Gáttaþefur

Ég skaust í bæinn fyrripartinn í gær, byrjaði reyndar á því að fara með 4 ruslapoka af flöskum og dósum í endurvinnsluna. Þurfti að troða þessu inn í bílinn og svo skoppaði þetta út um allt, svo datt einn pokinn á hliðina þegar ég setti hann frá mér fyrir utan bílinn og allt út um allt! Heftur eflaust verið svolítið spaugileg sjón, þótt mér fyndist það ekki það augnablikið.
Svo fór ég í BIKO og keypti mér ljós á ganginn! Dugleg...nú er bara spurning hvort ég kem því upp fyrir jól...þarf reyndar að fara og kaupa skrúfur til að festa ljósið í loftið, komst að því að þær fylgja víst ekki með! Kjánalegt! Svo fór ég í Hagkaup og ætlaði að kaupa gallabuxur á Mikael. Það var nú ekki eins auðvelt og það átti að vera. Ég leitaði og leitaði en fann engar í hans númeri. Reyndar var alveg afskaplega lítið úrval af strákafötum yfir höfuð þarna! Örugglega 90%af barnafötunum voru stelpuföt, strákafötin voru í einu horni og fór ekki mikið fyrir þeim. Enn minna fór fyrir starfsfólki, ég leitaði lengi að aðstoð og fann loksins eina í "sokkadeildinni" hún sagðist ekkert vita um barnafötin og fór að leita að einhverjum í það, kom svo og sagði mér að "hún væri rétt ókomin úr mat", ég skyldi bara hinkra aðeins. Ég stóð þarna eins og álfur innan um barnafötin í laaaaangan tíma og gafst upp fyrir rest og fór. Hagkaup fær ekki góða einkunn hjá mér varðandi þjónustu og bæ thei vei ekki BIKO heldur! En jæja, ég ætlaði nú ekki alveg að gefast upp og fór í Glerártorg, fann barnafatabúð þar, þar voru til einar gallabuxur í réttu númeri! Ég keypti þær bara og fór, konan í búðinni var svo sammála mér að það væri erfitt að fá föt á stráka á þessum aldri. Var nærri búin að spyrja hana hvort hún gæti ekki keypt inn meira af fötum á stáka á þessum aldir, en ákvað að segja bara "gleðileg jól" í staðin.
Svo skottaðist ég í sund með strákana, það var fínt, ég lá í heita pottinum og varð eins og sveskja, reyndar var eitthvað verið að laga stóru- gömlu sundlaugina, svo það var ekkert í boði að synda neitt ;) Strákarnir hömuðust í rennibrautinni, rosa stuð hjá þeim.
Svo voru það jóla-tónleikar ársins ;) Hvanndalsbræður, þeir tóku nokkur "falleg" jólalög og dagleg lög og voru náttúrulega haug skemmtilegir eins og vanalega. Svo var tekið smá pöbba-rölt en það var allt mjög rólegt og ég komin heim fyrir kl.01 :) Fínt kvöld.
Jæja, ætli ég verð ekki að kaupa skrúfur og reka Kristján í bæinn að kaupa jólagjöf handa mér ;)

Till next...adios

Gluggagægir

Vá hvað það er allt í einu stutt til jóla! Ég er nú nærri búin að gera allt, á reyndar eftir að hjálpa næstu 3 jólasveinum aðeins. Svo er reyndar öll tillagning eftir, það er alveg útséð að það borgar sig ekkert að laga til fyrr en í mesta lagi 2 dögum fyrir jól, annars er maður bara að laga til alla daga!
Fór í gærkveldi og keypti handa Kristjáni, og fleirum sem eftir voru. BT er fín búð, einnig Eymundsson, þetta verða "hörð" jól í pökkum í ár frá mér ;) Einnig sendi ég jólakort, gleymdi reyndar einu í sætinu á bílunm, sá það í gærkveldi þegar ég kom heim og nennti ómögulega aftur af stað...hendi því í póst í dag...ef ég nenni ;) Annars er ég að hugsa um að fara í laaaaanga gönguferð um bæinn í dag eða á morgun og læða nokkrum kortum í lúgur.
Kristján hefur ægilega áhyggjur af því að hann er ekki ennþá kominn í jólaskap, er alveg að fara á taugum útaf því strákgreiið...kanski eru hormónarnir búinir að yfirtaka jólaskapið! Ætla nú að gera mitt besta, syngja jólalög í allan dag og kanski kíkja á kaffihús í kakó :) Það er svo gaman að tjilla og dúlla sér bara í rólegheitum :) Annars var Mikael að heimta sundferð...ekki vitlaus hugmynd.
Ætla núna að skokka niður á torg og athuga hvort það eru til miðar á Hvanndalsbræður í kvöld...það kemur manni nú í jólagírinn að hlusta á þá ;)
Þrír dagar til jóla! Reynið að halda ró-inni, friður sé með ykkur ;)

Till next...adios

Bjúgnakrækir

Voða er nú fínt að skottast um á náttfötunum.
Ég ræsti strákana rúmlega 8 í morgun, klæddi þá í fín föt (Mikael fór meira að segja í frakka utanyfir sparifötin, eitthvað sem ég mundi allt í einu að ég átti inn í skáp síðan Kristján var á þessum aldri) og þeir gengu glaðir í bragði í skólann á leið á litlu jólin :) Voðalega á ég nú sæta stráka :) Þeir hafa náttúrulega sitt fallega útlit frá feðrum sínum, því að ég held mínu fallega útliti ennþá, en þeir feðurnir báðir orðnir ljótir ;) hehe. (Vona að enginn taki þessu voða alvarlega eða illa). Það hefur nefnilega komið mér pínu á óvart hvað sumir sem lesa bloggið mitt taka því voðalega hátíðlega...halda jafnvel að ég sé í fýlu eða í vondu skapi ef ég er eitthvað að tuða eða hneykslast á hinu og þessu! En svona til að fyrirbyggja allan misskilning þá myndi ég í fyrsta lagi aldrei nenna að blogga ef ég væri í vondu skapi og í öðru lagi er ég aldrei í vondu skapi ;) Þetta er nú bara allt til gamans gert og meira svona í átt til þess að reyna að vera fyndin heldur en leiðinlegur ;) Ég verð kanski bara misskilin grínisti svona eins og Jón Gnarr...hehe.
Annars er svo margt sem liggur fyrir í dag að ég veit bara ekkert á hverju ég á að byrja! Þarf að skrifa jólakort og senda þau (þeir sem búa fyrir utan íslenska landhelgi fá bara engin kort, því ég er orðin alltof sein....þið þarna úti: gleðileg jól og takk fyrir allt gamallt og gott, frá mér og mínum). Þeir sem búa á Íslandi Íslandi Íslandi, fá vonandi sín kort í hendurnar fyrir jól...held það sé síðasti skiladagur í dag, vona að það reddist ef ég kem þessu í póst fyrir miðnætti ;) Á nú eftir að finna nafna-heimilisfanga listann og svoleiðis...þetta tekur allt saman tíma o sei sei já.
Svo þarf að kaupa gjafir og pakka inn já og ég tala nú ekki um að laga til AFTUR!
Jæja, ætla að reyna að ákveða mig hvort ég klæði mig í skokkgallann og fer smá hring, eða hvort ég klæði mig í venjuleg föt og fer að gera eitthvað af viti...Þarf aðeins að hugsa þetta. Passið ykkur á jólastressinu, virðist vera að gagna núna ;) Lýsi, kertaljós, kakó og kósíheit eru ágætis forvarnir...og forðist búðir, þetta grasserar þar ;)

Till next...adios

Skyrgámur

Vá, næstum gleymdi að blogga maður....og þá hefði dottið út einn jólasveinn og ekki má það nú! ;)
Annars hef ég nú bara varla verið heima hjá mér í allan dag. Var að vinna frá 8-17 og fór svo í matarboð kl.19 og var að koma heim rétt um kl.23 ...voða skemmtilegar svona staðreyndir í tölum ;) Litlu jólin eru hjá strákunum á morgun og svo verður legið í leti og í fleti næstu tvær vikurnar, með kanski örlitlum undantekningum. Hef reyndar verið að hugsa um hvort ég eigi ekki að drífa mig í skokkið aftur...hef ekki farið síðan hummm í lok október, er bara að verða feit og sælleg...or notttttt!!!!!!(ætla að hugsa þetta samt aðeins lengur...) En gæti svo sem orðið það ef ég held þessu áti áfram, ef ég er ekki að borða mat þá er ég að borða konfekt! Gott að þurfa ekki að vinna fleiri daga á þessu ári ;)
Kristján kom heim með einkunnarblaðið sitt í dag, las upp fyrir mig og lofaði bót og betrun á næsta ári...í þessum "fallfögum sínum" ég var ekkert voða glöð, hann fékk reyndar nokkrar ágætis einkunnir, en sumar, eins og t.d íslenska, stærðfræði og náttúrufræði voru undir 5 en svo er hann að fá flottar einkunnir í öðrum fögum eins og 9 í vefhönnun, 8,5 í myndmennt, 8 í matreiðslu (aldrei nennir hann samt að elda heima), 7,5 í ensku og 6,5 í dönsku sem mér finnt nú bara ansi gott :)
En ég vona bara að loforðin hans standi!
Vonast til þess að ég geti farið að setja einkunnirnar mínar inn á bloggið ;) á eftir að fá fyrir þessar blessuðu ritgerðir ennþá. En fékk 5,2 í rökfræðiprófinu...hummm, ekkert spes einkunn, en náði þó ;) (þetta gildir 20% í vinnulagsáfanga).
Jæja, hef ekki meira að segja í bili, er þreytt og ætla að dríbba mig í bólið :) Goood night !

Till next...adios

Hurðaskellir

Vaknaði við einhvern hávaða eldsnemma í morgun, fattaði það ekki fyrr en Mikael gáði í skóinn sinn að þetta var auðvitað jólasveinninn :) Og enn ein sönnun þess að jólasveinninn er til byrtist mér í dag...í bókstaflegri merkingu, það komu þrammandi 2 jólasveinar inn í eldhús FSA (já, ég var sko að vinna í dag) æddu inn á GÁMES svæðið með hrópum og köllum ofan af fjöllum og sungu jólalag. Gáfu okkur svo rista stóran Makkintoss-bauk, svo við yrðum svolítð sætari þarna í eldhúsinu ;) og maður er sko búinn að standa sig í því ;) nammi namm! Þetta var nú skemmtilegt :)
Annars var tíðindalítið í dag...ég gleymdi að fara í skólann hjá Mikael í morgun, það var einhver foreldra-kynning í gangi, fékk reyndar póst frá kennaranum hans Mikaels í gær, en þar var sko ekkert verið að minna mann á þetta! Vona að mér verði fyrirgefið fyrir fermingu ;/
En ég keypti svo flotta skó handa honum í gær að ég hugsa að ég komist nú upp með ýmislegt næstu daga...hann varð ekki einusinni mjög fúll yfir því að fá sokka í skóinn í morgun ;)

Allur snjór er farinn, veit ekki alveg hvert hann fór, en spurning um að lýsa eftir honum: "tapast hefur snjór, hvítur á lit, brúkast gjarnan undir skíði og annað dót, og um jól til áhorfs, er annars oft til mikils ama einkum þegar hann hrúgast upp í bunka og festir bíla, svo er hann líka dálítið kaldur"...cool snow ;) Hætt að bulla í bili þó...hó hó hó *<:o)

Till next...adios

Askasleikir

Klukkan er að verða hálf 12 á hádegi og það er ennþá nánast svarta myrkur úti! Alltaf hlakkar mig nú jafn mikið til þess tíma þegar daginn fer að lengja á ný :) Held ég sé meira fyrir ljós en myrkur, finnst bara best að sofa í myrkri...þess vegna er ég nú eiginlega ný komin á fætur ;)
En núna á eftir á að gera aðra tilraun til þess að fara í búð, og ég vona að það haldi allir heilsu í því ferðalagi. Spruning um að fara bara í Nettó!
Mikael er orðinn fínn, segist reyndar annað slagið vera veikur, en svona meira þegar það hentar honum...eins og ég verð að sækja handa honum eitthvað að drekka af því að hann er svo lasinn.... svo sagðist hann ekki geta farið í skólann á morgun, vegna veikinda, þangað til að ég benti honum á það að þá missti hann af sundinu, þá varð hann voða hress og auðvitað fer hann í skólann á morgun :)
Svei mér þá, ég held bara að það sé farið að dimma aftur!!!!
Fólkið á efri hæðinni hjá mér er alveg að missa sig í jólaljósum, þau voru reyndar byrjuð að setja seríur út í glugga í byrjun nóvember og hafa nánast ekki stoppað síðan...setja meira að segja seríur í geymslugluggana og utanum þvottasnúrurnar. Verður örugglega ekkert gaman að ná þessu af snúrunum eftir jólin ;) Svo var bankað upp hjá mér í gær, þá hafði farið öryggi hjá þeim (og þau eiga náttúrlega engin öryggi, afþví að það er miklu auðveldara að fá þau bara hjá mér) þegar þau voru að segja peru í útiljósið...rauða-jóla-peru! Mér fannst þetta reyndar ferkar minna mig á ljós sem gæfi til kynna pútnahús. Og svo eru þau með bláar seríur í flestum gluggum....vantar alveg alla sjatteríngu í þetta hjá þeim. Þau (eða annaðhvort þeirra hjúa þarna uppi) eru líka farin að spila jólalög á píanóið í tíma og ótíma, sem væri kanksi svolítið sætt ef þau kynnu að spila! "Jólasveinar ganga um gólf " og ekki ein einasta laglína án þess að fara út af laginu...og bara í öllum lögum! Meira að segja ég gæti spilað þessi lög einhent á píanó án þess að ruglast...hehe.
Jæja, held ég verði bara að drífa mig af stað í búðina, búin að gefast upp á að bíða eftir því að það byrti meira ;)

