snaggaralegur strákur og reif dekkið undan bílnum. Hann horfði líka á skiptilykilinn minn og sagði: "varstu að reyna að ná dekkinu undan með þessu"? Svo ég var mikið glöð að halda í þá vissu mína að ég og Þórður erum ennþá rosa sterk :) Svo tók við bið á dekkjaverkstæðinu, þar sem þeim þótti álitlegt að hreinsa upp allar felgurnar og skipta um ventla (sem vonandi verður til þess að ég þarf ekki lengur að pumpa í dekk á 3 daga fresti), og svo lét ég skipta um olíu í leiðinni, sem var víst löngu tímabært...en ég er nú bara kona ;)... nei, ég var nú "bara" komin rúml.1000 km. framyfir æskileg skipti ;)
Já og svo keypti ég felgukross :) algerlega tilbúin í næstu dekkjaskipti ;)
Svo fór ég á leynifélagsfund í gærkveldi, en þar sem hann er mjög leynilegur þá dettur mér ekki í hug að minnast á hann einu orði í þessu bloggi :)
Hafið það gott og látið ykkur ekki verða kalt, því það er kalt!

Till next...adios

Speki dagsins

Fann þetta inn á stjörnuspá Mbl.is

Sporðdreki: Í dag er hægt er að umfaðma hluti sem yfirleitt eru ósnertanlegir. Ef tveir eða fleiri óska sér þess sama, eru meiri líkur á að hún rætist. Hvað viljið þið vinirnir?

Var að spá í að setja þessar snilldar spár hér inn, þegar ég man...sjáum svo til hvað rætist...og hver kætist ;)
Ekki uppáhaldskennarinn minn ákvað af sinni góðmennsku að flýta prófi sem átti að vera 7.mars, til næsta þriðjudags...mér ekki til mikillar gleði. Þetta hefði kanski verið í lagi ef hann hefði látið vita aðeins fyrr en sl.föstudag...eða þá sendi hann póst, gat ekki einusinni ælt þessu út úr sér í tíma sem var um morguninn!
Svo ég verð að vera voða rösk á þriðjudaginn, fara í tíma kl.8 vinna svo aðeins hjá Írisi í hádeginu, fara svo í próf og stökkva svo í tíma í List og fagurfræði, sem verður nú sennilega eitthvað verulega mikið byrjaður þegar ég klára prófið!
En þetta reddast allt einhvernvegin....ef eitthvað klikkar þá fer ég bara á fyllerý...OR NOTTTT!
Jæja, best að koma guttanum litla í rúmið, það er árshátíð hjá honum í hádeginu á morgun...svo ég þarf að skrópa í fyrirlestri...næstum fyndið að eini tíminn sem ég er upptekin á morgun milli 12 og 13 þá er árshátíð hjá 1.bekk....Ég fer nú að verða nokkuð sammála spaugstofukallinum sem segir alltaf: "Þetta er eitt stórt samsæri"!
Minni á snilldar miðilinn landpostur.is og minni á að það er alveg nóg að leita uppi mínar fréttir og pistla og skoða það....það var þetta með sjálfhverfuna ;) minni einnig á freyvangur.net sem er alveg hreint ljómandi skemmtileg síða...já og svo drífa sig á sýningu every one :)
Góðar stundir. :)

Till next...adios

Hablaha

Langt síðan síðast...mikið að gera. Frumsýningin á Þið munið hann Jörund gekk vel sl. föstudagskvöld. Allir glaðir og rosa fjör, flott veisla á eftir. Ég var reyndar komin heim um eitt leitið, var bæði þreytt og ekki í fyllerísgír...það var ég hinsvegar kvöldið eftir ;)
Prinsessupartý Evu var rosa flott og farið á Kaffi Ak á eftir (minnir mig...hehe) ég skreið heim einhverntíman fyrir dagmál og var alveg óskaplega þreytt allan daginn í gær.

Loksins var rétt Evróvisíonlag valið, en eini gallinn var að það var búið að breyta þessu flotta lagi þannig að það var ekki eins flott og það var! Humms...annars svo að allir verði glaðir, þá má bara skipta út 2 hálfberu dönsurunum í sigurlaginu og setja tvo berjandi bumbuslagara í staðin ;) og svo má skreyta sviðið með gulum gúmmíhönskum....allar húsmæður veraldar myndu kjósa lagið...gulir gúmmíhanskar og "this is my live" ;) passar!
Jæja, ætla að reyna að rífa mig upp úr þynnkugír dags 2 og tölta í skólann.
Ráðleggingar dagsins; ekki drekka heila hvítvínsflösku + fordrykkinn hennar Evu, þá verðiði svakaleg full!

Till next...adios

Nágrannar

Eins og oft hefur komið fram þá á ég mér nágranna...og því virðist fylgja ýmislegt. Nýjasta, en jafnframt eitt elsta nágrannavandamálið, er umgangur um rusl. Það var nefnilega búið að líma aðvörunarmiða á tunnuna í gær, þessir Reykjavíkur-búar kunna náttúrulega ekki að ganga um ruslatunnur með pokum í, það er bara troðið endalaust! Af þessu tilefni þá skrifaði ég bréf og hennti inn um bréfalúguna á efstu hæðinni (fór nú í eigin persónu að tala við "miðgrannana", en það virðist aldrei vera neinn heima á efstu hæðinni...nema þá til að henda rusli!)
Svona leit bréfið út:

Ágætu íbúar efstu hæðar Þórunnarstrætis 128

Að gefnu tilefni vil ég ítreka að gengið verði betur um ruslatunnur hússins. Í dag var límdur aðvörunnar miði á aðra tunnuna, sem þýðir einfaldlega að ef úrbætur verða ekki gerðar þá hætta þeir að taka rusl! Og ekki er það spennandi kostur. Allt rusl á að fara í lokuðum pokum ofaní svörtu ruslapokana. Ef svörtu ruslapokarnir detta niður eða aflagast á einhvern hátt, þá er einfaldast að laga það strax, en ekki halda áfram að troða pokum ofaní tunnuna. Einfalt ekki satt? :)

Endurvinnslutunnan sem staðsett er við hliðina á tröppunum er eingöngu fyrir pappír, dagblöð, fernur og plast en það þarf að flokka það. Allur pappír má fara beint í tunnuna (samanbrotinn takk, taka í sundur kassa) en fernur og plast þarf að setja sér í glæra plastpoka, hreint og snyrtilegt! Þar sem undirrituð er að borga fyrir endurvinnslutunnuna, þá er afar leiðinlegt að gengið sé illa um hana. Með bestu kveðju og eindregnum óskum og gífurlegum væntingum og vonum um bætta umgengni við tunnur hússins...örlítið pirraður íbúi neðstu hæðar, Elísabet :)

Svo vona ég bara að allt verði glansandi fínt héðan í frá...var ég nokkuð voðalega dónaleg að skrifa svona bréf? Jæja, það er a.m.k farið og ég er líka farin að ná í Mikael í skólann...ætla svo að reyna að draga drengina með mér á Greifann í tilefni þess að það er miðvikudagur í dag og ég fór í litun og klippingu í gær :)

Till next...adios

Skrambinn

Held að ég sé nokkurn vegin að gera út af við sjálfa mig um þessar mundir (aðallega í dag þó). Ég var orðin svo ringluð í kollinum að mér tókst að senda tvisvar sinnum tölvupóst með viðhengi, án viðhengisins! Og í bæði skiptin skipti það náttúrulega öllu að hafa viðhengið...Held að það sé búið að hringja í mig svona þrjúhundruð sinnum í dag og ég sjálf hringt ein sexhundruð símtöl. Og er ekki einu sinni að ýkja verulega mikið núna ;)
En þetta fer nú allt saman að hafast, þegar þetta blessaða leikrit verður komið í sýningu þá verður maður víst "bara" að dúlla sér í miðasölunni ;)
Annars er skólinn algerlega að sitja á hakanum þessa dagana og er það ekki gott :( svo allar örlitlar glufur sem myndast í mitt þéttskipaða prógramm næstu dagana fer í lestur skólabóka....hummm, svindlaði aðeins núna með þessum blogg skrifum, en það er bara svo langt síðan að ég skrifaði síðast að ég get ekki látið fólk engjast í eftivæntingu eftir nýju bloggi ;) tíhí...
En það eru víst örfáir miðar lausir á frumsýningu, svo endilega drífa sig í að panta :)
Jæja, ætla að reyna að drífa í að þrífa mig og lesa svo um "skrambans lygar og tölfræði" :)
Lifið heil!

Till next...adios

Valentínusardagurinn...

...hefur reyndar ekki verið mér ofarlega í huga í dag...en óhætt er að segja að leikfélagið hefur verið það! Er búin að sitja og reyna að selja auglýsingar í leikskrá og koma saman efni í sama rit. Þetta er alveg óskaplega seinlegt verk og yndislega leiðinlegt. En sem betur fer eru örlítið fleiri en ég úti að safna auglýsingum ;) En það eru ennþá laus pláss í leikskrá ef einhver vill auglýsa!!!

Fyrir nákvæmlega viku síðan, þá var hringt í mig frá KB-banka, þar var kona á ferð sem vildi endilega að KB-banki fengi að gera "tilboð í mig". Ekki kanski svona til að eiga mig alveg...en svona sjá um mín peningamál. Hún var næstum viss um að þeir gætu gert mér gott tilboð. Hún reyndar sagði að hún þyrfti að fá örlitlar upplýsingar hjá mér, en svo myndi ráðgjafi hafa samband við mig, mér að kostnaðarlausu, mjög fljótlega og gera mér tilboðið ljóst. Upplýsingarnar sem konan vildi voru eftirfarandi:
Kona: Ertu með fastar launatekjur?
Ég: Nei, ég er á námslánum.
Kona: Ertu þá ekkert að vinna með skólanum?
Ég: Nei.
Kona: Ertu með einhver lán, húsnæðislán, yfirdráttarlán eða önnur?
Ég: Nei. (rosa fanst mér nú gaman að geta sagt það)
Kona: Áttu eigin íbúð?
Ég: Nei.
Kona: Ertu með húseigendatryggingu?
Ég: Nei, ég á ekkert húsnæði (eins og ég var rétt búin að segja).
Kona: Áttu innistæðu á bók eða verðbréf?
Ég: Nei.
Svo varð konan frekar vandræðaleg, og ég spurði hvort ég væri kanski ekkert vænlegur kúnni, ætti ekkert en skuldaði heldur ekkert (nema námslánin sem af er). Jú jú, hún hélt nú það, ég væri eflaust fínn kúnni og það yrði haft samband við mig á allra næstu dögum. Síðan hefur ekkert heyrst! Svo ég verð þá að draga þá ályktun að ég sé ekkert sérstaklega spennandi kúnni fyrir svona banka. Enda er það bara allt í lagi...langar alls ekkert í KB-bankann. Fyrst þeir gátu ekki leyft mér að eiga reikningsnúmerið á bók sem pabbi stofnaði fyrir mig þegar ég var lítil (bókin var alltaf á hans kennitölu en mínu nafni...eitthvað sem var aldrei spáð í) þá geta þessir dúddar bara etið það sem úti frýs...þótt það sé þiðið núna ;)

Engin blóm komin ennþá....hummm.....en bæ ðei vei...Valentínusardagurinn kemur víst frá Ásum en ekki USA-um. Þeir hafa bara veri skolli rómantískir ásarnir...tíhí, sennilega verið mest hjarta-Ásar ;)

Till next...adios

Aðfangadagur Valentínusardagsins

Á morgun er Valentínusardagurinn, veit ekki alveg hvort að þetta er rétt skrifað en vona það besta. Á þessum tímamótum er ekki úr vegi að staldra við og líta um öxl, reyna að finna út úr því hvort það séu einhverjar líkur á að maður fái blóm....;) hehe, hafa Íslendingar unnið Dani í Parken??? Þegar stórt er spurt, þá fær maður oft heimskuleg svör og það er bara allt í lagi.
Enda finnst mér þessi Valentínusardagur algert bull og lapið upp eftir USA-lýðnum (þetta mun mér finnast alveg þangað til einhver gefur mér, blóm, konfekt og dekurdag í spa þennan dag).

