Hitt og þetta

Það er ýmislegt að gera um þessar mundir. Ég fór í gær og prufaði í fyrsta skipi að hlaupa með "hlaupahóp", það var mæting hjá Bjargi og hópurinn taldi nú ekki nema 7 þegar upp var staðið, og hætti alveg að vera hópur hálfri mínútu eftir að lagt var af stað. En þetta var fínt og farið í pottinn á eftir. Gerir manni eflaust gott að hlaupa í hóp annað slagið.
Síðan kíkkaði ég á "djass" tónleika um kvöldið, þar vour "Siggi og söfnuðinn" að spila, en það er Siggi Ingimars (betur þekktur sem Siggi Kapteinn eftir X-faktor þættina) og flinkir spilamenn með honum. Var alveg ljómandi að sitja í rólegheitum með bjór í hönd eftir hlaupin ;)
Svo settist ég niður við verkefnavinnu þegar ég kom heim um ellefu leitið, þurfti nefnilega að skila af mér verkefni í morgun. Enda laggði ég mig aðeins þegar skólinn var búinn í dag ;)

Svo er ég að fara í bíó á eftir, að sjá mynd sem kvikmyndaklúbbur Akureyrar (Kvik Yndi) er að fara að sýna.
Einnig er sprellmót háskólans í kvöld, söngvakeppni í Sjallanum og fleira, það er spurning hvort einhver orka verður eftir þá ;)
Einnig spurning um hvort að strákarnir fari nokkuð að gleyma hvernig mamma þeirra lítur út...hummm

Kristján minn á svo afmæli á morgun :) að verða 14 ára kappinn! Eitthvað verður nú af hormónaflæði hérna þá, þar sem hann ætlar að bjóða nokkrum gelgjum í afmælið sitt.
Annars er Kristján að verða svo mikið gelgja (ekki samt á neikvæðan hátt), hann er bara svo fullur af tilfinningum (hormónum) sem hann er ekkert að vita hvað hann á að gera við, svo hann fær kjökurköst, kuldaköst og er almennt í "miklu uppnámi" þessa dagana. En það góða við þetta er að hann er alltaf að faðma mig í tíma og ótíma, nokkuð sem hann hefur ekki viljað gera síðustu ár ;) Lifi gelgjan :)

Lét plata mig til að vera með í stuttverki sem verður sýnt í Borgarleikhúsinu 6.okt. En þá verður stuttverkahátíðin "Margt Smátt", og vil ég nota tækifærið til að hvetja alla til að mæta og horfa og hafa gaman að. Við erum með þátt sem heitir: "hlé" og er bara mjög skemmtilegur :) Gerist í hlé-i inn í búníngsherbergi í áhugaleikhúsi.

Er farin í bíó, á danska mynd sem ég man ekki hvað heitir....

Til next...adios

Ljómandi

Jæja, þá er sláturgerð haustsins búin í bili (á reyndar eftir að búa til eitthvað meira af lifrarpylsu en það verður ekkert strax) og er það alveg ljómandi gott :) Manni líður eitthvað svo skemmtilega húsmóðurlega þegar maður er að gera slátur, þótt ég borði nú ekki mikið af þessu sjálf, en ég er að passa kólesterólið og Kristján er matvandur ;) en það er gott að smakka slátur einstaka sinnum.

Mont dagsins: ég fékk út úr fyrsta verkefninu mínu í dag, en það var verkefni um ritun og ritstuld, ég átti sem sé að endurskrifa grein án þess að ritstela. Og þar sem ég þjáist af of miklum heiðarleika og gjörsneidd þeim hæfileika að stela ;) þá fékk ég 9 fyrir verkefnið :) Svo vona ég bara að framhaldið verði bara svipað ;) hehe, hope!

Held að ég hafi hlotið varnalegan skaða af stungu geitungsins þarna um daginn, er ennþá með talsverð ummerki á fætinum og hef það á tilfinningunni að það gæti bara stórt stykki dottið úr fætinum á hverri stundu! Geitungar eru a.m.k orðnir enemies nr.one!!! Ekki það að ég hafi átt óvini fyrir, ekki sem ég veit um a.m.k ;)

Svo var fyrsti fundur nýrrar stjórnar Freyvangsleikhússins sl. miðvikud.kv. þar endaði ég í að verða vara-formaður, sem átti að vera nokkurs konar "sárabætur" fyrir það að vera eina konan í stjórninni. Það virðist enginn fatta það að mér líkar það bara alls ekki illa, :) en það verður bara fínt ef þeir halda áfram að fara með mig sem prinsessu ;) hehe, sem er reyndar MJÖG ólíklegt.
En það er hellingur framundan hjá leikfélaginu, einþáttungahátíð í Borgarleikhúsinu í byrjun okt. Kabarett í byrjun nóv. reyna að gera eitthvað fyrir afmæli Freyvangs og svo ákveða leikrit fyrir veturinn....allt á fullu :)
Áhugasamir lesendur sem vilja vera með eru velkomnir :)

Ég er örlítið farin að geta klórað mig í gegnum Karl Marx og Saint-Simone og Auguste Comte og Tourqueville, og á eflaust eftir að skrifa góðan pistil um kenningar þeirra og fleira, kanski bara marga pistla, hehe....er að fara í próf á mánudaginn um þá kappa og það gildir 30% af lokaeinkunn, svo það er eins gott að vita eitthvað!

Þreytt þreytt....Mikael sofnaður í sófanum við hliðina á mér, ætla að koma okkur báðum í rúmið og skipað gæti ég Kristjáni væri mér hlýtt ;)

Till next...adios

Misskilningur

Held ég hafi misskilið námstækni-námskeiðið eitthvað. Hélt að ég gengi þaðan út full af visku, og lærdómsbrautin biði breið og greið...
En á meðan ég er í þessum dagdraumum (sem ku víst vera eitt af þessum þáttum sem trufla námseinbeitingu) þá bara hlaðast upp verkefni og ólesið efni virðist engan endi taka. Nema ég taki mér tak og lesi ;/
Það er líka bara eitthvað svo mikið að gera, námskeið í dag, kindur á morgun og fundur, námskeið á fimmtud. og sennilega sláturgerð á föstudag.
Ég held bara að ég sé á því skeiði að mér finnst allt eitthvað svo yfirþyrmandi og eitthvað.
Svo finnst manni maður vera hálf þroskaheftur þegar maður sér nemanda í næstu sætaröð spila tölvuleik allan tímann, en geta samt spurt gáfulegrar spurningar um efnið.....Halló! Ég á nú bara fullt í fangi að fylgjast með og glósa í leiðinni! En ég hugga mig við að að þetta hljóti að vera fólk sem á sér ekkert líf utan lærdóms, sem getur leift sér svona lagað. Greinilega búið að liggja yfir námsefninu í viku fyrir tímann.
Best að hætta að væla og gera eitthvað.
Það var samt eitthvað annað sem ég ætlaði að blogga um, get bara enganvegin munað það...

Till next...adios

Tíminn

Þá er þetta komið löglegt og staðfest: 58:13 tíminn minn í Akureyrarhlaupinu í gær :)
Ég er nokkuð ánægð með þetta, bætti mig um ca. 5 min. síðan í Reykjavíkurmaraþoninu :) og algerlega án þess að hafa verið dugleg að æfa mig! Sem segir mér bara það að með aðeins meiri æfingu ætti ég að geta bætt mig um nokkrar mínútur í viðbót :)
Langaði bara að deila þessu með ykkur :) vissi að þið biðuð rosalega spennt eftir tímanum ;)
Ætla að demba mér í hann Karl Marx og reyna að lesa eitthvað fyrir þjóðfélagsfræði-tímann á morgun ;) er vooooooða dugleg að finna mér eitthvað annað að gera....hummm.

Till next...adios

Akureyrarhlaupið

Það hafðist, ég hljóp 10 km. í Akureyrarhlaupinu undir 1 klst. :) Er ekki með tímann alveg á hreinu, en bíð spennt eftir "löglegum" úrslitum.
Það var samt ekki eins gaman að hlaupa í þessu hlaupi eins og Reykjavíkurmaraþoninu, þar var rosa stemming og fjör alla leiðina. Hérna voru frekar fáir, og maður var nú bara næstum einn í heiminum að hlaupa. Fór samt fram úr einum kalli í restina, og það var voða gaman :) sérstaklega af því að hann hafði farið fram úr mér 2 km. fyrir endamarkið ;) sökkvi !
Í skólanum er alltaf jafn gaman, og alltaf jafn mikið að gera... tókst samt að skila ritgerðinni minni og halda 5 min fyrirlestur um hana. Og ég var náttúrulega fyrst í að halda fyrirlestur. En það var líka bara fínt, nú get ég slakað á og hlegið að hinum sem eiga þetta eftir :)
Jæja, ég hef ekki mikla orku í að skrifa meira núna, ætla aðeins að leggja mig, svo verður pizza og leti í kvöld. Fór í Hagkaup áðan og keypti fullt af Amerísku ógeði handa strákunum, svo þeir eru sælir að horfa á vídeó og borða jukk....

Till next...adios

Stund milli stríða

Fyrirlesturinn sem ég var á áðan, var ekki eins lengi og ég hélt, svo ég ætla bara að nota þennan "auka" tíma sem ég "græddi" til þess að blogga smá ;)
Er nefnilega að fara á aðalfund Freyvangsleikhússins eftir klukkutíma eða svo, svo ég ætla að biðja ykkur lesendur góðir að lesa hratt og drífa ykkur í Freyvang ;)
Það er búið að rigna og rigna og rigna í allan dag, en það hlýtur nú að fara að klárast vatnið þarna uppi! Svo sá ég áðan, þegar ég var á leiðinni heim, að það er búið að SNJÓA í fjöllin! Eins gott að það voru göngur síðustu helgi en ekki næstu ;) En ég er annars að fara að hlaupa 10 km í Akureyrarhlaupinu á laugardaginn og það verður ekkert spes ef veðrið verður eins og veðurspáin spáir. En það ku víst eiga að slyddast eitthvað og svo á líka að bresta á einhver stormur í kvöld og nótt!!!
Jæja, það var nú ekki meiningin að láta bloggið mitt líta út eins og heimasíða veðurstofu íslands. Hummm.... Ég á að skila ritgerðinni minni um Bókina um veginn á morgun, gúlp, á líka að halda fyrirlestur um hana fyrir hina í bekknum. Svo nú verð ég að reyna að rifja upp einhverja leikræna takta, verst hvað það er langt síðan að ég hef þurft að leika eitthvað...hef aðallega verið að leika mér ;)
Það er leikur í sjónvarpinu, Ísland-N.Írland, sem ég sé reyndar ekki lengur, því að allt í einu kom drengur og þá eins og hendi væri veifað voru Tommi og Jenni byrjaðir að berja hvorum öðrum. Já, og bætevei Ísl. gerði jafntefli við Spán um daginn 1-1 og ég sem hafði spáð 0-6 fyrir Spán! En sennilega hefur bara eitthvað slegið saman í hausnum á mér og ég ruglað þeim leik saman við leikinn í dag, svo ég spái Írum sigri á Ísl. 6-0
Finnst ég finna brunalykt berast úr eldhúsinu....hvað ætli ég sé að elda? Er rokin í rokið.

Till next...adios

Nemendur

Nemendur háskólanns virðöast jafn misjafnir og þeir eru margir. Reyndar hefur mér þótt það fólk sem ég hef kynnst hingað til, vera afbragðs fólk (þá er ég náttúrulega sérstaklega að tala um minn bekk). En það er ferlega fyndið að fylgjast með tölvuskjánum hjá sumum á meðan á tímum stendur. Í einum tíma um daginn var ein að endurraða kökuuppskriftunum sínum, var komin að jólakökum síðast þegar ég leit á skjáinn hjá henni (þessi kella var sko ábyggilega þó nokkrum árum eldri en ég sko) svo var ein í tíma í dag, sem pikkaði og pikkaði og maður fór að hugsa hvað þessi væri voða dugleg að glósa...en þá var hún bara á msn! Svo virðist fólk vera að skoða hinar ýmsu netsíður í tímum. Kanski er það bara ég sem er svona treg að ég þarf sko að fylgjast með í tímum. Þykir bara verst að þegar tímar eru í Oddfellow húsinu, þá er engin leið að komast í kaffi, og þá getur stundum verið hörku vinna að halda augunum opin í 5 tíma í röð! Var ánægð þegar einn spurði í dag, hvort það væri ekki möguleiki að fá kaffivél í húsið ;)
Jæja, ég hef annars ekkert að viti að segja í dag, og veit því ekki afhverju ég er að bulla þetta, er ennþá þreytt eftir helgina og með einhvern ótætis hausverk og hálf sloj....harðneita samt að fara eitthvað að veikjast. Má sko ekkert vera að því næstu 3 árin ;)

Kvöldmaturinn eldar sig vist ekki sjálfur...

Till next...adios

Réttir

Í fréttum er réttir helst ;) Já, það voru sko réttir í dag, og þá frekar tvær en ein! Byrjaði á því að fara á Þverárrétt, þar sem engin gekk af göflunum ,(eins og í fyrra)allt fór bara rólega fram.Undarlegt nokk! Við áttum þarna einar 46 kindur (give or take one or two) og tróðum þeim í kerrur og bíla og brunuðum með það heim. Svo var gert matarstopp í sveitinni, bæði borðaður hefðbundinn matur, en einnig gúffað í sig helling af perutertu, sem Alla mágkona var svo góð að skella á í tilefni dagsins. Bæði mamma og Steinar Logi áttu sem sé afmæli í dag :)
Svo var brunað austur á bóginn og farið í Illugastaðarrétt. Þar áttum við sko 122 kindur og svo tókum við líka úrtíninginn frá hinum E-bæjunum, svo þetta var alveg á tvo stóra bíla. Reyndar keyrði sami bíllinn tvær ferðir (eða ökumaðurinn keyrði bílinn), og við (við=ég, Sverrir, Pálmi og Imma) lékum okkur bara í fótbolta/körfubolta á meðan við biðum milli bíla. Svo ég var bara að koma heim rétt fyrir kl.22:00 henti mér í sturtu og strákunum líka (ekki öllum í einu samt) og svo var liðið bara drifið í rúmið....ekki seinna vænna, skóli á morgun! Svo núna er ég bara að hlaða fartölvuna fyrir morgundaginn, þess vegna ákvað ég að nota tækifærið og blogga smá. Ætla samt að láta þetta duga, er hálf aum í fingrunum og höndunum eftir alla drættina í dag...hummm ég er sem sagt búin að stunda frjárdrátt í allan dag! :/ Ekki láta vita afþessu.