Till next...adios

Pottaskefill

Pottaskefill var nú alltaf kallaður Pottasleikir í mínu ungdæmi...en kanski er skefillinn eitthvað fínni, finst það samt alveg í takt við Askasleiki að kalla hann bara Pottasleiki áfram, og ekkert að vera að skafa utanaf þessu ;)
Mikael varð lasinn í gær, ég fór með strákana í Hagkaup (þar sem brjálæðið er) og eftir svona 5 min þar, fór hann að kvarta ógurlega yfir að sér liði illa, mér fannst það svo sem ekkert skrítið, þar sem fólk tróðst og tróðst og varla hægt að labba um með kerru án þess að sitja fastur á milli fólks með verslunarbrjálæðisglampa í augunum.
Svo það var lítið keypt, bara kjúlli í matinn og ein dvd mynd og svo brunað heim, ég var nú í rauninni bara pínu fegin...
Svo Mikael lá og horfði og sjónvarp og svaf mest megnis allan daginn í gær, eftir búðarferðina.
Ég þóttist ætla að rjátla eitthvað við að laga til, fór nú lítð fyrir því, en náði að fara með 1 ruslapoka af fötum í rauðakrossinn. Þetta voru nú reyndar föt sem ég var búin að setja í poka í haust...svo ekki skilja mig sem svo að ég hafi verið dugleg að fara í gegnum fataskápa ;) isss, það er alveg eftir!
En svo var leikhúsferð í gærkv. á "Ökutíma" og ég veit ekki hvað skal segja. Ég var kanski búin að heyra of mikið af því hvað þetta væri frábært leikrit, að mér fannst það bara svona allt í lagi! Ekkert frábært, en ekkert leiðinlegt heldur. Fanst það kanski full átakalaust miðað við efnið sem var tekið á. En núna vona ég bara að það sé fullt af fólki ósammála mér og skrifi þvílíku kommentin að ekki hafi annað sést ;)

Pabbi hefði átt afmæli í dag, orðið 83 ára, planið var að fara í sveitina en ég veit ekki hvort heilsufar Mikaels leyfir það, en hann er nú samt talsvert hressari en í gær (þarf svo sem ekki að vera mjög hress til þess). Svo sennilega verður maður bara heima að dunda sér og horfa á góða veðrið út um gluggann.

Svo sá ég jólasvein í gær :) ekki á sleða nei, heldur ók hann rauðum fólksbíl hér upp Þórunnarstrætið og flautaði ógurlega og veifaði til mín :)
Ég vissi alltaf að jólasveinninn væri til!!! :)

Till next...adios

Þvörusleikir

Ég er í miklu letistuði núna, búin með prófin og komin í jólafrí úr skólanum. Það hlaðast nú samt upp verkefnin hér heima, skúra skrúbba og ekki bóna. Ætla nú samt að láta það eftir mér að gera ekkert of mikið í dag. Skreppa aðeins með strákana í Hagkaup og reyna að eyða eitthvað af öllum þessum pening sem maður á ;)
Svo verður bara tjill tjill og leikhús í kvöld :)
Held að það sé brostið á með blíðu, eftir rok og rigningu í gær, virðist vera alveg stillt og gott veður, verst að fíni skíðagöngusnjórinn sem var kominn í fjallið er kanski eitthvað orðinn minni núna. Það runnu hér lækir niður götuna í gær, og maður var gjörsamlega eins og belja á svelli að reyna að fóta sig á öllum klakanum í rokinu ;)
Jæja, ég ætti kanski að reyna að klára að klæða mig, henda í eina þvottavél og drífa strákana út!

Till next...adios

Stúfur

Gott og slæmt...var að fá lokaeinkunn úr myndfræðinni, fékk 9 og er alveg himinsæl með það :)
en svo er ég að fara í próf í rökfræði á eftir (kl.14:00) og er ekki alveg að skilja þetta torf! Prufaði að taka sýnipróf í gær og fékk 2 !:(
Það er náttúrulega hrein mannvonska að hafa heilt próf bara krossaspurningar!!! Sérstaklega þegar efnið er um:
Modus Ponens:
Ef A þá B
A
B

Modus Tollens:
Ef A þá B
ekki-B
Ekki A

Eða rökhenda:
A eða B
Ekki A
B

Barbara:
Öll A eru B
Öll B eru C
Öll A eru C

Þetta eru sem sé gild rökform, og er næstum það léttasta við þetta próf!

Jæja, ætla ekki að tuða meira í bili, ég geri bara það sem ég get og vona það besta.
Svo er þriggja daga helgarfrí framundan hjá okkur, bæði mér og strákunum :) Svo vinn ég í tvo daga og fer svo í frí fram yfir áramót! Það kemur þá bara í ljós hvort ég les skólabækur eða aðrar bókmenntir um jólin ;)
Það gæti margt verra gerst en að falla á prófi...lífið er dásamlegt :)

Till next...adios

Giljagaur

Það er best að líta aðeins upp úr bókunum, enda byrjað arg og garg út á leikvelli, svo smá pása er fín ;) Er nánast búin að sitja og lesa síðan kl.8 í morgun, þetta er miklu meiri lestur en ég hélt ;/
Ég fann annars þessa skemmtilegu mynd í myndasafninu mínu og ákvað að deila henni með ykkur:)
Hef annars ekki mikið meira að segja í dag en í gær...
Fartölvan mín ber nafn með rentu: fartölva, ég er nefnilega búin að fara ótrúlega oft með hana á milli eldhússins og stofunnar. Ég sit oftast og læri við eldhúsborðið (eldhúsið er sem sé nokkurskonar eldhússkrifstofa) og svo labba ég með tölvuna inn í stofu þegar ég þarf að prenta eitthvað, því að prentarinn er staddur í stofunni (eða stofuskrifstofunni). Ég bara hafði ekki pláss fyrir prentarann í eldhúsinu, og ef ég reyni að læra í stofunni þá sofna ég ;)
Annars er ég að spá í að breyta stofuskrifstofunni í svefnherbergi líka, sum sé svefnherbergisskrifstofustofu, en hann Mikael minn er farinn að kvarta svo mikið um herbergisleysi að ég er að hugsa um að eftirláta honum herbergið mitt einhverntíman eftir áramót og flytja sjálfa mig inn í stofu. Henda bara út ónýta sófanum sem er þar og kaupa svefnsófa. Það verður þá kanski til þess að ég fer að búa um mig á morgnana ;) En þetta er svona í gerjun, þarf a.m.k að gera eitthvað í þessu fyrir afmælið hans Mikaels, en hann fullyrðir það að honum verði strítt ef hann verður ekki kominn með eigið herbergi þá. Reyndar er það ekki bara herbergi sem hann vill, heldur líka sjónvarp, tölva og a.m.k tvær fjarstýringar á tölvuna ;)
Svo þetta gæti kostað sitt ;) best að byrja að spara og einhenda mér í þetta þegar snjóa leysir...sem er nú reyndar alltaf að gerast...hummm, jæja, ég sé til.

Till next...adios

Stekkjastaur

Ég fékk reyndar ekkert í skóinn í nótt...kanski vegna þessa að ég gleymdi að setja hann út í glugga, verð að reyna að muna eftir því í kvöld! En hann Mikael klikkaði ekki á skónum, og fékk Star Wars spil í skóinn, svo kanski fær hann StarWars kerti í nótt, ef jólasveinninn á það til...sem ég efa reyndar, á sennilega eftir að finna upp svoleiðis kerti. Mér finnst annars að það ætti að fækka jólasveinunum, svona niður í tvo. Þetta er tómt ves...og ég sef ekki á nóttunni vegna spennu, er svo hrædd um að jólasveinninn gleymi sér!
En hvað um það, ég fór til fjalla í dag, nánar tiltekið í Hlíðarfjall, á gönguskíði. Alveg glimrandi gott veður og færð, gerist ekki mikið betra. Átti nú reyndar að liggja yfir bókum, en gerði það alveg fram að hádegi ;) svo verður það bara allur dagurinn á morgun...lesa lesa!
Annars eru fleiri en ég í prófun, Kristján er í prófaviku, var í stærðfræði í gær (sagðist hafa gengið ágætlega) , í ensku í dag (gekk vel, ekki við öðru að búast) svo fer hann í dönsku á morgun og íslensku á föstudag. Ég er endalaust að rexa í honum að lesa undir prófin, en svo hef ég grun um að bókin sé fljót að lokast um leið og ég fer út úr herberginu hans!
Jæja, ég veit eiginlega ekkert hvað ég á að skrifa núna, bulla bara eins og þvara samt kemur þvörusleikir ekki strax, er fjórði í röðinni.
Ok, ég skal hætta núna...

Till next...adios

Sveiflur

Það eru nú meiri sviftingarnar í þessu veðri. Í gær var birrr birrr kuldi úti, ca.13 gráðu frost, sem manni fanst vera alveg hellingur. Bíllinn fór í gang jú, en var svo frosinn að þær hurðir sem opnuðust, þær lokuðust ekki aftur :/ en strax í gærkveldi var aðeins farið að hlýna og í dag var bara næstum kominn 13 gráðu hiti! Bara bongó blíða.
Fór með strákana í jólaklippinguna í gær, svo núna á ég bara eftir að kaupa örfáar jólagjafir, skrifa jólakort og þá mega jólin koma ;) Já, og svo reyndar er ég að fara í eitt próf á föstudaginn...í rökfræði, en ég þykist ætla að vera voða dugleg að lesa og læra á morgun og hinn...var að vinna í dag og gær, mikið að gera á stóru heimili ;)
Annars er mig farið að langa að skella mér á gönguskíði, planið var að fara í gær, en þar sem að forstið var það mikið þá var því skotið á frest....núna vona ég bara að ég komist áður en snjórinn verður farinn aftur ;)
Fer á morgun ef ég verð dugleg að læra...verðlauna sjálfa mig :)
Fyrsti jólasveinninn kemur víst í nótt, svo ég ætla að drífa mig í rúmið og vona það besta :)

Till next...adios

Tónleikar

Tja, það fór nú svo að ég gerðist örlítið menningarleg fyrir jólin og fór á tónleika...rétt leit upp úr skrúringarfötunni og arkaði í höllina á tónleika með Sinfóníuhljómsveit Norðurlands ásamt Garðari Thór Cortes og söngfélaginu Sálubót. Þetta voru alveg magnaðir tónleikar og ég fékk gæsahúð þegar hann Garðar Thór söng "Helga nótt", enda ekki annað hægt, svona flottur maður að syngja svona flott lag ;) Amk var ég bara ánægð með þetta, mætti auðvitað vera betri hljómburður í höllinni, en þetta lagast nú allt með nýja menningarhúsinu sem er óðum að rísa, svo ég bara bíð róleg og nýt þess sem er í boði núna, hvar og hvenær sem ég get :)
Annars er ég búin að vera voða dugleg í dag, setti aðventuljósið út í glugga (ekki seinna vænna þar sem annar í aðventu er á morgun) svo fór ég að laga til og þrífa í elhúsinu, setti seríur í báða gluggana og jólagardínur líka! Voða voða dugleg, eldhúsið er nú reyndar bara hálf klárað af því að ég var dregin upp úr skúringarfötunni og á tónleikana, en ég klára þetta á morgun, á undan eða á eftir laufabrauðsgerð ;) Ætla að þykjast gera nokkrar laufabrauðskökur með gamla laginu, já já, eftir uppskrift! Eða, sko...mamma verður búin að hnoða í degið og svo flet ég út ;) og steiki, hviss, hvass, búmm...:)
Annars þrufti ég að skreppa upp á slysó í morgun, þannig var nefnilega að hann Mikael litli lamdi hann Kristján í olbogann og meiddi sig svo í hendinni að hann skældi í allt gerkveld þar til að hann sofnaði. Svo var hann enn svo aumur í morgun, og gerði ekkert með hendinni að ég þorði ekki annað en að láta kíkja á hann. Hann stera Pétur kíkti á kauða, þuklaði hendina og eftir að ég hafði sagð honum hvað hafði gerst (sem sagt að hann hefði lamið bróðir sinn) þá spurði hann voða varlega "hvað er bróðir þinn gamall"? kanski verið hræddur um að hann ætti pínu lítin bróðir sem hann væri að níðast á. En hann sagði að hann væri ekkert brotinn, hefði bara marist illa svo við fórum bara heim, en hendin er nú samt ennþá bólgin og mjög aum. Svo spurði Mikael þegar við komum heim: "mamma var læknirinn eitthvað þroskaheftur?" og ég var nú frekar hissa og segi: "nei, afhverju helduru það", þá sagði Mikael: "heyrðiru ekki hvernig hann talaði ?" hehe... þetta finnst reyndar engum fyndið nema þeim sem vita hver stera Pétur er og hvernig hann talar :)
Jæja, ég ætla að skríða í rúmið og láta mig dreyma um sleðaferð og jólasveina :)

Till next...adios

Ritgerðarskrif

Nú er ritgerðarskrifum lokið í bili...vonandi. Var að klára ritgerðina um "umbyltingu á lífsáttum, efnahag og samfélagsgerð á Ísl á tímabilinu 1850-1950" phúff! Byrjaði smá í morgun, fór svo í andlitsbað, lit og plokk, (geggjað, maður ætti að gera þetta annan hvorn mánuð) en ég átti ennþá eftir af gjafakortinu sem ég fékk þegar ég hætti á FSA, svo þetta kostaði varla krónu ;) svo fór ég á kaffi hús og fékk mér kakó og las fyrir ritgerðarskrifin. Ætlaði svo aðeins rétt að kíkja inn í Pennan/Eymundsson, en endaði með að kaupa 7 jólagjafir! Ég er að slá öll met í snemmbærumjólagjafakaupum þetta árið (reyndar ekki erfitt að slá mín fyrri met ;). Svo kíkti ég heim, fór svo í Nettó....og plís, minnið mig á að fara ekki aftur í búð fyrir jólin! Bílastæðin voru troðfull og ys og þys út af engu...halló, eru ekki ennþá 17 dagar til jóla???? Held að neysluæði Íslendinga sé bara ekkert að minnka nema síður sé. Jæja, þegar hér var komið við sögu þá náði ég í Mikael í skólann og fór heim og settist þá niður fyrir fullri alvöru að skrifa þessa blessaða ritgerð. Var að klára kl.22:22 og er ansi fegin. Þá er "bara" eftir að lesa fyrir rökfræðiprófið 14.des...og vinna 3 daga í næstu viku :/
Já, meðan ég man... ég náði hugmyndasöguprófinu, ætla ekkert að flíka einkunninni, en hann KK hefur greinilega verið voða strangur því að einkunnirnar hjá þeim sem náðu voru á bilinu 5-7 og ég var þar á milli ;) bara 1 fékk 8 og engin þar yfir...og nokkrir féllu :(
Þarf að hætta, Mikael lamdi Kristján svo fast að hann meiddi sig í hendinni ....best að hugga aðeins og skammast...tók nú smá syrpu áðan, þar sem ég kíkti inn í stofu og sá að fína tillagningin mín síðan í gær var komin í uppnám!