Allt sem ég ætlaði að skrifa er horfið úr höfði mér, en ég mundi hins vegar allt í einu að ég á eftir að hengja upp úr þvottavélinni! Veit ekki afhverju mér dettur alltaf í hug að setja í þvottavél þá daga sem ég nenni ekki að hengja uppúr henni....hummm, það er margt skrítið í hausnum á mér þótt sumt tolli stutt þar inni ;)

Till next...adios

Ekkert að segja

Hef bara ekkert að viti að segja í dag (eins og kanski svo oft áður, en læt það stundum ekki stoppa mig) svo ég ákvað bara að setja inn þessa fínu mynd af alvarlegu bræðrunum. Þetta er tekið um jólin, ætli við séum ekki að leggja af stað í sveitina þarna :)
Verður að duga í bili, have a nice day :)

Till next...adios

Prinsessa

Ég fékk það flottasta boðskort í afmæli, sem ég hef nokkrutíman fengið, í gær :) Skildi fyrst ekkert í hvaða bréf þetta var, sem beið eftir mér þegar ég kom heim...datt fyrst í huga að þetta væri límmiða-keðjubréf, en þar sem þetta var stílað á mig en ekki Mikael, þá var þetta mjög grunsamlegt bréf..! Sat lengi og horfði á það...hvað getur þetta eiginlega verið??? En svo opnaði ég umslagið og þá breiddist nú bros yfir andlitið :) var ekki hún Eva prinsessa að bjóða mér í prinsessuafmælið sitt :) jííííha! Það verður nú gaman :)
Annars er allt að að færast í fastar skorður, skóli hjá öllum í morgun og sumir voru mjög þreyttir eftir langt frí.
Hellingur að gera, nú hrúgast að manni hópverkefni, einstaklingsverkefni, ritgerðarskil, málstofur, próf og svo stússistúss fyrir leikfélagið. Ef einhver er snillingur í því að taka að sér meira en hann annar, þá er það ég ;)
En á móti kemur að þetta er nú bara alltaf jafn gaman og frábært allt saman, er að spá í að vera í skóla til fimmtugs eða svo ;) Þegar ég verð orðinn nútímafræðingur og fjölmiðlafræðingur þá fer ég bara til Nýja-Sjálands og læri eitthvað meira þar...verð doktor eða lektor eða rektor eða hvað þetta þýðir allt saman ;)
Alltaf gaman að láta sig dreyma...ætla nú samt að byrja bara á að reyna að klára fyrsta árið skammlaust ;)
P.s. ef einhver vill ráða mig í litla en vel borgaða vinnu í sumar, þá er ég til ;)

Till next...adios

Hvísl

Öll dýrin í skóginum eiga að vera vinir :)

Vaknaði eldsnemma, óþunn, afskaplega þakklát því að hafa ekki látið undan djammeðli mínu kvöldið áður. Dreif mig fram í Freyvang og hvíslaði eina æfingu. Hef það á tilfinninguni að þetta verði afskaplega skemmtilegt leikrit...þarna verða á sviði sterkustu meðlimir leikfélagsins, þótt þeir þættust allir vera orðnir bæði getulausir og heyrnarlausir...veit ekki hvort það tengdist því að ég var að hvísla....hummm maður spyr sig ;)
Svo kíkti ég í sveitina með strákana, alveg í fyrsta skipti síðan um áramótin að ég held, höfum ekkert komist vegna veðurs, færðar, veikinda eða anna og leti! Sverrir bóndi var svolítið "þreyttur" eftir þorrabótið í gærkveldi, en sennilega ekki verið sá eini í sveitinni sem var þreyttur ;)
Svo kíkti ég til Friðbjargar um kvöldið og þar var sko plönuð alveg gríðarleg auglýsingasöfnun fyrir leikskrá leikfélagsins....og auðvitað var ekki hægt að plana svona ábyrgðarfullan hlut nema að vera fullur ábyrgðar og dreypa örlítið á rauðvínstári ;) Svo ef þið viljið koma auglýsingu á framfæri, þá endilega hafið samband ;)
Jæja, gríðarlega buzy vika framundan, ég algerlega ólesin...heldi ég haski mér í rúmið.

Till next...adios

Ekki partý

Ég datt í einhvern ægilegan "langar að djamma" gír í kvöld, sennilega vegna þess að allir sem ég þekki eru annaðhvort á þorrablóti eða fyrir sunnan og engar líkur á því að ég finni einhvern sem langar með mér á tjútt...enda er ég líka svo löt að ég bíða alltaf eftir því að einhver reyni að draga mig á djamm...skil svo ekkert í því þegar ekkert gerist! Annars átti ég kalda "STELLU" í ísskápnum og sit nú og sötra á meðan ég rita þetta (burp, exskvísmí). Var að horfa á laugardagslögin í sjónvarpinu áðan (já, glöggir lesendur sjá að líf mitt er frekar eymdarlegt þetta kvöldið) og verð nú að segja að ég skil ekki í fólki sem eyðir peningunum sínum í það að kjósa lög í þessari vitleysu ;) hóhóhó-heyheyhey...var alveg afskaplega máttlaust lag, hefði verið flott ef það hefði verið hægt að færa vöðvakraftinn aðeins í röddina. Lagið með henni Ragnheiði Gröndal var annars voða fínt lag, á vel heima í léttum söngleik (fékk einmitt þá fínu hugmynd að semja leikrit með lögum, þegar ég var að hlusta á þetta lag...geng í það við fyrsta tækifæri;) en finnst það ekki alveg passa í Evróvissíónið. Svo var það lagið eftir hana Svölu svölu Björgvinsd. sem var flott diskó-friskó lag, sem ég vona að verði spilað næst þegar ég fer á Kaffi-Ak. (sem ég er svo sem ekkert viss um að verði endilega neitt á næstunni...).
Jæja, hef lokið gagnrýni minni á þessum laugardagslögum, ég stóð reyndar í þeirri trú að þetta væri einhver úrslitaþáttur þar sem framlag okkar ísl. yrði valið, en það var greinilega allt á missskilningi byggt, greinilega hrikalega ótrúverðugar heimildir sem ég hafði...eða mikið minnisleysi...eða ruglingur....farið að minna svolítið á ruglið í henni Reykjavíkinni hehe...Ef hann Villi litli viðurtan verðu ekki komin í einhverjan leðurklæddan "stjórnarformannsstól" eftir nokkra daga er ég illa svikin. Þeir sjallar hljóta að fara að bjarga hanns rauða rassi flótlega!
Annars finnst mér að í allar svona opinberar stöður, þá meina ég borgarstjóra, bæjarstjóra, forseta og það allt, eigi að velja í með því að halda fegurðarsamkeppni. Og auðvitað eiga bæði kynin rétt á að taka þátt í þeirri keppni, sá sem er svo sætastur/sætust fær sætið :) Þá færi nú fyrst að verða eitthvað vit í þessum fegurðarsamkeppnum ;) það er bara til svo mikið af sprenglærðu/gáfuðu fólki sem stjórnar þessu hvort sem er á bak við tjöldin og þá er mun gáfulegra að hafa sæta fólkið í sjónvarpinu...ég meina það, hverjum finnst Villi viðurtan fallegur??? En Dagur B.E???? ;) og hvorn viljið þið ferkar sem borgóstjó? SEE MY POINTS ?;)
Ég er nefnilega ekki svo vitlaus...því þrátt fyrir mínar skoðanir á þessum málum, þá geta sumir verið bæði sætir og gáfaðir ;) hehehehe...
Ég og STELLA rúllum ;) hikk
Það er verið að spila "never ending story" með Limahl í útvarpinu og ég með netta gæsahúð af flass"langt aftur í tímann"bakki. Ef ég fer ekki að koma mér í rúmið þá klára ég allan bjórinn í ískápnum og enda sitjandi við eldhúsborðið syngjandi: "I´m just a lonley girl, lonley and blue, I´m all alone with notthing to do"..... Ef ég kynni að skrifa "aumkunarvert" á ensku, þá myndi ég gera það núna!

Held ég hætti bara núna...bjórinn búinn sko ;)

Till next...adios

Gleymdi

Það er eins gott að ég er yfirleitt með sjálfri mér, annars myndi ég eflaust gleyma sjálfri mér....hummm.
Ég gleymdi nefnilega að minnast á tvær stór-fréttir áðan.
Sú fyrri er: (og persónulega finnst mér hún merkilegri, sennilega vegna þess að hún snýr beint að mér, og ég er svo sjálfhverf remember ;) að ég fékk 9,5 fyrir ritstjórnarverkefnið mitt og Ellu! :)
Kennarinn var alveg rosalega ánægð með verkefnið, eintómar góðar athugasemdir og ég er næstum viss um að það eina sem stóð í veg fyrir því að við fengum 10 er að kennarinn gefur aldrei 10 ;) hehe...eða það er fínt að hugsa það svoleiðis...er a.m.k alveg himinsæl með þessa einkunn :) Svo gildir hún líka 10% af lokaeinkunn ;)

Sú seinni er: að Kristján minn eignaðist lítin bróðir í gær (nei, ég var ekki ólétt) og vil ég nota tækifærið og óska honum, pabba hans og Þórdísi til hamingju með guttann :)

Ætla að reyna að skúbba frétt ;)

Till next...adios

Fjarlægðin gerir fjöllin blá...