Till next...adios

Göngur

Jæja, þá eru 1.göngur búnar þetta árið. Hefur bara sjaldan gengið svona vel, og ærnar runnu bara glaðar í bragði heim á leið, sumar reyndar drifu sig bara beint niðrá tún og virtust ekki taka eftir hliði sem var í vegi þeirra. Það var brakandi blíða og sól og það hefði ekki getað verið mikið betra. Það lítur reyndar ekki eins vel út með veður fyrir réttirnar á morgun, og nú þegar komin hellidemba ;/ maður verður bara að vona það besta. Ef það verður rigning þá kanski verður fólkið í réttunum bara aðeins rólegra....en stundum virðast sumir missa sig dálítið mikið....nefni engin nöfn ;)Vona bara að það verði engin börn hrædd í réttunum þetta árið eins og í fyrra....og þau voru sko víst ekki hrædd við kindurnar!
Íslendingar eru yfir í leik við spánverja 1-0 sem verður að teljast ansi merkilegt. En það er náttúrulega allt á floti, og spánverjar varla vanir svona mikili rigningu ;) Það er nú líka bara hálfleikur, svo við spyrjum að leikslokum.
Horfi í leikhléi á umdeilda "símaauglýsingu" ekki að ég sé neitt viðkvæm fyrir þessu "Jesú-Júdas" símtali, en finnst frekar að þeir ættu að lækka símreikninginn hjá manni heldur en að eyða peningunum í þessa vitleysu! Ég er nú reyndar hjá Vodafone....sem fer nú reyndar að vera spurning hvort er skárra (eða verra fyrirtæki, þetta eru bæði okurbúllur með lágmarksþjónustu, Vodafone samt skárra núna að mér finnst) en maður þarf samt alltaf að borga "fastagjaldið" til símans, því að þeir eiga dreifikerfið! Talandi um okurbúllueinkafyrirtæki- sem þrífast svona líka ljómandi vel undir handarkrika sjálfstæiðsflokksins....fuss og svei! Leikurinn er víst að byrja aftur, best að fara að horfa í von um að sjá annað mark.....hjá íslendingum :)

Till next...adios

Leiðrétting

Ég er farin að þurfa að leiðrétta prentvillur hjá mér....hummm eða þá bara það að ég er stundum ekkert mikið að hugsa um hvað ég er að skrifa.
Ritgerðin mín um Bókina um veginn á nefnilega ekkert að vera 1800 bls. heldur 1800 orð, og það er víst talsverður munur á þessu. Sem betur fer þarf ég ekki ennþá að gera 1800 bls. ritgerðir ;)
Annars er ég nánast búin með ritgerðina, fer bara eftir því hvað yfir-yfirlesarinn segir um gripinn. Hvort ég þarf að laga og endurbæta frá grunni.
Fór í smá smölunaræfingu í sveitina í dag, náðum nú samt um 70 skjátum, sem er nú bara ágætis æfing ;) Svo verða alvöru göngurnar á morgun og svo réttir á sunnudaginn. Fullt að gera.
Þyrfti svo að fara að drífa mig með bílinn minn í skoðun, gamla grána minn, þarf bara að finna einhvern sem kann að stoppa í gat á hljóðkútnum, er ekki alveg viss um að þeir hleypi mér i gegn um skoðun með gat...á pústinu sko. Veit það dugar ekkert að koma uppstrílaður og brosa sætt til þessara kalla hjá skoðunarapparatinu, svo maður verður víst að reyna að láta laga gripinn :)
Jæja, ætli ég reyni ekki að þýða nokkrar blaðsíður úr The Discovery of Society fyrir svefninn, Karl Marx, það er nú ekki til mikið betra svefnmeðal en blessaðar skólabækurnar ;)
Hafið það gott krúttin mín...

Till next...adios

Námstækni

Þar sem ég er að gera sjálfa mig brjálaða á skipulagsleysi mínu, bæði varðandi nám og annað, (ætla ekki einu sinni að nefna skúringar hálfu orði núna) þá hef ég tekið þá ákvörðun að splæsa á sjálfa mig námskeiði í námstækni.
Hefur samt hvarflað að mér hvernig ég á að hafa tíma til þess að fara á þetta blessaða námskeið, sem er í tvær vikur, tvo daga í hvorri viku og tvo tíma í hvert skipti ! En það verður bara að láta vaða!
Ég fór að iðrast afskaplega pirrings-skrifa minna eftir að ég tók til við lestur "bókarinnar um veginn". Þetta er þvílíkt snilldar rit. Speki alveg út í gegn, og ef mannfólkið gæti tileinkað sér, þótt ekki væri nema lítð brot, að þessari speki, þá væri nú gaman að lifa.
Auðvitað er þetta ekkert nema siðfræði, hvernig þú átt að koma fram við aðra og sjálfan þig svo að allir geti verið happý for the rest.......en það er bara eitthvað svo magnað að lesa þetta.
Fyrir utan það að gaurinn sem skrifaði þetta hann Lao-Tse var fæddur 300-400 árum fyrir Krist. Það er víst eitthvað á reiki með hvenær hann var uppi, svona eins og margt annað frá þessum tíma ;) Sumt minnti nú óneytanlega á ýmislegt úr Biblíunni, datt stundum í hug að Biblían væri "lengri" útgáfan af Bókinni um veginn, en maður lætur nú ekkert svoleiðis út úr sér ;)
Svo núna þarf ég bara að skrifa 1800 bls.ritgerð um gripinn fyrir fimmtud. í næstu viku....það- hlýtur að reddast, verð líka byrjuð á námstækninámskeiðinu þá og hef eflaust nógan tíma ;)
Háskólinn á Akureyri á afmæli í dag :) er sko orðinn 20 ára gamall, við fengum köku og kók í tilefni dagsins :)
Fór með Vælir í geldingu í dag. Núna liggur greiið aðallega fyrir, en ef hann reynir að labba er eins og hann sé blyndfullur.....og við hlægjum eins og svín! Óskup er maður vondur, klippir á æxlunarfærin á ræfilinum og hlær svo bara að honum.
Usss, ætla að fara út að skokka og reyna að losa mig við samviskubitið.
Svo les ég aftur Bókina um vegin og íhuga aðeins.

Till next...adios

Ands.....

Já, nú er ég bara hætt að vera jákvæð og væmin í þessum bloggskrifum mínum!
Enda allir hættir að nenna að kommenta...set það í beint samhengi.
Bara samt frekar stutt útrásfyrirgremjuna-blogg núna, áður en ég sökkvi mér niður í lestur: "Bókin um veginn" verður lesin í tætlur (sem er nú reyndar ekki erfitt, því gamalt var og lasburða eintakið sem Amtið átti til handa mér), svo verður farið í tvær aðrar skruddur á enskri tungu sem ég er eitthvað að dragast afturúr í lestir með...hummm.
En þá er það pirringurinn! Sko! Í fyrsta lagi (og það varðar bókina um veginn) þá er skítt að það er bara ein fokking bókabúð á Akureyri! Amtsbókasafnið átti bara eldri útáfuna af bókinni, sem var bætheivei gefin út 1971, en ég sem betur fer ákvað nú að taka hana, en kaupa jafnframt nýrri útgáfuna. Á nefnilega að skila ritgerð um þessa merku bók eftir 10 daga.....Svo ég ók sem leið lá í Pennan/Eymundsson og leitaði lengi vel. Ákvað svo loks að spyrja um gripinn, en þá var hún barasta ekki til! Og hafði víst ekki verið til lengi....og var ekkert á leiðinni að vera til!
Svo er maður líka búinn að heyra það að þó nokkur hópur fólks hefur enn ekki getað keypt allar skólabækurnar, af því að þær eru ekki til. Svona fer þegar það er engin samkeppni í gangi, þjónustan verður algert frat! Fuss og svei!
Svo er ég að verða nett brjáluð út af bílastæðum við heimili mitt. Ef ég ákveð að vera svo "góð" að keyra strákana í skólann á morgnanan (sem oftast er nú bara Mikael, Kristján vill frekar labba, en maður er ennþá í þeim pakkanurm að Mikael sé litla barnið sem þarf að stjana við frá morgni til kvölds.....eins gott að hann er í skóla;) en já, hvert var ég komin..., já einmitt, þegar ég er búin að keyra upp í skóla, og þarf ekki strax í minn skóla (eins og t.d núna í morgun) þá eru bara öll bílastæðin orðin full af óhræsis bílum, sem ég hef grun um að tilheyri að stórum hluta starfsfólki leikskólans. Svo annað hvort þarf ég að leggja leeeeeeeeeeeeengst í burtu og labba gríðarlega vegalengd heim, eða bara halda áfram að keyra! Já, mér finnst þetta fúlt, og svo er líka fólk sem á heima hinu megin við götuna sem leggur þarna . Ótrúlegt hvað heimurinn snýst gegn mér;)
Svo annað pirr; það eru ennþá gular ljótar heysátur á víð og dreyf um garðinn, ein meira að segja ofaná stéttinni sem ég geng um á leið minni inn. Svo er fólkið á eftri hæðinni búið að planta hjólinu sínu fyrir framan dyrnar hjá mér, sko inni í húsinu! Stundum verð ég bara svo gáttuð á tillitsleysi og yfirgangi í fólki að ég get bara ekki sagt eitt einasta orð!
En þá bara blogga ég um það og fæ smá útrás.
Enn annað pirr; kettirnir tveir eru að gera mig nett brjálaða, þeir eru tekinir upp á þeim óskunda að færa mér ánamaðka í tíma og ótíma! Koma og skella þessum flykkjum útötuðum í mold, á stofugólfið hjá mér og brosa!
Stundum á morgnana (sérstaklega ef það hefur verið rigning) þá liggja 4-5 stykki hálf þornuð á gólfinu frammi á gangi.
Auglýsi hér með eftir laxveiðimanni sem vantar duglega ormatínara! Læt þá fyrir lítið fé, bæði ketti og orma ;)

Till next...adios

Tíðindalítið

af vesturvígstöðunum....
Ég verð að segja að ég held að ég sé ótrúlega heppin með bekkjarfélaga. Þetta eru bara þvílíku perlurnar :)
Við sátum nokkrar inn í matsal í morgun, eftir tíma, og ætluðum að tala eitthvað um námið. En þetta endaði í endalausum samræðum um allt milli himins og jarðar. Bæði unglingadrykkju, agaleysi á krökkukm og prump kvennfólks ;)
Alger snilld :)
En námsefnið hleðst upp, þarf að lesa eina bók og skila ritgerð um hana eftir 2 vikur.
Annars held ég að ég ætti að hætta að kvarta og reyna heldur að gera eitthvað. ;)
Var alveg uppfull af visku áðan og ætlaði að bogga helling af skemmti/gáfu-efni, en hef svo bara verið á hlaupum og allt það gáfulega dottið út úr hausnum á mér.
Er að fara að vinna í fyrramálið svo það er kanski bara best að koma sér í rúmið og blogga bara seinna þegar ég hef eitthvað til málanna að leggja. Já, og svo þarf ég að hengja upp mislita þvottinn áður en ég fer að sofa ;)
Það rignir og þar af leiðandi er allt blautt.
Ætla líka að reyna af veikum mætti að fá Kristján til að hætta í tölvunni án þess að brjóta mikið af húsgögnum. ;)

Till next...adios

Bara eitthvað

Ekki langt í dag, er þreytt og svo líka pínu þreytt og á eftir að hengja upp þvottinn :/
Er að gera mér aðeins betur grein fyrir því að ég þarf sennilega að skipuleggja mig örlítið betur, og helst sem fyrst...
Hef enn ekki litið í skólabók, (búin að kaupa þær allar samt) og virðist alltaf finna mér nóg að gera. Hef samt ekki skúrað eða lagað til síðan nýnemavikan hófst (hummm, þetta eru kanski staðreyndir sem maður á ekki að segja frá í bloggi) .
Fór aðeins út að skokka í dag (nú er sko meiningin að taka þátt í Akureyrarhlaupinu og hlaupa 10 km. á innan við 60 min) en mikið óskup var ég nú eitthvað þung á mér. Enda ekkert skokkað í rúma viku (bara drukkið bjór og aðrar svipaðar veigar).
En ég finn nú samt að þetta er voða gott fyrir mann,að hlaupa sko, sérstaklega þegar maður situr svona mikið á rassinum allan daginn.
Jæja, ætla að athuga hvort þvottavélin sé búin að þvo hvíta þvottinn minn, sá misliti verður víst að biða til morguns...eins og ýmislegt fleira ;)
Hafið það rosagott, og takk fyrir kommentin krúttin mín ;) gaman að vera lesinn, þótt ég sé sjálf ekki vel lesin ;)

Till next...adios

Hremmingar

Ég lenti í alveg ógurlegum hremmingum í gærkveldi!
Þetta er frekar óhugnarleg saga, svo að viðkvæmir eru beðnir að lesa ekki lengra og fá sér heldur bók eftir Stefan King að lesa!
Það byrjaði allt frekar sakleysislega, svona venjulegt kvöld, strákarnir skruppu út á leikvöll og ég lét fara vel um mig í sófanum og ætlaði jafnvel að glugga í skólabók.
En þar sem ég hálf ligg í sófanum finn ég allt í einu eins og eitthvað sé að skríða upp fótlegginn á mér undir buxnaskálminni!
Mér fannst þetta að sjálfsögðu óþægilegt og hristi fótinn og dusta skálmina (læddist að mér sá grunur að kónguló hefði hætt sér full nálægt mér) en finn ég þá ekki þennan hroðalega sársauka í fætinum. Eins og hnífur væri rekinn á kaf í fótinn og snúið í sárinu. Og það hætti ekkert að vera vont! Sá ég þá ekki hálfdauðan geitung velta glottandi undan skálminni. Á þessum tímapunkti var ég ánægð með að strákarnir voru á leikvellinum, því sennilega hafa þeir ekki heyrt mömmu sína segja "shitt, fokk, andsk"....og s.frv. jafn oft á stuttum tíma.Ég reyndi að kreista eitthvað út úr stungusárinu en ekkert gekk. Sá fyrir mér hvernig var alltaf sogið úr sárum eftir bit kvikinda í bíómyndum í gamladaga, en hvernig sem ég reyndi þá náði ég ekki með munninn að leggnum á mér...svo ekki bjargaði það mér að hafa horft á káboj-myndir hér í denn ;)
En ég sturtaði yfir svöðusárið helling af sótthreynsandi, og var næstum búin að sturta í mig restinni af flöskunni. Bara svona til að athuga hvort það virkaði þá ekki fyrr ;) Það hvarflaði að mér að hringja í 112 því að þetta var jú sko sannarlega neyðartilvik, en þar sem einhver kunnugur hefði getað svarað ákvað ég að láta það vera.
En setti svo kaldan klút á sárið og beit á jaxlinn....Strákarnir vorkenndu mér út í eitt, þegar þeir komu inn og ég sagði þeim hvað hafði gerst. Mikael sagði að ég ætti að kaupa vélsög og hann ætlaði sko að saga hausinn af geitungnum í hefndarskini fyrir mig.
Svo bara kvaldist ég það sem eftir var kvöldsins, vældi í sumum í gegnum msn og sms og vil þakka öllum stuðninginn á þessum hryllingstíma. Fékk mér svo verkjatöflu fyrir svefninn og var mun betri í morgun., og núna lítur bara útfyrir að ég haldi fætinum :)
En ég finn samt ennþá öggu-pínu pons til.