Till next...adios

Jólamatur

Þetta var víst bara þreyta sem þjáði mig þarna á þriðjudaginn...og kanski smá kvef. Það er greinilega bara svona langt síðan að ég hef unnið eitthvað, að þetta fór alveg með mig að vinna heilan dag...greinilega mikið léttara að vera í skóla, og skemmtilegra ;) vildi bara vera á launum við að skólast, það væri alger snilld.
Í dag var jólamatur í vinnunni, hangikjöt með tilheyrandi og þá er öllu staffi FSA boðið í mat. Þetta er sem sagt "jólagjöf" yfirstjórnarinnar til hins allmenna starfsmanns. Allir glaðir en voða mikið að gera í eldhúsinu, eins gott að ég ákvað að vinna og algerlega bjarga þeim, hefðu ekkert ráðið við þetta án mín ;) já, fyrst að það segir þetta enginn annar þá segi ég þetta bara;). Ég vann frá 8-14 nennti ekki að vera lengur og fór heim og lagaði til í stofunni og núna sést í stofuborðið! En það er eitthvað sem hefur ekki gerst síðan í haust. Ætla bara að skúra yfir gólfið á eftir og innsigla svo stofuna fram til jóla :) verst að það er ekki hurð á henni sem hægt er að loka....hummm, kanski væri rafmagnsgirðing ágæt!
Annars ætlaði ég nú að reyna að byrja á þessari ritgerð, sem ég þarf að skila 14.des. en draslið í stofunni var bara farið að flæða um alla íbúð...eða var kanski draslið í íbúðinni farið að flæða inn í stofu...ekki gott að segja. En nú er amk stofan fín :) þótt restin sé eins og svín.
Planið núna er þá sem sagt að skrifa ritgerðina á morgun, taka smá pásu milli 9:30-11:00 og fara í andlitsbað, lit og plokk, halda svo áfram með ritgerðina og helst klára hana fyrir kvöldið. Vona bara að planið haldist...er ekki með plan Bé!

Till next...adios

Vinna sem þarf að sinna

Kræst! Úff púff dagur í dag. Var að vinna, í gömlu eldhús vinnunni minni, frá 8:00-16:00, lét svo Kristján plata mig í BT til að kaupa "skógjöfina" fyrir jólasveininn. Hann Kristján gerði nefnilega samning við jólasveininn fyrir ca.2 árum, að í stað þess að fá 13 sinnum eitthvað smotterí, þá fengi hann bara einn "veglegan" pakka. og þar sem jólasveinninn var viss um að hafa nóg að gera þegar hin alvöru skóvertíð byrjar og Kristján alveg búin að sjá út vænlegan pakka, þá var bara drifið í þessu.
Þegar heim var komið, þá helltist yfir mig heljarinnar þreyta! Ég lognaðist útaf í sófanum og lá þar nánast meðvitundarlaus til að verða 8. Þá fannst mér ég verða að sinna eitthvað næringarmálum fjölskyldunnar og eldaði lasagna að minni alkunnu snilld. En viti menn, Mikael vildi bara kornflögur og Kristján borðaði hummmm kanski 2 bita og var þá saddur. Hefði bara alveg geta sleppt eldamennskunni í kvöld.
Núna sit ég hér með hausverk og almennan slappleika og er að gleypa í mig hressingu (borðaði smá mat jú) en hressingin er í töflu formi, Omega 3-6-9, vítamín með steinefnum, hvítlaukstöflur og einhver lítil rauð pilla, bólgueyðandi og verkjastillandi. Þegar ég verð búin að koma þessu niður ætla ég beint í rúmið og vonast til þess að komast í vinnuna í fyrramálið.
Annars er nú lífið samt alltaf jafn dásamlegt :)

Till next...adios

Próf vinna

Jæja, þá er ég búin í prófinu í hugmyndasögunni, vona bara það besta, mér tókst amk að skrifa 12 bls. á 3 klst. og vona bara að eitthvað vit hafi verið í þessu!
Var að prenta út rolluritgerðina, sem endaði með það virðulega heiti: "Áhrif íslensku sauðkindarinnar á íslenskt samfélag." vona að þetta sé nógu fræðílegur titill og vona að ég fái amk 5 fyrir ritgerðina! Það er að hellast yfir mig eitthvað kæruleysi, eða kanski bara þreyta, er farið að verða nokk sama hvað ég fæ í einkunnir bara ef ég næ!
Svo er ég að fara að vinna á morgun og hinn og hinn...og svo þrjá daga í næstu viku líka og tvo daga í vikunni þar á eftir. Svo frí jibbí :)
Þarf samt að hella mér út í aðra ritgerðarsmíð, en hún á að vera um umbyltingu á lífsháttum, efnahag og samfélagsgerð á Íslandi áð tímabilinu 1850-1950. Þessi ritgerð á að vera 2000-2500 orð og skila fyrir 14.des! Svo það er best að týna eitthvað til, svona á milli vinnu. Síðasta prófið sem ég fer svo í er 14.des. í rökfræði. Og það er bara krossapróf! Sem mér finnst ekki gaman. Svo er maður að heyra sér til hryllings að heilu haugarnir af fólki hafi fallið á þessu prófi í fyrra....krossa putta og vona það besta, já og kanski reyna að læra eitthvað undir það líka, það hjálpar ;)

Till next...adios

Veðurfar

Nú er veður ágætt hér á stór-Akureyrarsvæðinu, en virðist vera alveg kolvitlaust alls staðar annars staðar. Ekkert flogið í dag, og þar að leiðandi sýnum við ekki stuttverkið "Hlé" í Freyvangi í kvöld, af því að leikstjórinn/einn leikarinn er staddur í Reykjavík (þetta er sko sami maðurinn). Eitthvað var hann að brasa við að reyna að semja um hærri laun fyrir kennara, sem er náttúrulega tóm vitleysa, því eins og allir vita hafa þeir fín laun fyrir sama og enga vinnu (þetta er sérstaklega skrifað fyrir Öllu mágkonu;).Og svo á fólk náttúrulega ekki að vera að þvælast þetta um há vetur þegar allra veðra er von!
Verð að segja frá því, að ég hitti voða fræga leikkonu hér fyrir utan áðan, man bara ekki hvað hún heitir...hún kynnti sig samt og tók í höndina á mér, en það var ekki fyrr en ég kom inn sem ég fattaði að ég held að ég hafi ekki aulað nafninu á mér út úr mér. Spurning hvor er með stjörnustæla, fræga leikkonan eða ég ;)
Ég er reyndar ekki búin að vera alveg með fulla 5 (ekki einu sinni fulla 3) síðustu daga, (eins og allir sem voru að æfa með mér á miðvikudagskv.geta vitnað um) búin að vera hálf slöpp og asnaleg eitthvað. Verð samt alveg brjáluð ef ég er að fá einhverja pest!
Jæja, ætla að senda Sverri bró rolluritgerðina í tölvupósti og komast að því hvort að eitthvað vit leynist í þessu eða hvort ég þurfi að gera þetta allt upp á nýtt....reyna svo að lesa aðeins meira í hugmmyndasögunni, en það hefur gengið MJÖÖÖÖÖÖG HÆGT í dag.
Komst annars að því í gær að jólabrjálæðið er byrjað...öll bílastæði yfirfull hjá öllum búðum og fólk æðir um með brjálæðisglampa í augum. Þetta er besti tími ársins til að vera heima hjá sér með heitt kakó og BettýCrocker köku ;)

Till next...adios

Bara smá

Af því að mér þykir svo gaman að láta aðra vita hvað mér finnst ég vera dugleg og hafa mikið að gera, þá ætla ég að láta eftir mér að blogga í 3 mínútur.
Ég er búin að sitja í allan dag (fyrir utan það að fara í klippingu og litun, tók 2 tíma, og skreppa í búðina og elda mat og svoleiðis) og skrifa ritgerina miklu um Íslensku sauðkindina. Og ég get bara alveg sagt það að ég er búin að fá nóg af fjárkláða, sauðasölu og flestu sem varðar kindur fyrr og síðar. Er nú samt að spá í að skjótast í sveitina á morgum, plata Sverrir til að lesa yfir ritgerðina og hjálpa honum smá í staðin.
Svo við fyrsta tækifæri verð ég að byrja á að lesa fyrir hugmyndasöguprófið sem verður á mánudaginn, er jafnvel að spá í að taka aðra bókina með mér í rúmið á eftir og athuga hvað ég get haldið mér lengi vakandi. Var í þjóðfélagsfræðiprófi í gær, og gekk ekkert vel, og er ekkert að ýkja það, verð alveg himinsæl ef ég bara næ þessu prófi....krossa putta og vona það besta.
Jæja, ætla að fara með hugmyndasögubók nr.1 í rúmið, hafið það rosa gott krúttin mín :)

Till next...adios

Update

Bara örstuttar nýjustu fréttir...eða ekki fréttir.
Ég er að lesa eins og brjáluð kona undir próf á morgun (kanski ekki alveg brjáluð, hummm, væri þá varla að hanga á netinu ha) í þjóðfélagsfræði. Hann var alveg að tapa sér núna kennarinn og lætur okkur taka próf úr eftirfarandi köllum: Freud, Simmel, Cooley, Mead, Parsons, Pareto, Michels, Mannheim, Mills og Merton.
Bara það að lesa um Freud tók mig heilan dag, svo sendi hann póst daginn eftir að ég las um hann og sagði að það yrði mjög lítil áhersla á Freud!!!Argh.
Svo er ég að fara í viðtal upp í skóla á eftir, tala við kennarana í 1.bekk um hann Mikael minn ;) Vona nú bara að það hafi eitthvað lagast með orðbragð og slagsmál síðan síðast.
Svo ætla ég í saumaklúbb í kvöld, þannig að ég verð að reyna að vera dugleg að lesa í dag....hummm.
Það á annars að sýna stuttverkið "Hlé" sem við fórum með í Borgarleikhúsið í haust, í Freyvangi föstudagskvöldið 30.nóv. en þá er víst 1.des hátíð hjá menningarmálanefnd sveitarinnar. Er þetta nú víst gert vegna þess á Freyvangur (þ.e húsið sjálft) á 50 ára afmæli um þessar mundir.
Samt pínu asnalegt að hafa 1.des hátíð 30. nóv. sérstaklega þar sem 1.des er á lögbundnum dajmmdegi-laugardegi. Isss flisss þetta menningar.......eitthvað.
Já svo að ég er líka búin að vera dunda mér við æfingar á þessu litla verki "Hlé-i", en það var líka aðeins bætt við það nokkrum prumpubröndurum!
Gaman að hafa nóg að gera.
Eftir prófið á morgun og á fimmtudaginn þá þarf ég svo að gera eina ritgerð um íslensku sauðkindina því ég þarf að skila henni á föstudaginn og einnig þarf ég að lesa undir hugmyndasöguprófið um helgina, en það er á mánudagsmorguninn...So mutch to do, so little time ;)
Jæja, kanski ráð að fara að byrja á einhverju að viti.
Ha de bra...

Till next...adios

Fréttir!!!

Jæja, þá er einkunnin mín komin sem ég kvartaði svo mikið yfir að vera ekki búin að fá í síðasta bloggi ;)
Og vitið menn! Ég fékk 88 af 100!!!! Ég brosi í nokkra hringi og er varla að trúa þessu! Tékkaði svona 18 sinnum áður en ég var orðin nokkuð viss um að ég væri ekki að sjá ofsjónir ;)
Ég vissi nú að mér hefði gengið sæmilega á prófinu, en hefði gískað og verði mjög ánægð með 7 ! En það er náttúrulega alger snilld þegar manni tekst að koma sjálfum sér á óvart :)
Svei mér þá, ég held bara að ég sé gáfaðri en ég held ;) hehe.
Svo er ég búin að vera dugleg í morgun, þambað grænt-ginseng te og kaffi til skiptis og er svona nánast að verða búin að sigrast á kaflanum um Freud (ákvað sem sagt að lesa í þjóðfélagsfræði).
En ekki dugir að slóra, þarf að hella upp á meira kaffi og lesa og lesa og lesa :)
Njótið dagsins, lífið er dásamlegt :)

Till next...adios

Arrrrrrgh

Reiti hár mitt og skegg...er ekki ennþá búin að fá þessa blessuðu einkunn í IBH0173 sem ég er búin að bíða eftir leeeengi. En þetta heitir Iðnbylting og hattvæðing á íslensku-skiljanlegu máli og var 50% próf. Alveg óþolandi að fá ekki einkunn á réttum tíma, sérstaklega þegar kennarinn tilkynnir hátíðlega yfir bekkinn sl. mánudag að þetta komi inn fyrir hádegi á þriðjudag. Sendi svo reyndar póst um hádegið í gær (miðvikudag) um að þetta kæmi ekki inn fyrr en seint á miðvikudagskvöld. En núna er klukkan 08:03 á fimmtudagsmorgni og EKKERT komið.:(
En jæja, ætli ég reyni bara ekki að forðast rúmið mitt í dag og byrji á ritgerðinni um Íslensku sauðkindina, eða lesi 2 bækur í hugmyndasögu eða 2 bækur í þjóðfélagsfræði eða 3 bækur um rökfræði....hummm, get ekki ákveðið mig á hverju ég á að byrja ;/ Sennilega best að byrja bara á kaffi ;)

Till next...adios

Stundum...