Og enn á ný er kominn föstudagur! Ég held að það hljóti að vera búið að kippa út einum degi í vikunni (er ég alltaf að tala um þetta...). Ég skoppaði í skólann eldsnemma í morgun (eða keyrði sko) og var vöknuð strax í öðrum tíma eftir að ég hafði sturtað í mig tvöföldum expressó í fyrstu frímínútunum! Ég fékk nefnilega þennan fína gest í gærkveld og varð að mýkja hana með hvítvíni, eftir að ég hafði látið út úr mér einhver ógætileg orð um nöldur og tuð í kvenfólki ;) og okkur tókst bara að blóðmjólka kúna ;) . Svo ég var sybbin í morgun. Eftir skóla fór ég og skilaði einum pössunarkettinum (núna eru "bara" tveir kettir á heimilinu) og sá svo auglýsta útsölu í Eymundsson, sem ég gat ekki horft framhjá...ætlaði nú reyndar bara að kaupa mér penna (það er eitthvað pennasvarthol hér á heimilinu fullt af horfnum pennum) en endaði með 3 bækur og nokkra penna, (og tvær bókanna voru ekki einu sinni á útsölu)! Svo skutlaði ég Mikael til vinar síns og við Kristján fórum í verslunarleiðangur í Nettó. Kristján var voða fegin að komast aðeins út úr húsi, enda búinn að vera veikur í viku.
Ég velti því svolítið fyrir mér í búðarferðinni, hvað stór hluti fólks (og þá er ég að tala um fullorðið fólk) er ofsalega ótillitsamt við náungann. Það væri allt miklu auðveldara ef fólk væri aðeins meira meðvitað um það að það er annað fólk í kring um það!
Kurteisi kostar ekkert :) svo ég held að allir ættu að vera örlátari á hana, lífið yrði svo miklu skemmtilegra fyrir vikið.
Hef lokið eystri úr viskubrunni mínum í bili ;)
Góða helgi Helgi :) og þið öll hin líka ;)

Till next...adios

Letidagur

Mér tókst að skjótast í skólann í morgun, skila verkefni og sitja einn umræðutíma, svo fór ég heim og þar sem allt var svo rólegt, strákarnir sofandi og ég ennþá varla vöknuð hvort sem var, þá skreið ég bara aftur í rúmið og svaf fram (yfir) að hádegi! Usss! Enda fel ég mig á bak við þá afsökun að ég sé búin að vera smá slöpp...hóst hóst
Annars er heilsa Kristjáns óðfluga að batna, svo nú getur hann aftur legið yfir tölvunni ;) þetta voru erfiðir dagar þegar hann hafði ekki einu sinni heilsu í tölvuleiki...núna finnst honum að hann hafi látið kjánalega og gert mikið úr þessu þarna um kvöldið þegar við enduðum upp á slysó. En ég hef nú veri að telja honum í trú um að það sé ekkert skrítið þótt hann hafi ekki verið alveg rólegur yfir því að finnast hann vera að kafna. Það hefðu nú sennilega fleiri panikkað en hann. Núna ætla ég bara að banna honum að verða meira lasinn í vetur, er orðið ágætt takk :)Þetta er hann Kristján voða voða lasinn...svona klukkutíma áður en það versta skall á.
Eins gott að hann frétti ekki af þessari mynd hér inni....hehe, ansi hrædd um að ég fengi ekki fallegt augnaráð þá ;)
En jæja, kjúklingurinn mallar í ofninum, ég hef ekki gert nokkurn skapaðan hlut af viti í dag, svo nú er mál að fara að lesa smávegis fyrir morgundaginn!
Bíð svo spennt eftir þessum hlýindum sem eiga að hellast yfir okkur á morgun og standa laaaangt fram í næstu viku! Alveg upp í 7 gráðu hita!!!

Till next...adios

Öskudagur

Það fór þá svo að ég fór hvorki á fund, ná á fatakynningu í gærkveldi, heldur lá leið mín upp á slysó. Kristjáni versnaði svo rétt eftir kvöldmat (náði reyndar ekki að borða nema hálfa kartöflu) fanst erfitt að anda og var alveg ómögulegur. Þegar það virtist bara versna þá reif ég bara Mikael upp úr rúminu (en aldrei þessu vant var hann sofnaður snemma) og brunaði með Kristján upp á slysó. Þar kíkti fyrst hjúkka á hann og þegar hún ætlaði að kíkja á kokið á honum þá kúgaðist hann og ældi svo heil óskup...Svo kom doktor og skoðaði hann og var nánast viss um að hann væri með Einkyrningssótt, hafði amk öll einkenni, bólgna eitla (eða kirtla...man ekki hvort nema hvorutveggja sé) hita, eyrnabólgu og ógurlega slappur. Kristján var þessu nú hálffegni (þótt hún, læknirinn, segði að það gæti tekið hann hálft ár að jafna sig alveg) því hann hafði verið þess full viss að þetta væri hans hinsta stund. En svo kom "góða hjúkkan" (þetta var reyndar alveg afskaplega góð hjúkka sem sá um okkur) og tók blóðprufu úr Kristjáni, og það fannst honum ekki gott...en lét sig hafa það, þar sem hann taldi þetta sennilega vera eina færa leiðin til að bjarga lífi sínu. Svo tók við löööööööööööööööööng bið eftir niðurstöðum úr blóðprufunum En svo rétt fyrir miðnættið þá kom doktorinn og sagði að blóðprufurnar hefðu bara komið ótrúlega vel út. Einkyrningssóttarprófuð hefði komið út neikvætt, svo allar líkur væru á að hann væri bara með svona heiftarlega pest og bólgur í eitlum út af einhverri veiru og hann myndi bara jafna sig á nokkrum dögum. En sagði jafnframt að við ættum að koma aftur ef að þetta versnaði eitthvað.
Svo að því búnu fórum við heim, algerlega búin á því öll sömul.
Svo nú fer bara öskudagurinn í hjúkrunarstörf (hefði átt að vera búin að kaupa mér hjúkkubúning ;) og lestur námsefnis sem er algerlega búið að sitja á hakanum undanfarna daga. Svo krossar maður bara fingur og vonar það besta, væri voða gott að geta komist í skólann í fyrramálið, bæði er skyldumæting og svo þarf ég að skila einu verkefni...
En þetta kemur allt í ljós, Kristján er rosalega þakklátur fyrir að hafa lifað þetta af, þótt hann sé ennþá hundlasinn, þá er hann skárri og sér lífið í alveg nýju ljósi eftir þennan hildarleik! Hann má nú alveg eiga það hann Kristján minn að hann er svolítil "dramadrottning" inn við beinið ;) en það er bara allt í lagi :)

Till next...adios

Sprengidagur

Já, nú á að taka á því í átinu, er að reyna að troða í mig bolluafgöngum gærdagsins (rop) svo sýður saltkjötið í pottinum, og baunirnar fara að sjóða bráðum :) Nammi nammi namm :)
Annars er þetta búinn að vera annasamur dagur, eins og oft (kanski þess vegna sem að vikurnar fljúga framhjá...;)) Kristján er ennþá lasinn, en ég held að þetta sé nú allt á réttri leið hjá honum, núna er hann "bara" fullur af kvefi, hósta og með svaðalega hálsbólgu. Er annars pínu hrædd um að honum hafi tekist að smita mig af einhverju, því ég er að fyllast af kvefi og hálf asnaleg...ok, asnalegri ;)
Eins og mín var von og vísan, þá gleymdi ég náttúrulega að kaupa saltkjötið og baunirnar þegar ég arkaði í búðina í gær, svo ég skrapp í Nettó í dag! Já og meðan ég man: ég er aftur komin á bíl :) þurfti reyndar að moka hann aftur upp í dag, því þegar planið var mokað var skilinn eftir vænn haugur af snjó fyrir aftan bílinn minn :( (reyndar virkar ekki miðstöðin frekar en fyrri daginn, svo það er bæði kalt inn í bílnum og ég sé ekkert út um framrúðuna, en það er aukaatriði, bara að ég geti keyrt kaggann :)
Mér finnst annars Nettó yfirleitt ágætis búð, en stundum er hún full mikið að spara fyrir mann...eða með öðrum orðum; selja manni eitthvað drasl á slikk! Það gera þeir t.d með saltkjötið, það var bara hægt að kaupa "spar saltkjöt" sem mér fannst aðallega vera hálskyrtlar, fita og bein. Og mig sem langaði bara í 2-3 góða bita. Svo það endaði með þvi að ég varð að kaupa 2 poka af sparkjötinu til að eiga kanski nóg kjöt handa mér og Kristjáni, (Mikael er nefnilega í afmæli og fékk líka saltkjöt í skólanum). Svo þetta fer að verða spurning um sparnað....en ég nennti bara ekki í fleiri búðir.
Svo þyrfti ég helst bæði á fatakynningu og fund í kvöld en hef varla orku í annað! Það er spurning hversu hress ég verð eftir saltkjöts átið...hvort ég fer eða verð heima í kvöld :)
Verð að láta það koma fram, afþví að ég var eitthvað að bölsótast út í snjómoksturinn í gær, að ég dáist að þolinmæði mokstursmannanna :) Að þurfa að moka göturnar í allri umferðinni og bíla hér, þar og allstaðar...þeir fá hrós dagsins :)

Hef ekki orku í meiri skrif í bili...

Till next...adios

Bolludagur

Ég var náttúrulega búin að steingleyma því að það væri bolludagur í dag, þangað til að einhverjir morgunhanar í útvarpinu fóru að gagga um það að þau þyrftu að ná í rassinn á einhverjum bakarísköllum - fanst það nú bara hljóma eins og ávísun á salmonellu eða eitthvað álíka spennandi. Svo þegar skólinn var búinn hjá mér þá arkaði ég bara niður í Nettó (ég mokaði jú bílinn upp í gær, en færðin á götunum er ennþá full flókin fyrir hann grána gamla) og hugðist næla mér í nokkrar bollur. Þar voru jú bollur í stórum stöflum, en engar svona tilbúnar til átu. Ég hafð nefnilega ætlað mér að kaupa nokkrar gerbollur rjómalausar, fyrir strákana, en svo nokkrar vatnsdeigsbollur með rjóma og alles handa mér. En þá voru bara ekki til neinar bollur með rjóma! Svo ég þurfti að kaupa sitthvora pakkninguna - gerbollur með 5 í pakka, vatnsdeigsbollur með 5 í pakka og svo keypti ég 4 berlínarbollur (en auðvitað voru 2 saman í pakka þar, svo ég þurfti að kaupa 2 pakka). Þannig að nú á ég 14 bollur handa okkur 3 :) Alveg ótrúlega skynsöm í innkaupum...hehe. Annars frysti ég bara restina, nema einhverjir kíki í kaffi, svo nú er bara að dusta rykið af þeytaranum og þeyta rjóma...vona bara að ég hafi keypt nógan rjóma!