Till next...adios

Bilun eða brjálæði?

Púfff, ég veit ekki hvort ég er að verða veik, eða bara svona hrikalega þreytt! Vona nú samt að þetta sé bara þreyta.
Mætti eldsnemma í morgun og fór í "val-fags-leit" þar að segja, ég þurfti að finna mér val-fag, og það virtist ætla að verða þrautin þyngri. Aðallega samt út af því að það er ekki svo margt í boði núna, og það sem er kennt, það stangast endalaust mikið á við stundarskrána mína :/
En kl.08:10 mætti ég í : "Meginþættir í þróunarmálum", sem ég hafði hugsað mér að yrði áhugavert, og tíminn passaði fínt. En fuss og svei, það voru tveir skiptinemar í tímanum (frá Litháen) og þá varð kennslan að fara fram á ensku, og ekki nóg með það, þá voru þetta annars-og þriðja árs nemar, sem virtust vita allt og búnir að nota sumarfríið í að kynna sér málið. Mér fannst sumir bara ætla að bjarga heiminum, stöðva fátækt í Afríku og þótt víða væri leitað ;) Ég var alveg uppgefin eftir að hafa setið þarna í 4 tíma, og var farin að hallast að því að gáfulegra væri að fara í Ítölsku! En ákvað svo að kíkja í tíma í "Myndfræði og myndnotkun í fjölmiðlum" og það virkaði bara svona hrikalega spennandi. Jafnvel þótt að ég hafi komist að því að það er kennt með 3.árs nemum í fjölmiðlafræði. Ekki jafn skerí og hitt ;)
En nóg um það í bili.
ÉG gjörsamlega gleymdi að greina frá þeim merkilega atburði um daginn ,að garðurinn var sleginn! En reyndar var sá galli á gjöf njarðar,. að hann er illa sleginn, og ennþá hey út um allt, bæði í litlum heysátum og einnig á dreif um garðinn....svo þetta er alveg spurnig hvort var skárra..
Einnig finnst mér núna leiðinlegt að búa við hliðina á leikskóla! Agalega geta þessir krakkar haft mikin hávaða!
Jæja, held að ég hætti núna að bulla, og reyni frekar að hvíla mig aðeinsl.

Till next...adios

Brúðkaupið

Jamm, þetta var sko brúðkaupið - með ákveðnum greini ;)
Verð bara að segja það að þetta var með skemmtilegri brúðkaupum/veislum sem ég hef farið í :) með fullri virðingu fyrir þeim brúðkaupum sem ég hef farið í....
Kirkjuathöfnin var náttúrulega voða falleg og skemmtileg, bæði sögðu þau "já" Nonni og Kathleen. Og svo lék skoskur sekkjapípuleikari útgöngumars.
Veðrið var ágætt, pínu kalt í útimyndatökunni, en svo brast bara á með blíðu, og eftir fordrykk og snittur var manni hlýtt að utan sem innan ;)
Það var bara voða gaman að vera aðstoðarveislustjóri, Sverrir reddaði öllu og ég bara var í því að brosa og vera sæt ;) gekk alveg glimrandi vel. Sve stóð sig náttúrulega stórvel sem veislustjóri og svaramannaræðurnar hanns voru bráðskemmtilegar. Enda átti maður nú ekki von á öðru :)
Maturinn var alveg snilld, og svo var alveg bunki að bráðskemmtilegu fólki mætt á svæðið.
Ég man ekki alveg hvað klukkan var þegar ég skreið í sumarbústaðinn sem ég hafði afnot af, en eftir að maður er búinn að sitja á barnum nokkra tíma og reyna að finna upp á nýjum og nýjum drykkjum til að prufa, þá er eins og tímaskinið fari eitthvað á skjön ;)
Var að reyna að rifja upp drykkju dagsins/kvöldsins og röðin var eitthvað á þessa leið:
Hvítvín, beylis líkjör, kampavín, hvítvín, rauðvín, skot (man ekki hvaða tegund) white russian, fjórfaldur beylís líkjör og svo rauðvín í restina.
Heilsan hjá mér í dag hefur verið frekar döpur, en ég náði þó að keyra heim skammlaust og skíða upp í sófa seinnipartinn, þar sem ég hef dvalið síðan...en núna ætla ég að rífa mig upp úr sófanum og koma mér í rúmið. Enda skóli hjá allri fjölskyldunni á morgun :)

Till next...adios

Hamrar

Jæja, nú er ég sko opinberlega orðin háskólanemi, og farin að haga mér sem slíkur.
Var með þennan fína kennara í dag, hana Friðbjörgu, og hún kenndi mér að "fara á flóa" sem þýðir að kaupa sér "háskólaföt" á lítin pening á flóamarkaði hjálpræðahersins.
Ég held bara að ég hafi verið orðin upprennandi "flóa-kelling" í restina.:)
Svo að launum fyrir kennsluna, þá fór ég með hana á Glerártorg og kenndi henni að eyða peningum í vitleysu og sannfæra sjálfan sig um að þetta sé eitthvað sem er nauðsinlegt að eiga;)
Af því að ég er svo góð!
Svo var háskóladjamm á útivistasvæðinu að Hömrum frá 2-5 í dag, þar var farið í leiki og keppt í mörgum erfiðum þrautum. Og ég held að liðið mitt hafi verið laaaaaang síðast, en það var nú bara vegna þess að ég var með svo miklum kelllllingum í liði! Líka eina liðið sem hafði engan karlmann innanborðs, samt var skipt í lið! Story of my life :)
Jæja, nú er Nonni bró að fara að ganga í það heilaga á morgun, ég vona bara að hann sé jafn rólegur og ég...er að reyna að koma mér af stað að ná í buxur sem var verið að stytta fyrir mig. 'Svo vona ég bara að föt strákanna séu sæmilega hrein og einhversstaðar þar sem ég finn þau. En ég hef nógan tíma til að vesenast í því.
Ætla að trimma eftir buxunum núna, fá mér einn Kalda og fara að sofa ;) geri svo allt sem ég hef ekki nennt að gera í dag, á morgun ;)

Till next...adios

Hikk

Já, góðir hálsar...nú er sko háskólalífið byrjað fyrir fullri alvöru.
Það var pizza og bjór í boði nemendafélagsins á Parken í kvöld, og ég, eins og sannur íslendingur, lét ekki mitt eftir liggja....gjörsamlega tróð í mig pizzum og frönskum og þambaði svo bjór eins og lindarvatn.
Er nú kanski aðeins að ýkja, en þar sem ég las í blaði um daginn að maður ætti aldrei að fara að sofa undir áhrifum, þá sit ég nú bara hérna og blogga.
Annars er gallinn við svona kvöld, að fólk er að tala voða mikið og voða áhugavert, en það er bara svo mikill hávaði að maður bara kinkar kolli og brosir og þykist heyra allt...en er svo bara engu nær um viðkomandi manneskju!
Annars er ég líka búin að komast að því að það eru MJÖG fáir karlmenn í háskólanum á Ak. það eru nokkrir stráklingar, en svo virðist sem kvenþjóðin sé að hertaka námsbrautir skólanna. Hvernig er með ykkur karlmenn? Ætliði bara að fara að leyfa kellingunum
að ráða öllu???
Áður fyrr mér öðruvísi brá.
Svo er aftur djamm á morgun, í Kjarnaskógi....frá kl.14:00-17:00 og svo aftur eftir kl.20:00!
Hugsa nú að ég verði að sleppa kvölddjamminu, þar sem það ku víst æskilegt að ég mæti í búðkaup morguninn eftir...í sveit mýanna.
Keypti mér prenntara í dag, fór að kaupa skóladót fyrir strákana, og fanst alveg ótækt að kaupa ekkert handa mér ;) svo ég greip með mér einn prentara.
Svo núna get ég prenntað út hin ýmsu eitthvað...finn eitthvað út úr því, get amk prentað sem ég hef ekki getað leeeeengi.
P.s ég er ekki ennþá búin að komast að þessu með Pálma Gunnarsson, og ég bíð alveg rooooosalega spennt eftir mánudeginum :)
En fyrst; brúðkaup og djamm.....og ekkert endilega í þessari röð ;)

Till next...adios

Sulta

Ég keypti mér blandaða berjasultu um daginn, og er að verða búin með meira en hálfa krukkuna! Hún er bara svo þvílíkt góð, sérstaklega með camenbert-osti og bruðum ;)
Ég kom hundblaut úr grillinu í skólanum í dag, reyndar var ekki bara grill, heldur líka ratleikur sem mitt lið, sem var númer 6, skíttapaði í :)
Annars var þetta fínt, hlaupa úti í rigningunni (þá kom sér nú vel að vera nýbúinn að halupa 10km í Rvk.) og borða grillaðar pylsur á eftir.
Svei mér þá ef ég kann ekki bara vel við mig í skólanum.
Svo er maður strax farinn að segja: "jess, það er bara eftir hádegi á morgun", sem er kanski ekki eins gott, að tileinka sér leti strax á nýnemavikunni, og lærdómurinn sjálfur ekki einusinni byrjaður!
En ég get nú afsakað mig með því, að tæknilega er ég ennþá í sumarfríi :) svo það má bara segja að ég sé dálítið dugleg að vera í skóla í sumarfríinu mínu :) hehe

Till next...adios

Skólinn

Þá er ég byrjuð í skólanum.
Var voða fengin að sjá að ég var sko bara alls ekki elst í bekknum mínum! ;)
Komst svo að því í dag (þegar við þessar "gömlu" vorum á "trúnó") að ein er jafn gömul mér, ein ári yngri, ein 44 ára og svo náttúrulega líka 21 og 22 ára skvísur...svo hef ég ekki komist að aldrinum á fleirum. Enda skiptir það svo sem engu máli heldur, væri alveg slétt sama þótt ég væri elst. Svo eru heldur ekki allir mættir í bekkinn, svo ég er ekki ennþá búin að komast að því hvort hinn skráði Pálmi Gunnarsson (sem er á bekkjarlistanum) sé hinn eini sanni gleðibanka-gjafi, eða bara einhver venjulegur maður ;)
Það væri rosalegt ef hinn eini sanni Pálmi Gunnarsson yrði með mér i bekk!!! Ég er sko nefnilega búin að halda upp á hann síðan ég man eftir mér, og ég var sko pottþétt á því að Gleðibankinn myndi gersamlega rústa Eurovision þarna í denn. En þótt að vonbrygðin yrðu mikil þarna um árið, þá myndi það lækna gömul sár að vera með goðinu í bekk ;)
Annars gekk allt á afturfótunum hjá mér í dag. Það var kynning á tölvukerfinu í morgun, og allir sátu við tölvu og fóru eftir því sem kennarinn sagði. En mín tölva, hún virkaði náttúrulega bara ekki! Svo hann þurfti að restarta henni og voða vesen, allir að bíða eftir mér...hummm
Jæja, svo var smá pása og við fórum nokkur og fengum okkur kaffi, sem hljómar nú sakleysislega. Nei, þá tókst mér sko að sulla kaffinu mínu út um allt, samt búin að setja svona take-away lok á glasið!
Fall er fararheill...sagði ein og ég vona sko sannarlega að það sé rétt.
Svo þurfti ég að fara með báða strákana í viðtöl í skólann, svo ég hef mest verið á hlaupum í dag. Svo er ég að fara á eftir í grillveislu upp í skóla í rigningunni ;)
Og rosalega skrifa ég alltaf mikið af sko-um og svo-um þegar ég er að blogga.....hummm
Ætla að fara og finna regngallann ;)

Till next...adios

Reykjavíkurmaraþonið

Það eru komin staðfest úrslit :
Ég var nr. 1769 og hljóp á: 1:03:52
2799 keppendur tóku þátt í 10 km. hlaupinu svo að ég hef hlaupið hraðar en 1030 manns, sem er ekki svo slæmt ;)
Annars var nú líka meiningin að taka þátt og hafa gaman af þessu, en ekki reyna að vera eitthvað súper framarlega. En það er bara plús að ganga vel :)
Það var líka heitið á mig, og fyrir hlaupin mín (og gjafmildi góðmenna) þá fá ADHD samtökin 5.000 kr. Og þar með er ég búin að gera góðverk ársins ;)
Annars vcrð ég að segja það, að það kom mér á óvart hvað ég hafði hrikalega gaman að þessu. Stemningin í kringum þetta allt og bara allt! Rosa gaman, og ég var alveg hrikalega ánægð eftir þetta. Svo er það bara Akureyrarmaraþonið næst ;)
Núna getur Árni bró hætt að efast um að ég hafi hlaupið...getur sko bara farið inn á marathon.is og flett mér upp :)
Reykjavíkur ferðin var bara fín, kíkti aðeins á tímamótatónleikana á Laugardalsvelli á föstud.kv. Nælon var að spila þegar maður gekk inn í mannhafið...svo bara fjölgaði eftir það.
Fínir tónleikar, nema síðasta hljómsveitin...Stuðmenn. Ég veit hreinlega ekki hvort ég vorkenndi meira, áhorfendunum að hlusta á þessi óskup, eða Stuðmönnum að vera svona gjörsamlega misheppnaðir! Yfirgaf hryllingin í snatri, eins og flestir aðrir.
Allt hitt fínt. Bubbi mjög góður, náði upp svaka góðri stemningu. Todmobile fín, greinilega gert þeim báðum gott, Andreu að fá sér nýjar tennur og Eyþóri að fara í meðferð ;) voru bara bæði sæt og fín...og kunna sko að spila og syngja.
Það skemmtilegasta við svona tónleika, er að maður getur sungið hástöfum með hljómsveitunum án þess að nokkur heyri í manni ;) svo ég er búin að fá þessa fínu útrás fyrir söngþörf mína í bili :)
Svo var maður náttúrulega eins og prinsessa hjá þeim Árna og Siggu Láru, ekki amalegt að vera í gistingu hjá þeim. Takk kærlega fyrir mig :)
Hugsa að ég skrifi aðeins meira um suðurferðina næst, eins og laugarvegsferðina mína og fleiri skemmtileg atvik...
En núna er ég þreytt eftir allan aksturinn í dag (ekki hlaupin, sei sei nei), svo ég bið ykkur vel að lifa.