þegar ég hlusta á fréttir, þá dettur mér í hug að það hljóti að vera 1.apríl. En þá staldra ég aðeins við, hugsa um veðurfar, hvað sé nýbúið að vera að gerast í nútíðinni ( t.d er nýlega búið að taka slátur?, eða nýbúin að vera jól? og þh.) og kemst þá oftast að því að 1.apríl er langt undan eða langt að baki.
Eina svona frétt heyrði ég í útvarpinu í dag, ég var að keyra heim úr skólanum og má þakka fyrir að hafa ekki keyrt á, svo hissa og hneiksluð var ég.
Eins og mörg dæmi sanna, þá láta konur oft á tíðum mjög undarlega, og virðast þessi undarlegheit oft ágerast með völdum og frama.
Já, nú er eitthvað kerlingar grei farið að mótmæla því að vera ráðherra!!!! Ekki það að hún vilji ekki vera ráðherra, heldur bara ekki ....herra. Maður segjr nú bara herra minn trúr! Og þessi keeeeeling kemur með þau dásamlegu rök að karlmenn getir ekki verið "frú" og þar að leiðandi getur kona ekki verið "herra" eða ráðherra eins og í tiltekna dæmi. (Sennilega að sýna snilli sína í rökfræði).
Það á náttúrulega bara að taka svona konur og setja þær í búr á Austurvelli öðrum til vítis og varnaðar.
Hvernig í óskupunum eiga konur að ná fram jafnréttindum með svona forpokaða vitleysisbullara við stjórnvöld? Ég veit ekki betur en að ráðherrar séu viss stétt, svona svipað og bændur, læknar , prestar, ruslakallar og s.frv. Reyndar þarf ekki að fara í skóla og læra til ráðherra, enda yrði það sennilega alltof flókið dæmi og gríðarlegt atvinnuleysi í þeirri stétt.
Ég hef amk ekki séð margar konur í læknastéttinni vilja láta breyta starfsheitinu "læknir" í "læknínu" eða eitthvað þessháttar. Enda hver myndi vilja fara til "læknínu" ef maður væri eitthvað veikur? ;)
Nei, þetta finnst mér jafn heimskulegt og þegar jafnréttiskellingin, hérna um árið, vildi láta setja græna-kallinn á umferðarljósunum í pils!
Er ekki líka mun mikilvægara að beita sér fyrir málum eins og hugsa betur um gamla fólkið, stytta biðlista á sjúkrahús, breyta námslánakerfinu þannig að bankarnir hætti að stórgræða á námsmönnum og fleira og fleira...nei, en þessi kelling fer að gera veður út af "herra".
Ekki myndi ég kjósa svona konu á þing. Enda finnst mér og hefur alltaf fundist að það sé persónan, persónuleikinn og framkvæmdarkrafturinn sem skiptir máli ekki kynið.
Kanski bara ég sem er svona forpokuð....OR NOT!

Till next...adios

Tímasetning

Búin að bíða eftir einkunn síðán um hádegið í dag. Kennarinn sagði í gær að einkunnirnar kæmu inn fyrir hádegið í dag, en þær eru ekki ennþá komnar, er búin að tékka oft og hef ekki getað einbeitt mér að neinu öðru í dag (smá afsökun fyrir að hafa ekki nennt að gera neitt).
En þetta kemur vonandi inn fyrir kvöldið!
Allt annað; Mikael er í afmæli hjá bekkjarbróður svo það er voða rólegt hérna núna...en það verður kanski ekki alveg jafn rólegt á eftir. Ég þarf nefnilega að taka hann aðeins í gegn þegar hann kemur heim! Fékk bréf frá kennaranum hans í dag, þar sem mér var tjáð að honum hefði lent saman við annan strák í frímínútunum í dag. Hann vildi vera með í einhverjum leik, en þessi strákur bannaði honum það (eða sagði að hann gæti ekki verið með) og þá henti Mikael steini í átt að stráknum. Þá sagði strákurinn að hann ætlaði að segja skólaliða frá og þá sagði Mikael þessa hummm "gullvægu" setningu: "mér er alveg sama, þú ert bara hálfviti"!
Það var nefnilega sendur póstur á foreldra allra 1.bekkinga í gær, og þar var sagt frá því að mikið hefði borið á ljótu orðbragði og slagsmálum meðal krakkanna í haust. Og nú á að fara að senda foreldrum póst heim ef eitthvað bjátrar á og ef foreldrar hafa fengið 5 pósta senda heim útaf barni sínu, þá eiga þeir að gjöra svo vel að mæta í skólann og vera þar eins og kennurum þykir ástæða til!!! Og hananú! Nú reikna ég með að ég sé aðeins 4 póstum frá því að þurfa að mæta í skólann með Mikael ;/

Till next...adios

Föstudagur

Jæja, þá er bara venjulegur dagur í dag, föstudagur og helgin að skella á. Jónas Hallgrímsson átti víst afmæli þennan dag og hefði orðið 200 ára eða eitthvað svoleiðis. Ég er búin að vanda málfar mitt sérstaklega í dag, það sem það er dagur íslenskrar tungu og mun það gjöra áfram.
Minn eldri sonur hann Kristján er að fara til fögnuðar í kvöld, það ætla að hittast nokkrir félagar í húsi eins þeirra, borða flatbökur, drekka límonaði og horfa á kvikmynd um galdradreng af engilsaxnensku bergi brotinn sem ku heita Harry Potter. Ég vona bara að þetta sé ekki yfirskyn og í reynd sé brjáluð gleði með stúlkum og alkahóli ;) hehe, nei ég hef annars engar áhyggjur af því, þar sem sonnur minn er prúður drengur og einnig hans kumpánar.
Svo nú er ég að sjóða fisk, handa mér og Mikael, svona í tilefni dagsins ;)
Ég gerði annars það í dag sem ég hef eigi gjört áður, en það var að kaupa jólagjöf fyrir mánaðarmót nóv.-des. Og meira að segja hugsa ég að ég hafi hingað til ekki keypt jólagjafir fyrr en í fyrsta lagi eftir 15.des. En núna dreif ég mig í verslun og keypti jólagjöf handa Mikael og meira að segja pakkaði henni inn í jólapappír! Mjög ánægð með sjálfa mig núna :)
Svo byrjaði ég líka á jólahreingerningunni í dag, þar að segja, það var farin pera í stofunni og ég skipti um og þvoði ljóskúpulinn í leiðinni :) og þar með er ég byrjuð að gera hreint, þótt að ég stór efi að ég haldi því áfram fyrr en í fyrsta lagi eftir próf, eða um 15.des.
Svo núna liggur fyrir að gera eina ritgerð um Íslensku sauðkindina og lesa fyrir próf á mánudaginn. Ég fékk reyndar til baka í dag efnisgrindina af ritgerðinni minni, þar hafði kennarinn sett út á það, að heiti ritgerðarinnar: "'Íslenska sauðkindin fyrr og nú" væri "frekar ófræðilegur titill" svo ég auglýsi hér með eftir fræðilegri titlum :) og svo sagði ég að ég: "myndi taka mjög jákvæða afstöðu til Íslensku sauðkindarinnar" og það þótti honum einnig: "frekar ófræðilegt að orða þetta svona". Hummm, ég er greinilega bara frekar ófræðileg! En ég fékk a.m.k að halda áfram með ritgerðina mína, verð bara að verða svolítið fræðilegri.
Jæja, ætla að draga ýsuna upp úr pottinum og fara svo að lesa um efnahagsþróun á Íslandi ;)
Hafið það gott.

Till next...adios

Afmæli :)

Ég á afmæli í dag
ég á afmæli í dag....og svo frv.

Það er orðin hefð hjá mér í þessu bloggi að óska sjálfri mér til hamingju með afmælið og ég geri það hér með :) Til hamingju með afmælið ég sjálf :) tata!
Þetta er nú annars búinn að vera fínn dagur.
Fékk slatta af "til hamingju með afmælið" sms-um, fékk afmælisgjafir frá strákunum mínum; myndaramma og kertastjaka. Fékk afmælisgjafir frá 2 bekkjarsystrum mínum, kók og toffy crisp frá annari og crispís-nammistöng frá hinni ;) þær eru greinilega að reyna að fita mig!
Svo fórum ég og Friðbjörg á Greifann með strákunum okkar og þau (hún og guttinn hennar) gáfu mér voða flotta könnu sem á stendur: "I love sex". Á Greifanum fékk ég mér kengúrukjöt, og það var hrein snilld :) rosa gott, mæli með því. Og núna kl.19:20 sit ég hér við tölvuna mína (djásnið mitt), örlítið rauðvínslegin, og rita þetta blogg. Hugsa að mesta fjörið sé búið í dag...hehe.
Man að á sama tíma í fyrra var allt fullt af snjó, núna er 10° hiti. Á sama tíma í fyrra var ég á leiðinni niðrá Bláu könnu og sat þar í góðum félagsskap og sötraði hvítvín, núna er ég búin að drekka 2 rauðvínsglös og komin heim....farin að geyspa og hugsa um rúmið mitt. Ætli þetta sé aldurinn??? Nei, neita að viðurkenna það, ætla að skella í mig kaffi og reyna að vaka a.m.k til kl 23:00 hehe...góðar stundir :)

Till next...adios

jamm

Veit næstum ekki afhverju ég loggaði mig inn á bloggið. Er alveg lens og veit ekkert hvað ég á að skrifa um hummm...
Fékk reyndar "skemmtilegan" póst inn um lúguna hjá mér áðan: jólakort frá Barnaheill, sem maður ræður hvort maður borgar eða ekki (en hver hefur samvisku í að nota þau og borga ekki...hummm ekki alveg jólaandinn) og svo bækling "Hvernig get ég aukið árangur minn í fjármálum"? Ja há! Þegar stórt er spurt....annars er þetta boð frá SPRON um að koma á þessa fínu ráðstefnu um fjármál. Þar verður manni eflaust sagt að spara og borga niður skuldir, og verð ég bara að segja að ég nenni ekki að eyða 3klst. af dýrmætum degi í að hlusta á það. Enda eina ráðið fyrir mig til að auka árangur í fjármálum það að hætta í skóla og fara að vinna ;) en það ætla ég sko ekki að gera.
Verð samt að koma því að, að sl. mánaðarmót voru mjög merkileg í mínu lífi (talandi um fjármál) en það er í fyrsta sinn, síðan OMG veit ekki hvað langt síðan, (þegar ég fór að búa með karlmanni, tja, svona 21.árs) sem ég er ekki með yfirdrátt á heftinu mínu...heitir reyndar debetkortareikningur núna, hehe, þykir eflaust hallærislegt að tala um hefti ;)
Já, mér tókst sum sé að greiða loksins niður 100 ára heimild!
Og þar með lýsi ég því yfir að ég sé búin að gera mitt í bili til að auka árangur minn í fjármálum ;)
Núna bíð ég bara róleg eftri því að peningarnir fari að raðast inn á reikninginn minn :) hlýtur að vera í réttu hlutfalli við þessa yfirdráttar-vexti sem maður var alltaf að borga...hummm ekki satt? ;)

Tíminn líður ógurlega hratt þessa dagana, og maður fær nettan fiðring í magann þegar maður áttar sig á því að það eru aðeins eftir rúmar 2 vikur af skólanum!!! Kræst, og þá koma próf og ritgerðarskil og alles...úff, nei þetta verður annars bara gaman. Ætla að reyna að vinna eitthvað í desember, en annars bara að slæpast í fríi með guttunum mínum og baka kanski eina sort eða svo ;)
Maður verður farinn að syngja með henni Svölu Björgvins áður en maður veit af: "Ég hlakka svo til, ég hlakka alltaf svo til..."
Rosalega er ég oft búin að skrifa maður í þetta blogg mitt! Uss, maður, nú er mála að hætta maður og drífa sig á einn fyrirlestur eða svo :)

Till next...adios

Slappleiki

Það varð lítið úr þessari fyrirfram plönuðu partý-djamm-helgi!
Hélt ég væri bara haldin ógurlegri leti á laugardaginn og lá mest og góndi á imbann, en þegar ég ætlaði að rífa mig upp úr þessu ógurlea sleni um kvöldið og henti mér í sturtu, þá komst ég að því að þetta var ekki bara leti. Ég rétt náði að klára að skola sjampóið úr hárinu vefja um mig handklæðum og skríða (næstum bókstaflega) upp í rúm! Það var næstum liðið yfir mig og mér leið hræðilega illa, hausinn að springa og allt í volli. Komst svo að því að ég var komin með hita og lá svo bara og fann beinverkina læðast um öll mín bein. Ætli ég hafi ekki legið í rúminu í 2 tíma þegar ég hafði safnað nægjanlegum kröftum til að fara í náttföt og bursta tennurnar :/
Sunnudagurinn var einnig "hvíldardagur" og ég í rúminu nánast allan daginn, eða það sem ég komst upp með. Strákunum fannst þetta hreint ekki skemmtileg helgi og reyndar mér ekki heldur. En nú er komin mánudagsmorgun, ég er ögn hressari og ætla að reyna að skrölta í tíma á eftir (er bara ekki nógu gáfuð til að geta sleppt úr tímum) en hann Kristján minn er tekinn við og liggur nú í rúminu með dúndrandi hausverk. Mikael var aftur á móti rekinn af stað í skólann með harðri hendi og ég vona að hann sleppi við þessi óskup!
Svo það var hvorki bekkjarpartý né Páll Óskar hjá mér þessa helgina :(
Gengur vonandi betur næst, og núna ætla ég að hætta þessu væli...