Annars var mér nóg boðið og oggolítið pirruð í morgun. Ég ákvað sem sé af minni alkunnu góðmennsku að labba með Mikael í skólann í morgun (Kristján er sko ennþá lasinn og bíllinn...já þið vitið allt um það) og það var nú bara eins gott að ég ákvað að fylgja barninu. Því allar gangstéttar voru vel faldar undir nokkrum metrum af snjó (ég ýki ekki einusinni mikið). Svo ég labbaði á undan, óð snjóinn upp fyrir hné og ruddi brautina fyrir Mikael. Hann væri sennilega ennþá fastur í skafli ef ég hefði sent hann einan! Þetta blessaða bæjarfélag má skammast sín þegar kemur að snjómokstri, ég held að það sé haldið full fast um budduna í þeim málum. Í gær hefði t.d verið alveg upplagt að nota rólegheitaumferðarleysið sem einkennir oft sunnudaga, til að moka, en nei þá sá maður ekki votta fyrir neinum sjóruðningstækjum! Það má náttúrulega ekki borga þessum greyjum yfirvinnu, nei, hér skal mokað á milli 8-16 og ekkert bruðl! Svo núna er verið að moka einhverjar götur og fullt af bílum fyrir ruðningstækjunum og ruðningstæki fyrir bílunum!
Ég vil bara hafa allar götur auðar þegar ég kem út á morgnana og gangstéttarnar líka takk! Þannig verður það þegar ég er orðin bæjarstjóri :)

Þetta er mynd af slóð eftir að ég og Mikael "ruddum brautina" ;) Það er víst gangstétt þarna undir:


Jæja, þessi rjómi þeytir sig víst ekki sjálfur...kálfur :)

Till next...adios

Litli frændi

Ég var að eignast lítin frænda í morgun :) prinsinn kom í heiminn kl.07:24 í morgun og var 13 merkur og 48,5 cm. Og öllum heilsast vel :) Til hamingju Árni og Sigga Lára :)
Af allt öðru, gamlar fréttir að allt er á kafi í snjó. Nýjar fréttir að ég er að safna kjarki til að moka upp bílinn og athuga hvort hann fer í gang.
Annars var dagurinn í gær leti dagur mikill, það var samt gerð tilraun til að fá mig á tvenna tónleika/viðburði í gærkveldi, en þar sem heilsufarið hanns Kristjáns breyttist á 5 min. fresti þá endaði nú kvöldið bara með hausverku upp í sófa hálf sofandi yfir "TMNT" ! Glæææææsi legt ;/
En ég lifi í voninni um batnandi heilsufar, svo ég komist aðeins út úr húsi og geti hresst upp á andlegu hliðina :)
Jæja, strákarnir eru búnir að skipta tölvunum "bróðurlega" á milli sín, svo þá er komin tími á að ég hendi mér í eitthvað hlýlegt og moki eða eins og segir í laginu: "mokum, mokum, mokum, mokum, mokum meiri snjó, mokum, mokum, mokum, mokum, mokum meiri snjó, tralllala....;)

Já og af leikfélagsmálum er fínt að frétta, rífandi gangur í æfingum í Freyvangi, ég fór í fýlu þegar ég fékk ekki að leika Jörund og ákvað að vera bara ekkert með :) nema kanski stússast í leikskrá og svoleiðis....þar get ég líka misnotað aðstöðu mína og komið nafni mínu að á hverri blaðsíðu ;)

Gon skófling ;)

Till next...adios

Ekkert fyndið

Já það er alveg hætt að vera fyndið hvað það snjóar mikið! Það bara snjóar og snjóar og snjóar svo meira, og mig óar alveg við þessu!
Annars lítið við þessu að gera. Vona bara að ég nái bílnum upp fyrir vorið ;) Svo eru bara allir með hor og hósta...usss ekki gott ástand.
Veit ekki afhverju ég settist hér niður fyrir framan tölvuna, á eftir að gera helling af almennum heimilisstörfum, vaska upp, þvo þvott og fleira skemmtilegt. Best að drífa í því meðan ég man ;)

Till next...adios

Og aftur komin helgi

Verð að segja að ég er bara alveg afskaplega fegin því að það er komin helgi! Þótt mér ói stundum hversu vikurnar eru fljótar að líða. Ég reif mig upp eldsnemma í morgun og þar sem Mikael var hóstandi og sjúgandi upp í nefið í alla nótt og Kristján ennþá slappur þá ákvað ég bara að leyfa þeim að vera heima. En sjálf arkaði ég af stað í skólann, í blindbyl og fimbulkulda. Þurfti að skila af mér einu verkefni og svo vera með ritstjórnarfund, þar voru blaðamennirnir teknir á teppið. Einhverja held ég samt að okkur Ellu, meðritstjóra mínum, hafi tekist að móðga. Það voru a.m.k nokkur reiðileg andlit í stofunni þegar við vorum að gagnrýna fréttirnar. En það er bara svona þegar fólk vandar sig ekki! hehe...
Ég er a.m.k mjög þreytt eftir vikuna, búið að vera fullt að gera og er alvarlega að spá í að liggja í all svakalegri leti þessa helgina. Jafnvel bara gera ekki neitt....panta pizzu og hvítlauksbrauð í kvöld, panta pizzu og franskar á morgun og panta pizzu og brauðstangir á sunnudaginn! Skemmtilegur og fjölbreyttur matseðill, sem er litaður af því að ég fékk: námslán, útborgað frá FSA, barnabætur og að ógleymdu hinu ómissandi meðlagi í dag! Svo nú á ég fullt af peningum sem ég veit ekkert hvað ég að gera við ;)
Jæja, ætla að koma Mikael í afmæli og leggja mig svo á meðan að hann er þar ;) gott plan. Svo verður það pizza nr.1

Till next...adios

Myndir

Hvað er öðruvísi við myndirnar??? Ákvað að skella hér inn skemmtilegum myndum í tilefni þess að það er snjór út um allt! Þessar eru reyndar teknar í fyrra vor, en só vott!
Mig minnir að það hafi verið Árni bró sem fékk þarna útrás fyrir sköpunargleði sína ;)

Till next...adios

Hnoðri í norðri verður að veðri þótt síðar verði...

Og það er bara akkúrat það sem hlýtur að hafa gerst! Hér geysa válynd veður, snjór og rok og vindur og ofankoma, nema hvorutveggja sé ;) Gamli bíllinn minn var næstum á kafi í snjó í morgun, og þar sem að ég sá fram á að þurfa að keyra yfir snjó, þá ákvað ég bara að láta bílinn hreyfingarlausan undir snjónum í dag. Bíllinn minn er nefnilega þeirri ónáttúru gæddur að ef ég keyri yfir einhvern snjó, þá kem ég honum ekki í bakkgír...meikar ekki mikið sens, en svona er þetta nú bara, ég er ekkert klikkuð! Svo virkar miðstöðin ekki heldur, svo það er bara hlýrra að labba sér til hita í bylnum heldur en að sitja í frosnum bíl.
Ég fylgdi Mikael í skólann í morgun (Kristján lasinn heima, með magapest) og svo "skokkaði" ég í skólann. Eftir skóla fór ég svo arkandi til meðritstjóra míns og við lágum yfir þessum blessuðu fréttum og pistlum í allan dag. En svo var hún svo góð að keyra mig til að ná í Mikael og aftur heim :) Það verður sennilega strembnara í fyrramálið, sérstaklega ef Kristján verður ennþá lasinn, því þá þarf ég fyrst að fylgja Mikael og svo hlaupa upp í Sólborg og vera mætt þar kl.08:10 ! Jæja, ég bara vona það besta :)
Það hlaut náttúrulega að koma að því að það kæmi vetur. Hefði auðvitað verið skemmtilegra að eiga bíl sem virkar í snjó, en svona er þetta bara....ég spara þá bensín á meðan :)
Jæja, hélt ég hefði helling meira að segja núna, en svo er víst ekki.

Till next...adios

Einmitt

Það bara hrúguðust inn komment hjá mér eftir að ég leysti undur tækninnar með það að hægt væri að kommenta án þess að skrá sig sérstaklega inn...gaman að því. Einnig virðist "aðdáenda" hóp mínum (dyggum lesendum) eitthvað vera að fjölga, þeim örugglega til mikillar gleði og ánægju á komandi bloggum ;) hehe....ég hef bara aldrei auglýst bloggið mitt neitt, sennilega einhver uppgerðar feimni ;)
Annars var ég næstum þunn í morgun eftir hvítvínsdrykkju gærkveldsins (svo drakk ég líka einn bjór á meðan að ég bakaði pönnukökurnar...segi bara engum frá því), en mér til mikillar hrellingar þá var ennþá eftir í hvítvínskútnum þegar klúbbkonurnar kláru fóru, svo ég sé fram á það að ég verði full hérna næstu kvöld að klára úr kútnum! Smá hjálp væri vel þegin ef þyrstir vegfarendur eiga leið hjá...held að svona kútar geymist ekki lengi eftir opnun ;) gúggl gúggl gúggl...
Annars er búið að vera brjál að gera í dag, þurfti reyndar bara á einn fyrirlestur í skólanum, en er svo búin að vera í hóp-verkefnavinnu og svo setið við ritstjórnarstörf. Ég er nefnilega ritstjóri landpostur.is þessa vikuna. Svo nú get ég "drullað" yfir hina aulana sem eru að skrifa fréttir...hehehe, nei annars er þetta nú yfir höfuð ágætt hjá þeim...misjafnlega ágætt en ok! Það er nefnilega ágætis vinna að lesa og gagnrýna yfir 50 fréttir og pistla...
Jæja, ætla að fá mér súkkulaði og fara svo að sofa.

Till next...adios

Áríðandi skilaboð

Ég tölvunörd vikunnar, held að ég hafi búið svo um hnútana að nú geti allir kommentað hjá mér...og þurfa þar með ekki að skrá sig sérstaklega inn!!!! Endilega kommentið og athugið í leiðinni hvort ég sé snillingur eða ekki ;)

Till next...adios

Rokk, rok og afmæli

Hún Gyða litla Árnadóttir Friðrikssonar á afmæli í dag! Orðin 2 ára litla hnátan og óska ég henni og hennar nánustu ættingjum til hamingju með það :) Hibb hibb húrrey!!!

Hér hlánaði og blés nærri öllum snjó í burtu í gær en það frysti aftur nægilega snemma til að skilja eftir skemmtilega mikið klakabúnt yfir öllu. Bílaplanið hjá mér er eins hált og svellið í skautahöllinni, og svo hallar planið náttúrulega, svo þegar ég legg af stað þá stoppast ég sennilega inn í Simensbúðinni niður á Glerárgötu...en það er allt í lagi því ég þarf hvort sem er þar inn til að kaupa mér peru í baðherbergisljósið (rugl að vera með einhverjar svona spes perur...það verður sko bara venjulegur skrúfgangur næst), svo ég get sennilega bara skrúfað niður rúðuna á bílnum (ef hún verður ekki frosin föst) og sagt "eina svona sparperu takk!" og brosað :) Ég man eftir því einu sinni í fyrra vetur, að það það var svo mikill klaki á bílaplaninu og rok...að einn bíll fauk-eða rann á næsta bíl fyrir neðan! Það er bara hreint ekki gáfulegt að búa til bílaplön í halla.
Annars heyrði ég í útvarpinu í morgun að það væri hífandi rok á Akureyri en ætti að lægja um hádegið...held samt að þetta hafi nú gengið yfir í nótt, mér fannst a.m.k ekkert hvasst í morgun og rak strákana miskunarlaust út og lét þá labba í skólann, hafði hvort sem er engan tíma til að keyra þá...á eftir að lesa helling fyrir tímana sem ég er að fara í á eftir...
Svo er ég með saumaklúbb á morgun...veit ekki hvað kom yfir mig, sennilega bara það að janúar er allt í einu að verða búinn og "minn tími var kominn" til að hafa klúbb....íbúðin er að vísu öll á hvolfi og ég hef sennilega lítin sem engan tíma til að laga til....en ég þykist bara verða voða hissa þegar þær skvísur koma á morgun og segi: " jiiii, ég var bara alveg búin að gleyma klúbbnum og þess vegna er bara allt í drasli hjá mér...en komið endilega inn, sem betur fer hafði ég eldað mikinn mat handa strákunum í kvöld og ætlaði meira að segja að gefa þeim smá hvítvín með matnum...skemmtileg tilviljun" :) og svo ef ég gleymi að kaupa peru inn á bað, þá sést hvort sem er ekki skíturinn þar...hehe, ég er bara alveg hætt að hafa áhyggjur af drasli, hef bara slökkt ljós ;)
Jæja, ætti kanski að fara að lesa eitthvað af viti og hætta þessu bulli hér...sem er engum til góðs en engum til hjóðs heldur...hehe, hope ;) (segi ég og fæ algera útrás við að drulla yfir liðið á efri hæðinni og segja hverjir fara í taugarnar á mér og svona...usss, skamm skamm!)