Till next...adios

Fréttir eða ekki fréttir

Bara örstutt, ætlaði bara að kyssa nýju tölvuna góða nótt, og ákvað að skrifa þá nokkrar línur í leiðinni ;)
Ég fór í klippingu og litun í gær og svo í lit og plokk í dag, svo það er ekki víst að það þekki mig nokkur sála eftir þessa yfirhalningu. En ég lét þó bótoxið í friði ;)
Skokkað aðeins í dag, í ca.50 min. ætla svo bara að slappa af fram að maraþoninu. Eins gott að standa sig þar, þar sem að ég er búin að fá tvö áheit :)
Er svo að bruna af stað til Reykjavíkurborgar seinnipartinn á morgun. Við Kristján förum bara tvö, því að Alla mágkona ætlar að vera svo góð að hafa Mikael tvær nætur og svo verður hann í sveitinni eina nótt :) Verður eflaust gaman fyrir alla aðila ;)
Verður fínt að hafa smá tíma til að dúllast í Reykjavík.
Planið var að kaupa sér fullt af fötum fyrir komandi skólaár, en þar sem ég eyddi öllum peningunum mínum í tölvu, þá verður víst minna af því...nema ég fari bara á Herinn ;)
En ég get líka örugglega fundið mér eitthvað uppbyggilegara að gera í Rvk. heldur en að eyða peningum í föt ;)

Till next...adios

Nýja fartölvan :)

O já, þið lásuð rétt, nú er ég búin að fjárfesta fyrir lausafé heimilisins, en er orðin fartölvu ríkari. Varð bara að blogga aðeins og segja frá því.
Þetta er skínandi hvít DELL tölva og mér finnst hún flott, sem er nú samt kanski ekki aðalatriðið, heldur að hún virki vel :)
Ég er amk búin að hafa það af að tengjast þráðlaust netinu :)
Er bara meira tækniundur en ég hélt...

Afmælisveislan fyrir Nonna bró gekk bara ljómandi vel, mikið etið og talað.
Svo er gaurinn að fara að gifta sig eftir 2 vikur svo það er skammt stórra högga á milli hjá honum!

Ég sókti um 20-30% vinnu hjá mínum gamla vinnustað, en stjórn FSA leggst gegn því að ég verði ráðin í þá stöðu, veit ekki hvort það er persónulegt eða...hummm, finnst það ansk... skítt eftir 16 ára starf.
En ég er sem sagt á lausu í íhlaupavinnu að ýmsu tagi, vantar smá vinnu með skólanum, svona til að eiga fyrir salti í grautinn og saft út á líka ;)
Kanski líka bara best að kúpla sig alveg út úr þessu....
Ætla amk ekki að bögga mig á því, heldur horfa bjartsýn fram á veginn og hlakka til skóladaga :)

Og svona rétt í lokin, ef einhver skyldi hafa misst af því.....MÉR FINNST NÝJA FARTÖLVAN MÍN FLOTT :)

Till next...adios

Fertugsafmæli :)

Ekki mitt nei, svona til að fyrirbyggja allan misskilning!



Hann á afmæli í dag

hann á afmæli í dag

hann á afmæli hann Nonni

hann á afmæli í dag :)



Jibbí,klapp klapp....og s.frv.



Jamm, hann Nonni bróðir er fertugur í dag....ótrúlegt en satt :)

Til hamingju með afmælið Nonni :)



Ætla ekki að hafa þetta lengra núna, þar sem ég er á leiðinni í sveitina í grillveislu í tilefni afmælisins :)

Skrifa kanski fréttir af veisluhöldum í kvöld, ef ég ét ekki yfir mig ;)

Till next...adios

Sunnudagsmorgun

Ok, kanski ekki alveg morgunn, þar sem klukkan er að nálgast 13:00 en það er, til þess að gera, svo stutt síðan að ég drattaðist á fætur að mér finnst ennþá vera morgunn.
Fór að skokka í gær og fyrradag líka.
Hlýt að hafa Reykjavíkurmaraþonið af ;) Það er samt enginn búinn að heita á mig ennþá!
Ég veit ekki hvort fólk hefur svona litla trú á mér, eða vill bara nota peninginn sinn í eitthvað gáfulegra ;) og þá er það bara allt í lagi.
Var reyndar að hugsa um að gáfulegra hefði verið að láta fólk heita beint á mig, sem sagt, ef ég hleyp 10 km. þá borgar fólk bara mér beint, í staðin fyrir að forrík félög hljóti góðs af.
Frekar þá ég, bláfátækur námsmaðurinn ;)

Fór á stúfana á föstudaginn og lét panta fyrir mig fartölvu.
Hún kemur sennilega norður á mánudag-þriðjudag...þetta er DELL tölva og vona ég bara hið besta.
Svo þarf ég líklega að kaupa nýtt lyklaborð á þennan tölvugarm, space-bar takkinn er nánast hættur að virka, svo núna þarf ég virkilega að hafa fyrir því að hafa bil á milli orða!
Þarf sko að ýta á sérstakan stað á takkanum til að hann virki. Ekki gaman!

Hann Mikael minn er að verða tannlaus ;) hehe...það bara hrynja úr honum tennurnar núna, búinn að missa eina framtönn að neðan og báðar framtennurnar uppi! Og þetta hefur bara hrunið úr honum á 2 vikum eða svo. Enda tannálfurinn verði tíður gestur á heimilinu ;)
Reyndar missti hann eina tönn í gær og sagðist bara vilja eiga hana, ætlar sko ekki að gefa tannálfinum fleiri tennur!
Jafnvel þótt hann fái pening fyrir...svo hann er búinn að læra það að peningar skipta ekki öllu máli í þessu lífi ;) Og það gott að hann er búinn að átta sig á því :)

Till next...adios

Púfff

Ég kom heim fyrir u.þ.b. 2 klst. síðan og síðan er ég búin að liggja á meltunni og rymja ógurlega!

Forsagan að því er löng og talsvert merkileg.

Þannig var því nefnilega háttað að ég vaknaði eldsnemma í morgun eða rúmlega 9:00 eða ca.9:29 nánar tiltekið.
Fór með Bollu í saumatöku (sem á mannamáli þýðir að ég lét taka saumana úr sígjótandi-kisunni sem ég er að passa, en nú gýtur hún ekki meir...múhahahaha, mikið er vald mannsins!)
og svo fór ég og skráði Mikael í vistun í skólanum (kræst hvað krakkinn er orðinn gamall, að byrja í skóla og alles!) og svo hjólaði ég með honum í íþróttaskólann. (ætti kanski að hætta að hafa alltaf þessa sviga inn á milli? hummm).
Þegar öllu þessu var lokið, þá keypti ég kartöflusekk og brunaði í sveitina. Nú átti sko að taka á því og rusla inn nokkrum böggum. (Nokkuð mörgum böggum)
Og það gerði ég, með smá hjálp frá Sverrir bró. (skrifað í von um að hann sé ekkert að lesa bloggið mitt...usss)
Þegar ég kom heim um kl.17:06 þá fann ég ekki nokkra löngun hjá mér til að standa í eldamennsku, og strákarnir fundu ekki neina löngun hjá sér til að borða það sem ég bauð þeim uppá (ég sagði: hvort viljið þið soðin fisk eða koma með mér á Greifann?).

Svo það varð úr að fjölskyldan labbaði niður Þórunnarstrætið og inn á Greifann.
Þar var sko tekið á því við átið...ostafylltar tortillaflögur í forrétt, karmellukjúklingur í aðalrétt og swiss-mokka í eftirrétt :) Og þetta er bara það sem ég borðaði ;)

Ég rétt svo gat dragnast upp Þórunnarstrætið og hent mér niður við fréttaáhorf.
Verð reyndar að geta þess að áður en að swiss-mokkanu kom, þá höfðu strákarnir gefist upp og fóru bara á undan mér heim!
Ps. ég var bara að plata þegar ég sagði í upphafi að forsagan að þessu væri merkileg ;)

Till next...adios

Annir

Það er mikið að gera á stóru heimili....og sérstaklega þegar maður nennir ekki á fætur fyrr en fer að halla í hádegið.
Verð að reyna að fara fyrr að sofa (og reka strákana fyrr í rúmið) og drífa mig á fætur fyrr, dagurinn var nærri hálfnaður þegar ég skreið á fætur um kl.10:30 í morgun.
En ég bætti það upp með því að fara út að skokka (eftir laaaaaangt hlé) þegar ég var búin að hjóla með Mikael í íþróttaskólann. Ætlaði svo að plata Kristján með mér í sund, en þá var klukkan orðin alltíeinu svo margt að ég bara slappaði af þar til að ég sótti Mikael aftur.
Svo var stefnan sett á sveitina þar sem ég fékk að keyra traktor ;) og rakaði dreifar fyrir Sverri.
Það er nú bara skemmtileg tilbreyting að traktorast aðeins :)
Á meðan batt Sverrir slatta af böggum sem meiningin er að ráðast á á morgun og koma undir þak.

Afskaplega er nú annars misjafnt hvað fólk er símavænt.
Ég þurfti að hringja í LÍN í dag;"lánasjóður íslenskra námsmanna" sagði stelpurödd þurrlega.
Ég bauð kurteislega góðan dag, og sagði til nafns, en fékk engin viðbrögð. Var nærri búin að segja "HALLÓ er örugglega einhver þarna" en var nokkuð viss um að stelpugreiið sem svaraði væri ennþá á hinum enda línunnar, svo ég bar upp erindið. "Ég gef þér samband við Rannveigu" sagði röddin á hinum endanum og ég gat ekki einu sinni sagt "takk" því það upphófst svona sónnn-bil-sónn-bil í þó nokkurn tíma.
Svo svaraði hún Rannveig, og þar var allt annað uppi á teningnum, eftir að hún var búin að leysa úr mínum málum var bara farið að spjalla, um hvað bankaábyrgð á lánunum væri há! Hún reiknaði það út að fyrir einn vetur væri bankinn að taka rúman 35.000 kr. bara í þóknun fyrir þessa bankaábyrgð. Ég sagði að það væri nú hægt að gera ýmislegt skemmtilegra fyrir þann pening, og þá sagði hún (sem mér fannst svolítið gaman) "já, það er t.d hægt að kaupa sér í matinn fyrir þetta í heila viku" Þá sagði ég nú bara af minni alkunnu hógværð: "ja, ég hugsa að maður gæti nú keypt í matinn í meira en viku fyrir þessa upphæð". "Já, kanski ef maður er rosalega útsjónarsamur" sagði hún þá.
Stuttu seinna þakkaði ég henni fyrir góða þjónustu og kvaddi.
En það sem mér fannst spaugilegt við þetta, er að ég efast um að stór hluti þjóðarinnar hafi þessa upphæð úr að moða til matarkaupa á viku!
Eða er ég svona skrítin?
35.000 kr. á viku er ca.140.000 kr. á mánuði. Og það er nú ekki mikið meira sem ég er að fá útborgað á mánuði. Þá er eftir að borga þetta vanalega, húsaleigu, hita, rafmagn, síma og sfrv.
Hummm....greinilega eru launin betri í Rvk. En það er skemmtilegra að vera snöggur á milli staða í staðin ;)

Till next...adios

Matur...

Ef ég hef léttst um svo mikið sem 1-2 kg. á þessum hlaupum mínum undanfarið, þá eru þau sko komin til baka og ríflega það ;)
Ekki að það hafi verið meiningin að léttast neitt, er bara ánægð með þyngd mína. En ég var aðeins búin að fá ábendingu um það að borða nú vel fyrst ég væri að þessum hlaupum.
Nú hef ég aldrei átt í vandræðum með að borða :) ég etið á við meðal hval ef svo ber undir, og ekki hafa nú hlaupin dregið neitt úr matarlystinni.
En þess síðustu 5 daga sem ég hef ekki hreift mig neitt (sökum veikinda að sjálfsögðu) hef ég etið sem aldrei fyrr! Ég bara hef nánast hangið í ísskápnum og nammi nammi namm...
Ég hélt að ég hefði gert innkaup fyrir rúma viku sl. föstudag, en þurfti aftur í búð í dag!
Kanski enda þessi hlaup mín með því að ég hleyp í spik ;)

Allt annað; ég sá í sjónvarpinu í kvöld tvo stjóra og fattaði þar með allt í einu að mér finnst afskaplega leiðinlegt að sjá þessa stjóra á skjánum, veit ekki endilega afhverju, kanski bara öfund...en þessir stjórar eru bæjarstjórinn á Akureyri (æ greiið kemur bara ekki vel fyrir) og borgarstjórinn í Reykjavík (æ greiið er bara eitthvað svo ömurlegur).
Kanski er ég alveg úti að aka, fór bara allt í einu að spá í þessu, finnst að þetta fólk ætti að hafa talsmann-eða svona fjölmiðlafulltrúa, sem kemur fram fyrir þess hönd, svona eins og flugleiðir eða fjarðarál...
Jæja, what ever....
Fattaði allt í einu í dag, að ég á bara fullt af ónotuðu áfengi síðan síðustu helgi ;)
Spurning hvort maður detti eitthvað í djammgírinn á næstu mánuðum.
Annars fara næstu helgar að verða ansi þétt bókaðar, næsta helgi reyndar nokkuð stapil, bara afmælis-grill fyrir Nonna fertuga (múhahahaha) bróðir minn á mánudaginn.
Helgina þar á eftir er Reykjavíkurmaraþon, þar á eftir ætlar Nonni fertugi að gifta sig og svo þarf ég kanski að vinna og svo koma göngur og réttir og svo og svo og svo...kræst, það verða komin jól áður en ég veit af.