Till next...adios

Letistuð

Ætla bara að lýsa yfir leti-stuði! Nenni ekki neinu og er meira að segja ennþá í náttfötunum.
Strákarnir hamast, slást og hamast meira og ég bara sit í eldhúsinu og væflast um veraldarheiminn og fylgist með fólki úr fjarðlægð!
Það er svo bekkjarpartý í kvöld og svo stefnan að fara í Sjallann á Pál Óskar á eftir, en ég verð að viðurkenna það að ég nenni ómögulega að fara á hvorugan staðinn. Ekki það að ég haldi ekki að það verði gaman, heldur bara það að ég er löt og vill bara vera heima í ólátunum hér ;)
Kannski eru þetta bara eftirköst eftri kabarett annirnar, sem tóku náttúrulega 2 vikur og ég var mjög lítið heima við þann tíma.
En kanski verð ég svo bara voða hress og fersk í kvöld, dríf mig í partý og skoppa svo um með "hinum krökkunum" undir dillandi tónlist Palla litla ;).....þótt að núna sé ég í besta falli til í að fara í sveitina og hjálpa Sverrir bróðir að svíða svið ;)
Jæja, það eru farin að hrúgast hér inn annara manna börn, svo ég kann ekki við annað en að klæða mig, kanski ég setji líka í þvottavél og geri eitt verkefni eða svo.

Ætlaði að setja inn eina mynd í tilefni snjókomu og hugmyndaleysis míns, en upp kom vandamálið: bX-6tj0s5 svo það verður að bíða betri tíma.

Till next...adios

Eftir 2 ár...

Ætla ég að setja þetta inn á bloggið mitt (er ekki alveg orðin nógu gömul ennþá;)
Fékk þetta sent og finst þetta sniðugt, njótið vel :)
Hugleiðing frá Andy Rooney:

Eftir því sem ég eldist, met ég mest konur yfir fertugt og her eru nokkrar ástæður fyrir því:

Kona yfir fertugt mun ekki vekja þig um miðja nótt og spyrja þig "hvað ertu að hugsa?"
Henni gæti ekki verið meira sama.

Ef kona yfir fertugt vill ekki horfa á leikinn með þér vælir hún ekki yfir því.
Hún gerir eitthvað sem hana langar til og yfirleitt er það áhugaverðara en leikurinn.

Konur yfir 40 eru virðulegar í framkomu. Þær fara sjaldan í öskurkeppni við þig í óperunni eða á fínum veitingastað.
Nema þú eigir það skilið, þá hika þær ekki við að skjóta þig ef þær halda að þær komist upp með það.

Eldri konur eru örlátar á hrós, oft óverðskuldað. Þær vita hvað það er að vera ekki metin að verðleikum.

Konur verða skyggnar með aldrinum. Þú þarft aldrei að viðurkenna misbresti þína fyrir þeim.

Þegar þú getur litið framhjá einni eða tveimur hrukkum er kona yfir 40 langtum kynþokkafyllri en yngri kynsystur hennar.

Eldri konur eru hreinar og beinar. Þær segja þér eins og skot að þú sért asni ef þú hagar þér sem slíkur.
Þú þarft aldrei að fara í grafgötur með hvar þú hefur þær.

Já, við dásömum konur yfir fertugt af mörgum ástæðum.

Því miður er það ekki gagnkvæmt. Því fyrir hverja glæsilega, smarta og vel greidda konu yfir fertugt, er sköllóttur,
vambmikill forngripur í gulum buxum gerandi sig að fífli fyrir 22gja ára gengilbeinu. Konur, ég biðst afsökunar.

Til allra þeirra karla sem segja; "Afhverju að kaupa kúna þegar þú getur fengið mjólkina frítt?" þá eru hér nýjar upplýsingar:

Nú á tímum eru 80% kvenna á móti giftingum.

Hvers vegna?

Vegna þess að konur gera sér grein fyrir að það borgar sig ekki að kaupa heilt svín þótt þær langi í smá pylsu!

Andy Rooney

Till next...adios

Eftir á að hyggja...

...var þetta bara með eindæmum góður kabarett. Og til að rökstyðja mál mitt enn frekar, þá hugsa ég að aldrei áður hafi þurft að sleppa svona mörgum góðum atriðum, eingöngu vegna tímaskorts. Samt var kabarettinn 80 min. sem er alveg í lengra lagi.
En þetta tókst bara ljómandi vel, bæði kvöldin, ég sló í gegn og var best eins og alltaf ;) (hehe...sko, það er enginn annar að hrósa mér svo það er best að ég geri það sjálf) hógværðin uppmáluð!
Eftir kabarettinn á laugardagskvöldinu var tekið hraustlega á því og drukkið, daðrað og dansað langt fram á nótt (ekkert endilega í þessari röð samt). Voða gaman, enda var maður að skemmta sér með svo skemmtilegu fólki að þetta gat ekki orðið annað en skemmtilegt :)
Svo átti Árni næst-litli bróðir afmæli í gær :) til hamingju með það enn og aftur! Orðinn 35 ára kappinn, hann er alltaf við það að ná mér á þessum árstíma, en ég næ að jafna bilið aftur 10 dögum seinna ;)
Jæja, ætla að fara að koma mér og strákunum í rúmið, þeir búinir að snúa sólarhringnum við, eftir vetrarfrí síðustu tvo daga, og ég er þreytt eftir úrbeiningu í sveitinni í dag!
Býð góða nóða nótt og lifið heil :)

Till next...adios

Smáauglýsingar

Það er kabarett í kvöld og annaðkvöld.
Í kvöld byrjar kabarettinn kl.20:30 og kaffi og með´í
Annaðkvöld byrjar kabarettinn kl.21:30 og ball á eftir og allir geta haft eitthvað með sér til drykkjar ;)
Annars heitir kabarettinn því "skemmtilega" nafni "Brátt sáðlát"...en gengur samt undir heitinu "í beinni" sem fær mann ekki til að roðna jafn mikið þegar maður segir fólki á förnum vegi hvað sé um að vera í Freyvangi.
Allir að mæta í Freyvang :)
Svo er ég sjálf með fiskabúr til sölu, 56 L og það fylgja allir fylgihlutir, sandur, dæla, hitari, og skrauterí, sem sé allt nema fiskar og vatn!
Fiskarnir mínir fengu nefnilega fiskaflensu og drápust og ég bara nenni ekki að fara í meira fiskeldi í bili. En búrið er flott og eigulegt :) fæst á algeru afsláttarverði eða kr. 10.000

Ætla að fara að lesa núna í Iðnbyltingu og kíkja á línurnar mínar fyrir kabarettinn ;)
Lifið heil.

Till next...adios

Vetur

Nú er það svart maður...allt orðið hvítt!
Nú bara snjóar og snjóar. Ég dreif mig áðan og lét skipta um dekk á bílnum, þar var lööööööng röð og ég greinilega ekki sú eina sem tók þessa ákvörðun með dekkjaskipti. En þetta hafðist á klukkutíma sem verður bara að teljast gott miðað við örtröðina!
Ég get þá a.m.k keyrt fram í Freyvang í kvöld á kabarettæfingu ;) nennti ómögulega að labba.
Talandi um Kabarett, þetta er svona að mjakast, sem er líka eins gott, þar sem sýningar eru um næstu helgi! Hummm....vonandi verður hægt að renna þessu öllu í réttri röð með söngvum í kvöld.
Ofninn inn í svefnherberginu mínu er búinn að vera að stríða mér undanfarið, hefur verið alveg ískaldur og ekkert vilja hitna sama hvað ég snéri hitastillinum. Svo fékk ég það skrítna ráð um daginn að berja hann bara með hamri! Í dag ákvað ég svo að þetta dygði ekki legur (var einhver kuldi í mér að sjá allan snjóinn) og ég reif upp hamarinn og barði ofninn duglega. Ekki leið á löngu áður en að ofninn hitnaði og nú er hann funheitur og fínn :) segið svo að ofbeldi borgi sig ekki....amk gagnvart ofnum ;)
Jæja, þarf að skreppa eftir honum Mikael í skólann, ekki hægt að láta barnið labba í "stórhríðinni".

Till next...adios

Hjálp!

Ég veit ekki hvort að heiti síðasta bloggs "á hlaupum" hafi verið betur geymt til dagsins í dag, en tel jafnvel að svo sé, en þó í allt annari merkingu.
Ég vaknaði í einhverju bjartsýniskasti í morgun, ákvað að skella mér í vetrarhlaup UMFA sem ku eiga að vera í hverjum mánuði í vetur.
Hef nú reyndar ekki verið dugleg að hlaupa undanfarið, en taldi það nú litlu máli skipta og dreif mig af stað. Þarna var slatti af fólki, maður fékk að borga 500 kr. og fékk númer til að næla í sig, minnti um margt á alvöru hlaup. Svo var skokkað af stað....og þar komst ég að því, að í þessi hlaup mæta greinilega aðeins geðsjúkir hlaupafíklar! Eftir ca. 5 min sá ég ekki nokkurn rass lengur. Skokkaði framhjá nokkrum litlum strákum og einn spurði í sakleysi sínu: "ert þú síðust?" ég svaraði já og másaðist áfram. Þegar ég var rúmlega hálfnuð, og löngu búin að mæta öllum sem voru þá á bakaleiðinni, fékk ég þennan ótætis krampa í lærið, en harkaði samt af mér og kláraði hlaupið, á 1,03 klst. ekki alslæmt, en þegar kom í mark þá var eins og það væri sko verið að bíða eftir mér, númerið rifið af mér, virtist ekki vera nein tímataka (tók sko tímann sjálf) og drykkjarföngin sem boðið var uppá löngu búin! Ég skreið inn í bíl, ók heim og haltraði í sturtu. Ákvað að hætta þessum hlaupum og í besta falli skokka ein á mínum hraða og eftir minni getur og þegar mig langar....ekki borga 500 kall fyrir ekki neitt! Og til að sanna það fyrir mér og mínum að þessu hlaupastandi verði haldið í algeru lágmarki, þá fór ég í vídeóleigu, leigði 3 myndir, keypti nokkra poka af snakki, gos og NAMMI :)
Svo nú verður setið og étið horft og legið með lappir upp í sófa. Er reyndar hrædd um að ég hafi tognað eða eitthvað, er a.m.k alveg að farast í fætinum, haltra út um allt og væli, enda vælukjói mikill ;)

Till next...adios

Á hlaupum

Rétt svona að láta vita af mér, er farin að verða pínu löt við að blogga, finnst ég líka alltaf að vera að skrifa um það sama, sem er aðallega um próf og einkunnir! Svo er ég líka að þykjast hafa voða mikið að gera, sem er, svona ykkur að segja, ekki láta það fara lengra, aðallega í nösunum á mér. Ligg í leti helling, eginlega allt of mikið stundum. Nú er ég t.d búin með einn kúrs sem var alltaf eftir hádegi á þriðjudögum (4 tíma) og fyrir hádegi á fimmtudögum (4 tíma) og er ekki alveg að höndla þetta nýfengna "frelsi". T.d í gærmorgun, þá ýtti ég strákunum út fyrir dyrnar, lokaði og skreið aftur upp í rúm og lá þar zzzzzzz-andi, þar til um 11 leitið. Skammaðist þá í búð og fór með bílinn á verkstæði og rétt náði að mæta í tíma á réttum tíma sem byrjaði 12:35 !
Í dag hins vegar er ég ekki búin að vera alveg eins löt, sem er alfarið út af því að ég þurfti að mæta í skólann kl.8:10 ...reyndar sátum við svo heillengi áðan bekkjarfélagarnir og kjöftuðum um allt og ekkert...En ég hafði það af að fara með bílinn í skoðun (fékk bara eina athugasemd, hann heyrði eitthvað hljóð í hjólalegu, held að þetta hafi bara verið hljóðlega og hann haft ofheyrnir) en ég má amk keyra bílinn í ár í viðbót, vona bara að bíllinn vilji það líka ;)
Svo fór ég í apótek og keypti heilu hlössin af hálstöflum, því hann Kristján minn er búinn að vera með hálsbólgu í nokkra daga og í morgun var hann alveg raddlaus og slappur og er núna bara að horfa á Simpsons í "eymd" sinni. Var alveg "miður sín" að komast ekki í skólann. Ætla að troða mig Omega 3-6-9 og Spektro Multi-Vita-Min og vona það besta.
Er svo að fara á stjórnarfund og kabarettæfingu í kvöld, þarf að lesa eitt handrit eða svo og svo þarf ég líka að lesa helling í "hnattvæðingu og iðnbyltingu" fyrir 50% prófið á mánudaginn...púfff, best að byrja á einhverju!

Till next...adios

Lestur og fleira

Jæja, ekki dugir að skrifa ekki neitt í bloggið breitt ;)
Ákvað rétt aðeins að kíkja hérna inn og skrifa niður örfá orð. Er að myndast við að reyna að lesa fyrir þjóðfélagsfræði-próf á morgun. En það verður um þá kappa Max Weber og Emile Durkheim. En þetta voru miklir spekingar á sínum tíma og eru víst enn ;) Durkheim kallaður faðir félagsfræðinnar...svona ef einhver er einhverju nær!
Annars verð ég að reyna að vera dugleg að lesa í dag, því ég er að fara í saumaklúbb í kvöld. En það verður bara ágætt að líta upp úr bókunum og kjafta við skemmtilegu klúbbkonurnar mínar :)
Annars er nú ekki eins og ég hafi verið með nefið ofaní bókunum síðustu daga....usss, fór á opnun hjá Listasafninu með vinkonu minni á laugardaginn (þar var í boði viskí í engiferöli), svo kíkti ég á kaffihús með kunningjakonu minni frá Rvk. (og við fengum okkur hvítvín) og svo síðan en ekki síst, þá dreif ég mig á árshátíð FSA um kvöldið! En eins og glöggir menn muna þá er ég hætt að vinna á þeim "ágæta" vinnustað, en fyrrverandi samstarfs konur mínar voru svo elskulegar að drífa mig með sér :)
Fínn matur og góð skemmtiatriði og svo dansaði ég eins og fimmtán fávitar laaaaaaangt fram á nótt. Er líka með marbletti ofaná ristunum eftir troðning fullra keeeelinga. Ég var sko ekkert drukkinnnnn...hikk!
Páll Óskar ofurkjútíkrúttíbolla var að DJ-ast og hann er bara snilld. Meira að segja eru gullskórnir mínir farnir að láta á sjá eftir allan dansinn!
Svo fór ég í sveitina á sunnudaginn ( bjargaði þynnkunni minni) og hjálpaði Sverrir bró að reka inn og draga lömbin frá, og flest þeirra farin sína hinstu ferð til Húsavíkur núna...
Og svo....var hringt í mig í gær og ég "plötuð" til þess að vera með í Kabarett, fór á fyrstu æfingu í gærkveldi og kom heim með heilan bunka af texta....og ég sem ætlaði bara að vera eitthvað oggopínupons með, ef þá eitthvað ;)
En þetta verður nú yfirstaðið eftir 2 vikur, svo isss flisss....verður gaman :)
Jæja, þá eru nýjustu fréttir og stóratburðir komnir á stafrænt form, nú verð ég bara að lesa meira og meira og meira, meira í dag en í gær ;)

Till next...adios

Áttu áttu?