Jæja, ætla að fá mér kaffi úr fínu kaffivélinni minni, henda mér í sturtu og lesa svo...þá er von til þess að ég sofni ekki yfir bókunum ;)
Ps. þetta með rokkið í titlinum, var bara upp á lúkkið ;) hef ekkert um rokk að segja ;)
Passið að fjúka ekki og látið ekki fjúka í ykkur ;)

Till next...adios

Ofurmamma

Ég tók alveg og tæklaði sjálfa mig í móðurhlutverkinu í dag. Var alveg extra dugleg og byrjaði daginn á að drífa Mikael í skíðaskólann, fór svo sjálf á skíði ásamt Öllu mágkonu, pabba hennar og litlu prinsessunum Guðrúnu Mist og Ragnheiði Katrínu....krakkarnir voru reyndar að æfa og í skíðaskólanum svo við hin renndum okkur bara af mikilli snilld af vild ;) Rosa gaman og gott ef ég er ekki bara pínulítið að bæta mig ;)
Svo eftir skíðin þá dreif ég strákana í sund! Það var reyndar uppástunga frá Mikael, en það þurfti mikin aga og járnvilja að drífa mig með þá, þar sem ég var gjöramlega að leka niður af þreytu eftir skíðin...en ég sat í heita pottinum meðan þeir gösluðust í sundlauginni svo þetta var fínt. Svo fékk ég að leggja mig í hálftíma eftir heimkomu úr sundinu, sem var afskaplega kærkomið ;) Vona bara að ég nenni að vera svona dugleg aftur fljótlega :)
Ég fór á bókasafnið í fyrradag og náði mér i nokkrar "hliðsjónarbækur" en það er svona skemmtilegt nafn yfir þær bækur sem við þurfum ekki að kaupa, en er samt ætlast til að við lesum! Ég er byrjuð að glugga í tvær en það er "Frelsið" eftir John Stuart Mill (honum fanst frelsi einstaklingsins ætti að vera ofar öllu, allir mættu gera það sem þeir vildu svo framarlega sem þeir sköðuðu ekki aðra) ég hef aðeins verið að lesa úr þessari bók á netinu á enskri tungu og er að vonast til þess að íslenska útgáfan sé aðeins auðlesnari. Svo byrjaði ég einnig á að kíkja í "Kommúnistaávarpið" eftir þá félaga Karl Marx og Fridrik Engels (þeir voru náttúrulega byltingasinnar og talsmenn öreiganna). Þessar bækur eru kanski ekki beint léttmeti en ég hlýt að geta klórað mig í gegnum þær!
Jæja, það er kominn matur hjá mér...við tróðum í okkur samlokum og sælgæti eftir sundið svo að kvöldmatnum seinkaði dálítið....hummm...eins gott að það komist enginn að þessari óreglu sem viðgengst á heimilinu ;)
Hafið það gott og verið góð hvort við annað...annað er bannað :)

Till next...adios

Vond kona...

Já, stundum velti ég því fyrir mér hvort ég sé ekki bara svolítið vond kona. Sérstaklega þegar að því kemur að dæma aðra. Það er einmitt það sem maður á ekki að gera, dæma aðra, hvaða rétt hefur maður svo sem til þess? En kanski er spurningin sú: afhverju fer sumt fólk í taugarnar á manni??? Það fer satt að segja í taugarnar á mér, þegar annað fólk fer í taugarnar á mér...en sem betur fer kemur þetta ekki oft fyrir. En eins og kanski einhvern er farið að renna grun í, þá kom þetta fyrir mig ekki fyrir svo löngu síðan. Málið er það, að núna eftir að skólinn byrjaði aftur eftir áramót, þá hafa bæst 2 nýjir í bekkinn, tveir tiltölulega ungir strákar (hef annars ekki hugmynd um aldur þeirra en milli 22-25 er örugglega nærri lagi). Annar virkaði bar fínt strax í upphafi, small alveg inn í þennan fína hóp sem bekkurinn minn er (nútímafræðin, svo erum við í kúrsum með fullt af öðrum) en hinn....sko í stuttu máli þá fer "allt sem hann gerir og allt sem hann segir" í taugarnar á mér! Og vá hvað mér finnst það óþægilegt, get samt ekkert að því gert. Bara ef hann opnar munninn (sem er alltof oft) þá langar mig til að segja honum að grjót halda kjafti og hundskast eitthvað í burtu! Já, ég veit, ég á bágt og ætti að skammast mín alveg í tætlur, og skammast mín alveg fyrir þessar hugsanir. Ef einhver lumar á góðu ráði þá væri það vel þegið :) hvernig á maður að hætta að láta fólk fara í taugarnar á sér? Svo hugsa ég líka stundum: "ætli ég fari svona mikið í taugarnar á einhverjum" hummm, en mér finnst það svo ótrúlega ólíklegt að ég fer þá bara að hlæja að þessum hugrenningum mínum ;) hehe...

Till next...adios

Heyrnarlaus á öðru...

og hálf blind á hinu...hummm, ég fer að detta sundur bráðum vegna lausra skrúfa eða annara galla. Ég missti heyrn á öðru eyranu í fyrrakvöld, svona næstum bara allt í einu, en ég tel (af því að ég er svo mikill læknir inn við beinið...) að þetta séu eftirstöðvar eftir veikindi mín um daginn. Kristján missti a.m.k líka heyrnina eftir að hann var lasinn þarna um jólin. Þetta er frekar óþægilegt, sérstaklega í tímum, en ég reyni að snúa betra eyranu að kennaranum og þá missi ég ekki af svo miklu ;)
Eitthvað er nú liðið að missa sig þarna í borg óttans! Ég held að það þurfi að skíra Frjálslyndaflokkinn upp á nýtt, Lauslátiflokkurinn væri mun meira viðeigandi og Sjálfstæðisflokkurinn yrði þá Alræðisflokkurinn. Þetta fór annars allt saman mikið framhjá mér alveg þangað til seint í gærkveldi að ég kíkkaði inn á landpostur.is og þar las ég þetta, hann er greinilega alveg að virka þessi fíni miðill sem ég "vinn" hjá ;) Voðalega hafa annars Sjallarnir verið orðinir örvæntingarfullir að komast aftur til valda, og hvað skyldu þeir hafa borið mikið af loforðum og fé á Ólaf (svona alveg fyrir utan borgarstjórnarstólinn í eitt ár), helling er ég hrædd um. Það er allt löðrandi í spillingu og óheiðarleika í þessum málum, og versnar og versnar! Ólafur kallinn, hann langar bara að vera pínu áberandi í smá stund, "njóta síðustu sólargeislanna" koma nafni sínu á spjöld sögunnar, þar sem kallinn er nú búinn að vera lasburða og veiklulegur þá er þetta kanski síðasta hálmstráið....en samt óheiðarlegt, og hver vill komast til metorða á óheiðarleika? Ok, Dabbi Odds er gott dæmi, en svona þar fyrir utan? Jæja, ekki orð um það meir...í bili.
Fór með strákana á Greifann í gær að borða, mér til andlegrar upplyftingar ;) velti því reyndar fyrir mér að gera það að föstum lið, einu sinni í viku eða svo að fara út að borða með stákana....það er bara svo gott að þurfa ekki að elda og VASKA UPP. ;) svo fær Mikael frímiða á Greifann þegar hann fer í skíðaskólann, svo þetta er ekkert svo voðalega dýrt ef maður pantar sér ekki steik þ.e.a.s ;)

Till next...adios

Ráðning

Jæja, ég fékk þessa fínu ráðningu á draumnum mínum úr síðasta bloggi. Hanna var svo góð að ráða hann fyrir mig og í stuttu máli, merkir hann í frægð, frama og auðlegð. Eitthvað var reyndar líka um snöggt tap á peningum sem maður hafði stritað fyrir og það rættist einmitt í dag, þegar ég fór og keypti skíðaskó, skíðastafi og vettlinga handa mér og skíðaskó handa Mikael. Og borgaði fyrir með peningunum sem ég stritaði fyrir á FSA fyrir jólin ;) hehe... Annars var ég farin að halda að draumurinn hefði verið fyrirboði um stórtap Íslendinag gegn Svíjum, en leikurinn var einmitt daginn eftir drauminn. En Íslendingar fengu aðeins uppreisn æru í dag, þegar þeir unnu Slóvena með 6 marka mun...en áttu samt ekkert spes leik í laaaangan tíma eftir að seinni hálfleikur hófst. Sem var kanski bara ágætt, því það fór pínu í taugarnar á mér lýsingarnar hjá blessuðum fréttamönnunum í fyrrihálfleik þegar "okkur" gekk vel. "Þeim hlýtur að líða eins og trukkur hafi ekið yfir þá", "við erum gjörsamlega að rústa þeim" og þar fram eftir götunum!
Jæja, tölvan að verða straumlaus og ég á leiði í háttinn, ætla að setja Mikael í skíðaskólann í fyrramálið og fara svo á heimspeki-kaffihús :)