Till next...adios

Skárri...

en verri.
Eitthvað er nú heilsufarið að lagast, enda ekkert ball í kvöld. Verslunarmannahelgin að renna sitt skeið á enda. Og fólk að skríða heim á leið.
Nema ég, ég skríð bara heima ;)
Hálsinn er skárri, en eitthvað er kvefið að aukast. Verð að reyna að hlaupa þetta úr mér...
Nú hafa náttúrulega 3 dýrmætir skokkdagar farið forgörðum, hugsa líka að það sé gáfulegast að halda sig heima við í dag.
Þarf líklega að byrja æfingarprógrammið alveg upp á nýtt....kanski líka að semja eitthvað æfingaprógramm ;)
Það var þessi fína flugeldasýning í gærkveldi. Ég stóð dúðuð við útidyrnar og fylgdist með, fékk þó smjörþefinn (eða púðurreikinn) af verslunarmannahelginni.

Tíminn æðir áfram, og ég sem ætlaði að gera svoooooo margt í sumarfríinu, er ekki búin að koma nokkrum hlut í verk.
En jæja, Mikael fer í íþróttaskólann hálfan daginn næstu 2 vikurnar, og þá verður sko tekið á því, skúrað, skrúbbað, rifið út úr skápum og skúffum, hennt og brennt!
Nema ég finni mér eitthvað annað að gera...sem eru þó nokkrar líkur á. Enda nóg að skúra gólfið og sjá svo til með rest ;)

Till next...adios

Stutt

Þetta verður stutt blogg í dag.
Eins og glöggir lesendur tóku eftir, þá bloggaði ég ekki neitt í gær, sem er mjög skrítið.
En það átti sínar ástæður. Ég var lasin :( og er það enn...
Ekkert svo sem fárveik, en svona slöpp slöpp slöpp veik, pínu hálsbólga, pínu kvef og svoleiðis, en aðallega slen og máttleysi.
Sit nú og drekk te með hunangi og sítrónusafa útí.
Missti af partý í gærkveldi...og tónleikum á föstudkv. Eins gott að ég fór út á fimmtudkv. annars hefði öll helgin verið ónýt! Eða ónýtt ;)
En svona á móti, þá er fínt að nota þessa köldu, blautu daga í það að liggja í sófanum og horfa á vídeó og þamba te.
Gott að ég fór í Bónus á föstudaginn og keypti byrgðir af mat fyrir viku tíma eða svo.
Hélt að skrílslætin í bænum yrðu kanski svo mikil að maður þyrði ekki út úr húsi í nokkra daga.
En bæjarstjórinn(-stjórnin) sá nú fyrir því, jamm, bara banna þessum skríl á aldrinum 18-23 ára að koma til Akureyrar!
Nú var sko tekið fast á hlutunum....kanski líka með þeirri afleiðingu að tiltölulega fáir lögðu leið sína hingað. Ekkert meira að gera hjá löggunni en um venjulega helgi, engin brjáluð læti og allir glaðir, nema verslunarmenn ;) sem missa þarna af því gullna tækifæri að selja drukknum ungmennum vörur og hafa af þeim sumarkaupið.
Kanski ættu nú verslunarmenn bara að taka sér frí þessa helgi.!!! Hætta að hugsa um gróða endalaust. hummm....
Annars finnst mér þetta samt hálf grátlegt að banna vissum aldurshóp að tjalda á tjaldstæðum bæjarins. Sérstaklega þar sem það er mjög lítill hópur sem hefur skemmt fyrir hinum.
Það á bara að taka þessa bjána sem eru með læti, setja þá á svartan lista og banna þeim að fara á útihátíðir ;)
Ég fór nú á nokkrar útihátíðir á þessum aldri 18-23 ára, eða sennilega eina á ári að meðaltali...sennilega bara farið síðast 22 ára en þá fór ég til Vestmannaeyja.
Útihátíðir eru einmitt fyrir þennan aldur 18-23 ára! Mátt fara án foreldra og eftir 23 þá eru margir farnir að búa og eiga börn eða erlendis í háskóla eða eitthvað.
Það er öllum hollt að upplifa að vera á alvöru útihátíð, svona eins og var í Húnaveri í gamla daga. Enda finnst mér að útihátíðir eigi að halda fjarri mannabyggð. Og bjóða sérstaklega velkomin ungmenni á aldrinum 18-23 ára :) Þau eru sko ekki verri en við...nema síður sé ;)

Till next...adios

ýmislegt...

...fer öðruvísi en áætlað var.
Eins og til dæmis í gær. Ég kíkti á kaffihús með Kathleen tilvonandi mágkonu minni, og vandaði mig ósköpin öll við að finna 2 klst. bílastæði, svo ég þyrfti nú ekki að vera í stresskasti. Og það tók tíma, því það var búið að loka af helling af bílastæðum í miðbænum fyrir eitthvað fuck... tívolí!
En ég fann það fyrir rest, meira að segja bakkaði snilldarlega inn í það (er greinilega ekki venjuleg kona, því þær ku víst ekki kunna það) og tölti á Bláu könnuna. Sat þar í fínu yfirlæti, tjatti og kaffi, þar til að ég þurfti að ná í móður mína til læknis. Ég er hálfnuð upp gilið þegar ég sé eitthvað rusl á framrúðunni hjá mér. Shittt! Ég fékk sekt :( Gleymdi að setja bílastæðaklukkuna í gluggann, hún lá bara og brosti í sætinu við hlið mér.
Ég krossbölvaði þessu asnalega kerfi, sem mér hefur annars þótt sniðugt þar til nú.
Mér finnst að fólk megi bara leggja þar sem það vill þegar því langar til þess!
Breyti þessu þegar ég verð bæjarstjóri! Og þar varð ég 1000 kr. fátækari :(
Eftir snatt og snúninga með mömmu, keyrði ég hana í sveitina og svo mig heim aftur.
Fannst þá að ég væri ekki búin að gera neitt af viti, skellti mér í skokkskóna og hljóp (mjöööög hægt, en örugglega) upp að Hömrum og til baka.
Hún Friðbjörg hafði annars sent mér sms þegar ég var að leggja af stað í skokkið, til að spyrja hvort ég hafði áhuga á að fara á Hvanndalsbræður á Græna hattinum.
Auðvitað var ég til í það. Eftir skokkið snaraði ég mat á borðið, hennti mér í sturtu og rölti til Friðbjargar.
Við fengum okkur bjór og röltum svo niður í bæ. Tónleikarnir áttu að byrja kl.21:00 svo okkur fannst nú alveg passlegt að vera þarna hálftíma fyrr. En viti menn...UPPSELT!!!
Þá var víst biðröð langar leiðir og uppselt í forsölu...
Þá voru nú góð ráð dýr, en eftir stutta umhugsun ákváðum við bara að fara á tónleika með Ragnheiði Gröndal í Ketilhúsinu í staðin. Gaman að geta valið úr viðburðum ;)
Og það var bara ljómandi gaman, kanski svolítið mikið öðruvísi stíll en Hvanndalsbræður, en öðruvísi gaman.
Var líka gaman að vakna í morgun hress og spræk, en ekki jafn gaman að sjá allt út í fiðri og dauðan þröst á gólfinu!
Og ennþá minna gaman að komast að því að allt var komið á flot í þvottahúsinu og geymslunni minni :(
Var að henda út drasli fram eftir degi. t.d gömlum myndum og fötum, allt haugrennandi!
En ég lagaði þó til í geymslunni fyrir vikið :)

Till next...adios

Bjartsýni eða brjálæði?

Góðan dag gott fólk.
Ég var vöknuð eldsnemma í morgun (á undan börnum og vekjaraklukku er MJÖG snemma) og ákvað að lesa örlítið af þessum 15 kg sem ég fékk á bókasafninu.
Þá reyndar rann á mig mikil syfja aftur, rétt mátulega ætlaði ég að leggja mig aftur, þegar Mikael vaknaði. Og þá var nú ekki aftur snúið í rúmið...
Drattaðist á fætur, sparkaði tölvunni í gang og í einhverju bjartsýniskasti skráði ég mig í Reykjavíkurmaraþonið 18.ágúst 2007 :)
Fólk getur meira að segja heitið á mig, og þá renna þeir peningar til styrktar ADHD-félaginu.
Ætla nú reyndar "bara" að hlaupa 10 km.
En kanski 21 km á næsta ári ef ég kemst skammlaust frá þessu ;)
Þetta er a.m.k hvatning í þá veru að halda áfram að hreifa sig. Stefni nú ekki á neinn stórsigur, en væri gaman að fá að vita hvað maður skokkar þetta hægt ;)

Svo allt annað; las í blaði í morgun: (rosalega hef ég komið miklu í verk og klukkan ekki orðin 12:)
"Vill skylda Íslendinga á hegðunarnámskeið" Geir Jón Þórisson yfirlögregluþjónn hefur áhyggjur af grófu ofbeldi! - Og þá ekki vaxadni ofbeldi, heldru grófara ofbeldi. Og áhorfendur standa hjá og horfa á og hafa gaman að!!!!! Halló, what´s going on?
Í fyrsta lagi, finnst mér að fólk það sem kallar sig "eðlilegt" eigi að hafa vit á því að haga sér almennilega.
Þá meina ég bara svona atriði sem er ekki erfitt að muna eins og t.d. ekki lemja fólk, ekki segja ljót orði við annað fólk, ekki hrinda fólki eða ergja annað fólk!
Meira að segja þótt fólk sé orðið dauðadrukkið, þá á það ekki að missa það mikið af vitglórunni að það lemji, bíti, hrækji eða ráðist á annað fólk með einum eða öðrum hætti.
Þá er nú bara í góðu lagi að verða fullur og æla í blómabeð í næsta garði. :)
Öll dýrin í skóginum eiga að vera vinir, og afhverju ekki líka fólkið í landinu, eða heiminum ef út í það er farið.
Það er svo margt sem ég ekki skil...sem betur fer.

Till next...adios

1.ágúst

Það var bara með miklum vilja og sjálfsaga að ég gat haldið aftur af mér í dag og sleppt því að æða út í búð og eyða "öllum" barnabótunum mínum í vitleysu.
Þess í stað borgaði ég nokkra reikninga, fór á bókasafnið og fékk mér nægjanlegt lesefni til næstu aldamóta.
Bókalistinn hefur aldrei verið svona "menningarlegur" áður eftir ferð á bókasafnið:

Mannkynssaga - frá miðri nítjándu öld til vorra daga.
Fólk í fjötrum - baráttusaga íslenskrar alþýðu.
Nútímasaga (reyndar gefin út 1985 svo það er spurning hvort hún er nútímaleg...hmmm)
Hnattvæðing og þekkingarþjóðfélag - Ísland í breyttu þjóðfélagsumhverfi 1

Hananú! Svo þykist ég ætla að vera voða dugleg og lesa og reyna að vita eitthvað smá þegar skólinn byrjar. En kanski verður bara ekkert farið út í þetta lesefni, en það hlýtur að nýtast mér á einn eða annan hátt.
Svo aðalástæða þess að ég er að reyna að halda í þessar krónur sem ég fékk í dag, er að ég ætla að fjárfesta í fartölvu fljótlega(hér eftir kallað FFF). Og þá hugsa ég að það sé kanski ekki verra að eiga einhverja greiðslu upp í það.
Annars ætla ég nú ekki að kvarta yfir að hafa ekki fengið fúlgu fjár frá skattinum í dag. Þetta er reyndar í fyrsta skiptið í mörg ár þar sem ég þarf ekki að borga neinn skatt!
Bara dregið af mér eitthvað gjald í framkvæmdarsjóð aldraðra (sem mér skylst að sé aldrei notaður í það sem á að nota hann í) og svo fæ ég restina að barnabótunum.
En þetta er nú kanski afleiðing þess að ég geri skattaskýrsluna mína sjálf, á ekki neitt og skulda næstum ekki neitt...ennþá ;)
En ég sé nú ekkert eftir þessum krónum í ríkiskassann, læt ekki mitt eftir liggja í að halda þessu yndislega landi gangandi :)
Ísland er land mitt....tralalalalalalalala la la...

Till next...adios

Ætlar hann að rigna?

Það er spáð rigningu í dag, en ennþá hangir hann þurr.
Ég er reyndar búin að "bíða eftir" rigningu í nokkra daga, og þá bara til þess að nenna að hanga inni og laga til!
Ætlaði að vera svo dugleg að taka allt í gegn hjá mér í sumarfríinu, en hef þess í stað nánast varla stoppað við innandyra.
Og á meðan hleðst upp skítur og drasl, er alvarlega að spá í að fara með garðhrífuna í herbergið hans Kristjáns og raka bara gólfið og moka í poka.
Sennilega myndi hann sakna nokkra tölvuleikja og blaða, en ég er farin að sakna þess að geta ekki gengið á gólfinu þarna inni hjá honum!