Já, ég á áttu :)
Verð að monta mig aðeins, var að fá út úr þjóðfélagsfræðiprófi áðan, sem gildir 30% af lokaeinkunn. Og ég fékk 8 !!! Ég rak upp siguröskur (ræstum því sigurrós) fór tvöfalt heljarstökk aftur á bak og flikk-flakk af gleði :) Vissi nefnilega ekkert hvernig mér gekk í þessu prófi og margir voru voða svartsýnir út í þetta próf. En núna heldur kennarinn áfram að vera krútt og ég reyni að halda áfram að lesa fyrir næsta próf, sem er reyndar bara rétt handan við hornið....
Reyndar fékk ég líka 8 fyrir smáverkefni í vinnulagi, heimildarskráningu, sem ég hélt ég væri fallin í , gerði reyndar nokkrar mjög klaufalegar klaufavillur, en það var kanski vegna þess að ég kláraði það verkefni eftir að ég kom heim af tónleikum fimmtudagskvöld og var búin að fá mér tvo bjóra. Dundaði mér við þetta eitthvað fram á nótt og fannst það fínt ;)
Mæli samt ekki með mikilli verkefnavinnu eftir bjórdrykkju....hummm.
Annars var ég í prófi í gær, í iðnbyltingu og hnattvæðingu, var aðallega spurt út í styrjaldirnar, bæði þá fyrri og síðari og kalda stríðið.
40% af prófinu voru krossaspurningar, og ég veit að mér gekk ekki vel í þeim, ég er bara alveg hræðileg mað þessa krossa! Það er svo auðvelt að rugla mig, svo hvarflar heldur ekki að mér að eitthvað af svarmöguleikunum sé bara uppspuni og því er ég endalaust að velta þessu fyrir mér og enda oftast á vitlausum svörum. Hinar spurningarnar fannst mér allt í lagi.
Annars virðist fólk líka vera eitthvað fúlt út í þetta próf, því það er búin að vera stöðug umræða um það á netinu síðan það var í gær, allir að segja að þetta hafi verið ömurlegt próf og úr efni sem enginn var búinn að lesa um....hummm.
En burtséð frá því hvernig mér gekk á þessu prófi, kemst að því á mánudaginn sennilega, þá er ég orðin mun fróðari um styrjaldirnar en ég var áður og finnst voða gaman að lesa um þetta allt saman. Væri reyndar líka voða fegin ef ekkert væri prófað úr þessu ;) en það er önnur saga ;)
Jæja, af því að mér gekk svona vel í þjóðfélagsfræðiprófinu, þá er ég að hugsa um að leggja mig aðeins ;) þarf ekki að mæta í skólann fyrr en um hádegið og það er kalt úti!
Held jafnvel að það sé kominn vetur! Þarf að fara með bílinn á verkstæði, í skoðun og í dekkjaskipti, en það er seinna tíma vandamál...á svona tímum væri gott að eiga kall ;)

Till next...adios

Dugnaður

Verð bara að segja ykkur frá því hvað ég er búin að vera dugleg í dag.
Byrjaði á að fara í Hagkaup með strákana og keypti þar tvennar buxur á Mikael og eina peysu. Fannst ekki ganga lengur að hafa hann alltaf í sömu gallabuxunum! Hann á sko alveg fleiri buxur, er bara á því skeiðinu núna að hann vill bara ganga í gallabuxum og var ný búinn að eyðileggja tvennar.
Svo það merkilega: Ég fór á skauta með strákana!
Jamm, og skautaði eins og ekki skautadrottning í klukkutíma!
Hef sko ekki stigið á skauta í púfff....meira en áratug, og þetta reyndi alveg á alla mína fótavöðva.
En það var voða gaman hjá okkur og Mikael var bara orðinn ansi góður, Kristján rosa flinkur, miklu betri en ég ;)
Svo fórum við bara á Búlluna og fengum okkur hammara....síðan er ég búin að vera að lesa um fyrri heimsstyrjöldina, á þá seinni eftir og kalda stríðið...próf á mánudaginn.

Till next...adios

Skemmtilega fyndið

Ég óttast það að skrif mín um "skemmtanir" í borg óttans sl. helgi verði að bíða örlítið og víkja fyrir atburðum dagsins.
Ég kveikti nefnilega næstum óvart á sjónvarpinu rétt fyrir kl.17:00 í dag, og stóðu þá ekki Dagur B Eggerts, Björn Ingi framsóknarkrútt og einhverjar tvær kellingagribbur og töluðu mikið og undarlegt mál. Ég áttaði mig fljótlega á að eitthvað snérist þetta um "orku-mál" þeirra höfuðborgarbúa og nokkru seinna rann upp fyrir mér sá fyndni sannleikur að búið væri að mynda nýja ríkisstjórn í Reykjavík! Ég fór að hlæja og hló alveg óskaplega og innilega lengi vel. Svo var talað við háskælandi sjálfstæðis-minnihluta-fráfarandi-borgarstjórn og þá sprakk ég nú alveg. Þar sem þau hímdu þarna með tárvota hvarma og sögðu að hann Björn Ingi framsókanrkrútt væri vondur og óheiðarlegur bakstungumaður. Sem nota bene hafði nú samt alltaf verið gott að vinna með og aldrei borði skugga á samstarf þeirra! Hummm.... Svo hjó ég eftir einu sem sjálfstæðisvælukórinn sagði: "við hefðum náð samkomulagi ef hann Björn Ingi hefði bara verið sammála okkur". Múhahahahahahaha.....þau voru sum sé svekkt og sár yfir því að fá ekki að sukka svolítið og hygla vinum og ættingjum í formi gjafabréfa í gullnámum. Fuss og svei, sjálfstæðis spillta pakk!
Samt sem áður er ég ansi hrædd um að nú sem endranær, verði framsóknarflokknum kennt um allt sem aflaga fer, þótt hann sé að gera hið eina rétta í málinu.
Þetta sannar bara það sem ég hef alltaf sagt: X-B :)

Ég óska bara Degi og Birni Inga til hamingju með borgina og vona bara að þeir kenni þessum kellingum sem eru með þeim að hugsa svolítið meira eins og karlar í borgarstórninni, svo þær eyðileggi ekki fyrir sér og öðrum með einhverjum gribbutilþrifum....hún er nú hættulega hörundssár hún Sverrisdóttirin- sjaldan fellur eplið...
Skil ykkur eftir með hugsanir ykkar ;)

Till next...adios

Húsmóðir í hjáverkum

Ég er að reyna að vera smá húsmóðir í dag. Ekki misskilja mig samt, ekkert að laga til eða svoleiðis (skúraði fyrir (þó)nokkrum dögum og hugsa að það verði að duga til jóla), bara að elda!
Er að sjóða fullan pott af lambaketi og fullan pott af kartöflum, og ætla mér svo að búa til afgangakássu á morgun. Þetta kalla ég að vera húsmóðir, elda hagsýnt...í svona tvo daga í viku ;)
Það er annars agalegt að þykjast vera svona mikil húsmóðir í eldamennskunni þegar Nigella er að elda krásir í sjónvarpinu með alveg ótrúlega lítilli fyrirhöfn! Og aldrei þarf Nigella að vaska upp!
Ekki það að ég öfundi hana neitt, þótt hún sé falleg, eldi krásir og borði helling án þess að vera feit, aðallega þetta með uppvaskið ;)
Allt annað, ég er að hugsa um að setja ekki fleiri einkunnir inn á bloggið mitt. Fékk út úr einu örprófi í gær (Iðnbylting og hnattvæðing) og óhætt að segja það, að sú einkunn er ekkert til að hrópa húrra fyrir...ok, ég skal segja ykkur það, ég fékk 6,3 :( En reyni að hugga mig við að það eru 3 örpróf í þessum áfanga og þau 2 bestu gilda til lokaeinkunnar 20% . Annars var þetta bara frekar gott á mig, kanski þörf ábending um það að það er komin tími til að OPNA skólabækurnar og lesa!!!!!
Sem minnir mig á það að ég þarf að fara að læra. Og ég sem ætlaði að fara að skrifa um næturlífið í Reykjavík......hummmm, næst.

Till next...adios

Borg óttans og margt smátt

Jæja, þá er ég komin heim, þreytt og slæpt eftir slarkið í stórborginni ;)
Við fórum nokkur úr Freyvangsleikhúsinu í ferðalag til Reykjavíkur að sýna stuttverkið "Hlé" eftir hann Hjálmar Arinbjarnarson á stuttverkahátíðinni "margt smátt" í Borgarleikhúsinu í gær.
Við Friðbjörg vorum náttúrulega svo miklar prinsessur, að við flugum í gærmorgun suður og norður aftur í hádeginu í dag.
En gærdagurinn var ansi stífur.....ég byrjaði á að skutla strákunum í sveitina og bruna beint á flugvöllinn. Hélt reyndar að ég myndi missa af vélinni þar sem ég ætlaði aldrei að finna bílastæði! Þarna voru bílar út um allar trissur og á öllum auðum plássum, bílastæðum, grasbölum og grjóthólum. Fann fyrir rest smá grænan blett sem ég gat troðið bílnum á, komst reyndar varla út úr honum fyrir runna sem ég var klesst uppvið, en það reddaðist.
Vinkonur Friðbjargar náðu í okkur á flugvöllinn í Rvk. og keyrðu okkur upp í Kringlu, svo var æfing í Borgarleikhúsinu.
Eftir æfinguna, þá fórum við í búningunum með "kröfuspjöld" merkt Freyvangsleikhúsinu upp í Kringlu og fengum okkur að borða. Það er óhætt að segja það að við vöktum smá athygli og nokkrir Reykvíkingar eflaust pínu fróðari um Freyvangsleikhúsið núna...amk hvar það er á landinu ;)
Svo var "skrúðganga" um Kringluna með fleiri leikfélögum, sem endaði í Borgarleikhúsinu þar sem stuttverkahátíðin "Margt smátt" fór fram (reyndar átti ég það til ansi oft að kalla þessa hátíð "stórt og smátt" af og til og endalaust).
Þetta var dæmalaust skemmtileg hátíð, okkur gekk frekar vel að leika og vorum eflaust og óefað með besta leikverkið ;) þar á eftir komu verk sem: Árni bróðir leikstýrði, Árni bróðir samdi og Róbert hans Árna bró lék í. :) þetta var næstum því fjölskylduhátíð ;)
Eftir hátíðina þá fóru sumir að "græja" sig og sumir voru dágóða stund að því (ótrúlegt hvað kvennfólk getur verið lengi að taka sig til) en maður fékk sér þá bara öl og spjallaði við Pétur Einarsson á meðan ;) vona að við höfum ekki truflað hann mikið við texta lesturinn......hummm!
Svo löbbuðum við óraleið að einhverju húsi þar sem samveran átti að fara fram, það vissu heldur ekki allir hvert við vorum að fara, svo að leiðin varð kanski aðeins lengri en stóð til...en ekki svo ;) Svo var drukkinn meiri bjór og borðuð þessi fína kjötsúpa :) svo voru skemmtiatriði og fullt af skemmtilegu fólki til að tala við.
Voða voða gaman að hitta fólk sem maður hafði ekki séð leeeeengi.
En þegar miðnættið var rétt um garð gengið, þá ákváðum við Friðbjörg að rölta til Árna títtnefnda bró (fengum sko báðar að gista hjá þeim sómahjónum Árna og Siggu Láru) og kíkja á "menninguna" í miðbænum í leiðinni.
Í stuttu máli, þá lá við að maður þyrfti áfallahjálp eftir stutt stopp á 2 stöðum! En það bjargaði geðheilsunni að koma við í 10-11 og kaupa sér æðibita, bitafisk og banana í nesti, og var það maulað síðasta spottann :)
Jæja, ég fer kanski nánar út í þessa staði í næsta bloggi, er orðin þreytt og búin að skrifa allt of mikið um stórt og smátt...nei ég meina margt smátt ;)

Till next...adios

Góðan dag :) Fann eina mynd af mér í myndakássunni sem ég var að setja inn í tölvuna. Þessi er nú síðan einhverntíman í vetur/vor.
Bara svona fyrir þá sem sjá mig sjandan ;) hehe...
Ég veit ekki hvort ég er eitthvað að ofþreyta sjáfa mig, en um þessar mundir, þá má ég ekki opna bók án þess að sofna eftir 7 min. Og er það heldur bagalegt þegar maður þarf að lesa heilu bunkana af efni. Ef einhver lumar á ráði hvernig hægt er að lesa án þess að sofna...(nenni ekki að lesa standandi) þá væri það vel þegið.
Annars gengur mér ágætlega að sofna ekki þegar ég er að læra inn í eldhúsi á daginn, en þá er svo mikill hávaði frá krakkaormunum á leikskólanum að það truflar einbeitinguna talsvert.
Það er mjög undarlegt að vera stundum heima þegar það er ennþá leikskóli. Og kanski eins gott að ég var ekki heimavið þegar Mikael var ennþá í téðum leikskóla, ég vissi ekki að krakkar gætu búið til svona mikin hávaða! Stundum er hreinlega eins og það sé verið að pinta þau hroðalega, svoleiðis eru gólin og görgin! Svo elhúsið er ekki góður lærdómsstaður, sófinn er ekki góður lærdómsstaður, rúmið ennþá síður góður lærdómsstaður (nema þá í rúmfræði...múhahahahaha, ég er svooooo fyndin)...svo nú eru góð ráð dýr.
Kanski er ég líka bara á einhverju þreytu skeiði, búin að vera að æfa og svoleiðis.....kanski verð ég bara fín eftir helgi. Þá á nú samt að fara að byrja á Kabarett....hummm, spurning um að vera bara kanski oggopínuponsulítið með í því ;)
Jæja, nú er ég hætt að kvarta. Hætt þessu væri og reyni að gera eitthvað að viti! Og hananú!