Till next...adios

Draumfarir

Ég segi nú ekki farir mínar sléttar af síðustu draumförun mínum. Ef einhver er flink/ur í draumaráðningum þá óskast ráðning takk, en draumurinn var svona:
Mig dreymdi að ég var stödd í sveitinni og horfi út um eldhúsgluggann (sem snýr í norður) og horfi upp að fjárhúsum og upp í fjall. En þar er alveg gríðarlega mikill snjór, snjórinn er í stórum hengjum og snjóðflóð renna niður annað slagið. Ég segi: "ég hef nú mestar áhyggjur af gangnamönnunum". Allt í einu stendur þá hann Oddur Bjarni við hlið mér og er að fylgjast með þessum snjó-hamförum. "skyldi hafa verið flogið" sagði ég þá, þá segir Oddur Bjarni: "nei, örugglega ekki og þess vegna hef ég ekkert komist hingað" og svo hlær hann ógurlega og segir "voðalega ertu trúgjörn". Þá segi ég:"já, ég er trúgjörn, og það er ljótt að plata mig svona". Allt í einu kemur mikill hrosshópur hlaupandi niður fjallið, á harðastökki og sumir renna og detta í snjónum. Ég velti því fyrir mér hvort þetta séu okkar hross, og tel að svo sé. Eitt hrossið kemur alveg upp að eldhúsglugganum og ég opna hann og klappa því og segi: "já það var nú gott hjá þér að koma bara hingað". Svo gengur hesturinn aðeins frá, til annars hests og ég horfi á þá og hugsa að þeir séu nú örugglega kærustupar. Þá segir Oddur Bjarni allt í einu: " rosalega hefur snjórinn dökknað allt í einu". Ég lít aftur upp í fjall og sé þá að svona svartur blær er yfir snjónum á sumum stöðum, svona eins og sandi hafi verið dreift yfir. Þetta er skrýtið hugsa ég og lít af glugganum og inn í eldhús, lít svo aftur upp og út um gluggann. Þá er allt í einu orðið snjólaust, lekur af þakinu og allt blautt (samt ekkert í líkingu við það að allur snjórinn hefði bráðnað, meira svona eins og það væri að stytta upp eftir góðan skúr), ég hugsa: þetta eru gróðurhúsaáhrifin, en í sama mund sé ég út fjörðinn að þar er að mydast svona eldhnöttur og svona eins og risastórt sólarlag komi æðandi að. Ég geng þá inn í stofu, þar eru þá báðir strákarnir mínir og ég sé líka þessa ógnarbyrtu úr suðri. Ég segi: "aldrei hélt ég nú að þetta myndi gerast á meðan að ég lifði", svo tek ég utanum strákana mína (og er alveg ótrúlega róleg yfir þessu öllu) segi: "ég elska ykkur mest af öllu í heiminum" og svo verður allt svart. Svona ekki ólíkt því þegar slökkt er á sjónvarpi, hvítur punktur í miðjunni. Þarna vakna ég...sem betur fer ;) lít á klukkuna og þá er hún akkúrat 03:30.
Ég verð nú að segja að ég var smá tíma að sofna aftur eftir þennan "heimsenda" draum, fannst líka ógurlega skrítið hvernig hann Oddur Bjarni gat laumað sér þarna inn....hummm!

Af allt öðru og léttara hjali ;) þegar stíflulosarinn flinki var farinn héðan um daginn, þá hefur hann geinilega flýtt sér að búa til reikning, því að reikningurinn var kominn inn í einkabankann minn strax um kvöldið og svo kom bréfreikningurinn í dag...og verð ég að segja að reikningurinn er mjög fyndinn (ekki það að ég sjái neitt eftir þessum aurum, finnst mun skemmtilegra að geta sett í þvottavél og verið þokkalega þurr í fæturnar)
Reikningurinn er svona:
Dagvinna 2.....1,00 klst. 2.294 kr.
Snigill...............1,00.........2.060 kr.
Akstur ZT-765..1,00......1.333 kr.
Trygging.............1,00.........142 kr.
Samtals fyrir Vsk............5.829 kr.
Vsk. 24,5%.......................1.429 kr.
Til greiðslu........................7.258 kr.

Þetta er nú allt gott og blessað, en það sem mér fanst fyndnast við þennan reikning er þrennt, í fyrsta lagi: Snigill! Sem ég reikna með að sé hávaðasama tækið sem hann notaði til að losa stýfluna...og hann tók með sér aftur þegar hann fór, hef a.m.k ekki stigið á snigil í þvottahúsinu ennþá ;) svo notaði hann mitt rafmagn. Svo er það aksturinn....hummm, rúmur þrettánhundruðkall! Það hefði verið ódýrara að taka TAXA! Ég veit að bensínið er orðið dýrt, en common, mér findist nú nær að hækka aðeins tímakaupið hjá manninum, heldur en að okra á akstri. Svo er það þriðja og kanski fyndnasta...trygging 142 kr...hummm, fyrir hvað er þessi trygging? Ef hann dettur á hausinn í bleytunni? Ef að ég er eitthvað leiðinleg við hann? Ef ef ef...humm, svo er þetta svo hlægileg upphæð að ég hefði þá bara hækkað frekar tímakaupið hjá manninum. Hann hlýtur að vera tryggður hvort sem er í vinnunni ;) sem ég held að vinnuveitandi eigi að bera kostnað af...en ekki ég.
Jæja, þetta eru nú bara svona vangaveltur...svo er gjalddagi reikningssins sami dagur og verkið er unnið...svo það er eins gott að borga bara í hvelli og brosa út að eyrum :)

Till next...adios

Af afmælum og stússi

Já í dag er merkilegur dagur, því þá eiga þau systkyni Friðrik og Ragnheiður Þórðarbörn afmæli. Friðrik Ingi orðinn svo mikið sem 17 ára (kominn tími á að leggja bílnum og hlaupa...) og hún Ragnheiður Katrín litla 5 ára (vona að ég muni þetta rétt...) óska ég þeim hér með innilega til hamingu :) og bíð spennt eftir rosa veislu ;)
Annars er það helst ég fréttum að ég gafst upp á að bíða eftir að snillingarnir á efri hæðinni gerðu eitthvað í stíflu málum, og þegar allt fór á mesta flot ever hér um hádegið í gær, þá hringdi ég á stíflulosara sem kom eftir 5 min og lagaði þetta á 2 klst. Með hávaða og látum...hélt það væri krókódíll fastur í rörinu eða eitthvað rosalegt! En svo var ég bara að dunda mér enn einu sinni að moka vatninu út úr geymslunni og þurrka gólf hér og þar og allsstaðar...gaman að því ;)
Skemmtilegast þótti mér þó að geta sett í þvottavél...og stelpu greiið hér uppi þorði ekki annað en að koma niður í gærkveldi og spyrja mig hvort hún mætti setja þvottavélina þeirra af stað...og sennilega er þvotturinn þeirra orðinn mjög hreinn, búið að þvo hann 3 eða 4 sinnum...hehe.
Hitti loksins á samvinnuhópinn minn í skólanum í dag, eða sem sé þau sem eru með mér í hóp í verkefnivinnu í Afbyggingu 20.aldarinnar. Við áttum að vera 6 saman, en tvær eru dottnar út og ein var veik, svo við vorum "aðeins" færri en stóð til. Þetta var samt ljómandi góður "hópur" og verður eflaust voða gaman að vinna með þeim í vetur :)
Jæja, ætla að reyna að ákveða hvað ég á að hafa í kvöldmatinn...heilsan ennþá eitthvað að stríða mér, er ekki alveg komin með fulla orku, en vona að það lagist ekki seinna en í gær...
Kanski ég panti bara pizzu...á ennþá afgang af tuttugukallinum sem ég þarf að fara að nota ;)

Till next...adios

Rík um stund

"A king for a day" heitir einhver mynd eða eitthvað, minnir mig...ég var aftur á móti "rík um stund" eða ca. 5 min. Kanksi þó lengur, en vissi a.m.k ekki af því. Ég var nefnilega að fá námslánin mín í dag...loksins! Og snillingarnir í bankanum (eða hjá LÍN) lögðu alla upphæðina bara inn á tékkareikninginn minn, en ekki "Námulánsreikninginn". Svo ég átti allt í einu fullt af pening inn á reikningnum mínum og horfði á upphæðina dágóða stund og dæsti af vellíðan...dreymdi dagdrauma og ákvað að verða rík einhverntíman í framtíðinni (þá er ég að tala um peningalega rík tík, er rík af öllu öðru). Svo tók ég nú upp símann, hringdi í bankann og lét þá nú leiðrétta þetta...konan skyldi ekkert í þessu og þakkaði mér fyrir að "benda þeim á þetta". Það var nú samt gengið frá þessu öllu í bankanum, svo þetta er bara klúður hjá þeim, en hún ætlaði sko að breyta þessu fyrir næstu útborgun í vor ;)
En það góða við þetta (fyrir utan það að þurfa ekki að borga geðveika yfirdráttarvexti í augnablikinu) var að bankinn hafði nú eitthvað nýskast við mig...sennilega ekki haldi að ég fengi svona "há" námslán, svo að ég átti rúmar 20.000kr. í afgang :) Jibbí jei! Er að spá í að bjóða bara strákunum út að borða á Greifann í kvöld :)

Till next...adios

Hóst

Ég var bara nærri því búin að gleyma að blogga í dag....mikið að gera, og alltof lítill tími! Ætla einmitt að fara að skríða í rúmið með eina skólabók og lesa eins og ég get þar til að ég sofna! Þarf sko eiginleg að lesa c.a 50 bls. fyrir kl.8:10 í fyrramálið....finnst ykkur ekki gaman að lesa um lærdóminn minn? ;) hehe...
Ég skrifaði fyrsta pistilinn minn inn á landpostur.is í kvöld, vissi ekkert hvað ég átti að skrifa um, en datt í hug að skrifa um endurvinnslu...ég átti líka til mynd af endurvinnslutunnu í fórum mínum, svo þetta passaði fínt ;)
Svo þarf ég að skúbba einni frétt af fyrir fimmtudaginn...er líka að reyna að finna út úr því hverjir eru með mér í hóp í verkefnavinnu í einu fagi, sendi póst á liðið en hef bara fengið eitt svar! Sem er ekkert gott því að við eigum að skila fyrsta verkefninu á föstudaginn! Ég veit að það er "bara" mánudagur í dag....en ef að dagarnir liðu eins hratt hjá ykkur og þeir gera hjá mér, þá myndu þið hafa svipaðar áhyggjur og ég ;)
Ég er búin að komast að því að ég er alveg ógurlega sjálfmiðuð. Mér finnst bara algjörlega morgunljóst að allir hljóti að hafa gaman af sömu hlutum og ég og finnst alveg furðulegt þegar ég heyri einhvern segja að eitthvað sé leiðinlegt...hummm, en á meðan að þetta hefur ekki alvarlegar afleiðingar í för með sér, þá ætla ég bara að halda áfram að vera sjálfmiðuð og skilja bara ekkert í "þessu skrítna fólki" sem er ekki að hafa sama smekk og ég ;)
Já og bloggið ber yfirskriftina "hóst" í dag af tilefni af því að ég er búin að hósta í allan dag :)
hóst hóst hóst...

Till next...adios

OMG!!!