Það var agalegur kaffiþamb-dagur í gær hjá mér.
Ég byrjaði á því að rölta með strákana niður í bæ í góða veðrinu og við fórum á Bláu könnuna og fengum okkur kaffi og kökur ;) þeir fengu sér reyndar gos...
Ætlaði fyrst á bókakaffið í Eymundson, en þar sem þeir eru svo gáfaðir að hafa bara 5 borð, þá er bara nánast alltaf fullt þegar maður rekur nefið þar inn.
En jæja, svo var rölt heim og skömmu síðar fékk ég gesti, og þá var sko kjaftað og drukkið kaffi lengi vel.
Svo um kl.19:00 ákvað ég að þetta gengi ekki svona, og skellti mér í hlaupaskóna.
Skokkaði upp að Hömrum og þar einhvern götuslóða til baka.
Held að ég hafi bara ekki skokkað svona langt áður án þess að stoppa nema einusinni og þá bara gekk ég hratt í smá stund.
Pantaði svo pizzu þegar ég kom heim, skellti mér í sturtu og var bara nokkuð góð. Sofnaði ekki einusinni yfir sjónvarpinu!!!
Þetta er allt að koma :)

Till next...adios

Nýr dagur

Og ný fyrirheit...eða þannig.
Það rættist bara helling úr gærdeginum, svona miðað við nóttina á undan.
Ég og Mikael fórum í langan hjólatúr (Kristján nennti ekki með þar sem hann var með gest) , við hjólumum út í Kjarnaskóg, löbbuðum (ég reyndar reyndi að skokka aðeins) hringinn og hjóluðum svo neðri leiðina til baka. Þ.e.a.s við hjóluðum niður á Drottningarbraut og um innbæinn í miðbæinn og þaðan heim.
Var orðin mjög svöng eftir þetta allt og át allt sem hönd á festi þegar ég kom heim, sem var nú reyndar ekki svo mikið. Þurrar bruður voru alveg príðis góðar :)
Ákvað svo að hafa kvöldmatinn í fyrra fallinu, og dreif mig svo með strákana í bíó.
Eða frekar lét ég undan miklum þrýstingi um að fara með þá í bíó.
Á Simpsons the movie.
Stórkostlegasta fjölskyldumynd allra tíma!
Stóð í dagskránni...hummm, veit ekki alveg hvort ég er sammála. Fannst Harry Potter mun skemmtilegri ;) Fannst líka orðbragðið full gróft stundum miðað við að þetta á að vera fjölskyldumynd. Það er alveg hægt að draga aðeins úr blótsyrðum, a.m., þeim allra grófustu. En það var greinilega ekki gert.
Ég og Mikael fórum á íslensku útgáfuna, en Kristján á enska talið. Ég var nú reyndar mjög ánægð með það að báðar útgáfurnar voru sýndar á sama tíma. Gátum því farið öll saman, þótt við færum ekki í sama salinn.
Bíóið var troðfullt, biðröð í miðasöluna og biðröð í nammisöluna og biðröð inn í salinn. Svo var ekki farið að helypa inn fyrr en 5 min fyrir sýningu, svo maður stóð þarna í kraðakinu í dágóða stund. En svo viti menn, þá var opnað inn í A-salinn (með enska talinu) og það geystust allir þar inn! Ég hugsa að við höfum verið ca.10 sem vorum í B-sal á íslenska talinu.
En það var bara fínt, mér finnst alltaf best í bíó þegar það eru fáir ;)
Ætla nú ekki að fara að leggja mikla dóma á þessa mynd, hef ekki horft það mikið á Simpsons þættina að ég hef ekki mikið vit á þessu.
Ég hló nú kanski tvisvar, þrisvar sinnum, glotti annað slagið en fannst þetta oft á tíðum vera alveg yfirgengilegt rugl!
En strákarnir voru voða sáttir og fanst gaman svo ég sá ekkert eftir þessari bíómyndarferð :)

Er strengjalaus í fótunum í fyrsta sinn í viku!
Er að hugsa um að halda upp á það með því að fara út að skokka seinnipartinn ;)
Sjáum til.
Er reyndar að verða svo skotin í hlaupaskónum mínum að ég gæti næstum bara sofið í þeim, þeir eru svooooooooo þægilegir :)

Till next...adios

Þegar maður heldur...

að allt sé í lagi, þá er það pottþétt ekki!
Eða svoleiðis virðist það a.m.k vera hjá mér.
Alveg merkilegur ands...að þegar manni finnst bara allt ganga vel og er ekkert að hafa miklar áhyggjur af hlutunum, þá fer eitthvað úrskeiðis.
Annars byrjaði gærdagurinn alveg ágætlega. Vann fyrir eina sem þurfti að bregða sér í brúðkaup. Mikael var hjá pabba sínum á Dalvík, og Kristján heima að slæpast að venju.
Ég fékk meira að segja pakka frá vinnufélögunum, af því að ég er að hætta :) og get núna farið á snyrtistofu og látið gera mig sæta ;)
Fannst það alveg æðislegt og er alveg rosalega ánægð með það, gott að eiga svona góða vinnufélaga :)
Svo seinnipartinn hjóluðum við Kristján aðeins um bæðinn og enduðum á Búllunni og fengum okkur rosa góða hamborgara.
Svo um kvöldið rölti ég til vinkonu minnar með smá bjór í poka og við sátum og kjöftuðum um háskólann, karlmenn og margt margt fleira. Rosa fínt, og eins og glöggir lesendur hafa eflaust áttað sig á, þá hafði þetta bara verið hinn ágætasti dagur.
En uppúr miðnætti þá snarbreyttist það.
Fékk hringingu frá pabba hans Mikaels. Hann á það stundum til að hringja í mig þegar hann er með guttann (sem gerist nú reyndar ekki oft) og bulla eitthvað í mér, þykjast hafa verið tekinn fastur fyrir dópsölu og vera með guttann á löggustöðinni, eða að hafa verið meða hann að veiða og hann hafi dottið í sjóinn...eða eitthvað álíka rugl. Og vá hvað mér finnst þetta mikið pirrandi og asnalegt. Og þarna hringdi hann eftir miðnættið og sagði að hann væri í smá vandræðum, það væri þarna kona frá barnaverndarnefnd sem vildi tala við mig og....ég varð frekar pirruð sagði honum að hætta þessu bulli, þetta væri ekkert fyndið og ég væri orðin mjög þreytt á þessum húmor hans!
En hann sagðist ekki vera að bulla og svo kom bara kona í símann og sagðist vera frá barnaverndarnefnd Dalvíkur.
Púfff, mér náttúrulega krossbrá. En þá voru málin þannig að Hafþór hafði farið út á pöbb að kaupa áfengi fyrir sig og einhvern nágranna, og nágranninn var að passa á meðan!
Svo fór nágranninn eitthvað að verða hræddur um að Hafþór kæmi ekkert aftur (greinilega búinn að vera í burtu í góða stund) og hringdi í lögregluna, sem hringdi svo aftur í barnaverndarnefnd sem gekk svo í málið.
Þetta var nú óskup viðkunnaleg kona, sagði að Hafþór væri ekkert rosalega fullur, en það væri greinileg vínlykt af honum og ég þyrfti bara að ákveða hvort hún kæim með strákinn til mín, eða hvort hún ætti bara að skilja þá fegða eftir.
Ég þurfti nú ekki að hugsa mig lengi um, bað hana vinsamlegast að keyra hann til mín, þar sem ég var búin að fá mér bjór (sem betur fer ekki nema 2) þá gæti ég ekki skutlast eftir honum. Þetta var bara minnsta málið, og guttinn var vakinn og ég sagði honum að "góða konan" ætlaði að keyra hann til mín. Svo talaði Hafþór aðeins við mig aftur og sagði að ég gæti "ekki gert sér þetta"! En í minni orðabók þá sá hann nú alveg um að gera sér þetta sjálfur, svo að mér var ekki hnikað nema síður væri!Arg! Þegar þarna var komið við sögu var ég orðin mjög mjög mjög reið.
Svo skokkaði ég heim og beið eftir Mikael. Konan frá "nefndinni" var fín, sagði að það yrðu svo sem engin eftirmáli að þessu, hún þyrfti bara að láta "nefndina" á Akureyri vita að hún hefði keyrt strákinn hingað til mín. Sagði að hann Hafþór hefði ekkert verið "mikið" fullur, en samt svolítið valtur á fótunum þegar hann var að hjálpa Mikael í fötin, og svo hafði hann verið með fullan haldapoka af víni með sér.
Mikael stökk beint í fangið á mér, ég spjallaði svo aðeins við hann og kom honum í rúmið, þar sem hann fór að hágráta og leið mjög illa. Eðlilega skildi hann ekki neitt í neinu. Vonandi hefur Hr.H þótt þetta fyllerí vera þess virði!
Ætla svo ekki að skrifa meira um þetta, gæti þá átt það til að skrifa einhver mjög ljót orð.
Kanski finnst líka einhverjum það vera óviðeigandi af mér að blogga um þetta, en þar sem að ég ætla ekki að taka þátt í neinum feluleik þá, finnst mér líka bara fínt að fá smá útrás og skrifa þetta hér.
Og ef einhver hneikslast; þá bara ekki lesa þetta ;)

Till next...adios

Ááááátakk

Sælt veri fólkið :)
Ég virðist vera mun duglegri að blogga þegar ég er í sumarfríi....hugs...hvernig ætli standi á því?
Ekki það að ég hangi í tölvunni allan daginn, o sei sei nei.
Mín fór nefnilega aftur út að skokka í gær! Út í Kjarna og til baka (verð að taka það fram að ég skokki aftur til baka líka, annast gæti fólk haldið að ég hafi gefist upp og húkkað mér far til baka).
Get sagt ykkur það, að eftir það skokk, þá sögðu fæturnir á mér stöðu sinni lausri, fóru í verkfall og hefðu eflaust flutt að heiman ef þeir væru ekki mjög vel fastir við restina af mér.
Var svo heppin að Mikael sofnaði yfir teiknimynd svo ég skreið bara uppí sófa til hanns og sofanði aðeins með honum. Og þá fyrst gat ég harkað af mér að fara í sturtu og elda kvöldmat.
Fór svo í búð í dag og eignaðist þessa forlátu hlaupaskó :) bara svo ég gefist ekki upp alveg strax ;)
Eflaust spyr sig einhver: "hvað gengur nú á fyrir henni að vera að þessum hlaupum"?
En svarið er einfalt; ætla að reyna að auka aðeins þolið hjá mér, þar sem ég geri eflaust lítið annað en að sitja á rassinum í vetur, og þá gengur mér líka betur að hlaupa á eftir kindunum hans Sverris í haust ;)
Svo á það alveg eftir að koma í ljós hvort ég fer að hlaupa alla daga vikunnar, í hvaða verðri sem er, alla daga ársins, eins og flestir hlaupabrjálæðingar landsins....sjáum til með það ;)

Grasið grær sem aldrei fyrr í garðinum hjá mér. Náði nú loksins að hitta á eiganda efstu hæðarinnar, hann lofaði öllu fögru og ætlar þvílíkt að redda öllu og láta slá garðinn.
Svo ég bíð þolinmóð, reyni að halda ró minni á meðan að ég þarf ekki sveðju til að komsat út úr húsi. Þetta fer að verða eins og vafningsviðurinn sem óx utanum höllina hjá þyrnirós...nema hvað að það er kanski ekki alveg eins rómó að húsið umvefjist grasi....hvaða prins nennir að mæta með sláttuorf og berjast við mjálmandi ketti á leið sinni til að kyssa mig??? ;)
Bíð spennt....bæði eftir prinsinum og hvort að garðurinn verði sleginn. Og ef satt skal segja, þá er ég hreinlega ekki viss um hvort er ólíklegra....

Till next...adios

Bolla

Fékk smá örlítið áhyggjuflökt í dag.
Þar bar nefnilega svo við, að í gærmorgun eldsnemma, fór ég með pössunarkisuna mína í aðgerð á dýraspítala hér í grennd. Nú átti sem sagt að taka fyrir fleiri kettlingaeignir á þessum bæ.
Svo náði ég í hana í dag, eftir heitupottaliggjuna, og ætlaði að drífa köttinn inn og fara svo með Kristján á Subway. En það vildi ekki betur til en svo, að þegar ég tek Bollu (það er sko kötturinn) út úr bílnum, þá stekkur hún af stað úr fanginu á mér og spyrnir klónum í nefið á mér!
Og þar sem nefið mitt er mjög, og þá meina ég MJÖG viðkvæmt, þá auðvitað missti ég köttinn. En hann stökk nú bara inn í garð, svo ég hafði ekki miklar áhyggjur. Þekkti sig nú inn í garðinum, þótt grasið vaxi þar hraðar en arfi og algerlega óáreitt.
Svo leið dagurinn, fór á Subway með Kristján, svo heim, engin Bolla... Náði í Mikael í íþróttaskólann, engin Bolla....fór í búðina fyrir mömmu, engin Bolla....fór í sveitina og dvaldi þar dágóða stund (og fékk góðar kjötbollur og ábrystir í eftirmat, nammi namm), engin Bolla!
Var farin að sjá fyrir mér jafn dramatístkan atburð og með hann Lúkas ræfilinn, ljótasta hund íslands...nei ég meina frægasta hund íslands í dag. Hann stökk einmitt svona í burtu eftir ófrjósemisaðgerð, var týndur, drepinn og upprisinn allt á nokkrum vikum.
Úff, ég var farin að spá í hverju ég ætti að ljúga á netinu,;" það komu brjálaðir unglingar með skegg og höfðu kisuna á brott með sér í stórri sloggi brók, og gengu eflaust í skrokk á henni, hef ekki séð hana síðan". Hefði svo fundið upp eihver nöfn á einhverju fólki sem mér finnst skilið að missa æruna! En kanski yrði ég svo kærð 700 sinnum þegar kattarræksnið skilaði sér í minkagildru mánuði seinna, með fugl í kjaftinum.
Enda læddist litla greyið hér inn um gluggann fyrir 2 tímum og liggur malandi við fætur mér ;)
Þarf ekki að gera veður úr þessu úr þessu ;) Sjúkkitt!
P.s smá hugsun; eru "hundavinir" ekki mannavinir?

Till next...adios

Taka tvö

Ég var svo þreytt, eða öllu heldur örmagna í gær, að ég meikaði ekki að skríða að tölvunni og blogga.
Og ástæða þessara þreytu/örmögnunar minnar var sú að ég var með örlitla strengi eftir skokkið í Kjarna daginn áður.
Og til að taka á þessum strengjum og ná þeim úr mér, fannst mér alveg tilvalið að hjóla smotterí.
Og það gerði ég.
Ætlaði fyrst ekkert að hjóla neitt mjög langt, en fyrr en varði var maður kominn langleiðina að Hrafnagili og fann ekki fyrir neinu, ekkert mál að hjóla og sól og blíða og nánast logn.
Auðvitað varð ég svo að hjóla "réttu megin" til baka. Það þýðir það að maður þarf að hjóla upp þessa rosalegu brekku (Laugalandsbrekkuna)! En þar sem mér fannst það til þess vinnandi að geta þá bara nánast runnið í bæinn ( og vera réttu megin), þá dreif ég mig upp brekkuna.....labbaði nú reyndar ca helminginn af henni.
En viti menn, hafði þá ekki bara byrjað að blása úr norðri! Kanksi hafði maður verið með einhvern smá gust í bakið á suðurleiðinni (kanski þess vegna sem það var svo létt, hummm), en nú þurfti maður sko alveg að hafa fyrir því að hjóla í bæinn. Þurfti meira að segja að hjóla niður Grafarklaufina (svona fyrir þá sem vita hvar það er;)!
En þetta endaði sem sagt í rosa púli og ég var svoooooo þreytt þegar ég kom heim að ég rétt náði að skríða í sturtu og gefa strákunum að borða áður en ég lognaðist útaf í sófanum.
Kom svo við í eldhúsinu á leiðinni í rúmið seinna um kvöldið og át u.þ.b 100 gr. af 70% súkkulaði og skolaði því niður með 1/2 L af mjólk!
Fer að verða spurning hvort ég léttist eða þyngist í þessu átaki mínu ;)
Tók svo, að ég held, skynsömu ákvörðun í dag að fara bara í sund og ekki til að synda, heldur bara liggja í heitum pottum og í eymbaðið :)
Er að verða nokkuð strengjalaus og stekk eflaust á stað í skokk/hlaup/hjól eða eitthvað á morgun ;)