Hér er svo ein mynd af Kristjáni, síðan á fermingardaginn hans í vor...21.apríl minnir mig ;) Nú er hann orðinn 14 ára og með hormónaflæðið á háu stigi. Og ég bókstaflega horfi á hann stækka!










Og ekki má gleyma Mikael :)
Sem er alltaf jafn sætur og hormónalaus (ennþá)
Hann er reyndar á því skeiði núna að það má ekki taka af honum myndir, þessi er síðan um fermingu Kristjáns.









Jæja, ætla að gera heiðarlega tilraun til að lesa smá, ekki horfir maður á sjónvarpið í kvöld....alþingisumræður í allt kvöld!

Till next...adios

Bíó

Búin að vera verulega menningarleg sl.3 daga og fara í bíó upp á dag :)
Fyrst var dönsk mynd: "listin að gráta í kór" mjög góð mynd um viðkvæm málefni sem mér fannst vera gerð góð skil.
Svo var austurrísk mynd: "FOREVER, NEVER, ANYWHERE" ; glettilega skemmtileg mynd um vægast sagt mjög óheppna kappa og mannlegt eðli....eða óeðli ;)
Og síðast en ekki síst var bandarísk mynd: "Crazy love" og var það vægast sagt mögnuð ástarsaga, og það magnaðasta var að hún er sönn. Nokkurs konar heimildarmynd.
Það er verið að sýna allar þessar myndir og fleiri til á kvikmyndahátíðinni í Rvk. og mæli ég eindregið með þeim.
Er heppin að búa ekki í Reykjavík, því ég myndi sennilega fara á allar myndirnar ;) Gott að láta skammta sér smá sýnishorn hér norður ;)

Jæja, próf á morgun.....og ég alltaf jafn flink að humma fram af mér að setjast niður við lesturinn.

Afmælið fór vel fram í gær :) Kristján orðinn 14 ára.....tíminn flýgur hratt á gerfihnatta öld, sem minnir mig á það að vonbrigði haustsins voru þau að títt nefndur Pálmi Gunnarsson,sem átti að verða uppáhalds bekkjarbróðir minn í vetur, hætti greinilega við allt saman og hefur ekki látið sjá sig í skólanum.....og nafnið hanns dottið út af nemendalistanum :( skæl skæl....

Get ekki lært....er með tárin í augunum.....skæl...farin að sofa ;)

Till next...adios

Hitt og þetta

Það er ýmislegt að gera um þessar mundir. Ég fór í gær og prufaði í fyrsta skipi að hlaupa með "hlaupahóp", það var mæting hjá Bjargi og hópurinn taldi nú ekki nema 7 þegar upp var staðið, og hætti alveg að vera hópur hálfri mínútu eftir að lagt var af stað. En þetta var fínt og farið í pottinn á eftir. Gerir manni eflaust gott að hlaupa í hóp annað slagið.
Síðan kíkkaði ég á "djass" tónleika um kvöldið, þar vour "Siggi og söfnuðinn" að spila, en það er Siggi Ingimars (betur þekktur sem Siggi Kapteinn eftir X-faktor þættina) og flinkir spilamenn með honum. Var alveg ljómandi að sitja í rólegheitum með bjór í hönd eftir hlaupin ;)
Svo settist ég niður við verkefnavinnu þegar ég kom heim um ellefu leitið, þurfti nefnilega að skila af mér verkefni í morgun. Enda laggði ég mig aðeins þegar skólinn var búinn í dag ;)

Svo er ég að fara í bíó á eftir, að sjá mynd sem kvikmyndaklúbbur Akureyrar (Kvik Yndi) er að fara að sýna.
Einnig er sprellmót háskólans í kvöld, söngvakeppni í Sjallanum og fleira, það er spurning hvort einhver orka verður eftir þá ;)
Einnig spurning um hvort að strákarnir fari nokkuð að gleyma hvernig mamma þeirra lítur út...hummm

Kristján minn á svo afmæli á morgun :) að verða 14 ára kappinn! Eitthvað verður nú af hormónaflæði hérna þá, þar sem hann ætlar að bjóða nokkrum gelgjum í afmælið sitt.
Annars er Kristján að verða svo mikið gelgja (ekki samt á neikvæðan hátt), hann er bara svo fullur af tilfinningum (hormónum) sem hann er ekkert að vita hvað hann á að gera við, svo hann fær kjökurköst, kuldaköst og er almennt í "miklu uppnámi" þessa dagana. En það góða við þetta er að hann er alltaf að faðma mig í tíma og ótíma, nokkuð sem hann hefur ekki viljað gera síðustu ár ;) Lifi gelgjan :)

Lét plata mig til að vera með í stuttverki sem verður sýnt í Borgarleikhúsinu 6.okt. En þá verður stuttverkahátíðin "Margt Smátt", og vil ég nota tækifærið til að hvetja alla til að mæta og horfa og hafa gaman að. Við erum með þátt sem heitir: "hlé" og er bara mjög skemmtilegur :) Gerist í hlé-i inn í búníngsherbergi í áhugaleikhúsi.

Er farin í bíó, á danska mynd sem ég man ekki hvað heitir....

Til next...adios

Ljómandi

Jæja, þá er sláturgerð haustsins búin í bili (á reyndar eftir að búa til eitthvað meira af lifrarpylsu en það verður ekkert strax) og er það alveg ljómandi gott :) Manni líður eitthvað svo skemmtilega húsmóðurlega þegar maður er að gera slátur, þótt ég borði nú ekki mikið af þessu sjálf, en ég er að passa kólesterólið og Kristján er matvandur ;) en það er gott að smakka slátur einstaka sinnum.

Mont dagsins: ég fékk út úr fyrsta verkefninu mínu í dag, en það var verkefni um ritun og ritstuld, ég átti sem sé að endurskrifa grein án þess að ritstela. Og þar sem ég þjáist af of miklum heiðarleika og gjörsneidd þeim hæfileika að stela ;) þá fékk ég 9 fyrir verkefnið :) Svo vona ég bara að framhaldið verði bara svipað ;) hehe, hope!

Held að ég hafi hlotið varnalegan skaða af stungu geitungsins þarna um daginn, er ennþá með talsverð ummerki á fætinum og hef það á tilfinningunni að það gæti bara stórt stykki dottið úr fætinum á hverri stundu! Geitungar eru a.m.k orðnir enemies nr.one!!! Ekki það að ég hafi átt óvini fyrir, ekki sem ég veit um a.m.k ;)

Svo var fyrsti fundur nýrrar stjórnar Freyvangsleikhússins sl. miðvikud.kv. þar endaði ég í að verða vara-formaður, sem átti að vera nokkurs konar "sárabætur" fyrir það að vera eina konan í stjórninni. Það virðist enginn fatta það að mér líkar það bara alls ekki illa, :) en það verður bara fínt ef þeir halda áfram að fara með mig sem prinsessu ;) hehe, sem er reyndar MJÖG ólíklegt.
En það er hellingur framundan hjá leikfélaginu, einþáttungahátíð í Borgarleikhúsinu í byrjun okt. Kabarett í byrjun nóv. reyna að gera eitthvað fyrir afmæli Freyvangs og svo ákveða leikrit fyrir veturinn....allt á fullu :)
Áhugasamir lesendur sem vilja vera með eru velkomnir :)

Ég er örlítið farin að geta klórað mig í gegnum Karl Marx og Saint-Simone og Auguste Comte og Tourqueville, og á eflaust eftir að skrifa góðan pistil um kenningar þeirra og fleira, kanski bara marga pistla, hehe....er að fara í próf á mánudaginn um þá kappa og það gildir 30% af lokaeinkunn, svo það er eins gott að vita eitthvað!

Þreytt þreytt....Mikael sofnaður í sófanum við hliðina á mér, ætla að koma okkur báðum í rúmið og skipað gæti ég Kristjáni væri mér hlýtt ;)

Till next...adios

Misskilningur

Held ég hafi misskilið námstækni-námskeiðið eitthvað. Hélt að ég gengi þaðan út full af visku, og lærdómsbrautin biði breið og greið...
En á meðan ég er í þessum dagdraumum (sem ku víst vera eitt af þessum þáttum sem trufla námseinbeitingu) þá bara hlaðast upp verkefni og ólesið efni virðist engan endi taka. Nema ég taki mér tak og lesi ;/
Það er líka bara eitthvað svo mikið að gera, námskeið í dag, kindur á morgun og fundur, námskeið á fimmtud. og sennilega sláturgerð á föstudag.
Ég held bara að ég sé á því skeiði að mér finnst allt eitthvað svo yfirþyrmandi og eitthvað.
Svo finnst manni maður vera hálf þroskaheftur þegar maður sér nemanda í næstu sætaröð spila tölvuleik allan tímann, en geta samt spurt gáfulegrar spurningar um efnið.....Halló! Ég á nú bara fullt í fangi að fylgjast með og glósa í leiðinni! En ég hugga mig við að að þetta hljóti að vera fólk sem á sér ekkert líf utan lærdóms, sem getur leift sér svona lagað. Greinilega búið að liggja yfir námsefninu í viku fyrir tímann.
Best að hætta að væla og gera eitthvað.
Það var samt eitthvað annað sem ég ætlaði að blogga um, get bara enganvegin munað það...

Till next...adios

Tíminn

Þá er þetta komið löglegt og staðfest: 58:13 tíminn minn í Akureyrarhlaupinu í gær :)
Ég er nokkuð ánægð með þetta, bætti mig um ca. 5 min. síðan í Reykjavíkurmaraþoninu :) og algerlega án þess að hafa verið dugleg að æfa mig! Sem segir mér bara það að með aðeins meiri æfingu ætti ég að geta bætt mig um nokkrar mínútur í viðbót :)
Langaði bara að deila þessu með ykkur :) vissi að þið biðuð rosalega spennt eftir tímanum ;)
Ætla að demba mér í hann Karl Marx og reyna að lesa eitthvað fyrir þjóðfélagsfræði-tímann á morgun ;) er vooooooða dugleg að finna mér eitthvað annað að gera....hummm.

Till next...adios

Akureyrarhlaupið

Það hafðist, ég hljóp 10 km. í Akureyrarhlaupinu undir 1 klst. :) Er ekki með tímann alveg á hreinu, en bíð spennt eftir "löglegum" úrslitum.
Það var samt ekki eins gaman að hlaupa í þessu hlaupi eins og Reykjavíkurmaraþoninu, þar var rosa stemming og fjör alla leiðina. Hérna voru frekar fáir, og maður var nú bara næstum einn í heiminum að hlaupa. Fór samt fram úr einum kalli í restina, og það var voða gaman :) sérstaklega af því að hann hafði farið fram úr mér 2 km. fyrir endamarkið ;) sökkvi !
Í skólanum er alltaf jafn gaman, og alltaf jafn mikið að gera... tókst samt að skila ritgerðinni minni og halda 5 min fyrirlestur um hana. Og ég var náttúrulega fyrst í að halda fyrirlestur. En það var líka bara fínt, nú get ég slakað á og hlegið að hinum sem eiga þetta eftir :)
Jæja, ég hef ekki mikla orku í að skrifa meira núna, ætla aðeins að leggja mig, svo verður pizza og leti í kvöld. Fór í Hagkaup áðan og keypti fullt af Amerísku ógeði handa strákunum, svo þeir eru sælir að horfa á vídeó og borða jukk....

Till next...adios

Stund milli stríða

Fyrirlesturinn sem ég var á áðan, var ekki eins lengi og ég hélt, svo ég ætla bara að nota þennan "auka" tíma sem ég "græddi" til þess að blogga smá ;)
Er nefnilega að fara á aðalfund Freyvangsleikhússins eftir klukkutíma eða svo, svo ég ætla að biðja ykkur lesendur góðir að lesa hratt og drífa ykkur í Freyvang ;)
Það er búið að rigna og rigna og rigna í allan dag, en það hlýtur nú að fara að klárast vatnið þarna uppi! Svo sá ég áðan, þegar ég var á leiðinni heim, að það er búið að SNJÓA í fjöllin! Eins gott að það voru göngur síðustu helgi en ekki næstu ;) En ég er annars að fara að hlaupa 10 km í Akureyrarhlaupinu á laugardaginn og það verður ekkert spes ef veðrið verður eins og veðurspáin spáir. En það ku víst eiga að slyddast eitthvað og svo á líka að bresta á einhver stormur í kvöld og nótt!!!
Jæja, það var nú ekki meiningin að láta bloggið mitt líta út eins og heimasíða veðurstofu íslands. Hummm.... Ég á að skila ritgerðinni minni um Bókina um veginn á morgun, gúlp, á líka að halda fyrirlestur um hana fyrir hina í bekknum. Svo nú verð ég að reyna að rifja upp einhverja leikræna takta, verst hvað það er langt síðan að ég hef þurft að leika eitthvað...hef aðallega verið að leika mér ;)
Það er leikur í sjónvarpinu, Ísland-N.Írland, sem ég sé reyndar ekki lengur, því að allt í einu kom drengur og þá eins og hendi væri veifað voru Tommi og Jenni byrjaðir að berja hvorum öðrum. Já, og bætevei Ísl. gerði jafntefli við Spán um daginn 1-1 og ég sem hafði spáð 0-6 fyrir Spán! En sennilega hefur bara eitthvað slegið saman í hausnum á mér og ég ruglað þeim leik saman við leikinn í dag, svo ég spái Írum sigri á Ísl. 6-0
Finnst ég finna brunalykt berast úr eldhúsinu....hvað ætli ég sé að elda? Er rokin í rokið.