Ég get bara ekki orða bundist! Eins og mér finnst nú leiðinlegt að setja út á og gagnrýna aðra (múhahahaha) þá verð ég bara að lýsa því yfir, að mér finnst að sumu fólki eigi ekki að sleppa lausu úr föðurhúsum án þess að kenna því undirstöðuatriði í hvernig hlutir virka!
Nýlegt dæmi, legg ég hér fram sem rök fyrir máli mínu.:
Eins og ég skrifaði í fyrradag, þá var hér allt á floti þegar ég kom heim, eyddi ég dágóðum tíma í að reyna að losa stýflu og þurrka gólf. Svo lagðist ég í rúmið! Seint í gærkveldi þá kemur Kristján til mín (þar sem ég var hálf meðvitundarlaus) og segir mér að allt sé komið á flot í eldhúsinu. Púfff, hefur nú blessaða fólkið sett í aðra þvottavél...hugsaði ég fremur gröm. Jú, allt var á floti í þvottahúsinu, geymslan mín aftur orðin full af vatni og farið að leka inn í eldhús til mín. Ég var ekki uppá marga fiska, svo ég lét mér nægja að þurrka upp af eldhúsgólfinu hjá mér, setja stórt handklæði á gólfið og hugsaði með mér að fólkið uppi hlyti að sjá 10cm vatnslagið á gólfinu þegar það illaðist til þess að hengja upp úr vélinni. Svo sofnaði ég og dreymdi tóma vitleysu, sem tengist þessu hreint ekki neitt, en í stuttu máli þá var komin heilmikil byggð í fjallið sunnan við lækinn heima (sem sé Svertingstaðarmegin) og ég og Þórður bróðir áttum að smala fjallið (eins og eitthvað gæti fengið mann til að smala fjallið "vitlausu" megin;). Þar voru bara nokkrar kindur
og voru þær vel af girtar í 3 hólfum...allt mjög undarlegt...svo breyttist eitthvað af kindunum í ketti með kettlinga, og trust me, það er mun auðveldara að "smala" kindum en köttum! Svo var hellingur af húsum þarna í fjallinu, og haugur af fólki. Jæja, nóg af draumförum mínum...sennilega bara verið búin að taka of mikið af verkjatöflunum góðu ;)
Í dag skóf ég vatnið út úr geymsluni minni öðru sinni og sé að enn er kveikt á þvottavél efrihæðarinnar, ákveð að rabba aðeins við hjúin, rölti upp stigann, banka og eftir nokkur bönk þá kemur húsmóðirin til dyra og eftirfarandi samtal á sér stað:
ÉG: Hæ, þið hafið sennilega tekið eftir ástandinu í þvottahúsinu?
Hún: Hæ, já, ég skil þetta ekki, bara vatn út um allt.
Ég: Það hefur greinilega stýflast niðurfallið.
Hún: Já helduru það.
ÉG: Það var allt á floti þegar ég kom heim úr skólanum á föstudaginn
Hún: Já var það, en skrítið
Ég: Þið hafið sennilega sett í þvottavél um morguninn?
Hún: Já
Ég: Ég var heillengi að þurrka upp og reyna að losa stýfluna. Svo hafið þið sennilega sett aftur í þvottavél í gær og allt aftur farið á flot.
Hún: Já, sko hann maðurinn minn setti bara vélina aftur á stað.
Ég: Já og þess vegna hefur allt fari á flot aftur.
Hún: Ég skil bara ekki hvaðan allt þetta vatn kemur
Ég: Úr þvottavélinni
Hún: En hvaðan?
ÉG: Þvottavélin er tengd við niðurfallið og þegar niðurfallið stýflast þá fer allt vatnið á gólfið.
Hún: Er það? Ég hélt að þetta væri útaf veðrinu eða eitthvað svoleiðis.
Ég: (eftir smá hik vegna þess að ég vissi ekki alveg hvort hún var að grínast, en svo virtist ekki vera) þið megið ekki setja þvottavélina ykkar af stað fyrr en það er búið að laga stýfluna.
Hún: Ok, og hvað eigum við að gera?
Ég: Hringið í leigusalann ykkar og segið henni frá þessu og hún getur sagt ykkur í hvaða fyrirtæki þið getið hringt til að fá stýflulosara.
Hún: Já en hún er flutt til Ísafjarðar
Ég: Þið getið samt hringt í hana og annaðhvort reddar hún þessu eða þið.
Hún: ok, takk fyrir :)

Það hvarflaði ekki einu sinni að mér að bjóðast til þess að hringja eftir stýflulosun, var nefnilega farið aðeins að þykkna í minni, þar sem í fyrsta lagi virtist fólkið ekki vita hvert vatnið úr þvottavélinni færi, í öðru lagi að setja aftur fokking sömu vélina af stað (var ekki bara hægt að nenna að hengja upp úr vélinni...eða var gólfið kanski of blautt til þess...hummm) og í þriðja lagi að halda að veðrið væri valdur af þessu. ÉG meina ef það væri asahláka og 30 metrar á sekúndu kanski ja...en 4 gráðu frost og stilla...held varla. (Og ef einhver er að velta fyrir sér, þá er svarið já, hún er ljóshærð) tíhí...

Ég beini þeim tilmælum til foreldra vítt og breytt um heiminn að þeir kenni börnum sínum meira um daglegt líf og hversdagslegt amstur eða haldi þeim ella heima til fertugs!!! Það á bara ekki að leggja svona á annað fólk.

Ps. Það eru ennþá einhverjir FÁVITAR að skjóta upp flugeldum! Það á náttúrulega bara að sekta svona fólk...eða dæma það til refsingar, eins og að þurrka upp af gólfinu hjá mér ;)
Búin að fá gremjuútrás í bili...

Till next...adios

Einkunnir

Jæja, var víst búin að lofa að setja inn einkunnirnar mínar, og ég verð víst að standa við það! Ég ákvað að setja líka inn meðaleinkunn úr áföngunum, svona til að þið sjáið hvernig ég stend mig miðað við hina (þetta er aðallega gert í þeirri vona að lægstu einkunnirnar líti ekki eins illa út)...hehe: Njótið vel ;)

Hugmyndasaga: 5,5 (meðal eink. 5,7)
Vinnulag í hug-og félagsvísindum: 6,5 (meðal eink. 6,7)
Inngangur að þjóðfélagsfræði: 7 (meðal eink. 7,1)
Iðnbylting og hnattvæðing: 8,5 (meðal eink. 7,1)
Myndfræði og myndnotkun í fjölmiðlum: 9 (meðal eink.8,6)

Svona lítur þetta út sem sé...ég er a.m.k ánægð með að hafa náð öllu í fyrstu atrennu og án þess að gera eins og sumir sem mættu ekki í próf, fengu vottorð og mættu í upptökupróf, svona til þess að hafa rúman mánuð til að lesa meira! Það var sko ekki rassgat að þessu fólki! Veit um a.m.k 4 sem gerðu þetta í hugmyndasögunni...mér finnst þetta næstum jafnast á við svindl. En ég hef góða samvisku yfir því sem ég hef gert í skólanum, mætti kanski vera aðeins duglegri að lesa stundum (oft) en það stendur til bóta :)

Nú hljóta námslánin að fara að detta inn eftir helgi, eins líka gott, því að vextirnir á yfirdrættinum í bankanum (sem eru þó skaplegri en "venjulegir" yfirdráttarvextir) eru komnir upp í 15%! Mér reiknast svo til að bankinn sé búinn að draga um 20.000kr. af lánunum mínum í vexti fram að áramótum....svo bætast náttúrulega við þessir 14 dagar sem liðið hafa af þessu ári...þetta er óforskammað og ég skil hreinlega ekkert í þessum fleirihundruðogfimmtíu námsmönnum sem hafa endalaust látið bjóða sér þetta. Námslánakerfið er eins úrelt og vídeótæki!

Heilsan er að batna, hef nú samt ekki farið út fyrir dyr í dag, og ætla mér ekki að gera það. Stefni bara á að verða full hress fyrir kl.10:55 í fyrramálið og mæta þá í tíma. Það bjargaði mínu heilsufari annars alveg í gær að ég fann einhver rótsterk verkjalyf inn í skáp, eitthvað sem ég hafði fengið þegar endajaxlarnir voru dregnir úr mér fyrir tæpum 2 árum síðan! Töflurnar voru að vísu örlítið útrunnar, en ég tók sjensinn og skellti smá í mig og gat eldað kvöldmat og skammast í strákunum...í kvöld ætla ég hinsvegar að panta einhvern mat utan úr bæ...kanski austurlenskan ;)

Till next...adios

Ææ mig aumar...og leiðrétting

Best að byrja á því að leiðrétta smá villu síðan í gær, miðillinn sem ég er orðinn blaðamaður hjá er inn á slóðinni: http://landpostur.is sem sagt ekki með greini eins og ég skrifaði greinilega í gær...
Ég hef aðeins þá afsökun að ég hlýt að hafa verið að byrja að verða veik þegar ég skrifaði þetta...það heltist nefnilega yfir mig lasleiki í gærkveldi, næstum því bara allt í einu. Kanski komin með pestina sem Kristján fékk fyrir jól, ég var bara svo lengi að fatta að hann smitaði mig ;/
Annars er þetta óþverra pest, hræðilegur hausverkur, hræðileg hálsbólga, hræðilegir beinverkir og sfrv. mér er bara alls staðar illt ! Svo er heldur ekki mikill friður til að fá að vera veikur í friði hér á þessu heimili. Skæl skæl...ætla að skríða aftur í rúmið.

Till next...adios

Blaðamaður

Jamm, það tilkynnist hér með að ég er orðinn blaðamaður hjá "landpóstinum" (landposturinn.is). Þar mun ég koma til með að skrifa fréttir og pistla inn tvisvar í viku a.m.k. Var nefnilega að byrja í áfanga í dag sem heitir "Inngangur að fjölmiðlafræði" og það virðist vera svolítið meira en bara inngangur, því við eigum að halda úti fréttavef og bæði senda inn fréttir/pistla og ritstýra og gera verkefni og taka próf...og lesa helling (dýru bókina t.d). Þessir áfangar sem eru byrjaðir þessa önnina eru rosa spennandi, en virðast vera algerlega yfirfullir af verkefnavinnu! Og þá meina ég verkefnaskil minnst einu sinni í viku, stundum oftar.
Ég er byrjuð í :
Inngangur að fjölmiðlafræði
Afbygging 20.aldar (sem er kennt á ensku, prófað á ensku og verkefnaskil á ensku) það sem bjargar þessum áfanga að við erum með hryllilega skemmtilegan kennara af Ítölskum ættum. Og
Upplýsingarýni
Svo byrja eftir helgi:
Siðfræði og álitamál
Félagsvísindatorg II og
List og fagurfræði (ef ég fæ að skrá mig í það, ekki búin að fá svar)
og svo er kennt í lotu í mars og apríl
Ljósvakamiðlun (sem Sigrún Stefánsdóttir kennir)
That´s all folks ;)

Þegar ég kom heim úr skólanum rétt eftir hádegið í dag, þá blasti ekki við mér fögur sjón, aftur hafði stýflast niðurfallið inni í þvottahúsi og allt á floti! Flætt bæði inn í geymslu hjá mér og inn í eldhús (í gegnum vegginn). Svo ég var lengi vel að "drullusokkast" í niðurfallinu og setti líka stýfluleysi, vona að það virki. Samt finnst mér þetta skrýtið að það stýflast svona allt í einu. Ég þvoði tvær vélar í gær og það kom ekki dropi uppúr niðurfallinu og bennti ekkert til þess að það væri að stýflast. Svo setja turtildúfurnar uppi greinilega í vél í morgun (vatnið var sko ennþá volgt á gólfinu) og fara og allt fer á flot! Spurning hvort þau eru með sement í vösunum...hummm! Þetta er a.m.k ansi pirrandi.
Jæja, held ég sé búin að blogga nóg í dag, svo enn verður sagan af "álögum vondu nornarinnar" að bíða.