Till next...adios

Átak

Veit ekki alveg hvaða flugutegund ég fékk í höfuðið í dag, en ég fékk a.m.k flugu í höfuðið og fór út að skokka!!!!
Já, þetta er ekki innsláttarvilla, ég fór í gamla strigaskó, (flatbotna og eiga sennilega ekkert sameginlegt með þeim skóm sem "venjulegir" skokkarar bera á fótum sér)... og skokkaði af stað.
Þar sem ég var nú komin af stað, ákvað ég að skokka bara út í Kjarnaskóg. Og það gerði ég.
Ég hef ekki hugmynd um hvað þetta er langt, en þegar ég kom út í Kjarnaskóg, þá skokkaði ég hringinn í skóginum og svo aftur til baka. Ok, ég labbaði svona stundum inn á milli...ætlaði nú ekki alveg að drepa mig svona strax!
Hingað til hef ég látið mér nægja, að keyra á bíl út í Kjarna, labba hringinn og keyra svo heim aftur....og það svona 3-4 sinnum yfir sumartímann, og þá bara í sól og blíðu :)
En ekki nóg með það, þá hjólaði ég líka upp í KA heimili og sótti Mikael í íþróttaskólann og hjólaði með honum heim aftur.
Svo nú er stóra spurningin hvort ég læt þessa hreyfingu duga fyrir sumarið, eða haldi þessu eitthvað áfram....ætla að taka nokkra daga í að hugsa málið ;)
Og svona til að kóróna heilsuátak dagsins, þá hafði ég soðna ýsu í kvöldmatinn.
Langaði nú meira til þess að fara á kaffihús og fá mér feita rjómatertusneið, en ég verð að hugsa um snáðana mína og reyna að troða einhverri hollustu í þá ;)
Læðist bara í súkkulaðið þegar þeir eru sofnaðir ;)

Till next...adios

Breytingaskeið

Já, það er ekki seinna vænna.
Held að ég sé komin á breytingaskeiðið. Er svo mikið að hugsa um alskyns breytingar
og stend frammi fyrir hellings breytingum.
Í fyrsta lagi, er ég hætt að vinna á vinnustað sem ég hef unnið á sl.16 ár!
Úff pínu skerí....
Og í öðru lagi, er ég að fara í skóla þar sem ég verð í skólanum, þá meina ég í sjálfri skólabyggingunni með kennurum og öðru fólki.
Hef bara verið í fjarnámi á þessu áður umtalaða 16 ára tímabili.
Og vegna allra þessa breytinga er ég svona að hugsa um að breyta kanski bara sjálfri mér í leiðinni. Kanski kominn tími á það eftir 37 ár. ;)
Er að hugsa um að verða þessi rólega týpa, hætta að segja klámbrandara og syngja klámvísur þegar ég fer á fylleri. Sitja frekar bara pen og dreypa á hvítvínsglasi og hlusta á hina.
Það væri alveg nýtt fyrir mér, þar sem oftast vil ég að allir hlusti á mig ;)
Á það til að vera svolítið athygslissjúk þegar áfengismagnið í blóðinu nær vissu stigi....
Svo þetta gæti orðið athyglisvert. Enda þótt ég viti það vel að þetta verður mikið átak fyrir mig, þá er allt í lagi að reyna ;)

Till next...adios

Laugardagskvöld

Nálgast miðnætti, og ég var að enda við að hengja upp þvott...
Partý-girl what! hmmmm
Enda er þetta bara hið besta mál. Í þessi síðustu skipti sem ég hef farið "út á lífið" sem mætti frekar kalla "út í heim hinna fullu og ráðviltu", þá hef ég fundið það, að maður er ekkert að missa af sérstaklega miklu.
Það er fínt að fá sér í glas í góðra vina hóp, og röfla dálítið og slúðra smávegis...en þegar maður kemur út í hringiðuna, þá er sko bara betra að passa sig.
Hefur stundum komið sér vel að fara "út á lífið" í hlaupaskónum ;)
Fínasta líkamsrækt: glasalyftingar og karlafráhlaup ;) hehe
Gæti kanski gerst einkaþjálfari...

Þetta var annars útúrdúr, get svo sem alveg viðurkennt það að yfirleitt verð ég alveg drullufúl ef það reynir enginn við mig þegar ég fer "út á lífið". En svo aftur á móti læt ég oftast eins og andsk.við þessi grey sem reyna við mig þegar ég fer "út á lífið".
Svo sennilega er ég bara uppfull af hroka og yfirlæti. Farast úr egói og finnst að heimurinn ætti aðallega að snúast um mig. Skil svo ekki neitt í neinu þegar beini og breiði vegurinn reynist bæði grýttur, hlykkjóttur og jafnvel ófær á köflum.
Vegagerðin hefur svo sem aldrei staðið sig neitt sérstaklega vel, og hvað þá að hún nenni að hugsa um minn prívat veg ;)
En áfram ég arka á götóttum gönguskóm
og geng yfir hóla og hæðir
á veginum verða urðir og erkiflón
sem vonlitla sál mína hræðir.

Annars ætla ég að taka það fram, svona til að fyrirbyggja allan misskilning, að ég er alls ekki í neinu þunglyndiskasti eða neitt svoleiðis. Er alveg í ágætis skapi. En einhverra hluta vegna virðast skrif mín alltaf beinast á svona frekar neikvæðar brautir. Kanski er ég bara að skrifa mig frá þessum litlu leiðindum sem hafa þjakað mig ;)

Fór að spá í það í gær hvort það væri nokkuð of snemmt að fara að kaupa sér skólabækur?
Og þá kanski að byrja að lesa aðeins... aðallega allar þessar á ensku ;)
Þarf nauðsinlega að huga að fartölvukaupum...einhendi mér í það þegar sumarfríið byrjar.
Vinna í viku enn og svo FRÍ :) jibbí
Læt ykkur ein með hugsanir ykkar í bili...

Till next...adios

Af hverju...

Af hverju...
- klæðir maður sig fínt uppá, en drekkur sig svo svo dauðadrukkinn að maður kemst ekki einusinni á ball?
- fellur maður aftur og aftur í sömu gryfjuna, þótt maður viti óskup vel af henni?
- er maður svona fljótur að gleyma mistökum sínum?
- er sumu fólki skítsama hverjum það traðkar á á leið sinni um lífið?
- ælir maður ef maður hefur drukkið of mikið áfengi?
- öfundar maður stundum fólk sem er ekkert hamingjusamara en maður sjálfur?
- er ekki búin að vera meiri sól hér fyrir norðan í sumar?
- get ég ekki skrifað gáfulegra blogg en þetta núna?
- hætti ég ekki bara núna og skrifa meira seinna og kanski í öðrum stíl en þetta?
Till next...adios

Jamm og jæja og fleiri fréttir

Sko, í fyrsta lagi... á maður ekki að blogga eftir 1 stóran bjór og hummmm ca.4 glös af rauðvíni. En þessa kenningu mína er ég búin að brjótaí tvígang í kvöld. 

En samt, ef ég væri ekki pínu "létt" og öggolítði lónlý núna í kvöld, þá hefði ég bara ekki bloggað neitt. Og þá hefðu þið, kæru vinir ekki neitt að lesa...SVo lög má brjóta, eða kenningar ef svo ber undir að mig langar til þess.

Það var nefnilega ýmislegt sem ég gleymdi að segja áðan...t.d að hann Kristján minn er í útlöndum í fyrsta skiptið á æfinni....hummm og er nú bara búinn að fara helmingi sjaldnar en ég til útlanda.

Halló! Er einhver þarna úti sem vill bjóða mér til útlanda?????

Smá útúrdúr

Mikael minn er á Dalvík hjá pabba sínum og ömmu, ekki alveg í fyrsta skiptið á æfinni, en næstum því samt ;)

Svo nú er maður bara allalone svo kanski blogga ég bara meira fljótlega hehe

till next...adios

Fréttir

Jamm og jæja,

Nú er komið að fréttum dagsins...og gærdagsins og fyrragær og þarþarþarþarþarundan.....

Frétt númer 1. = ég sagði upp í vinnunni þann 1.júní sl.

Skrifaði harðort bréf um stjórnunarhæfileikaleysi yfirkellu minnar og hennti því til allra þá sem ég vissi að tengdust FSA á einhvern hátt.

Er reyndar búið að taka mig í viðtal síðan, það voru starfsmannastjóri og yfirmaður fjármála og reksturs sem nánast bara þökkuðu mér fyrir vel unnin störf og sögðu að það væri nú gott að skipta um vinnu...heehhe

Renni nú í grun um hvað yfirkella mín er búin að tjá þeim um mig...eflaust undirrót alls ills :)

Frétt númer 2. og hún er sko ekki síður merkileg en nr.1

Ég er búin að fá inngöngu í Háskólann á Akureyri :)

Svo á haustdögum ætla ég að setjast á skólabekk með krökkunum og fá námslán (vonandi) og tjilla þess á milli....hehehe

Já og ég er að fara að leggja stund á nútímafræði.

Það er nefnilega búið að segja við mig að ég eigi ekki alltaf að hugsa um fortíðina, svo er þá ekki eins gott að læra bara um nútímann ;)

Svo ég er í góðum málum tralllalalala....vonandi, púfff , ég er samt með smá hnút í maganum varðandi peninga mál....hummmmm en só vott.

Já og ps. meðan ég man: Karlmenn eru hér með teknir út af prógramminu hjá mér.

Nenni ekki einusinni að skrifa neitt neikvætt um þá svona er ég orðin þreytt á þessu karlafokki....

Till next...adios

Auglýsing

Tveir krúttlegir kassavanir kettlingar fást algerlega gefins :)

Eru mega dúllur þótt karlkyns séu ;)

Kusu kattarflokkinn í síðustu kosningum en þeir komu ekki ketti að.

Eru af einstaklega geðgóðu kyni komnir, einnig er persa/bengal blóð í æðum þeirra sem gerir þá extra flotta.

Látið ekki kött úr klónni sleppa, einstakt tilboð, einnig spes tilboð næstu vikuna 2 fyrir 1 :)

Sælir eru fávísir...

því þeir vita ekki hvað þeir gjöra!

Þetta átti vel við, bæði í Euruvision keppninni og alþingiskosningunum sl. helgi!
Það var náttúrulega alger skandall (og kanski bara tákn um það sem koma skyldi) að hann Eiríkur Hauksson stórsöngvari og sjarmatröll (og frændi minn) skyldi ekki komast upp úr forkeppninni. En svona er lífið, maður fær ekki alltaf það sem maður vill, og það er til fullt af "smekklausu" fólki í evrópu.
Hér geng ég náttúrulega út frá þeirri staðreynd að ég hafi alltaf rétt fyrir mér. Og þeir sem eru á öðru máli tileyra "fávísa" hópnum sem minnst var stuttlega á í byrjun ;)
Ok, þetta er hroki, en ég ætla bara að leifa mér að hafa bæði hroka og hleypidóma í þessum skrifum mínum núna! Og hananú!

Auðvitað átti Eiki að komast áfram, og auðvitað átti Framsóknarflokkurinn að fá miklu betir kosningu en þeir fengu.
Og allt þarf þetta að hellast yfir mann sömu helgina...úfff
Svo var það einhver Serbnesk trukka-lessa sem vann eurovision og í öðru sæti var feitur og ljótur klæðskiptingur með stjörnu á hausnum! Halló, whats going on???

Aftur að Framsókn. Fylgistapið aldrei verið meira í sögu flokksins.
En það sem er grátlegast við þetta allt saman er að flest allir sem ég hef talað við, kusu
Sjálfstæðisflokkinn, og útaf hverju? Jú, af því að þessir flestir, vildu áframhaldandi samstarf D og B...
Afhverju í ands... kaus þá fólkið ekki Framsókn?
Sjáið nú bara til, þegar Samfylkingin og Sjálfstæðið verður búið að þurrka út landbúnað og sjávarútveg í þessu landi, hvað þá?! Eina vonin er að eftir 4 ár kemur Framsóknarflokkurinn fram og bjargar málunum. Þá verð ég jafnvel bara komin út í pólitíkina. Ég hugsa að ég yrði alveg mögnuð í ráðherraembætti. Eða líka bara sem óbreyttur þingmaður.
Annars fannst mér það eina rétta hjá Framsókn að draga sig úr úr þessu sjórnarsamstarfi við SJálfstæðið. Nú er komin tími á uppbyggingu innan flokksins, og svo er líka allt í lagi að Sjálfstæðið fái að eyðileggja fyrir fleiri flokkum....Just wait andi seeeeeee ;)

Jón minn, þú ert flottur í forustu Framsóknar og þið öll hin alveg ágæt líka, þið sóðuð ykkur vel í baráttu sem var nánast ógerlegt að vinna. En við vinnum bara næst og þá verður það bara enn sætara fyrir vikið :)

Nú læt ég þessum pólitísku skrifum mínum lokið, óska nýrri ríkisstjórn allra heilla, í von um sem minnst klúður :)

Till next...adios

Bandalagsþing

Sælt veri fólkið, og takk fyrir síðast :) og takk fyrir kommentin ;)
Og hæ Eygló :)
Svoooo gaman að einhver les mann :)
Nú er ég svo ánægð, þegar ég er búin að komast að því að enn er til fólk sem nennir að lesa bloggið mitt, bæði "gamlir og nýjir" að ég er að hugsa um að vera bara jákvæð núna :)

Kom heim í gær af bandalagsþingi, en það er árlegt þing BÍL, sem útleggst Bandalag Íslenskra Leikfélaga. En innan þeira vébanda eru flest áhugaleikfélög landsins. A.m.k þau sem máli skipta ;)
Í ár var það haldið af leikfélagi Fljótsdalshéraðs, að Hallormsstað. Og þar var nú vistin aldeilis góð. Skemmtilegir og skeleggir fundir, skemmtilegt og frábært fólk um allt og síðast en alls ekki síðst: Algerlega æðislegur matur!
Hef bara ekki lent í öðrum eins kræsingum á svona þingi. Legg til að þessi kokkur verði fastráðinn "hirðkokkur BÍL" eða þingið verði í framtíðinni alltaf á Hallormsstað ;)
Það er alltaf gaman á svona þingum, mætti þó stundum vera styttir fundarhöld og miklu meira gaman og glens. En svona er þetta, var samt pínu þreytt í sitjandinum þegar ég kom heim, nánast búin að sitja alla helgina frá kl.16 á föstud til kl.16 á sunnud.!
Var að verða svo þreytt á að sitja svona að ég var mikið að spá í að labba heim, en þar sem að það var ansi kalt úti á þá ákvað eg að sennilega væri best að fara heim á sama máta og ég fór austur á BÍL í bíl.
Komum við í Hótel Reynihlíð á heimleiðinni og Nonni bró bjó til þetta rosagóða SwissMokka kaffi handa mér :) algerlega bjargaði deginum.
Annars veit ég varla hvað ég á að skrifa meira um þingið, það var gaman og gaman og gaman og gaman! Og svo var líka gaman að því að sýning Siggu Láru mágkonu og leikfélags Fljótsdalshéraðs vann titilinn áhugaverðasta áhugaleiksýning ársins :) og er það aldeilis frábært :)
Nú er ég bara búin að vera hellings jákvæð, já og bæ te vei: ég er að taka þátt í "hjólum í vinnuna" og er sko búin að hjóla alla vinnudaga síðan það byrjaði fyrir 6 dögum :) dugleg ;)

Till next...adios

1.mai

Gleðilegan verkalýðsdag :)
Í tilefni dagsins þá hef ég ekki unnið handtak í allan dag, bara sett í 2 þvottavélar og svo slæpst...
Annars held ég að það séu allir búnir að gefast upp á að lesa bloggið mitt, hef a.m.k ekki fengið nein komment laaaaaaaaaaaaaanga leeeeeeeeeeengi.
En ég læt það ekki slá mig út af laginu og held ótrauð áfram. Helli úr skálum reiði minnar eða tala um það sem vel er gert, en einhverra hluta vegna fer alltaf minna fyrir því en hinu sem miður fer!
Auðvitað ætti maður bara að vera jákvæður og skrifa um fallega og skemmtilega hluti, en vá hvað það yrði eitthvað leiðinlegt til lengdar ;)
En ég lofa að hafa það með, eins mikið og ég get.
Ég t.d fermdi Kristján 21.apríl sl. og gekk það ljómandi vel, og strákurinn stóð sig eins og hetja :)
Vil bara þakka öllum hér með sem komu og gerðu daginn enn ánægjulegri fyrir vikið :) takk takk!