Till next...adios

Nemendur

Nemendur háskólanns virðöast jafn misjafnir og þeir eru margir. Reyndar hefur mér þótt það fólk sem ég hef kynnst hingað til, vera afbragðs fólk (þá er ég náttúrulega sérstaklega að tala um minn bekk). En það er ferlega fyndið að fylgjast með tölvuskjánum hjá sumum á meðan á tímum stendur. Í einum tíma um daginn var ein að endurraða kökuuppskriftunum sínum, var komin að jólakökum síðast þegar ég leit á skjáinn hjá henni (þessi kella var sko ábyggilega þó nokkrum árum eldri en ég sko) svo var ein í tíma í dag, sem pikkaði og pikkaði og maður fór að hugsa hvað þessi væri voða dugleg að glósa...en þá var hún bara á msn! Svo virðist fólk vera að skoða hinar ýmsu netsíður í tímum. Kanski er það bara ég sem er svona treg að ég þarf sko að fylgjast með í tímum. Þykir bara verst að þegar tímar eru í Oddfellow húsinu, þá er engin leið að komast í kaffi, og þá getur stundum verið hörku vinna að halda augunum opin í 5 tíma í röð! Var ánægð þegar einn spurði í dag, hvort það væri ekki möguleiki að fá kaffivél í húsið ;)
Jæja, ég hef annars ekkert að viti að segja í dag, og veit því ekki afhverju ég er að bulla þetta, er ennþá þreytt eftir helgina og með einhvern ótætis hausverk og hálf sloj....harðneita samt að fara eitthvað að veikjast. Má sko ekkert vera að því næstu 3 árin ;)

Kvöldmaturinn eldar sig vist ekki sjálfur...

Till next...adios

Réttir

Í fréttum er réttir helst ;) Já, það voru sko réttir í dag, og þá frekar tvær en ein! Byrjaði á því að fara á Þverárrétt, þar sem engin gekk af göflunum ,(eins og í fyrra)allt fór bara rólega fram.Undarlegt nokk! Við áttum þarna einar 46 kindur (give or take one or two) og tróðum þeim í kerrur og bíla og brunuðum með það heim. Svo var gert matarstopp í sveitinni, bæði borðaður hefðbundinn matur, en einnig gúffað í sig helling af perutertu, sem Alla mágkona var svo góð að skella á í tilefni dagsins. Bæði mamma og Steinar Logi áttu sem sé afmæli í dag :)
Svo var brunað austur á bóginn og farið í Illugastaðarrétt. Þar áttum við sko 122 kindur og svo tókum við líka úrtíninginn frá hinum E-bæjunum, svo þetta var alveg á tvo stóra bíla. Reyndar keyrði sami bíllinn tvær ferðir (eða ökumaðurinn keyrði bílinn), og við (við=ég, Sverrir, Pálmi og Imma) lékum okkur bara í fótbolta/körfubolta á meðan við biðum milli bíla. Svo ég var bara að koma heim rétt fyrir kl.22:00 henti mér í sturtu og strákunum líka (ekki öllum í einu samt) og svo var liðið bara drifið í rúmið....ekki seinna vænna, skóli á morgun! Svo núna er ég bara að hlaða fartölvuna fyrir morgundaginn, þess vegna ákvað ég að nota tækifærið og blogga smá. Ætla samt að láta þetta duga, er hálf aum í fingrunum og höndunum eftir alla drættina í dag...hummm ég er sem sagt búin að stunda frjárdrátt í allan dag! :/ Ekki láta vita afþessu.

Till next...adios

Göngur

Jæja, þá eru 1.göngur búnar þetta árið. Hefur bara sjaldan gengið svona vel, og ærnar runnu bara glaðar í bragði heim á leið, sumar reyndar drifu sig bara beint niðrá tún og virtust ekki taka eftir hliði sem var í vegi þeirra. Það var brakandi blíða og sól og það hefði ekki getað verið mikið betra. Það lítur reyndar ekki eins vel út með veður fyrir réttirnar á morgun, og nú þegar komin hellidemba ;/ maður verður bara að vona það besta. Ef það verður rigning þá kanski verður fólkið í réttunum bara aðeins rólegra....en stundum virðast sumir missa sig dálítið mikið....nefni engin nöfn ;)Vona bara að það verði engin börn hrædd í réttunum þetta árið eins og í fyrra....og þau voru sko víst ekki hrædd við kindurnar!
Íslendingar eru yfir í leik við spánverja 1-0 sem verður að teljast ansi merkilegt. En það er náttúrulega allt á floti, og spánverjar varla vanir svona mikili rigningu ;) Það er nú líka bara hálfleikur, svo við spyrjum að leikslokum.
Horfi í leikhléi á umdeilda "símaauglýsingu" ekki að ég sé neitt viðkvæm fyrir þessu "Jesú-Júdas" símtali, en finnst frekar að þeir ættu að lækka símreikninginn hjá manni heldur en að eyða peningunum í þessa vitleysu! Ég er nú reyndar hjá Vodafone....sem fer nú reyndar að vera spurning hvort er skárra (eða verra fyrirtæki, þetta eru bæði okurbúllur með lágmarksþjónustu, Vodafone samt skárra núna að mér finnst) en maður þarf samt alltaf að borga "fastagjaldið" til símans, því að þeir eiga dreifikerfið! Talandi um okurbúllueinkafyrirtæki- sem þrífast svona líka ljómandi vel undir handarkrika sjálfstæiðsflokksins....fuss og svei! Leikurinn er víst að byrja aftur, best að fara að horfa í von um að sjá annað mark.....hjá íslendingum :)

Till next...adios

Leiðrétting

Ég er farin að þurfa að leiðrétta prentvillur hjá mér....hummm eða þá bara það að ég er stundum ekkert mikið að hugsa um hvað ég er að skrifa.
Ritgerðin mín um Bókina um veginn á nefnilega ekkert að vera 1800 bls. heldur 1800 orð, og það er víst talsverður munur á þessu. Sem betur fer þarf ég ekki ennþá að gera 1800 bls. ritgerðir ;)
Annars er ég nánast búin með ritgerðina, fer bara eftir því hvað yfir-yfirlesarinn segir um gripinn. Hvort ég þarf að laga og endurbæta frá grunni.
Fór í smá smölunaræfingu í sveitina í dag, náðum nú samt um 70 skjátum, sem er nú bara ágætis æfing ;) Svo verða alvöru göngurnar á morgun og svo réttir á sunnudaginn. Fullt að gera.
Þyrfti svo að fara að drífa mig með bílinn minn í skoðun, gamla grána minn, þarf bara að finna einhvern sem kann að stoppa í gat á hljóðkútnum, er ekki alveg viss um að þeir hleypi mér i gegn um skoðun með gat...á pústinu sko. Veit það dugar ekkert að koma uppstrílaður og brosa sætt til þessara kalla hjá skoðunarapparatinu, svo maður verður víst að reyna að láta laga gripinn :)
Jæja, ætli ég reyni ekki að þýða nokkrar blaðsíður úr The Discovery of Society fyrir svefninn, Karl Marx, það er nú ekki til mikið betra svefnmeðal en blessaðar skólabækurnar ;)
Hafið það gott krúttin mín...

Till next...adios

Námstækni

Þar sem ég er að gera sjálfa mig brjálaða á skipulagsleysi mínu, bæði varðandi nám og annað, (ætla ekki einu sinni að nefna skúringar hálfu orði núna) þá hef ég tekið þá ákvörðun að splæsa á sjálfa mig námskeiði í námstækni.
Hefur samt hvarflað að mér hvernig ég á að hafa tíma til þess að fara á þetta blessaða námskeið, sem er í tvær vikur, tvo daga í hvorri viku og tvo tíma í hvert skipti ! En það verður bara að láta vaða!
Ég fór að iðrast afskaplega pirrings-skrifa minna eftir að ég tók til við lestur "bókarinnar um veginn". Þetta er þvílíkt snilldar rit. Speki alveg út í gegn, og ef mannfólkið gæti tileinkað sér, þótt ekki væri nema lítð brot, að þessari speki, þá væri nú gaman að lifa.
Auðvitað er þetta ekkert nema siðfræði, hvernig þú átt að koma fram við aðra og sjálfan þig svo að allir geti verið happý for the rest.......en það er bara eitthvað svo magnað að lesa þetta.
Fyrir utan það að gaurinn sem skrifaði þetta hann Lao-Tse var fæddur 300-400 árum fyrir Krist. Það er víst eitthvað á reiki með hvenær hann var uppi, svona eins og margt annað frá þessum tíma ;) Sumt minnti nú óneytanlega á ýmislegt úr Biblíunni, datt stundum í hug að Biblían væri "lengri" útgáfan af Bókinni um veginn, en maður lætur nú ekkert svoleiðis út úr sér ;)
Svo núna þarf ég bara að skrifa 1800 bls.ritgerð um gripinn fyrir fimmtud. í næstu viku....það- hlýtur að reddast, verð líka byrjuð á námstækninámskeiðinu þá og hef eflaust nógan tíma ;)
Háskólinn á Akureyri á afmæli í dag :) er sko orðinn 20 ára gamall, við fengum köku og kók í tilefni dagsins :)
Fór með Vælir í geldingu í dag. Núna liggur greiið aðallega fyrir, en ef hann reynir að labba er eins og hann sé blyndfullur.....og við hlægjum eins og svín! Óskup er maður vondur, klippir á æxlunarfærin á ræfilinum og hlær svo bara að honum.
Usss, ætla að fara út að skokka og reyna að losa mig við samviskubitið.
Svo les ég aftur Bókina um vegin og íhuga aðeins.

Till next...adios

Ands.....

Já, nú er ég bara hætt að vera jákvæð og væmin í þessum bloggskrifum mínum!
Enda allir hættir að nenna að kommenta...set það í beint samhengi.
Bara samt frekar stutt útrásfyrirgremjuna-blogg núna, áður en ég sökkvi mér niður í lestur: "Bókin um veginn" verður lesin í tætlur (sem er nú reyndar ekki erfitt, því gamalt var og lasburða eintakið sem Amtið átti til handa mér), svo verður farið í tvær aðrar skruddur á enskri tungu sem ég er eitthvað að dragast afturúr í lestir með...hummm.
En þá er það pirringurinn! Sko! Í fyrsta lagi (og það varðar bókina um veginn) þá er skítt að það er bara ein fokking bókabúð á Akureyri! Amtsbókasafnið átti bara eldri útáfuna af bókinni, sem var bætheivei gefin út 1971, en ég sem betur fer ákvað nú að taka hana, en kaupa jafnframt nýrri útgáfuna. Á nefnilega að skila ritgerð um þessa merku bók eftir 10 daga.....Svo ég ók sem leið lá í Pennan/Eymundsson og leitaði lengi vel. Ákvað svo loks að spyrja um gripinn, en þá var hún barasta ekki til! Og hafði víst ekki verið til lengi....og var ekkert á leiðinni að vera til!
Svo er maður líka búinn að heyra það að þó nokkur hópur fólks hefur enn ekki getað keypt allar skólabækurnar, af því að þær eru ekki til. Svona fer þegar það er engin samkeppni í gangi, þjónustan verður algert frat! Fuss og svei!
Svo er ég að verða nett brjáluð út af bílastæðum við heimili mitt. Ef ég ákveð að vera svo "góð" að keyra strákana í skólann á morgnanan (sem oftast er nú bara Mikael, Kristján vill frekar labba, en maður er ennþá í þeim pakkanurm að Mikael sé litla barnið sem þarf að stjana við frá morgni til kvölds.....eins gott að hann er í skóla;) en já, hvert var ég komin..., já einmitt, þegar ég er búin að keyra upp í skóla, og þarf ekki strax í minn skóla (eins og t.d núna í morgun) þá eru bara öll bílastæðin orðin full af óhræsis bílum, sem ég hef grun um að tilheyri að stórum hluta starfsfólki leikskólans. Svo annað hvort þarf ég að leggja leeeeeeeeeeeeengst í burtu og labba gríðarlega vegalengd heim, eða bara halda áfram að keyra! Já, mér finnst þetta fúlt, og svo er líka fólk sem á heima hinu megin við götuna sem leggur þarna . Ótrúlegt hvað heimurinn snýst gegn mér;)
Svo annað pirr; það eru ennþá gular ljótar heysátur á víð og dreyf um garðinn, ein meira að segja ofaná stéttinni sem ég geng um á leið minni inn. Svo er fólkið á eftri hæðinni búið að planta hjólinu sínu fyrir framan dyrnar hjá mér, sko inni í húsinu! Stundum verð ég bara svo gáttuð á tillitsleysi og yfirgangi í fólki að ég get bara ekki sagt eitt einasta orð!
En þá bara blogga ég um það og fæ smá útrás.
Enn annað pirr; kettirnir tveir eru að gera mig nett brjálaða, þeir eru tekinir upp á þeim óskunda að færa mér ánamaðka í tíma og ótíma! Koma og skella þessum flykkjum útötuðum í mold, á stofugólfið hjá mér og brosa!
Stundum á morgnana (sérstaklega ef það hefur verið rigning) þá liggja 4-5 stykki hálf þornuð á gólfinu frammi á gangi.
Auglýsi hér með eftir laxveiðimanni sem vantar duglega ormatínara! Læt þá fyrir lítið fé, bæði ketti og orma ;)

Till next...adios