Till next...adios

Skóli á ný

Þá er skólinn byrjaður aftur. Reyndar var mjög stuttur dagur í dag, búin fyrir kl.10 í morgun ;) Fór svo heim og byrjaði að taka niður jólaskrautið, er ekki alveg búin en þetta kemur.
Svo fór ég að kaupa skólabækur, keypti 4 bækur af 12 sem ég þarf að nota núna á vorönn og þessar 4 bækur náðu nú samt að kosta rúmar 15.000 kr. !!! Ein bókin bar nú samt alveg af í verði og kostaði 6.500 kallinn, svo hún hleypti nú verðinu dálítið upp. Annars voru 3 bækur ekki fáanlegar (og ég fór nú að vona að þær fáist bara ekkert ef þær verða jafn dýrar og hinar;) 3 bækur keypti ég notaðar (og ekkert búin að borga þær neitt) og 2 bækur átti ég fyrir. Svo núna er ég að veða nokkuð klár fyrir skólann :)
Annars var voða gaman að byrja aftur og hitta skemmtilega ruglaða fólkið sem er með mér í bekk, við stóðum alveg í klukkutíma fyrir utan skólann og kjöftuðum :)
Svo fékk ég einkunn fyrir ritgerðina mína í Iðnbyltingu og hnattvæðingu, en hún var um þjóðfélagsþróun á Íslandi frá 1850-1950, helstu breytingar og svoleiðis, og ég fékk 9 í einkunn! :)
En lokaeinkunnin í áfanganum er ennþá ekki komin inn, svo námslánin og einkannalistinn minn hér á blogginu verða að bíða ögn enn...
Annars skrifaði ég skrifstofustjóranum mínum tölvupóst áðan og spurði hvort ég gæti ekki skráð mig í auka val fag, þá tek ég 17 einingar á vorönninni, en hvað hefur maður svo sem annað að gera ;) hehehe...

Jæja, ætla að láta duga að fjalla um skólamál mín í dag, læt pistilinn um "álög vondu nornarinnar" bíða til morguns.
Veðrið er geggjað og ég gæti hneggjað af gleði :)

Till next...adios

Afmæli

Já, hann Þórður bró á afmæli í dag...veit ekki alveg hvort hann vill láta aldur síns getið, en það eru tvö ár síðan hann varð fertugur ;) Til hamingju með afmælið :) Ég velti því reyndar fyrir mér í gær, að ef hann hefði fæðst einum degi fyrr þá hefði hann eflaust orðið frægur söngvari, a.m.k. voru bæði Elvis Presley og David Bowie fæddir í gær...eða þar að segja 8.jan. Já, einn dagur getur skipt sköpum ;)
Nú byrjar skólinn á morgun, eldsnemma kl.8:10 gott að ég er í æfingu að vakna snemma ;) Svo þarf ég að fara í bæinn og kaupa bækur. Nennti því ekki í dag, varla tekið hart á því svona fyrsta daginn...veit meira að segja af einni sem keypti sér engar bækur á síðustu önn, hún fékk þær bara á bókasafninu! Enda í sálfræði....;) þar sem skrítna fólkið á heima ;) hehehe...bara grín!

Stundum er ég voða voða lengi að hugsa og taka ákvarðanir, aðallega þó í sambandi við einhver smámál. Núna er ég t.d búin að taka þá ákvörðun að drífa mig í líkamsrækt,(er búin að hugsa um það síðan í haust sko) nota stutta daga í skólanum til þess að henda mér í ræktina og vera búin að því áður en að strákarnir koma heim úr skólanum! Gott plan ha. En núna get ég ómögulega ákveðið mig hvert er nú best að fara í ræktina! Það eru heilar 3 líkamsræktarstöðvar sem koma til greina. Ein er stutt frá og hefur mjög góð tæki, en er víst frekar lítil og illa loftræst. Önnur er ekkert mjög langt frá og er ný og flott og dýr, með heitan pott á þakinu. Þriðja er líka nýleg, flott með heita potta, góðan anda og félagsstarf, en er lengst út í þorpi. Svo nú er ég bara að hugsa og hugsa, og alveg spurning hvort ég verð búin að taka ákvörðun þegar vorar...

Till next...adios

Jólin búin

Þá eru jólinn liðin og ég orðin löt að blogga aftur...hehe ;)
Nei, ætla nú að reyna að standa mig eitthvað í þessu, bara mikið að gera hjá mér, vinna og fá gesti :)
Nú á ég BARA eftir að fá inn eina einkunn, og það verður nú gaman þegar ég get sett inn allar einkunnirnar mína hér á bloggið, ykkur til gleði og ánægju. Þær góðu til ánægju og þær lélegu til að hlæja að ;) hehe...hvað geri ég ekki fyrir ykkur???
Reyndar verður ennþá skemmtilegra þegar allar einkunnirnar verða komnar inn og ég fer að fara að fá námslánin mín ;) mér óar sá peningur sem bankinn hirðir af mér í vexti! Það á náttúrulega að breyta þessu námslánakerfi í hvelli, og gera þar með bönkum aðeins erfiðara um vik við að féfletta fátæka námsmenn, nóg gera þeir nú af því samt!
Ég redda þessu þegar ég kemst inn á þing,...eða verð forseti :)
Fór reyndar að velta því fyrir mér í dag, af því að nú fara launin að hækka næstu mánaðarmót, að þessar launahækkanir eru kanski ekkert svo voða sniðugar, því það hækkar bara allt annað um því sem það nemur, og oft gott betur en það!
Ég væri alveg til í að halda bara ágætis launum og halda verði á matvöru og öðrum nauðsynjum í lágmarki. Nógu voru þeir nú snöggir að láta lækkaðan virðisauka renna í ranga vasa. Ég er sko farin að borga alveg það sama fyrir innkaupakörfuna mína núna og ég gerði fyrir ári síðan...og sennilega bara meira en það.
Og hvaða glóra er í því þegar sumir eru með 100.000 kr. í mánaðarlaun þegar aðrir eru með 10.000.000 kr.??? Ekki að ég öfundist neitt út í "ríkisbubbana", á alveg nóg fyrir mig og mína, mér bara finnst þetta svo asnalegt. Það eru náttúrulega sjálfstæðisbúbbarnir sem eru búnir að einkavæða allt og hrinda af stað þessum ógurlega launamismun!!! Og SVEI- attan Dabbi stýrivaxtastjóri!!! Hóflegur launamismunur og lægra vöruverð, then we are talking ;)
Ja hérna, ég bara komin út í kjaramálin...isss, alveg hætt því núna. Ætlaði reyndar aðeins að tala um skólamálin! Það eru nefnilega skólaviðtöl í skólanum hjá strákunum á morgun, og ég fékk að vita í gær hvernær ég á að mæta með Mikael og í dag hvernær ég á að mæta með Kristján! Vei, þetta eru nú aldeilis snillingar í skipulagningu. Samt var skipulagsdagur hjá þeim rétt fyrir jólin ;) hehe...Og ef mér reiknast rétt þá hef ég 0 min til að hlaupa á milli viðtala!
Og Kristján boðaður í viðtal hjá umsjónakennaranum sem hann hætti að hafa fyrir rúmum mánuði síðan! Sennilega vill hún ekki sleppa af honum hendinni. Reyndar væri ég líka til í að sleppa þessu viðtali með Kristjáni, þessi kella minnir mann nefnilega svolítið á fuglahræðu, maður veit ekki alveg hvort maður á að óttast hana eða bara hlæja...svo ég er næstum jafn stressuð og Kristján ;)

Jæja, best að undirbúa sig andlega og fara bara að sofa :)

Till next...adios

Þrettándinn

Jæja, ég held bara að ég hafi haft það af að blogga alla dagana frá því að fyrsti jólasveinninn kom og þar til sá síðasti fór....nema einn dag! Ætla nú samt ekki að halda því fram að þetta hafi allt saman verið "gáfumannahjal" eða eitthvað, en þið verðið að taka viljann fyrir verkið ;)
Núna meira að segja er klukkan bara 5 min í tólf, en ég var staðráðin í því að ná þessum degi líka!
Þetta verður samt stutt...vinna á morgun og svona.
Ég gleymdi að minnast á það að ég eignaðist forláta sófa núna rétt um daginn, föstudaginn sennilega, var rétt búinn að fá hann í hús þegar Árni bró, Sigga Lára mág. Gyða frænk. og mamma komu í mat til mín :)
En þetta er þvílíka djásnið, leður-hornsófi dökk grænn og sér varla á honum :) Ég er alveg ofsalega ánægð þegar gott fólk sem ég þekki kaupir sér nýja hluti og eftirlætur mér þá "gömlu" :o)
Enda var gamli sófinn minn orðinn meira en lítið ljótur, slitinn og búinn að þjóna sínu hlutverki ! Held ég hafi keypt hann fyrir 15 árum síðan, í Augsýn (sem er löööööngu hætt) og þá kostaði hann 90.000 kr. sem ég greiddi í þrennu lagi. Mætti bara á staðinn og borgaði einu sinni í mánuði, ekkert skuldabréf eða Vísa rað kjaftæði, bara traust og staðið við sitt :)

Hætt og farin að sofa, hafið það gott og hagið ykkur fallega :)

Till next...adios

Tólfti í jólum

Búin að vera á leiðinni til að blogga í allan dag, og haft mikið að segja og mikið verið að hugsa... en núna loksins þegar ég kem því í verk, þá man ég bara ekkert hvað ég ætlaði að röfla um!

Er loksins komin með einkunn fyrir rolluritgerðina mína, hún var nú ekki há, en ég náði samt ;) fékk 5,5 isss, er alveg fullviss um að það var bara vegna þess að sá eða sú sem fór yfir ritgerðina hefur ekki haft hundsvit á íslensku sauðkindinni...og eflaust ekki þótt hún nógu "fræðileg". Það verður gaman að fá hana til baka þegar skólinn byrjar ;) Það er nú samt ekki búið að henda inn lokaeinkunn fyrir mann úr þessum áfanga, svo mig vantar ennþá 2 lokaeinkunnir. Hef nú samt sterklega á tilfinningunni að ég fái 6 eða 6,5 í þessum vinnulagsáfanga.

Ég fór með strákana í göngutúr í dag, og lét þá LABBA (ekki hjóla) og það virðist hafa borið einhvern árangur því að Mikael sofnaði kl.21:00 eða yfir "laugardagslögunum" ég lái honum það reyndar ekki...og þegar ég var farin að njóta kyrrðarinnar á heimilinu, dásama það hvað hann sofnaði nú snemma og sest niður við tövluna til að skrifa þetta þá var kallað: "MAMMA"! Og kappinn kominn á fætur og heimtar að fara í tölvuna! Tók það nú reyndar ekki í mál og er á leiðinni til að koma honum í rúmið aftur! Nú er stefnan að reka þá með harðri hendi á fætur kl.9 í fyrramálið! Ég skal koma réttu róli á liðið með góður eða illu!

Það var eitthvað partý á efrihæðinni í gærkveldi, en samt ekkert sem hélt fyrir manni vöku (það er svona þegar maður fer seint að sofa, þá er erfitt að halda fyrir manni vöku) en svo hélt það greinilega áfram um hádegisbilið í dag, þegar SingStar hefur verið dregið fram með tilheyrandi hávaða. Já, ég get bara með góðu móti ekki kallað þetta söng, sem ég heyrði óma hér í gegnum steinsteypuna...söng hæfileikarnir virðast liggja á sama stigi og píanó hæfileikarnir...hehe.

Jæja, verð að koma kappanum aftur í rúmið á meðan að hann er ekki full vaknaður, ef það gerist þá verður ekki farið að sofa fyrr en eftir 2 ;)

Till next...adios