Svo smá neikvætt: Arg! Ef það er eitthvað sem fer í taugarnar á mér, þá er það heimskt fólk. Og þá er ég að tala um fólk sem á að teljast líkamlega og andlega "í lagi" og hafa tekið út eðlilegan þroska. Þ.e. komið yfir tvítugt en hagar sér eins og úfff ég veit ekki einusinni eins og hvað það hagar sér!
Dæmi: Það flutti nýtt fólk í húsið fyrir ca.3 vikum síðan. Ég fékk mér endurvinnslutunnu sl. föstudag. Í morgun var búið að henda 2 ógeðslegum opnum ruslapokum ofaní endurvinnslutunnuna! Og ógeðslegar matarleifar dreyfðar yfir allt endurvinnsludótið sem ég var búin að setja ofaní. Og nb. tunnan er MJÖG vel merkt, bæði ofaná lokinu og framaná tunnunni.

Dæmi tvö: Þetta sama fólk, er ekki með þvottavél í þvottahúsinu, heldur bara þurrkara. Sem væri svo sem allt í góðu, nema hvað að þetta er þurrkari með barka sem eðlilega þarf að fara út um glugga svo að gufan sem myndast við þurrkunina fari út en ekki inn. Þetta virðist vefjast fyrir þessu blessaða fólki, því þurrkarinn er staðsettur eins langt frá glugga og mögulegt er, og barkinn bara puðrar gufunni upp í lofti! Fyrir utan að vera að reyna að þurrka þvott á snúrunum í þvottahúsinu og fá þessa mollu í þau. Þá meira að segja loka þau dyrunum vel og vandlega, sem alltaf er annars opin, þegar þau eru með þurrkarann í gangi! SVo um daginn þá var þvottahúsið eins og tyrkneskt gufubað. Ætti kanski ekki að bögga ´mig á þessu, heldur bara selja aðgang að sauna ;)
Jamm, þetta pirrar mig aðeins, en ég tek þessu náttúrulega með jafnaðargeði, eða ógleði og læt sem ekkert sé ;) týni ógeðið upp úr endurvinnslutunnunni og lofta úr úr þvottahúsinu. Vona að blessað fólkið þroskist fyrir rest. Já og læri almennilega á píanó eða selji það ella.
Hætt að tuða í bili, skal reyna að vera jákvæðari næst :)
Till next...adios

Kettir

eru til margra hluta nytsamlegir

T.d flottir sem bókastoðir :)

Það ættu allir að eiga einn, og geta fengið þá hjá mér ;)

Annars er það helst í fréttum að það er aaaaaaaalveg að koma sumar...

Alveg satt, sumardagurinn fyrsti er ekki á morgun heldur hinn, og ég er þess fullviss að þetta verði veðurblandið sumar.

Einhver rigning, eitthvað rok, einhver sól og eitthvað logn...

Ég er nefnilega svakalega flink í að spá í veðurfar komandi mánaða. Ég spáði því t.d í haust að þetta yrði mjög snjóþungur vetur!

Fyrsti veturinn sem ég man eftir að hafa ekki þurft að moka bílinn upp allan veturinn!

Reyndar hefur verið einhver snjór jú, en ekki neitt til að tala um.

Nú er kosninga baráttan að fara á fullt. Og hef ég hugsað mér að vera með nokkra mjög pólitíska pistla hér á þessu bloggi.

Rak nú reyndar augun í kosningaloforð frá samfylkingunni áðan: "400 ný öldrunarrými" Vá, ef maður hefur heyrt eitthvað áður ´þá er það þetta!

Það væri nærri lagi að moka pening í heilbrygðisgeirann, vinna upp biðlista og gera fólk það hraust að það geti bara séð um sig sjálft ;)

Svo er nú ekki nóg að bæta við rúmum eða rýmum, ef enginn er til að hugsa um gamla fólkið á þessum heimilum. Er ekki allt í lagi að sinna fólkinu svolítið betur fyrst?

Gæti verið að það þurfi kanski að gera þessar umönnunarstöður örlítið meira aðlaðandi fyrir fólk að sækja í ?

Svo eru íslendingar að drepa sjálfa sig og alla í kring með þessu innistæðulausa snobbi sínu.

Það er ekki nógu "fínt" lengur að vera bóndi, sjómaður, fiskverkandi eða bara almennur verkamaður lengur.

Nei, allir eiga að læra nógu mikið, verða háir herrar , fá fullt af peningum og verða sama um allt og alla í kringum sig!

Hvernig haldið þið að ísland liti út ef allir, já ég meina allir, færu í langskólanám og hér yrði ekki þverfótað fyrir læknum og lögfræðingum og öðrum fræðingum?

Sennilega myndi allt vaða í lögsóknum í garð lækna og allt löðrandi í sorpi, skít og öðrum óhroða sem þessi aðall myndi óhjákvæmilega skilja eftir sig.

Væri ekki bara alveg upplagt að minnka launamuninn (sem alveg spauglaust getur talið í miljónum áa mánuði) og gera öll störf eftirsóknaverð.

Þá hættir fólk að eltast við peninga í þessum og hinum geiranum, og fer loksins að vinna við það sem því finnst áhugavert.

Vá hvað ég yrði frábær einræðisherra :)

Till next...adios

Hummm

Ég er nú ljóti hálfvitinn... ég fór nefnilega ekki á ljótu hálfvitana í gærkv. eins og ég hafði ætlað mér...heldur fór ég að sjá ljótu fíflin í Freyvangi. En þar var lokasýning á Prímadonnunum.


Tókst það bara allt ljómandi vel. Ég tók hann Mikael með mér að sjá, og ætlaði svo að skutla honum í bæinn og kíkja aftur í Freyvang, þar sem ég vissi að einhverjir ætluðu eitthvað að lyfta glösum.


En viti menn, ég keyrði Mikael heim jú, en settist svo aðeins niður með honum fyrir framan sjónvarpið og steinsofnaði !!!


Og mín var greinilega ekki saknað meira en það í leikhúsinu að það var enginn að hafa fyrir því að hringja neitt í mig og athuga með mig...


En ég vaknaði a.m.k mjög hress í morgun, og er bara mjög sátt við þetta allt saman.


Gott að vita af því að fólk getur skemmt sér án þess að ég sé á staðnum. Þótt ég sé þess nú fullviss um það að það skemmti sér a.m.k ekki eins vel ;)

Jæja, ætla að fá mér ferskt loft fyrir svefninn.

Till next...adios

Föstudagur

Gott kvöld,

Í fréttum er þetta helst:

Ekkert að frétta ;)

Samt einhver agalegur föstudagsfílingur í mér, kanski bara afþví að það er föstudagur...

ekki gott að segja.

Annars er ég ný komin úr litun og klippingu, og er þar af leiðandi aðal gella ársins ;) a.m.k í dag...

Nú á ég bara eftir að fara í lit og plokk, og þá er ég reddý fyrir fermingu ;)

Það er að verða alveg agalega stutt í fermingu...rétt vika.

Jæja, ætla að fara út og anda að mér vorloftinu og fíla náttúruna þar sem hún grær :)

Stefni á að fara á "Ljótu hálfvitana" á Græna hattinum annað kvöld :)

Mæli með að allir fari að mínu fordæmi...

Till next...adios

Minning

Friðrik Jónsson

Fæddur 16.desember 1924

Dáinn 04.ferbrúar 2007

Það er margs að minnast.

Hugsanir manns fara um víðan völl, staldra við þar og hér og þjóta svo áfram um farinn veg.

Fyrst og síðast mun ég minnast þín pabbi minn fyrir það hvað þú varst heilsteiptur karakter. Maður bara takmarkalausa virðingu fyrir þér.

Fyrstu minningarnar um þig er þegar þú tókst mig með í gönguferðir um landareignina. Líta eftir kindunum, eða hestunum eða bara labba um.

Mér fannst þetta alveg einstakt að labba um með þér og halda í stóru grófu hönd þína.

Að fara í reiðtúra var líka alveg einstaklega skemmtilegt.

Að "hjálpa" þér að leggja á Blesa gamla þegar þú varst að leggja af stað í göngur.

Biðja um að fá að smakka sykurvatnið í flotta vasapelanum sem þú tókst alltaf með þér í göngur.

Og taka á móti þér glöðum og rámum þegar þú komst úr göngunum.

Æskuminningarnar eru alltaf sveipaðar dýrðarljóma...að minnsta kosti mínar minningar.

Mér finnst líka eins og þú hafir alltaf verið að vinna. Ósérhlífinn og ætlaðist til mikils af sjálfum þér og okkur krökkunum líka. Þótt stundum hafi maður orðið þreyttur og pirraður, þá býr maður að þessu alla æfi.

Ekkert væl...bara gera það sem gera þarf.

Við vorum ekkert endilega alltaf sammála um allt, sérstaklega þegar ég var á seinnihluta unglingsárana...en í dag sé ég að oftast nær hafðir þú algerlega hárrétt fyrir þér.

En kanski vorum við líka bara dálítið lík í skapinu..örlítið þrjósk og pínu þver og ekki alveg alltaf tilbúin til að bakka með það sem sagt og gert var.

En alltaf stóðstu sem klettur við hlið manns þegar eitthvað bjátraði á.

"Honum féll aldrei verk úr hendi" - þetta er setning sem er eins og hafi verið samin um pabba.

Man ég sérstaklega eftir einu fyrir um 8 árum síðan, þá orðinn 74 ára gamall. Ennþá einn í búskapnum. Að um sauðburð þá hringir mamma í mig og spyr mig hvort ég geti komið í sveitina og farið aðeins í fjárhúsin fyrir pabba, því þá hafði svo mikið borið um nóttina að hann hafði ekkert sofið.

Það var nú ekkert mál, og ég var komin í sveitinu um 9 leitið um morguninn.

pabbi segir mér hvað þurfi að gera, hvaða lömbum á eftir að gefa lambatöflu og svo dríf ég mig út. Ég hugsa að ég hafi verið um 2 tíma í fjárhúsunum, og þegar ég kem inn þá býst ég auðvitað við því að pabbi sé sofandi...en nei, þá var hann sko búinn að hvíla sig nóg, drakk kaffi í eldhúsinu og sagði að fyrst ég væri nú á staðnum væri nú gott að nota tækifærið og gera girðingu svo hægt væri að byrja að hleypa lambánum út.

Svo það sem eftir var dagsins var verið að gera girðingu og gera það sem hann þurfti hjálp við.

Og alltaf fannst mér gott að geta hjálpað pabba.

Betri pabba hefði ekki verið hægt að hugsa sér.

Auðvitað var margt sem við áttum eftir að ræða, öll þín viska fór með þér.

Alltaf finnst manni maður hafa allan heimsins tíma

og alltaf kemur það manni á óvart þegar maður uppgötvar að maður hefur það ekki.

Elsku pabbi minn, takk fyrir allt og sérstaklega það að hafa verið pabbi minn.

Nú hvílist þú að loknu góðu dagsverki.

Gleðilega páska

Góðan dag gott fólk og gleðilega páska :)

Þetta er mynd af páska ungum.

Páskahretið lét ekki á sér standa , fremur en fyrri árin og gott er að geta treyst á eitthvað í þessum heimi ;)

Ég er alveg uppfull af visku og fróðleik þessa dagana, en alveg óvíst hvort ég nái að koma því frá mér hér á þetta blogg....það virðist eins og ég hálf blokkist þegar ég logga mig inn á bloggið. Og allt þetta skemmtilega sem ég ætlaði að skrifa lokast inn í skúmaskoti hugans.

Já og til hamingju með daginn Árni og Sigga Lára :) 1.árs brúðkaupsafmæli og ár síðan að Gyða litla var skírð...þetta man maður :)

Nú styttist í fermingu Kristjáns...21.apríl og sennilega er ég alltof róleg yfir þessu öllu saman. Virðist sem fólk fari á taugum þegar það fermi börnin sín. Er ekki bara nóg að koma krökkunum í kirkju á réttum tíma?

En endilega allir sem lesa þetta blogg eru velkomnir í sal Lundarskóla kl.17:00 fermingardaginn :)

Ég er búin að fá nýja nágranna, á hæðina fyrir ofan mig. Hef reyndar ekki hitt þau ennþá, bara heyrt í þeim!

Þau eiga pínanó.

Hef ekki orðið vör við það að einhver á heimilinu kunni á píanó.

En píanóið virðist vera þokkalega mikið notað...a.m.k miðað við kunnáttu.

Grannar mínir fara snemma á fætur...líka um helgar

Virðast einnig staðráðnir í því að læra einverntíman á píanó...alveg sjálfir.

Nóg af nágrönnum mínum.

Ætla ekki að hafa þetta blogg lengara í bili,

en vil minna á komandi kosningar... X-B

"berjumst til síðasta manns " ;)

Till next...adios

:-(

Heare I go again on my own...